Nga kui xi ndatjín kʼoasʼiaan: Kjoafaʼaitsjen xi kuinyakaoná
Ñola koya kataʼya josʼin bándiaaná Biblia. Millón mani chjota xi kui kjoafaʼaitsjen jebi tjíofitjenngi.
1. Tʼatsʼe kjoabixan
Kjaʼaí kjaʼaísʼin síkjaʼaitsjen chjota xi tʼatsʼe kjoabixan, kʼoa kjaʼaí kjaʼaí tso tʼatsʼe jmeni xi sʼin nga nda koatio.
JE BIBLIA ITSO: “Tsjoacha katamao yánchjínno, josʼin tsjoachao yaono. Je xi chjoón xkón katabe xʼinle” (Efesios 5:33).
JÓSʼIN TSOYANILE JEBI: Tʼatsʼe Jeobá tínroani kjoabixan kʼoa kuinga je xi ngisa nda beni jméni xi machjénle xi jechixan nga tsjoa sa̱tío kon (Marcos 10:6-9). Ngisaa tsjoa sa̱tío kon xi jechixan tsa kuinyakaongañá xínkjín ʼndele nga to yaole koaini nga jngó jngó. Jngo xʼin xi tsjoake chjoónle tjao be kʼoa síkuinda. Kʼoa je chjoón xi bakóle kjoaxkóntokon xʼinle bexkón kʼoa ngasin nganda fákao.
BINYAKAONÁ JE KJOAFAʼAITSJEN XI TSJOÁ BIBLIA: Je Quang kao Thi, xi Vietnam tsʼe, alikui tinda tsakatiokaoni xínkjín. Je Quang totaon tsabe je chjoónle kʼoa itso: “Alikui kuenta kisʼian jotjín kon je chjoónna kʼoa toxkia tsakjakaoña”. Kʼoa je chjoónle itso: “Alikui tikoannʼiotʼaña je xʼinna kʼoa koanmena kitsjioan”.
Kʼianga kiskotʼaya Biblia je Quang kao chjoónle kisitjoson jmeni xi tso Efesios 5:33. Itso: “Kʼianga koanjinna jmeni xi tso texto jebi tjao koanna je chjoónna, koanjinna nga an tjínnele koanjngiʼa kʼoa nga kuenta sʼian josʼe kon. Kʼoa nga tjaona je chjoónna kʼoati tjao bena tsanda je”. Je Thi itso: “ʼBexkónña je xʼinna tojo tso Efesios 5:33, kʼoa nga tjao bena je xʼinna nda sʼe tokoan”.
Kʼiatsa mesali jchai jósʼin tjínnele koatiokao xínkjín xi jechixan, tjasjai jw.org ya Internet kʼoa chótʼai je revista ¡Despertad! número 2 xi tsʼe nó 2018, xi i̱ ʼmi: “12 claves para una familia feliz”.
2. Josʼin mangínkoaa xi kjaʼaí
Nkjín chjota xi likui nda fikao xínkjín nga tokui fini jokjoan, jñani tsʼe, kʼoa tsa kjaʼaí religión tjíojin.
JE BIBLIA ITSO: “Jchaxkón ngatsʼi” (1 Pedro 2:17).
JÓSʼIN TSOYANILE JEBI: Je Biblia kʼoatso nga tsín koa̱n jticha koaan je chjota xi xin tsʼe kʼoa tsa jeje̱ xi tixʼin xínkjín kʼoa xi tiyánchjín xínkjín matsjoakeni. Kʼoatso nga tsín koa̱n chja̱ʼajiaan chjota, tsín koa̱n kui kjuinñá jmé religión tjíojin, jñáni tsʼe kʼoa jókjoan (Hechos 10:34). Ningalani tsín tongóson sʼin makjainná kʼoa tsín sasénná josʼín, tjínnele nda si̱koaa kʼoa koakolee kjoaxkóntokon (Mateo 7:12).
BINYAKAONÁ JE KJOAFAʼAITSJEN XI TSJOÁ BIBLIA: Kʼianga sʼa ʼndí kji Daniel kʼoatsakʼinle nga nʼio chʼao kjoan je chjota xi Asia tsʼe, kuinga nʼio jtike koanni je chjota xi ya tsʼe kʼoa totaon tsabe. Itso: “Ndatjín jmeni xi tisʼian koanna kʼoa tsín koanjinna nga tsínni kixi tíjna, tokui kiña nga naxinandána kisitoánntje”.
Kʼianga kiskotʼaya Biblia je Daniel alikui tikʼoasʼin kisikjaʼaitsjenni. Itso: “Je Niná alikui ʼya xi faʼájin, tongóson fikao ngatsʼi chjota, kʼoa kʼoatisʼin kisikjaʼaitsjen tsanda an”. Alikui tiʼya xi faʼájinni je Daniel, kʼoa itsosa: “Alikui tikui fiña jñáni tsʼe je chjota, tonda sikoa ngatsʼi kʼoa nkjín miyo tjínna xi xin naxinandále”.
Kʼiatsa mesali jchai tʼatsʼe jebi tjasjai jw.org ya Internet kʼoa chótʼai je revista ¡Despertad! número 3 xi tsʼe nó 2020, jñani tso: “¿Tiene cura el prejuicio?”.
