1, 2. 1) Jmé kjoanyʼán xi koa̱n sʼe̱ná ndʼaibi. 2) Ánni nga kjesa ñaki nyʼán sʼin tiyojiaan ndʼaibi (chótsenlai sén xi faʼaitʼa ibi).

NGATSʼIÑÁ nga mená nga nyʼán sʼin kuiyoaa kʼoa nga tsín jme kjoanikjáojin katasʼená. Bʼailee kjoanda je Jeobá nga títsjoáná je “kjoanyʼántakonle”. Basenkaoná nga nyʼán sʼe tokoán kʼoa nga tsín jme xi nikjáojiaan (Filip. 4:6, 7). Xi ijngosani, nga jetsakʼaitʼalee yaoná je Jeobá, nyʼán sʼin tiyoaa xi kao je, xi tsonile nda tiyoaa ngixko̱n (Rom. 5:1).

² Nichxin xi tiyoaa ndʼaibi, kjesa faʼaikaojin Niná kjoanyʼán jngo tjíjtsa Sonʼnde. Nichxin fetʼa tiyoaa, kuinga nʼio tse kjoa tjínsíni kʼoa je chjota nʼio tse kjoa tjíobajngi (2 Tim. 3:1-4). Xi ijngosani, ñá xi chjotale Cristo maa, tibixkantʼakaoñá je Na̱i kʼoa kao kjoaʼmiya ndiso xi tíkaníbason (2 Cor. 10:4, 5). Je xi kʼoati kjoaʼaxinná kjoanyʼán xi tjínná, jé xíngiaa xi tsín testigole Jeobá ma. Tsakui nichxin, besinná tʼatsʼe xi makjainná kʼoa tsakui kʼoatsoná nga ñá tjínná jée nga tsín tijtín sʼin tiyoñá kao familianá. Kʼoa tsa saʼnda kʼoakuitsoná nga tsín tikoayaxki̱niná. Jósʼin tjínnele jchatokoán xíngiaa xi batiochjoaná. Jméni xi koa̱n sʼiaan kʼiatsa kuilani kjoa jebi tibitjatojiaan.

3, 4. 1) Jósʼin kuichomani jmeni xi tsakakóya je Jesús. 2) Kʼiáni nga ngisa ñʼai koa̱nná nga chjotale Jesús koaan.

³ Je Jesús koanjinle nga xkoa̱ya sikatío je chjota jmeni xi tsakakóya kʼoa nga kjoanʼiojin koa̱nchjénle je chjotatjenngile. Kʼianga kui kjoa jebi sʼe̱ alikui nda sikatío je familia. Je Jesús i kitso: “Ali nikjaʼaitsjenjion tsa nyʼán tjín xi jeʼe̱ sikʼéjnale i̱ sonʼndebi. Alikui jeʼe̱ nga sikʼéjna xi nyʼán tjín, tokjoajchán xi jeʼe̱ sikʼéjna. Kui xá jaʼainia, jméni nga je tibe kontra koaisínile nʼaile, kʼoa xi tsoti kontra koaile xi na̱le, kʼoa xi jaʼnda kontra koaile xi na̱chále. Kʼoa je xi kontrale chjota, tijeni xi tjío ya ndʼiale” (Mat. 10:34-36).

⁴ Ánni kʼoakitsosíni je Jesús: “Ali nikjaʼaitsjenjion tsa nyʼán tjín xi jeʼe̱ sikʼéjnale i̱ sonʼndebi”. Kui xi koanmele nga katasíkjaʼaitsjen je chjota jósʼin kuichomani nga chjotatjenngile koa̱n. Je Jesús kui xá jaʼaini i̱ Sonʼnde nga kitsoya xi kixi, alikui nga xkoa̱ya sikatío je chjota (Juan 18:37). Tonga sakʼoajin kʼoakoa̱n. Kuinga kui kitsoyasíni je Jesús nga sakʼoa ñʼai koa̱nná nga chjotale koaan, ngisaa tsa je xi miyoná mani kʼoa tsa xi xíngiaa tsín sa̱sénle nga Énle Niná chótʼayá.

