1, 2. 1) Jmé xá xi ngisa kitsjoale kjoandosin je Jesús, kʼoa ánni. 2) Jmé xi tjínnele sʼiaan nga ndasʼin si̱xá kao Jeobá.

JE Jesús chjineyá koan, kʼoa kʼoati kitsoyason je énnda chjotse (Mar. 6:3; Rom. 15:8). Ñaki nʼio ndasʼin kisitjoson nga jao xá jebi. Je Jesús nda koanle kisichjén je ki̱cha̱ xi mandani je yá. Xi ijngosani, kʼoati nʼio nda koanle kisichjén je kjoankjíntokon xi kisʼele tʼatsʼe je Énle Niná (Mat. 7:28; Luc. 24:32, 45). Kʼianga 30 nóle Jesús alikuiti xá chjineyá kisʼinni, tokui xá kisʼin nga kitsoyason tʼatsʼe je Chjotaxále Niná. Koanjinle nga nʼio chjíle nga kui xá sʼin, nga̱ kʼoakitso nga kʼoati kui xá kisikasénni Niná i̱ Sonʼnde (Mat. 20:28; Luc. 3:23; 4:43). Je Jesús tokui xá kisʼin nga kitsoyason, kʼoa kui xi koanmele nga kʼoati sʼiaan tsanda ñá (Mat. 9:35-38).

² Alikui to ngatsʼiaa nga maná xá chjineyá, tonga ngatsʼiñá nga maná ʼmiyasoán je énnda chjotse. Je xá jebi nʼio chjíle, nga̱ saʼnda je Niná kʼoati kui xá sʼín. Je Biblia kʼoatso nga tojngo nixákoaa je Niná (1 Cor. 3:9; 2 Cor. 6:4). ʼYañá nga ñaki kixi je Énle Niná (Sal. 119:159, 160). Kuinga nda nichjénñá “je én xi kjoakixi”, xi tsonile je Énle Niná, kʼianga ʼmiyasoán (tʼexkiai 2 Timoteo 2:15). * Tonga machjén nga ngisasa nda koa̱nná si̱chjén je Biblia, nga̱ kui xi ngisa nichjén kʼianga bakoyaa xi tʼatsʼe je Jeobá, je Jesús kʼoa kao tʼatsʼe Chjotaxále. Je naxinandále Jeobá tsen kʼoatsoná jokjoan je xo̱n  kʼoa kao je video xi koa̱n sichjén kʼianga kʼuínyasoán, tonga tjínnele koa̱nná josʼin si̱chjén.

3. 1) Jméni xi ngisa kʼoailee kjoandosin nga sʼiaan nga tochoasa nichxin tíjna. 2) Tojo tso Hechos 13:48, ʼyáni xi tjínnele kjoásjee.

³ Tjíoná je xo̱n kao video xi nichjén kʼianga bakoyaa. Kʼianga bakoyaa kui xi tsonile nga ʼmiyalee je chjota nga katamajinle jmeni xi tsoya je Énle Niná kʼoa nga kʼoasʼin koaikao yaole jotso je Biblia. Nga to choasa nichxin tíjna, machjén nga nʼio kʼoailee kjoandosin nga koakoyalee je chjota je Énle Niná. Kui xi tsonile nga chʼa̱sjee nganʼio nga kjoásjee je chjota xi mele nga so̱kole kjoabijnachon xi tsínkʼia fetʼa kʼoa kuinyakoaa nga choʼndale Jeobá katama (tʼexkiai Hechos 13:44-48). *

