1, 2. Jmé xá xi kisʼenele je Josué kʼianga jekʼien je Moisés.

JE Jeobá i kitsole je Josué: “Je Moisés choʼndana jekʼien. Kʼoa ndʼaibi tisótjain, titjátojin je xo̱ngá Jordán, ji kʼoa kao naxinandá, nga kuitjásʼaon je ʼnde xi tsjoale” (Jos. 1:1, 2). Ngotjo tsʼantjaiyani jme xá xi kisʼele je Josué. Me 40 nó nga ya tsakasenkao je Moisés, tonga nga jekoanni jé tsakasentítjonle naxinandá Israel.

² Kʼianga nkjín nó nga je Moisés tsakasentítjonle je naxinandá Israel, tsakui nichxin kui kisikjaʼaitsjen je Josué jósʼin naxinandá nga je koasentítjonle (Deut. 34:8, 10-12). Kʼianga kui síkʼaxki̱ Josué 1:1, 2, jngo xo̱n xi tʼatsʼe Biblia nchja̱ni, itso: “Nichxin kjoatse kʼoa kao ndʼaibi, ñʼai male je naxinandá kʼianga bʼantjaiya je xi basentítjonle”.

3, 4. Jósʼin ʼyañá nga nda kisʼin je Josué kʼianga je Jeobá kisinʼiotʼa, kʼoa jméni xi chjónangilee yaoná.

³ Je Josué tsakui nichxin kʼoasʼin kisikjaʼaitsjen nga ñʼai koa̱nle nga je koandiaale naxinandá Israel, tonga jé Jeobá kisinʼiotʼa kʼoa kitjenngi josʼin tsakándiaale (Jos. 1:9-11). Je Jeobá jngoo ánkje kisichjén nga tsakándiaale je Josué kao naxinandá Israel. Je ánkje jebi jé xi “Én” ʼmile, xi tsonile je ʼNdítjonle Niná (Juan 1:1; Éx. 23:20-23).

 ⁴ Jé Jeobá tsakasenkao je naxinandá Israel nga tsín ñʼai koanle nga kitjenngi josʼin tsakándiaale je Josué. Kʼoati nkjín koya jmeni xi tíbʼantjaiya nichxin xi tiyoaa ndʼaibi. Tsakui nichxin i̱ bixoán: “Nga ngisa nʼio tísíxá je naxinandále Niná, a ngisaa tininʼiotʼaa je Jesús, je xi séntítjonná” (tʼexkiai Mateo 23:10). *

5. ʼYáni xi kisatejin je Josué ya chrian Jericó (chótsenlai sén xi fitsʼiani kjoaʼmiya jebi).

⁵ Kʼianga to chriankʼia jaʼatojin xo̱ngá Jordán je naxinandá Israel, ya chrian Jericó, je Josué jngo chjota kisatejin xi jngo espada yʼatonntsja. Nga tsín be ʼyáni je chjota jebi, i kitsole: “A jin tijnakaonáijin axo jé kontranajin tijnakoai”. Tokʼoakoanle je Josué kʼianga kʼoakitsole nga je xi séjnatítjonle “je chjotakjoajchánle Jeobá” (tʼexkiai Josué 5:13-15). * Ningalani kʼoatso je Biblia nga je Jeobá xi tsakjákao je Josué, jngoo ánkje kisichjén (Éx. 3:2-4; Jos. 4:1, 15; 5:2, 9; Hech. 7:38; Gál. 3:19).

6-8. 1) Tsakui nichxin, ánni kʼoasʼin kisikjaʼaitsjen kʼani nga tsín ndasʼin kuichomani jme xi kitso je Jeobá. 2) Ánni kʼoabixónsíñá nga ndasʼin kichomani jmeni xi kitso je Jeobá (kʼoati chótsenlai nota).

⁶ Je ánkje kʼoakitsole je Josué jmeni xi tjínnele sʼin kʼianga tjoéle je naxinandá Jericó. Tsakui nichxin tsín koanjinle nga títjon je Josué jmeni xi tsakʼinle. Tobʼelañá, je Niná kʼoasʼin tsakʼéne nga tjínnele jtíndai yaole je xi xʼin. Tonga nkjínjin nichxin koatiokjáya kʼoa tsínjin tikoa̱n skaanni. A machjénkjoan nga kʼia kitindai yaole nga kui nichxin (Gén. 34:24, 25; Jos. 5:2, 8).