5. Jmé kjoa xi bitjatojiaan xi chjotale Cristo maa.

⁵ Je Jesús kʼoakitso nga kjoañʼai kjoaʼatojin je chjotale, jolani kʼianga xínkjín batiochjoale (Mat. 10:38). Kʼianga chjotale Cristo maa, kaná nga ʼya xi besinná kʼoa tsa bʼasjenginá je xíngiaa, tonga ngisaa nʼio tse xi tinikinjee tikʼoajinni jokji tinichaa (tʼexkiai Marcos 10:29, 30). *

6. Jméni xi kuenta sʼiaan tsa je xíngiaa batiochjoa nga Jeobá nixálee.

⁶ Kʼiatsa je xíngiaa koatiochjoaná nga Jeobá tinixálee, alikui tokui koa̱njtichañá. Tonga kuenta sʼiaan nga je xi ngisa títjon tíjna kuinga tsjoacha koaan je Niná kao Cristo (Mat. 10:37). Kʼoati si̱kjaʼaitsjeen nga je Na̱i kʼoati kui síchjén je kjoatjaocha xi tjínná kao xíngiaa nga tsín tikixi koanngíntʼanilee je Jeobá. Kuila kataʼyaa je kjoa xi sʼe sakʼoa kʼoa jósʼiaan nga koa̱n kuitjátojiaan kjoa jebi.

7. Jósʼin tjínnele jchatokoán je kjoabixanná tsa tsín testigole Jeobá ma je chjoónná kʼoa tsa xʼinná.

⁷ Je Biblia kʼoatso nga je xi bixan kjoa sʼele (1 Cor. 7:28). Tsa chjoónná kʼoa tsa xʼinná tsín testigole Jeobá ma, tsakui nichxin ngisa tse kjoa sʼe̱ná. Ninga kʼoalani, tjínnele kʼoasʼin jchatokoán je kjoabixanná josʼin bekon Niná. Tsa chjoónná kʼoa tsa xʼinná tsín mele nga Jeobá sixále, alikui xi tsonile nga koa̱n kuinjioán kʼoa tsa koa̱n si̱katioá xíngiaa (1 Cor. 7:12-16). Je chjoón xi chjotale Cristo ma, tjínnele skoe̱xkón xʼinle, nga̱ jé xi ngʼajko̱ tíjnale ningalani tsín je basentítjon nga bakóyale familiale xi tʼatsʼe Niná. Tikʼoasʼinni, je xi xʼin, tjínnele tsjoake koa̱n je chjoónle kʼoa sikuinda ningalani likui Jeobá tísíxále (Efes. 5:22, 23, 28, 29).

8. Jméni xi chjónangilee yaoná kʼiatsa tsín nanda tsjoáʼndená je xʼinná kʼoa tsa je chjoónná nga Jeobá tinixálee.

⁸ Jméni xi koa̱n sʼiaan kʼiatsa tsín nanda tsjoáʼndená je xʼinná kʼoa tsa je chjoónná nga Jeobá tinixálee. Tobʼelañá, je xʼinle jngo tichjaa kʼoakitsole nga totjíchoa̱ nichxin katabakóyason nga xki̱ xomana. Tsa kuilani kjoa tibitjatojiaan, chjónangilee yaoná jebi: “A kui tíbʼénena xʼinna nga tsín tije Jeobá sixánile. Kʼiatsa mai, a koaan sitjosonle jme xi títsona”. Kʼiatsa nda chósonnilee josʼiaan alikui nanda kjoa sʼe̱ná (Filip. 4:5).

9. Jósʼin kuitsoyale je xtile xi chjotale Cristo ma nga katabexkón je nʼaile kʼoa tsa je na̱le xi tsín testigole Jeobá ma.

 ⁹ Tsa je xʼinná kʼoa tsa je chjoónná tsín je Jeobá síxále, ñʼaijin koa̱nná nga koakoyalee je ʼndíxtiná. Tobʼelañá, tjínnele kʼuínyalee jotso Énle Niná nga katabexkón je nʼaile kao na̱le (Efes. 6:1-3). Tonga tsa je xʼinná kʼoa tsa je chjoónná likui fitjenngi jotso je Énle Niná, nda choa̱ kʼoéjnalee nga jchaxkoán. Kui kuenta sʼiaan jme xi nda sʼín kʼoa kʼoailee kjoanda josʼin basenkaoná. Alikui chʼaosʼin si̱kʼaxkiaa ngixko̱n xtiná. Tosa kui kʼuínyalee je xtiná nga tiʼndená chjoéjiaan josʼiaan nga jngó jngoá, tsa je Niná si̱xálee kʼoa tsa mai. Kʼianga ndasʼin fikao yaole xtiná tsakui nichxin koasenkao je xʼinná kʼoa tsa je chjoónná nga koa̱nmele skoe̱ xi tʼatsʼe Jeobá.

