1, 2. 1) Ánni nga tsín mangósonni jmeni xi choyalee kao jmeni xi koyale je chjota. 2) Jméni xi kuitsoyaná kjoaʼmiya jebi.

NʼIO naskánatjín jmeni xi tsjoáná je Jeobá nichxin xi nroaján. Tobʼelañá, kʼoatso nga kʼoasjetsje jaʼaínle kʼoa nga kʼoakoa̱n ya ngʼajmi kao i̱ Sonʼnde josʼin mele (Mateo 6:9, 10). Kui jebi xi nʼio chjíle xi choyalee. Je Jeobá kʼoati tsoná nga tsjoáná kjoabijnachon xi tsínkʼia fetʼa, tsa ya ngʼajmi kʼoa tsa i̱ Sonʼnde (Juan 10:16; 2 Pedro 3:13). Kʼoati tsoná nga tosi tonda koandiaaná kʼoa tsjoánganʼioná nichxin xi tiyoaa ndʼaibi.

² Je Biblia kʼoatso nga “nʼiotʼatakoán” jmeni xi choyalee (chótsenlai je rekuadro “Jósʼin tsoyanile”). Kui xi tsonile nga ñaki tjínjngo tokoán nga kuitjoson jmeni xi tso je Jeobá (Hebreos 11:1). Nichxin xi tiyoaa ndʼaibi, nʼio nkjín chjota xi kui koyale nga nʼio nkjín tsojmi sʼe̱le, tonga alikui be tsa kjoaʼaí nichxin nga kʼoakoa̱n. Tobʼelañá, tsakui nichxin lotería mele kuinjele. Tonga alikui be tsa kuinjele. I̱ kjoaʼmiya jebi kui  kuitsoyaná jmé xi koasenkaoná nga ñaki kʼoakʼoé tokoán nga kuitjoson jme xi tso je Niná. Kʼoati kuitsoyaná jósʼin basenkaoná nichxin xi tiyoaa ndʼaibi je kjoamakjainná.

3. Ánni nga makjainniná nga kuitjoson jmeni xi tso je Niná.

³ Alikui toje kichʼá je kjoamakjain. Tsa mená nga sʼe̱ná kjoamakjain machjén nga je nganʼiotsjele Niná koandiaaná (Gálatas 5:22). Je nganʼiotsjele kui xi basenkaoná nga ʼyaa je Jeobá. Nga majinná nga nʼio tjínle nganʼio kʼoa nga nʼio chjine, makjainná nga sitjoson jmeni xi tso. Kʼianga kui nchja̱ni je Biblia tʼatsʼe jmeni xi tongini tso je Jeobá kʼoatso nga “jekʼoakisʼe”, xi tsonile nga ñaki sitjoson jmeni xi tso (tʼexkiai Apocalipsis 21:3-6). * Je Jeobá ñaki kixi kʼoa kuinga ʼyañá nga sitjoson jmeni xi tso (Deuteronomio 7:9).

4. Jméni xi koankjainle je choʼndale Niná.

⁴ Ya kapítulo 11 xi tsʼe Hebreos, 16 choʼndale Niná síkʼaxki̱, xi xʼin kao xi yánchjín xi nʼio kisʼele kjoamakjain nga kuitjoson jmeni xi tso je Jeobá. Kʼoati nkjínsa choʼndale Jeobá síkʼaxki̱ xi nda tsakʼé kon nga “ñaki nda koankjainle” (Hebreos 11:39). Ngatsʼi kui kiskoyale je “ntje̱” xi kitso Jeobá nga kjoaʼaí. Bení nga je “ntje̱” jebi sikjeson ngatsʼi kontrale Niná kʼoa nga ʼndenaxó sikao i̱ Sonʼnde (Génesis 3:15). Je choʼndale Niná jebi koankjainle nga sikjaʼáyanile je Jeobá. Likui ya kiskoyale nga ngʼajmi koai, nga̱ kjesa kui kjoachoya tsjoájin je Jesús nga kʼia (Gálatas 3:16). Kui kiskoyale nga i̱ Sonʼnde koatio kʼianga jeʼndenaxó koa̱n (Salmo 37:11; Isaías 26:19; Oseas 13:14).