4. Jmé xi sʼiaan nga koa̱nsjainá je chjota xi mele sʼe̱le je kjoabijnachon xi tsínkʼia fetʼa.

⁴ Jmé xi sʼiaan nga koa̱nsjainá je chjota xi mele nga sʼe̱le je kjoabijnachon xi tsínkʼia fetʼa. Tokʼiaa koa̱nsjaina kʼianga kʼuínyasoán, tojo kisʼin je chjotatjenngile je Jesús kʼianga siglo 1. Kuinga machjénsíni nga si̱tjosoán jmeni xi kitso je Jesús, kitso: “Tojñani naxinandá axo ʼnde jña kuitjásʼaon, tjasjao ʼyáni xi bakinle kʼoa ya tiyo saʼnda nga kuitjoo” (Mat. 10:11, TNM). ʼYañá nga tsín kjuinrʼoé je Énle Niná je chjota xi ngʼakon kʼoa xi tsín mandosinle xi tʼatsʼe Niná. Jé fasjee je chjota xi nangitokon, je xi ñaki kʼoatjío kon nga mele skoe̱ xi tʼatsʼe je xi kixi. Tobʼelañá, kʼianga chjineyá koan je Jesús, títjon kui tsakásjai je yá xi ndakjoan kʼianga kisinda xo̱ntjoa kʼoa tsa jmesani xi kjaʼaísanile, kʼianga kʼoakisʼin kʼoati nda kisichjén je ki̱cha̱ xi koanchjénle. Kʼoa ñá, kʼoati machjén nga títjonkjoanla kjoásjee je chjota xi ndʼé tjío je ni̱ma̱le, kʼoa xijekoa̱n, ndasʼin si̱chjén jmeni xi tsjoáná je naxinandále Niná nga chjotatjenngile Cristo si̱koaa je chjota (Mat. 28:19, 20).

5. Jngo choa̱ tʼejnai jósʼin koa̱n si̱chjén jmeni xi tsjoáná je naxinandále Niná nga bakoyasoán (chótsenlai sén xi fitsʼiani kjoaʼmiya jebi).

⁵ Tojme ki̱cha̱ni tsen tsen tjínle josʼin machjén. Si̱kjaʼaitsjenla josʼin kisichjén je Jesús je ki̱cha̱ xi kisindani yá. * Tjínkʼa xi tsakʼéchoa̱ni je yá, xi tsakateni, xi kiskoxʼáni, xi kisikixini kʼoa xi tsakʼékjaoni je yá xi kisinda. Kʼoatisʼinni, kjaʼaí kjaʼaísʼin nichjén nga jngó jngó koya jmeni xi tsjoáná je naxinandále Niná kʼianga ʼmiyasoán. Nga nʼio chjíle ngayeje jebi, kataʼyala jósʼin koa̱n si̱chjén.

6, 7. 1) Jósʼin tinichjain je tarjeta de contacto. 2) Jósʼin machjénná je xo̱n xi nikáyolee je chjota nga katafi je kjoajtín.

⁶ Je tarjeta de contacto. Ningalani to ʼndí kjoan xo̱n jebi, nʼio binyakaoná nga be chjota ʼyáni je testigole Jeobá kʼoa nga katakotʼa je pájina xi tíjnaná ya Internet. Yaa koa̱nsjaisale xi tʼatsaan kʼoa koaan sijé nga katabʼaile estudio. Ndʼaibi, jetsʼato 400,000 mani chjota xi ya tjen je pájina jw.org síjéni nga mele skótʼaya je Biblia. Kʼoa nga nyaon nyaon, siento mani je chjota xi síjé nga kataʼmiyale. Kuinga machjénni nga chʼaa je tarjeta de contacto tojñani nga bitsomaa, ánni nga koa̱n kʼoainilee je chjota tojñani nga sa̱téjiaan.

⁷ Je invitación. Jao koya josʼin machjén je xo̱n xi sʼeyole chjota nga katafi je kjoajtín. Xi títjon, itsole je chjota: “A tsí matsjoali chótʼayai  Biblia kao je testigole Jeobá”. Ya xo̱n jebi tsoya nga koa̱n ya skótʼaya kʼianga satíoná je kjoajtín kʼoa tsa je chjota xi mele koaan jngo testigole Jeobá tsjoále estudio. Je xo̱n jebi ali tsa tokuijin xá machjénni nga kʼoaʼmilee je chjota ʼyáni je testigole Jeobá, kʼoati basenkaoná nga kʼoaʼmilee nga katakotʼaya je Biblia (Mat. 5:3). Toʼyani xi faʼai nga satíoná je kjoajtín nda chjoéyaa ningalani tsín mele skótʼaya je Biblia. Kʼiatsa kjoaʼaí je kjoajtín xi satíoná, ngisaa nda koa̱njinle jmeni xi tso je Biblia.