⁷ Tochajinle kui kisikjaʼaitsjen je sondado xi kitindai yaole jósʼin sitoánntjaini je familiale kʼiatsa je kontrale kuichokʼetʼale. Tonga je chjota xi ya Jericó tsʼe alikui jokisʼin, tosaa tokitsokjon. Je Biblia itso: “Nʼio kisʼechjoa je xo̱ntjoale Jericó xi totʼatsʼe chjota israelita, aliʼya xi kitjo kʼoa aliʼya xi jaʼasʼen” (Jos. 6:1). Kʼianga kʼoakoan, alikui jao tjínná nga je chjota israelita ngisaa kisinʼiotʼa josʼin tsakándiaale je Jeobá.

⁸ Kʼoa xi ijngosani, je Jeobá kʼoakitsole nga tsín jokatasíkao Jericó. Je xi tjínnele sʼin, kuinga jaon nichxin nga jngó jngó kʼa kʼoetinndaile je naxinandá kʼoa nga ñato kʼa kʼoetinndai je xi mañatoni nichxin. Tsakui nichxin tjínkʼa je sondado xi kʼoasʼin kisikjaʼaitsjen nga to nganʼiole kʼoa nichxinle sicha. Tonga je Jeobá, xi tsakándiaale je chjota israelita, nʼio nda be ánni nga kʼoakitsonile. Ndasʼin kichomani jmeni xi kitsole Jeobá je chjota israelita, kʼoa kui xi kisitaja je kjoamakjainle, kʼoa xi ijngosani, alikui koanchjén nga kiskan kao je sondado xi Jericó tsʼe (Jos. 6:2-5; Heb. 11:30). *

9. Ánni machjénsíni nga kjuintjenngiaa josʼin bándiaaná je naxinandále Niná. Jngo choa̱ tʼejnai.

⁹ Jméni xi bakóyaná jme xi koan nga nichxinle chjota israelita. Tsakui nichxin tsín majinyejená ánni nga bʼantjaiya sakʼoani josʼin bándiaaná je naxinandále Niná. Tobʼelañá, tsakui nichxin kʼoatsakixoán ánni nga tableta, tsa teléfono kʼoa tsa kjaʼaísanile xi si̱chjénñá kʼianga chótʼayá nga toñá, kʼianga ʼmiyasoán kʼoa nga feʼee kjoajtínná.  Tonga ndʼaibi tiʼyañá nga machjénná. Kuinga machjénsíni nga kjuintjenngiaa jmeni xi tso je naxinandále Niná, ningalani sakʼoa jao sʼe̱ná nga títjon. Kʼianga ʼyaa nga ndasʼin bichómani jmeni xi bʼantjaiyajin, ngisaa matajasa je kjoamakjainná kʼoa ngisaa jtín sʼin biyoaa.

10. ʼYáni xi tsakándiaale je cuerpo gobernante ya Jerusalén kʼianga tsakʼéndajin je kjoa xi kisʼe.

¹⁰ Tejanla nó koanskanni nga jechjotale Cristo koan je Cornelio, tsakatío kʼa je chjotale Cristo xi chjota judío kitjenni xi kjoacircuncisión kisitoánntjai (Hech. 15:1, 2). Kʼianga tjínkʼa xi tsín kisasenle ya Antioquía xi tʼatsʼe jebi, jé Pablo kisʼenele nga katafi ya Jerusalén jñani tjío je cuerpo gobernante nga kjaoyani kjoa jebi. ʼYáni xi tsakasenkao je cuerpo gobernante nga tsakʼéndajin kjoa jebi. Je Pablo kʼoakitso nga je Niná tsakándiaale nga ki ya Jerusalén. Alikui jao tjínná nga je Cristo tsakándiaale je cuerpo gobernante nga tsakʼéndajin je kjoa xi kisʼe (Gál. 2:1-3).

11. 1) Jósʼin kisikjaʼaitsjen je chjotale Cristo xi chjota judío kitjenni tʼatsʼe kjoacircuncisión. 2) Jósʼin tsakakó je Pablo nga kitsjoanganʼiole je chjotajchínga xi tsakatio ya Jerusalén (kʼoati chótsenlai nota).