5, 6. 1) Jméni xi kiskoyale je Abrahán kao familiale. 2) Jméni xi kisʼin nga taja kisatio kjoamakjainle (chótsenlai sén xi fitsʼiani kjoaʼmiya jebi).

⁵ Ya Hebreos 11:13 kʼoatso nga je choʼndale Jeobá xi kixi koan, koankjainle nga kuitjoson jmeni xi tongini kitso je Jeobá ninga “tokjin kiskotsennile, kʼoa koantsjoale joni tsa kikʼáyandiaa”. Jebi kui xi tsonile nga kui kiskoyale nga ya koatio ya sonʼnde chjotse kʼoa kui kiskaniya jko̱ nga jeya tjío. Jngo choʼndale Niná xi bʼaxki̱ jé Abrahán. Je Jesús kʼoakitso nga je Abrahán “kjaínga koantsjoale nga kuicho be” je nichxin nga kuitjoson jmeni xi kitso Niná (Juan 8:56). Je Sara, Isaac, Jacob kao xi kjaʼaísa choʼndale Niná kʼoati kui kiskoyale nichxin nga jekoatexoma Chjotaxále Niná i̱ Sonʼnde (Hebreos 11:8-11).

⁶ Jméni xi kisʼin je Abrahán kao familiale nga taja kisatio kjoamakjainle. Tosi tonda kiskotʼaya xi tʼatsʼe Jeobá. Je Niná, sakʼoaa ánkje kisikasén, sakʼoaa sén tsakakóle je choʼndale kʼoa sakʼoaa kao nijñá kitsoyanile. Tsakui nichxin kʼoati je choʼndale Niná xi jejchínga kitsoyale kʼoa tsa maije̱ kjio xo̱njchá jñani kiskotʼayajin. Je Abrahán kao familiale alikui kisichajin jmeni xi tongini kitso je Niná. Nʼio tsjoake koan nga kui kisikjaʼaitsjenjin. Kuinga tsín jao kisʼenile nga sitjoson jmeni xi kitso je Jeobá. Nga kʼoakisʼin, kui xi tsakinyakao nga kixi kitʼale Niná ninga kjoa jaʼatojin kʼoa ninga chjota kitjenngike.

7. Jméni xi títsjoáná je Jeobá nga taja sʼe̱jna kjoamakjainná, kʼoa jméni xi tjínnele sʼiaan.

 ⁷ Jméni xi koasenkaoná nga nʼio sʼe̱jna je kjoamakjainná. Je Jeobá kao Biblia tsoyaniná jmeni xi tsjoáná nichxin xi nroaján kʼoa jmeni xi sʼiaan nga tsjoa sa̱tío tokoán. Kuinga ndatjínsíni nga nyaon nyaon kʼoéxkiaa je Biblia kʼoa nga kjuintjenngiaa je kjoafaʼaitsjen xi tsjoá (Salmo 1:1-3; tʼexkiai Hechos 17:11 *). Je Jeobá kʼoati kʼiakjoan tsjoáná jmeni xi machjénná “nga fichó choa̱le” kʼoa jé tísíchjén “je choʼnda xi nʼiotʼakon, xi nda be xá” (Mateo 24:45). Tojo kisʼin je choʼndale Niná nichxin kjoatse, kʼoati tjínnele kjitʼa kʼoéxkiaa jmeni xi tongini tso je Niná kʼoa si̱kjaʼaitsjenjiaan. Tsa kʼoasʼiaan, kui xi koasenkaoná nga tosi tonda kixi kjuintʼalee je Niná kʼoa nga tosi tonda chóyalee je nichxin nga koatexoma je Chjotaxále i̱ Sonʼnde.

8. Jósʼin basenkaoná je kjoabʼetsʼoa nga mataja kjoamakjainná.

⁸ Xi kʼoati tsakinyakao je choʼndale Jeobá nichxin kjoatse nga taja kisatio kjoamakjainle, kuinga tsakʼétsʼoale Jeobá, kʼoa je Jeobá kinrʼoé kjoabʼetsʼoale (Nehemías 1:4, 11; Salmo 34:4, 15, 17; Daniel 9:19-21). Tikʼoasʼinni tsanda ñá, ngisaa mataja je kjoamakjainná kʼianga nijélee nganʼio je Jeobá kʼoa nga ʼyaa nga basenkaoná kʼoa nga kuikjoan tsjoáná jmeni xi machjénná kʼoa kʼiakjoan tsjoáná nga machjénná (tʼexkiai 1 Juan 5:14, 15). * Tosi tonda si̱jélee je Jeobá nganʼiotsjele ánni nga koa̱ntajani kjoamakjainná (Lucas 11:9, 13).

