JE KJOATÉXOMA xi tsakʼaile Moisés kʼoatso nga sakʼoa koanchjén nga juramento kitsjoa je chjota. Tonga kʼianga nichxinle Jesús, nʼio nkjín chjota judío xi tokʼoakitso ngantsjai, tojoni nga koankjainle xi ngikʼa nga kʼoatjín jmeni xi kitso. Kʼoakitso je Jesús nga toxitsjoa nga kʼoakisʼin. I kitso: “Katajaonli tsa jaonli, kʼoa tsa mai maili” (Mat. 5:33-37; 23:16-22).

Jngo diccionario xi kʼoatso nga je libro xi Talmud ʼmi, faʼaitʼa jñani kʼoatso nga kʼoasʼin ngale je chjota judío nga juramento sʼín kʼianga jmeni xi tso. Tsoya jñánile je juramento xi ñaki tjínnele kuitjoson kʼoa jñánile xi mai.

Alikui tsa toje Jesús je xi kʼoakitso nga tsín kixi tíjna nga kʼoakisʼin je chjota. Tobʼelañá, je chjota judío xi Flavio Josefo tsakʼin, i kitso tʼatsʼe jngo relijiónle chjota judío: “Tosaa likui jme juramento sʼín, nga̱ kʼoasʼin síkjaʼaitsjen nga ngisa chʼao sʼin tikʼoajinni tsa énndiso kuinchja̱. Kʼoatso nga jekjoañʼai tíjnajin je chjota xi kjoanʼio juramento tsjoá kʼianga koa̱nkjainle xi ngikʼa jmeni xi tso”. Jngo libro judío xi Eclesiástico kʼoa tsa Sabiduría de Jesús Ben Sirá sʼin ʼyale, itso: “Je chjota xi nʼio nkjín juramento tsjoá, tse kjoañʼai tíʼmaone yaole” (23:11). Je xi tsín kisasenle je Jesús, kuinga tokjoaská koanle je chjota nga juramento kitsjoa. Kʼiatsa ñaki kixi jmeni xi bixoán ngantsjai, alikui machjén nga juramento sʼiaan nga koa̱nkjainle xi ngikʼa jmeni xi kuixoán.