10. Jósʼin kuitsoyale je xtile xi chjotale Cristo ma kʼiatsa je xʼinle kʼoa tsa je chjoónle tsín testigole Jeobá ma.

¹⁰ Tsa je xijchá xi tsín testigole Jeobá ma koanmele nga je ʼndíxtile katabʼasje je sʼuí xi tsín ya Biblia yʼangini kʼoa tsakui koa̱nmeleje̱ nga kjaʼaí kjoamakjain katasʼele. Tjínkʼa chjota xi bʼéchjoale je yánchjínle nga Biblia katabakóyale je ʼndíxtile. Tsa kʼoalani kjima, je xi chjoón básjaile jokji tjen kʼoamale nga tsoyale je ʼndíxtile jotjínni xi kixi (Hech. 16:1; 2 Tim. 3:14, 15). Tobʼelañá, tsa tsín tsjoáʼnde je xi xʼin nga estudio katabʼaile je xtiʼndíle kʼoa nga kjoajtín koai. Ninga bexkónlani je chjoón jme xi tso xʼinle, tonga koaan kuitsoyale ʼndíxtile josʼin makjainle kʼianga tjoʼndele, kʼoasʼin koakoyanile xi tʼatsʼe Jeobá kʼoa jotso je kjoatéxomale (Hech. 4:19, 20). Kʼianga jekoa̱njchínga je xti, jé xi  kuitsoni tsa Jeobá sixále kʼoa tsa mai (Deut. 30:19, 20). *

11. Jméni xosikaoná nga kjoa sʼe̱niná kao xíngiaa xi tsín testigole Jeobá ma.

¹¹ Kʼianga kichotʼayá Biblia kao je testigole Jeobá, tsakui nichxin likui kʼoatsakʼinlee xíngiaa. Tonga nga jekoantajasa kjoamakjainná, koanjinná nga tjínnele nʼiojin koaan kʼoa nga machjén nga chja̱kaoñá jme xi kjimakjainná (Mar. 8:38). Kʼiatsa kjoa tísʼená kao xíngiaa nga kixi timangíntʼalee Jeobá, jméni xi koa̱n sʼiaan nga nyʼán sʼin kuiyoaa kao xíngiaa kʼoa kixi koa̱nle je Niná. Kataʼyala kʼaa je kjoafaʼaitsjen xi koasenkaoná.

12. Ánni nga batiochjoa kʼani xíngiaa nga testigole Jeobá maa, kʼoa jmé xi koa̱n sʼiaan.

¹² Si̱jinlee yaoná josʼin síkjaʼaitsjen je xíngiaa xi tsín testigole Jeobá ma. Nʼiojin tsjoa tjín tokoán nga kjimajinná xi tʼatsʼe Biblia. Tonga tjínjinkʼa xíngiaa xi kʼoasʼin sikjaʼaitsjen nga jngo secta tiyojiaan kʼoa nga totíchʼanachaná. Tsakui nichxin kʼoasʼin sikjaʼaitsjen nga tsín titsjoachañá nga jekinikatioá je sʼuí xi bʼasje. Kʼoa tsa kʼoasʼin síkjaʼaitsjen nga kjoañʼai tsjoáná Niná kʼianga jekuiyá. Tjínnele si̱jinlee yaoná josʼin síkjaʼaitsjen kʼoa nda kuinóʼyalee ánni nga jchasíñá jmeni xi makjáojinle (Prov. 20:5). Koaan kjuintjenngiaa je choa̱ xi tsakʼéjna je pastro Pablo, kisijinle yaole josʼin kisikjaʼaitsjen ngatsʼi chjota kʼoa kui xi tsakasenkao nga koan kitsoyanile je Énle Niná. Kʼiatsa kʼoasʼiaan tsanda ñá koasenkaoná nga koa̱n kʼuínyalee xíngiaa jme xi makjainná (1 Cor. 9:19-23).