9. Tikʼaxki̱ kʼai ánni nga kʼoétsʼoañá.

⁹ Kʼianga kʼoétsʼoalee je Jeobá, alikui tsa tokui nga si̱jélee jmeni xi machjénná. Kʼoati kuinga kʼoétsʼoanilee nga kʼoailee kjoanda kʼoa nga chʼa̱sjengʼaa, nga̱ nʼio tse jmeni xi títsjoáná (Salmo 40:5). Kʼoati tjínnele kʼoétsʼoantjé je ndsʼee xi tjío jngo tjíjtsa Sonʼnde. Tobʼelañá je ndsʼee “xi kjoañʼai tjío”. Kʼoati machjén nga kʼoétsʼoantjé je ndsʼee xi xá kjinele ya jinjtín. Kʼianga ʼyaa nga nrʼoéná je Jeobá nga bʼetsʼoalee, ngisaa machriantʼalee kʼoa ngisaa mataja kjoamakjainná (Hebreos 13:3, 7).

10. Jmé xi tsakinyakao je choʼndale Niná nga nʼiojin koan kʼoa nga kixi koan.

¹⁰ Ya kapítulo 11 xi tsʼe Hebreos, je pastro Pablo itso xi kiski: “Je yánchjín kiskoé je kʼenbe nga jaʼáyanile. Tjín kʼa xi nʼio chʼao tjín kjoañʼai tsakjaʼá, nga kaile kiskoé kjoabitjontjaile, jméni nga sikinjesíni kjoafaʼáya xi ngisa nda” (Hebreos 11:35). Nʼio nkjín choʼndale Niná xi kixi kitʼale ninga nʼio ñʼai tjín kjoa jaʼatojin, nga̱ koankjainle nga sikjaʼáyanile Niná. Bení nga je Jeobá tsjoá ijngokʼanile kjoabijnachon kʼoa nga i̱ koatio ngantsjai nichxin i̱ Sonʼnde. Si̱kjaʼaitsjenla jmeni xi koantʼain je Nabot kao Zacarías. Nga Niná kisitjosonle  la̱jao̱ kinikʼienni nga jao (1 Reyes 21:3, 15; 2 Crónicas 24:20, 21). Je Daniel yaa kinikʼatjenjinle xa, kʼoa jan miyole xi nga̱já xi tífaʼájnga̱ kinikʼatsaoya. Kitsjoaʼnde nga kʼoakinikao ʼndele nga yátsʼi̱n kuinyale Jeobá. Chjota jebi koankjainle nga je Jeobá tsjoále nganʼiotsjele kʼoa nga je koasenkao nga ska̱le tojme kjoa xi kjoaʼatojin (Daniel 3:16-18, 20, 28; 6:13, 16, 21-23; Hebreos 11:33, 34).

11. Nga kisʼele kjoamakjain je profetale Niná, jmé kjoa xi kichokjoajinle.

¹¹ Nʼio nkjín je profetale Niná xi tsaʼyasin kʼoa xi ndoyá kinikatíoʼya, jolani je Micaya kao Jeremías. Kʼoa je Elías kao xi kjaʼaísa profeta yaa tsakʼetsoma “ya ʼndetʼaxintʼa, jinjñá, ngingijao, kʼoa ya nga̱jao̱ jin nangi”. Ngatsʼi kixi kitʼale Niná kʼoa kichokjoajinle kjoa xi jaʼatojin nga̱ ñaki kʼoatsakatío kon nga kuitjoson jmeni xi tjíokoyale (Hebreos 11:1, 36-38; 1 Reyes 18:13; 22:24-27; Jeremías 20:1, 2; 28:10, 11; 32:2).

12. ʼYáni xi nʼio nda choa̱ tsakʼéjnaná kʼoa jméni xi tsakasenkao nga kiskale je kjoa xi jaʼatojin.