8. Ánni nga nʼio chjínile nga katafaʼai je kjoajtín xi satíoná je chjota ninga toñandia. Jngo choa̱ tʼejnai.

⁸ Nʼio chjíle nga tosi tonda sʼe̱jinkon je chjota nga katafaʼai je kjoajtín xi satíoná, ninga toñandia. Nga̱ kʼoasʼin skoe̱ni nga tsín mangóson je testigole Jeobá kao je relijión ndiso. Kui bakoyaa jmeni xi tso je Biblia kʼoa binyakaoñá je chjota nga katabe xi tʼatsʼe Niná (Is. 65:13). Kʼoakoan je Ray kao Linda, xi Estados Unidos tsʼe. Ninga makjainle xi tʼatsʼe Niná, koanjinle nga tjínnele jngo relijión koatiojin nga ngisa nda skoe̱ xi tʼatsʼe Niná. Kuinga kikotsenni josʼín nga jngó jngó relijión xi tjín ya naxinandále. Nʼio nkjín relijión tjín kʼoa nkjín yo̱ngo̱ kjio. Kʼianga koatiojin jngo relijión, kʼoasʼin kisikjaʼaitsjen nga tjínnele tjín xi koanjinle nga tosʼa kuichotítjon, kʼoa xi ijngosani, nga je xi nyatítjonle relijión tjínnele kʼoakjoan najño kʼoakjá jokjoan xi bakinle je xi Niná bexkón. Nga jenkjín nó jaʼato, jekikotsen ngakjijnda je yo̱ngo̱ xi tjín ya naxinandále, tonga tsín tsjoa kisatio kon nga̱ tsín jme xi koanjinle kʼoa je xi nyatítjonle relijión tsín ndakjoan najño xi bʼakjá. Kʼianga jekitjoni je yo̱ngo̱ xi tofetʼani kisíxatʼa, je Linda kisíxá kʼoa je Ray kini ndʼiale. Kʼianga tjenya yandiaa, je Ray tsabee jngo Ndʼia jña chotʼayá, kʼoa i kitso: “Koaanla kjoaʼasʼen kʼoa skotsen jmeni xi sʼín”. Kʼoa tokʼoakoanle nga nʼio ndasʼin kiskoeya je ndsʼee kʼoa nga ndakjoan najño yʼakjá. Je Ray tsakʼejnatítjon kʼoa nʼio tsjoa kisʼe kon tʼatsʼe jmeni xi koanjinle. Kʼoakoan tojo kitso je pastro Pablo tʼatsʼe josʼe kon jngo chjota xi tokʼia faʼaitítjon je kjoajtín, xi i̱ tso: “Ñaki kjoakixi Niná tíjnajinno” (1 Cor. 14:23-25). Saʼnda nga kʼia, je Ray ntsjaintsjai ki je kjoajtín nga taingo, kʼoa xijekoan, ki ngantsjai je kjoajtín xi satío nga jinle xomana. Kʼoati ki Linda tsanda je. Kʼoa ninga jetsʼato 70 nóle, kiskotʼaya Biblia nga jao kʼoa kisʼenngindá.

9, 10. 1) Ánni nga choa ñʼai tíjnani josʼin nichjén je tratado. 2) Tʼeyanajmí jósʼin koa̱n si̱chjén je tratado Jméni xi Reino de Dios ʼmi.

⁹ Je tratado. Jin mani je tratado xi tjíoná, xi nʼio ndasʼin binyakaoná nga tosʼa chjakaonajmí títjoán xi tʼatsʼe Énle Niná je chjota. Saʼnda nga tosʼa kitjo títjon kʼianga nó 2013, aonla jmi miyón jekitjo. Kʼianga jemaná nichjén jngoaa, jechoa ñʼai maná nga nichjén xi ngikʼa. Jósʼin koa̱n si̱chjén kʼianga tosʼa chja̱kaonajmí títjoán xi tʼatsʼe Énle Niná je chjota.

