Nga kui xi ndatjín kʼoasʼiaan: Jméni xi kuenta sʼiaan
Me tongatsʼi chjota nga be jmeni xi ndatjín kʼoa jmeni xi chʼaotjín. Tobʼelañá, alikui sasénle nga yánchjín ʼyataon, nga xínkjín síkʼien chjota kʼoa nga xtiʼndí ʼyataon. Tonga kʼoati tjín chjota xi sasénle nga nda chjota maa, nga kuenta nʼia xi kjaʼaí kʼoa nga katasʼendajin tsa jme kjoani. Tonga jósʼin nikjaʼaitsjeen xi tʼatsʼe jebi. Tobʼelañá, ʼyáni xi koa̱n sóyokoaa, nga tsín énndiso kuinókjoaa kʼoa jósʼin si̱jchá ʼndíxtiná. Nkjín chjota xi kʼoasʼin síkjaʼaitsjen nga ndatjín jmeni xi sʼín kʼoa nga tsínkjoan machjén nga ʼya xi kʼoakuitsole jmeni xi sʼin. Kuinga kui kʼoasʼínni je chjota josʼin síkjaʼaitsjen kʼoa tsakuije̱ jotso xi kjaʼaí. Tonga a ndatjín nga kʼoasʼin nikjaʼaitsjeen.
JOSʼIN NIKJAʼAITSJEEN NGA JNGÓ JNGOÁ
Kʼianga jme xi nʼia majinná jmeni xi ndatjín kʼoa jmeni xi chʼaotjín kʼoa kui mangínñá josʼin nikjaʼaitsjeen (Romanos 2:14, 15). Saʼnda je xtiʼndí majinle jmeni xi tsín kixi tíjna kʼoa sakʼoa kʼoasʼin síkjaʼaitsjen nga je sʼele jée kʼiatsa tsín nda sʼin. Kʼianga sʼa majchíngaa kui kjoafaʼaitsjen mangíntjenngiaa josʼín xi ngikʼa. Tobʼelañá, josʼín xi tjío ya niʼyaná, jotso je maestro, josʼín chjota xi fajtaa, josʼin beni chjota ya ʼndená kʼoa jotso je religión xi tiyojiaan. Tiñá ʼyañá tsa ndatjín kʼoa tsa mai jmeni xi nʼia kʼoa faʼaitsjenná tsakui kuenta tinʼia jmeni xi tsakʼinyaná nga sʼa koanjchíngaa.
Yaa nroani josʼin nikjaʼaitsjeen nga mandosinná xi kjaʼaí, nga nda chjota maa, nga kixi maa kʼoa nga mamachaa xi ngikʼa. Tonga kʼoati kui kjoafaʼaitsjenná xosíkaoná nga tsín toxkia chjakoaa je chjota xi tsjoachaa kʼoa nga tsín kjoasoa katasíkʼéjnajinná jmeni xi bixoán kʼoa jmeni xi nʼia.
A ndatjín tsa tokui kjuinñá josʼin nikjaʼaitsjeen. Kʼianga sʼa xti je Garrick tokui kini josʼin kisikjaʼaitsjen kʼoa ndatjín
jmeni xi kisʼin koanle. Tonga skanni koanjinle nga tsín kixi tíjna josʼin kisikjaʼaitsjen kʼoa nga tsín nda kichotsjoá nga kʼoakisʼin. Nga tokui kini josʼin kisikjaʼaitsjen tsee kjoa kiskajin, jolani nga kisichajngi, nga droga kitsjentʼale, nga tsakʼi kʼoa nga tsʼen koan.JOSʼIN SÍKJAʼAITSJEN XI KJAʼAÍ
Kʼianga jme xi nʼia kʼoati kuenta nʼia josʼin síkjaʼaitsjen xi ngikʼa, kʼianga kʼoanʼia mankjínsa tokoán. Nda biyoaa kʼoa bexkónná je xíngiaa, je miyoná kao je chjota xi ya tsʼe jñani tsaan kʼianga kuenta nʼia josʼin síkjaʼaitsjen.
A ndatjín nga kʼoati nʼia josʼín xi ngikʼa. Kʼianga sʼa xti Priscila kʼoati kisʼin jokisʼin xi miyole koan nga nkjín chjota tsakjayokao. Tonga koanjinle nga tsínni nda bichótsjoá nga k’oan’ia. Itso: “Nga kʼoati kisʼian josʼín xi ngikʼa alikui tsjoa kisʼe tokoan. Tongisa tse kjoa tsakatejnajian”.
JMÉSANI XI KOA̱N SʼIAAN
Ningalani nʼio tjínle kjoandosin nga kui kuenta nʼia josʼin nikjaʼaitsjeen kʼoa josʼin síkjaʼaitsjen xi ngikʼa tonga sakʼoani tsín nda bichómani. Sakʼoa tsín majinná josʼin kuichotsjoá jmeni xi nʼia tsa nda kuichomani kʼoa tsa mai (Proverbios 14:12). Sakʼoa tsín kixi tíjna josʼin nikjaʼaitsjeen kʼoa josʼin síkjaʼaitsjen chjota, nga̱ tjín jmeni xi ndasʼin ʼyale ndʼaibi xi tsín nda ʼyale ngasʼa kʼoa jmeni xi chʼaosʼin ʼyale ngasʼa jendasʼin ʼyale ndʼaibi.
A ndatjín nga kʼoatisʼin si̱kjaʼaitsjeen josʼin síkjaʼaitsjen xi ngikʼa
Jméni xi koasenkaoná nga jchaa jmeni xi ndatjín kʼoa jmeni xi chʼaotjín. Jméni xi kuinyakaoná nga tsín skan kʼoakoa̱nniná jmeni xi sʼiaan.
Kijnaa jngo xo̱n xi kuinyakaoná ngatsʼiaa nga nda kuichomani jmeni xi sʼiaan. Yaa kjoaʼmiya xi ijngo kuitsoyaná jósʼin koasenkaoná xo̱n jebi nga kui kʼoasʼiaan xi kixi tjín.