3. Xi tʼatsʼe tao̱n
Je chjota kʼoasʼin síkjaʼaitsjen nga nda kuiyoaa nichxin xi sʼa nroa kʼoa nga tsjoa sa̱tío tokoán tsa tao̱n sʼe̱ná.
JE BIBLIA ITSO: “Je kjoachjine basenkaoná joni tsa je tao̱n nga basenkaoná, tonga je kjoanda xi tjenkao je kjoankjíntokon kui jebi: je kjoachjine koaanle kʼoasjentjai je xi kui tjínle” (Eclesiastés 7:12).
JÓSʼIN TSOYANILE JEBI: Ningalani tjínná tao̱n alikui kui xi nda sikatíoná kʼoa xi tsjoa kʼoe tokoán (Proverbios 18:11; 23:4, 5). Je xi nda sikatío kjoaixiná nichxin xi sʼa nroa kʼoa xi tsjoa kʼoe tokoán kʼiaa nga si̱tjosoán je kjoafaʼaitsjen xi tsjoá je Biblia (1 Timoteo 6:17-19).
BINYAKAONÁ JE KJOAFAʼAITSJEN XI TSJOÁ BIBLIA: Jngo chjota xi Cardo ʼmi, xi Indonesia tsʼe, nʼio kisixá nga tse tao̱n kisʼele. Itso: “Kiña tojña naxinandá koanmena, tsakatseña tsojmi xi chjí, niʼya, carro kʼoa kisʼena tojme tsojmi xi koanmena”. Tonga to i koan kisicha tao̱nle je Cardo. Itso: “Koanchéna je tao̱nna kʼoa toxitsjoani ninga nʼio tse kisixá nga tao̱n tsakajngia nga̱ tongotjo kisichaña. Ñaki tokui xá kisʼian nga tao̱n tsakajngia tonga toxitsjoani”.
Je Cardo alikui titao̱n nʼio básjaini ndʼaibi, tosaa kui fitjenngi je kjoafaʼaitsjen xi tsjoá Biblia jñani kʼoatso nga tokatamaniná jme xi tjínná. Itso: “Nʼio tsjoa tjín tokoan ndʼaibi nga̱ ʼbeña nga kui xi ngisa chjíle nga mangíntjenngiaa je kjoafaʼaitsjen xi tsjoá je Biblia”.
Kʼiatsa mesali jchai jme xi tso Biblia tʼatsʼe tao̱n tjasjai jw.org ya Internet kʼoa tʼexkiai jñani tso: “A kui skuelangʼa kao tao̱n xi nda sikatíoná”, xi faʼaitʼa Xo̱n xi Bájinkonná número 3 xi tsʼe nó 2021.
4. Nga xínkjín fayokao je chjota
Kjaʼaí kjaʼaísʼin síkjaʼaitsjen je chjota xi tʼatsʼe nga xínkjín fayokao.
JE BIBLIA ITSO: “Chja̱ʼaxinlao yaono kjoachajngi. Jngójngó nga jon tsje tiyokao yánchjínno, jchaxkón. Ali tokuijin kjoachi̱nga̱ xi nʼianilao, joni tsa chjota xi li judíojin xi tsínkui be Niná” (1 Tesalonicenses 4:3-5).
JÓSʼIN TSOYANILE JEBI: Ya Biblia kʼoatso nga tsín koa̱n si̱chajngiaa. Nkjín koya nchja̱ni kʼianga kjoachajngi síkʼaxki̱. Jolani je xi síchajngitʼale je chjoónle kʼoa tsa xʼinle, xi kui xá sʼín nga chjota fayokao, xi xínkjín fayokao nga kje bixanjin, je xi tixʼin kʼoa tsa xi tiyánchjín xínkjín fayokaoni kʼoa je xi cho̱ fayokao (1 Corintios 6:9, 10). Ya Biblia kʼoatso nga jngoo kjoatjao xi tʼatsʼe Jeobá tínroani kʼianga fayokao xínkjín xi jechixan (Proverbios 5:18, 19).
BINYAKAONÁ JE KJOAFAʼAITSJEN XI TSJOÁ BIBLIA: Je Kylie, xi ya Australia tsʼe, itso: “Kʼianga tosʼa tijna toʼan kʼoasʼin kisikjaʼaitsjen nga nda sʼe̱ tokoan tsa tjín xi koajnakoa. Tonga tsínni nda kisʼe tokoán nga kʼoakisʼian kʼoa alikui tinda tsakatejnaña”.
Kʼianga kiskotʼaya Biblia je Kylie kisitjoson je kjoafaʼaitsjen xi tsjoá je Biblia. Itso: “Nda satío tokoán kʼianga nitjosoán kjoafaʼaitsjen xi tsjoá Énle Niná. Ndatjín tokoan ndʼaibi nga kʼoatisʼian jotso je Jeobá. Kʼianga tisitjosoan jotso Biblia nʼio tíbasenkaona”.
Kʼiatsa mesali jchai jme xi tso Biblia tʼatsʼe jebi tjasjai jw.org ya Internet kʼoa tʼexkiai jñani tso: “¿Qué dice la Biblia sobre vivir juntos sin estar casados?”.
Je Niná basenkaoná nga ʼyaa jmeni xi ndatjín nga̱ jé kisindaná. Ninga sakʼoa ñʼai maná nga nitjosoán kjoatéxomale nʼio chjíle nga kʼoasʼiaan nga̱ kui xi koasenkaoná nga nda sa̱tío tokoán ngantsjai.