¹⁰ Tsakuila si̱chjén je tratado Jméni xi Reino de Dios ʼmi, koaan ya jña fitsʼiani koakolee je chjota kʼoa i̱ kʼuínlee: “A saje kichjonangilai yaoli jméni xi Reino de Dios ʼmi. Jósingái ji, jñánile nga jan koya jebi xi kʼoatjín”. Ni kʼoatjín jokuitso kʼoa ni mai, koakolee je pájina xi fini jñani tso: “Je Biblia itso” kʼoa kʼoéxkiaa Daniel 2:44 kao Isaías 9:6, xi tiya tratado faʼaitʼani. Tsa sa̱sénle je chjota koaan tsesa chja̱kaonajmíñá je Énle Niná. Kʼoa xi tofetʼani, koakolee je kjoachjonangi xi faʼaitʼa ya jto̱n yátsʼi̱n jñani “Jósʼin kuiyoaa kʼianga jekoatexoma je Chjotaxále Niná” tso. Tsa kʼoasʼiaan, tojo kui chja̱kaonajmíñá je chjota nga kuichochon ijngokʼalee. Kʼianga chja̱kaonajmí ijngokʼá koaan ya koakolee je kjoaʼmiya 7 xi tsʼe foyeto Énnda chjotse xi tʼatsʼe Niná tínroani, nga̱ kui jngo koya xi nichjén kʼianga bʼailee estudio je chjota.

11. Jmé xá bitjoni je rebistaná, kʼoa jméni xi tjínnele jchaa xi tʼatsʼe nga jngó jngó rebista.

¹¹ Je rebista. Je Xo̱n xi Bájinkonná kao je ¡Despertad! kui xi ngisasa nkjín én tjíofaʼatoya kʼoa kui xi ngisasa nkjín tíbʼabíson. Nga nʼio nkjín naxinandá tíbʼabíson, jmeni xi ngisa nchja̱ni rebista jebi kui jmeni xi mandosinle je chjota tojñani tsʼe. Kui xá si̱chjénñá nga kuinyakoaa je chjota nga katabe jmeni xi nʼio chjíle nichxin xi tiyoaa ndʼaibi. Nga koa̱nná ndasʼin si̱chjén, tjínnele jchaa ʼyá chjotani xi bakinle jme xi tínchja̱ni nga jngó jngó rebista.

12. 1) Jme xá bitjoni je rebista ¡Despertad!, kʼoa jósʼin binyakao je chjota. 2) Jósʼin tíbichótsjoá nga tinichjain rebista jebi.

¹² Je rebista ¡Despertad! kui xá bitjoni nga je kuinyakao chjota xi be choa tʼatsʼe Biblia kʼoa tsa tsínkjoan jme xi be. Tsakui nichxin tsín be jmeni xi bakóya je Biblia, tsa tsín sínʼiotʼa je relijión kʼoa tsakui nichxin tsín be nga nʼio chjíle je kjoafaʼaitsjen xi nya Biblia. Kui xá bitjoni je rebista jebi nga katamajinle je chjota nga tíjna je Niná (Rom. 1:20; Heb. 11:6). Kʼoati binyakao je chjota nga katamakjainle nga Énle Niná je Biblia (1 Tes. 2:13). Je xi nʼio nchja̱ni nga jan rebista ¡Despertad! xi tsʼe nó 2018 kui jebi: “El camino de la felicidad”, “12 claves para una familia feliz” kao “Ayuda para quienes están de duelo”.

13. 1) Jmé xá bitjoni je Xo̱n xi Bájinkonná xi sʼeyole chjota. 2) Jósʼin tíbichómani nga tinichjain je rebista jebi.

¹³ Je Xo̱n xi Bájinkonná xi sʼeyole chjota kui xá bitjoni nga je kuinyakao chjota xi tjínle kjoaxkóntokon kao Niná kʼoa kao je Énle. Tsakui nichxin be choa jmeni xi tso je Biblia, tonga tsín majinle jmekjoanni xi bakóya (Rom. 10:2; 1 Tim. 2:3, 4). Nga jan rebista xi tsʼe nó 2018 kui tsoya kjoachjonangi jebi: “A tojo machjénná jme xi tso je Biblia”, “Jméni xi choyalee nichxin xi nroaján” kʼoa “A mandosinle Niná xi tʼatsi”.