13. Jósʼin tjínnele chja̱kaonajmía xíngiaa.

¹³ Nda tso én kuinókjoaa. Je Biblia itso: “Je énno ñaki nda tinókjoao kao kjoanda” (Col. 4:6). Koaan si̱jélee Jeobá nga katatsjoáná nganʼiotsjele ánni nga koa̱n nda tso én chja̱kaosíñá xíngiaa. Alikui koa̱n nga kui cho̱batiyañá tʼatsʼe jme xi makjainle. Kʼiatsa kui kʼoakuitso kʼoa tsakui kʼoasʼin jmeni xi tsín sa̱sénná, koaan chjénngilee je choa̱ xi tsakatío je pastro. Je Pablo i kitso: “Kʼia nga chʼao tsonajin, nichikontʼainjin nga je. Kʼia nga síkjaʼánajin kjoañʼai, jchókjoakaonajin. Kʼia nga nchjaʼaonnajin, nda nokjoalaijin” (1 Cor. 4:12, 13).

14. Jósʼin basenkaoná nga nda mangínkoaa yaoná.

¹⁴ Ndasʼin koanngínkoaa yaoná. Ningalani basenkaoná nga nda tso én nokjoaa nga nyʼán biyoaa kao xíngiaa, ngisaa nda koasenkaoná kʼianga ndasʼin koanngínkoaa yaoná (tʼexkiai 1 Pedro 3:1, 2, 16). * Je choa̱ xi batioá kuinyakao je xíngiaa nga skoe̱ nga ndasʼin biyoaa ya niʼyaná, nikuindañá je ʼndíxtiná kʼoa tsje sʼin mangínkoaa yaoná. Ninga tsínkʼia testigole Jeobá koa̱n je xíngiaa, tsjoa tjín tokoán nga̱ ʼyañá nga tísasénle Jeobá nga kixi timangíntʼalee.

15. Jméni xi sʼiaan nga tsín cho̱batiaa kao xíngiaa.

¹⁵ Tongini si̱kjaʼaitsjeen tsa jme kjoa sʼe̱ná. Si̱kjaʼaitsjeen jmé xosikaoná tsa cho̱batiaa kao xíngiaa kʼoa chósonnilee josʼiaan (Prov. 12:16, 23). Jngo tichjaa xi Australia tsʼe, itso: “Je nʼaichána, nʼio tsakʼejnachjoale je Énle Niná. Tongini nga kjesa nokjoajinlaijin, nijélaijin Jeobá nga katabasenkaonajin nga tsín toxkia kʼuínlaijin nga jtinajin. Tongini nikjaʼaitsjainjin jokʼuínlaijin ánni nga nda cho̱banajmínijin. Xi ijngosani, kʼianga tsínkui cho̱batiyanijin xi tʼatsʼe relijión, tongotjo nokjoalaijin”.

16. Jméni xi koasenkaoná nga tsín chʼao sʼe̱ tokoán kʼiatsa kachobatiaa kao xíngiaa.

 ¹⁶ Toxá cho̱batijin sakʼoañá kao xíngiaa xi tsín testigole Jeobá ma. Tsakui nichxin likui nda sʼe̱ tokoán nga̱ nʼio tsjoachaa kʼoa kui xi mená nga ndasʼin kuiyokoaa ngantsjai. Kʼiatsa kʼoakjimaa, si̱kjaʼaitsjeen nga je xi ngisa tjínnele tsjoacha koaan jé Jeobá tikʼoajinni je xíngiaa. Tsa kʼoasʼiaan, kuinyakaojián je xíngiaa nga skoe̱ nga kjoabiya kuichokaoná kʼiatsa tsín si̱tjosoán jotso je Énle Niná kʼoa nga kjoabijnachon so̱koná tsa si̱tjosoán. Si̱kjaʼaitsjeen nga tsín ʼya xi koa̱n kʼoénelee nga Jeobá katasíxále. Tonga je xi koa̱n sʼiaan kuinga kʼoakʼuínlee josʼin tíbasenkaoná nga tinitjosonlee je Niná. Kʼoa je Niná kʼoati tíbakóle kjoatsjoacha nga kʼoati katabe xi tʼatsʼe joni tsa ñá. Nga jngó jngóñá xi kuixónñá tsa si̱xálee Niná kʼoa tsa mai (Is. 48:17, 18).

17, 18. Jméni xi koa̱n sʼiaan kʼiatsa jngo xíngiaa sikʼéjna Jeobá.