¹² Je xi ngisasa nda choa̱ tsakʼéjnaná jé Jesús. Kichokjoajinle kjoa xi nʼio ñʼai tjín jaʼatojin kʼoa kixi kitʼale Niná. Jméni xi tsakasenkao. Je pastro Pablo kʼoakitso nga je Jesús kiskale je yá kjoañʼai xi totʼatsʼe kjoatsjoa xi kiskoyale kʼoa xijekoan yaa tsakʼejna ngakixile Niná (Hebreos 12:2, TNM). Kuinga kʼoakitsonile Pablo je chjotale Cristo nga kui choa̱le Jesús katafitjenngi (tʼexkiai Hebreos 12:3). * Tojo koan je Jesús, nkjín je chjotale Cristo xi títjon tsakatio xi kʼoati kinikʼien nga kixi kitʼale je Jeobá, jolani je Antipas (Apocalipsis 2:13). Je chjotale Cristo jebi jekitjoéle kjoanda, tonga je choʼndale Niná xi tsakatio ngasʼa kjesa tjoejinle kjoanda nga̱ i Sonʼnde kiskoyale nga koatio (Hebreos 11:35). Je chjotale Cristo xi jekʼien xi ya kisʼele kjoachoya ya ngʼajmi, kʼiaa jaʼáyale ya ngʼajmi nga jejaʼato nó 1914 kʼianga jetsakatéxoma je Jesús. Yaa koatexomakao je Jesús nga koatexomasonle je chjotasonʼnde (Apocalipsis 20:4).

13, 14. 1) Jmé kjoa xi nʼio ñʼai tjín jaʼatojin je Rudolf Graichen. 2) Jméni xi tsakasenkao nga kixi kitʼale Jeobá.

¹³ Nichxin xi tiyoaa ndʼaibi, miyón mani je testigole Jeobá xi kui choa̱le Jesús tjíofitjenngi. Kui síkjaʼaitsjen jmeni xi tongini tso je Niná nga sʼin kʼoa kixi fitʼale ninga kjoa faʼatojin. Tobʼelañá, je ndsʼee xi Rudolf Graichen ʼmi, xi ya Alemania kitsin nga nó 1925. Kʼoatso nga kʼianga sʼa ʼndí kji kui síkjaʼaitsjenjin je sén xi tʼatsʼe Biblia nchja̱ni xi matsentʼa je cuadro xi kjiotʼa ndʼiale. I kitso: “Jngo xi kui matsentʼa je tse̱en kao barréʼndí, tindsoʼndí kao xaʼindo, nra̱ja̱ʼndí kao xa: ngatsʼi yaa ñatjen tjío kʼoa jngo tiʼndí tíbándiaale” (Isaías 11:6-9). Kui xi tsakasenkao je Rudolf nga kjitʼa kisikjaʼaitsjen je ʼNdenaxó kʼoa ñaki kʼoatsakʼé kon nga kʼoakoa̱n. Nga kʼoakisʼin, kui xi tsakasenkao nga  kixi kitʼale je Jeobá ninga nkjín nó kitjenngike je polisía xi Alemania nazi tsʼe kao je polisía xi Alemania comunista tsʼe.

¹⁴ Je Rudolf nʼio tse kjoa jaʼatojin. Kʼoa je na̱le kui kisikʼien je chʼin xi tifus ʼmi ya ʼnde jñani kjoañʼai kinikjaʼá. Kʼoa je nʼaile jngo xo̱n kisʼin firma jñani kʼoatso nga tsín timenile nga testigole Jeobá koa̱n. Tonga je Rudolf taja kisʼejna kjoamakjainle. Nga jekitjoni ndoyá superintendente xi tsʼe circuito koan. Xijekoan, yaa ki Skuela xi tsʼe Galaad jña nichjine misionero kʼoa yaa kinikasén ya naxinandá Chile. Superintendente xi tsʼe circuito koan ijngokʼa kʼoa jngo misionera chixankao xi Patsy ʼmi. Jngo tsotiʼndí kisʼele, tonga tosʼaa jngojaole sá nga kʼien. Kʼoa nga jeki nichxin to sajé chjoónle kʼienngáni. Tosʼaa 43 nóle nga kʼien. Ninga kuilani kjoa jaʼatojin, je Rudolf tosi tonda kisixále je Jeobá. Ningalani jejchínga kʼoa chʼin tjínle, precursor sʼin tísíxá kʼoa chjotajchíngaa sʼin tíjna ya jinjtín. Xi tʼatsʼe Rudolf yaa faʼaitʼa ya rebista La Atalaya xi tsʼe 1 de agosto de 1997, pájina 20-25. ^[1]