14. 1) Jósʼin binyakao je chjota nga ño video xi nichjén kʼianga ʼmiyasoán. 2) Jósʼin tíbichómani nga tinichjain je video jebi.

¹⁴ Je video. Kʼianga nichxinle Jesús, je xi chjineyá koan alikui kʼoakjoan ki̱cha̱ kisichjén jokjoan ki̱cha̱ xi tjín ndʼaibi. Nichxin xi tiyoaa ndʼaibi, je chjineyá kui síchjén je ki̱cha̱ xi lʼí síxákao, jolani je sierra, je taladro, je lijadora kao je clavadora. Kʼoatisʼinni, ndʼaibi tjínná je xo̱n xi Énle Niná yʼangini, tonga kʼoati nʼio nkjín video tjínná. Kʼoa ño mani je video xi koa̱n si̱chjén kʼianga ʼmiyasoán, je xi ʼmi: Ánni nga machjénsíni nga chótʼayá je Biblia, Jósʼin ʼmiyalaijin Biblia je chjota, Jméni xi ma kʼianga biyojtínjin kʼoa kao ʼYánijin xi testigole Jeobá maijin. Je xi totsʼato jngo minuto faʼa, koaan kʼia si̱chjén nga tosʼa sa̱téjin títjoán je chjota. Kʼoa je xi ngisasa nkjín minuto faʼa, koaan koakolee kʼiatsa ale je chjota, kʼoa tsa kʼiaje̱ nga jejao jan kʼa bichochonlee. Je video jebi kui xi kuinyakao je chjota nga koa̱nmele skótʼaya kʼoa koai je kjoajtín xi satíoná.

15. Tikʼaxki̱ jngui je choa̱ xi bakó jósʼin binyakao je chjota nga kui kotsenle je video xi énle faʼaitʼa.

¹⁵ Kataʼyala kʼaa choa̱ xi tsoyaná josʼin bichómani kʼianga nichjén je video kʼianga ʼmiyasoán. Jngo tichjaa xi jngo chjoón kiskajin xi ya Micronesia tsʼe kʼoa kui tsakakóle je video Ánni nga machjénsíni nga chótʼayá je Biblia kʼianga én yapés, je én xi nchja̱ je chjoón. Kʼianga tsakakóle je video, tokʼoakoanle je chjoón kʼianga kao énle faʼaitʼa je video. Kʼoa i kitso: “Je chjota xi nchja̱ i̱ video jebi kʼoasʼin nchja̱ josʼin nchja an”. Kʼoa xijekoan, kʼoakitso nga kʼoexkia jmeni xi faʼaitʼa ya jw.org kʼianga én yapés (tingósonkoai Hechos 2:8, 11). Kʼoa jngo tichjaa xi Estados Unidos tsʼe, kisikasénle je tikjaʼmele xi xin naxinandá tíjna je dirección jñani koa̱n skótsenle je video xi énle faʼaitʼa. Kʼianga jekiskotsenle video, je tikjaʼmele jngo correo electrónico kisikasénle  je tichjaa, kʼoa i kitsole: “Je xi ngisa koanndosinna kui jñani kʼoatso nga nʼio tse nganʼio tjínle kʼoa nʼio tsʼen je xi kjinentsja je sonʼnde. Kisijéña nga kataʼmiyana je Biblia”. Je ti jebi yaa tsʼe jñani tsín tjoʼndele je ndsʼee nga tsoyason.

16. Tʼeyanajmí jósʼin machjén nga jngó jngó foyeto jebi: 1) Tinóʼyalai je Niná kʼoa kuijnaní ngantsjai nichxin. 2) Énnda chjotse xi tʼatsʼe Niná tínroani. 3) ʼYáni xi kʼoatjíosʼín ndʼaibi josʼin mele Jeobá.