¹⁷ Kʼiatsa jngo xíngiaa bichonsjejin ya jinnaxinandále Niná kʼoa tsa je xi tsín timenile nga testigole Jeobá koa̱n. Nʼiojin aon koa̱nná, kʼoajin koa̱nná joni tsa jngo ki̱cha̱ tifaʼatosʼenkjá ya ni̱ma̱ná. Jmé xi koa̱n sʼiaan tsa kʼoakjima.

¹⁸ Si̱ngalee yaoná nga kʼoasʼiaan xi tʼatsʼe Niná tínroani. Nga tosi tonda taja katasʼejna je kjoamakjainná, tjínnele nyaon nyaon kʼoéxkiaa je Biblia, kuiyondalee je kjoajtínná kʼoa kjuian, kʼuínyasoán kʼoa si̱jélee Niná je nganʼiole nga katachókjoajinná je kjoa xi sʼená (Jud. 20, 21). Tonga jméni xi koa̱n sʼiaan tsa tsínti kao kjoatsjoa tinixánilee Niná nga aon tjín tokoán. Alikui koa̱n si̱kinroajeen tokoán. Si̱kjaʼaitsjenjiaan je xále Jeobá nga̱ kui xi koasenkaoná nga tsín chʼao sʼe̱ tokoán kao kjoafaʼaitsjenná. Kuenta sʼiaan jmeni xi koanle xi kiski Salmo 73. Kʼianga tsín tinda kisʼeni kon, nʼio kisikjáojin. Tonga kʼianga jekui kisikjaʼaitsjen nga ñaki toje Jeobá sixále kui xi tsakasenkao nga kisindaya je kjoafaʼaitsjenle (Sal. 73:16, 17). Kʼiatsa kʼoasʼiaan tsanda ñá kʼoati koasenkaoná.

19. Jósʼin bakoá nga ʼyaxkoán josʼin batekjáya Jeobá.

¹⁹ Jchaxkoán josʼin batekjáya Jeobá. Ningalani aon maná nga títjon nga bichakjáyaná, ndasʼin biyoaa ngatsʼiaa nga maskanni, kʼoa basenkao tsanda je xi kabajngijée (tʼexkiai Hebreos 12:11). * Tobʼelañá, je Jeobá kʼoatsoná nga tsín tije si̱miyoñá je chjota xi jée bajngi kʼoa xi tsín tikʼoamanile je jéele (1 Cor. 5:11-13). Ninga nʼio aon koa̱nná nga kabichonsjejin xíngiaa, alikui koa̱n nga je kuinókjoalee kʼiatsa tsín nʼio tjín xá, jolani tsa teléfono kuinókjoalee, tsa mensaje si̱kasénlee, tsa karta chjílee, tsa correo electrónico kʼoa tsa redes sociales si̱chjén nga chjílee.

20. Ánni nga tsín tokʼoéjngosíñá tokoán kʼiatsa jngo xíngiaa kabichonsjejin.

²⁰ Alikui tokʼoéjngoaa tokoán. Je kjoatsjoacha koyale ngayeje kʼoa kuinga tsín tokʼoéjngosíñá tokoán nga̱ koaan kʼoéjnajin ijngokʼani ya jinnaxinandále Niná je xíngiaa xi kasíkʼéjna Jeobá(1 Cor. 13:7). Kʼiatsa tiʼyaa nga jetísíndaya yaole jngo xíngiaa, koaan si̱jélee Niná nga katatsjoále nganʼiole kʼoa nga katabʼejnanda ijngokʼani (Is. 44:22).

21. Jméni xi koa̱n sʼiaan kʼiatsa kjoa tísʼená kao xíngiaa nga Jesús timangíntjenngilee.

²¹ Je Jesús kʼoakitso nga tjínnele ngisa tsjoacha koaan je tikʼoajinni toʼya chjotani. Alikui jao kisʼe kon nga kixi koaitʼale je chjotale ninga xínkjín koatiochjoale. Kʼiatsa kjoa tísʼená kao xíngiaa nga Jesús timangíntjenngilee, si̱jélee nganʼio je Jeobá ánni nga chókjoajinniná (Is. 41:10, 13). Si̱kjaʼaitsjeen nga je Jeobá kao Jesús tsjoa tjíole xi tʼatsaan kʼoa nga je sichikontʼainná nga kixi timangíntʼalee. A tsí kjoaixi nga tsjoa bʼé tokoán jebi.