15. Tikʼaxki̱ kʼai je ndsʼee xi kao kjoatsjoa tjíosíxále je Jeobá ninga nʼio tse kjoa tjíofaʼatojin.

 ¹⁵ Nichxin xi tiyoaa ndʼaibi, nʼio nkjín ndsʼee xi kao kjoatsjoa tjíosíxále je Jeobá ninga chjota nʼio fitjenngike. Siento mani xi ndoyá tjíoʼya ya naxinandá Eritrea, Singapur kao Corea del Sur. Ánni. Kuinga kaile nga ki̱cha̱ kjoajchán sichjén (Mateo 26:52). Tobʼelañá, je ndsʼee Isaac, Negede kao Paulos jetsʼato 20 nó nga ndoyá tjíoʼya ya naxinandá Eritrea. Nga ya tjío totaon tjíoʼya. Nga ndoyá tjíoʼya likui kjima tjíobixan kʼoa likui kjima tjíosíkuinda je xijchále. Ninga kʼoalani, kixi tjíofitʼale Jeobá kʼoa taja tjío kjoamakjainle. Saʼnda je chjota xi síkuinda je ndoyá bexkónní. Ya jw.org faʼaitʼa fotole ndsʼee jebi, kʼoa kʼoasʼin matsen nga nʼio tsjoa tjíole ninga nʼio tse kjoa tjíofaʼatojin.

16. Tsa nʼio tíjna kjoamakjainná, jméni xi koa̱nná sʼiaan.

¹⁶ Alikui tongatsʼi je testigole Jeobá xi ndoyá nikatíoʼya kʼoa xi totaon ʼya joni je ndsʼee xi jekanikʼaxkiaa. Tonga nʼio nkjín xi kjoañʼai faʼá xi totʼatsʼe nga ma̱ tjío, nga kjoaxkón bichóne kʼoa nga kjoajchán batío chjota ya ʼndele. Kʼoa tjínkʼa je ndsʼee xi kui choa̱le Abrahán, Isaac, Jacob kao Moisés tjíofitjenngi, alikui mele nga nʼio ngʼa kuitjo i̱ Sonʼnde kʼoa alikui kjoanyiná tjíofitjenngi, tosa nʼio nda tjíosíxále je Jeobá. Jméni xi tjíobinyakao je ndsʼee jebi nga kao kjoatsjoa tjíosíxále Jeobá. Kuinga tsjoake je Jeobá kʼoa makjainle nga kuitjoson jmeni xi tongini tso. Be nga je Jeobá tsjoále kjoabijnachon xi tsínkʼia fetʼa ya sonʼnde chjotse je choʼndale xi kixi fitʼale. Nga kʼia alikui tiʼya xi totaon jchani (tʼexkiai Salmo 37:5, 9). *

17. 1) Jméni xi sʼiaan tsa mená nga taja sʼe̱jna kjoamakjainná. 2) Jméni xi jchaa ya kjoaʼmiya xi ijngo.

¹⁷ I̱ kjoaʼmiya jebi kui kaʼyaa nga je kjoamakjain kui xi tsonile nga ñaki tjínjngo tokoán nga kuitjoson jmeni xi tso je Jeobá. Tsa mená nga taja sʼe̱jna je kjoamakjainná, tjínnele nga kʼoétsʼoalee je Jeobá kʼoa tosi tonda si̱kjaʼaitsjenjiaan jmeni xi tongini tso nga sʼin. Tsa kʼoasʼiaan, kui xi koasenkaoná nga kixi koaan tojme kjoani xi kuitjátojiaan. Ya kjoaʼmiya xi ijngo kui kuitsoyasa jósʼin tsoyanile nga tjínná kjoamakjain.