¹⁶ Je foyeto. Kʼiatsa jngo chjota xi tsín nanda male bʼéxkia kʼoa tsa tsín xi kao énle je xo̱n xi Énle Niná yʼangini, jósʼin koa̱n kʼuínyalee je xi kixi. Je xi koasenkaoná kui je foyeto Tinóʼyalai je Niná kʼoa kuijnaní ngantsjai nichxin. * Xi kʼoati nʼio nda basenkaoná nga bʼailee estudio je chjota kui je foyeto Énnda chjotse xi tʼatsʼe Niná tínroani. Koaan koakolee je xi 14 koya tsoyaná ya jto̱n yátsʼi̱n je foyeto jebi, chjónangilee jñanile xi ngisa mandosinle kʼoa kui chótʼayá jñanile xi skoéjin. A kʼoasʼin tinichjén je foyeto jebi kʼianga mangínchon ijngokʼalee je chjota. Je xi kʼoati koa̱n si̱chjén kʼianga ʼmiyasoán, kui je foyeto ʼYáni xi kʼoatjíosʼín ndʼaibi josʼin mele Jeobá. Je foyeto jebi, kui xá kisʼendani nga kuinyakao je xi Biblia tjíokotʼaya nga skoe̱sa xi tʼatsʼe naxinandále Niná. Nga koa̱nná josʼin si̱chjén, koaan chótʼaa je Xo̱n xi tjítʼa jme xi chotʼayá ya kjoajtín: Tʼatsʼe chjotale Cristo kao Xále Niná xi tsʼe sá marzo nó 2017.

17. 1) Jósʼin basenkao je chjota nga jngó jngó je libro xi nichjén kʼianga ʼmiyalee. 2) Jméni xi tjínnele sʼin je xi fisʼenngindá, kʼoa ánni.

¹⁷ Je libro. Kʼiatsa jngo foyeto si̱chjén nga tosʼa kʼuínya títjonlee je chjota, kʼiani bele tokoán koaan kao kui kʼuínyalee je libro Jmé kjoanni xi bakóya je Biblia. Je libro jebi nʼio nda koasenkao je chjota xi tiʼmiyalee nga koa̱njinle jmeni xi tsoya je Biblia. Kʼianga jekjoetʼale je libro jebi, kʼiatsa jekjimataja kjoamakjainle je chjota xi tiʼmiyalee, kao kui libro “Tosi tonda katasʼeno kjoatsjoachale Niná” kʼuínyalee. Je libro jebi koasenkao nga kʼoasʼin koaikao yaole jotso je kjoafaʼaitsjen xi tsjoá je Biblia. * Tjínnele sa̱kóyale je chjota nga jao libro jebi ninga tongini koaisʼenngindá. Tsa kʼoasʼin, taja sʼe̱jna je kjoamakjainle (tʼexkiai Colosenses 2:6, 7). *

18. 1) Tojo tso 1 Timoteo 4:16, jméni xi machjén nga sʼiaan, kʼoa jósʼin kuichomani tsa kʼoasʼiaan. 2) Jméni xi kuenta sʼiaan kʼianga si̱chjén jmeni xi tsen títsjoáná je naxinandále Niná kʼianga ʼmiyasoán.

¹⁸ Ñá xi testigole Jeobá maa, tjínnele koakoyasoán je Énle Niná, nga̱ kui xi koa̱nle tsjoále kjoabijnachon xi tsínkʼia fetʼa je chjota (Col. 1:5; tʼexkiai 1 Timoteo 4:16 *). Tsen títsjoáná je naxinandále Niná jmeni xi koa̱n si̱chjén kʼianga kʼuínyasoán (chótsenlai je rekuadro “ Xi nʼio nichjén nga bakoyaa”). Nda si̱chjén jmeni xi títsjoáná je naxinandále Niná. Nga jngó jngó je publicador xi kuitsoni jmeni xi sichjén nga kuitsoyason kʼoa kʼiáni nga sichjén. Xi kuenta sʼiaan kuinga tsín to xo̱n si̱kʼabiá. Kʼoati tsín koa̱n je kʼoailee chjota xi tsín mandosinle je Énle Niná. Kui xi mená nga chjotatjenngile Cristo katama je chjota xi tjíonda nga sʼe̱le je “kjoabijnachon ngantsjai”, je xi ndʼé tjío ni̱ma̱le kʼoa kao xi mele kjuinrʼoé je xi kixi tjín (Hech. 13:48; Mat. 28:19, 20).