¹¹ Jé Cristo tsakándiaale je cuerpo gobernante kʼianga kʼoakitso nga je chjotale Cristo xi tsín chjota judío kitjenni tsín tjínnele kjoanʼio sitjoson xi tʼatsʼe kjoacircuncisión (Hech. 15:19, 20). Tonga nga jejaʼato nó, nkjín chjotale Cristo xi chjota judío kitjenni xi tojo kjoacircuncisión kitjenngi. Kʼoa nga kui én kinrʼoé je chjotajchínga xi tjío ya Jerusalén nga kʼoatíʼmile je Pablo nga tsín bexkón je Kjoatéxomale Moisés, kʼoakitsole je Pablo nga katabakóle je xi kʼoatjíotsole nga sítjoson je kjoatéxoma (Hech. 21:20-26). * Kʼoatsakʼinle nga ño chjota katafikao jñani tíjna je yo̱ngo̱ nga koaisítsje yaole ánni nga skoe̱ni je chjota nga sítjoson je kjoatéxoma. Je Pablo koanjin kʼoakitso nga tsín kixi tíjna nga kʼoasʼin, nga̱ jé chjotale Cristo xi chjota judío kitjenni xi tsín majinle xi tʼatsʼe kjoacircuncisión.  Tonga nangitokon koan kʼoa kisitjoson jmeni xi tsakʼinle, nga̱ kui ngisa kini nga tjínnele jtín sʼin koatio je chjotale Cristo. Tsakui nichxin i̱ kuixoán: “Tsa toya tjen jetʼa je Kjoatéxomale Moisés kʼianga jekʼien Cristo, ánni kitsjoaʼndeni nga tsín ndi̱to̱n kisʼendajin kjoa jebi” (Col. 2:13, 14).

12. Ánni nga tse nichxin kisikʼatoni je Cristo nga koan kisʼendajin je xi tʼatsʼe kjoacircuncisión.

¹² Tjínkʼa xi ñʼai male nga majinle jmeni xi makixiyanda tʼatsʼe jmeni xi makjainná. Je chjotale Cristo xi chjota judío kitjenni kʼoati ñʼai koanle nga kisikʼantjaiya josʼin kisikjaʼaitsjen tʼatsʼe kjoacircuncisión (Juan 16:12). Ñʼai koanle nga koanjinle nga tsín tikuini kjoacircuncisión xi ndasʼin sikatío ngixko̱n Niná (Gén. 17:9-12). Tjínkʼa xi kitsokjon tsa chjota koaitjenngike xi totʼatsʼe nga tsín tikʼoasʼinni (Gál. 6:12). Kʼoa nga jeki nichxin, nga ngisasa nda koa̱njinle xi tʼatsʼe jebi, je Cristo kao karta xi kiski je Pablo tsakándiaanile (Rom. 2:28, 29; Gál. 3:23-25).

13. Jméni xi koasenkaoná nga kʼoainganʼioá josʼin tíbándiaa je Cristo nichxin xi tiyoaa ndʼaibi.

¹³ Nichxin xi tiyoaa ndʼaibi, kʼiatsa tsín majinná ánni nga sakʼoa bʼantjaiyani tsa jmeni jinnaxinandále Niná, si̱kjaʼaitsjeen jósʼin tsakándiaale Cristo je choʼndale Niná nichxin kjoatse. Tojo koan kʼianga nichxinle Josué, nga siglo 1 kʼoa kao ndʼaibi, nʼio ndasʼin tíbándiaale nga tísíkuinda je naxinandále Niná, nga tísítaja je kjoamakjainle kʼoa nga jtín sʼin tjíosíkatío (Heb. 13:8).

14-16. Nga je “choʼnda xi nʼiotʼakon, xi nda be xá” tíbándiaaná, jósʼin bakó je Cristo nga kui xi mele nga taja sa̱tío je kjoamakjainná.

¹⁴ Je “choʼnda xi nʼiotʼakon, xi nda be xá” kʼiakjoán nga choa̱le tsjoáná je kjoafaʼaitsjen xi machjénná (Mat. 24:45). Kui jebi xi bakó nga tsjoakená Cristo kʼoa nga mele ndasʼin kuiyoaa ngixko̱n Niná. Je Marc, xi ño mani je xtile, itso: “Nga tsín mele nga ndasʼin kuiyoaa ya jinjtín, je Na̱i jé familianá bʼetʼale. Kuinga ngisa kjitʼa kʼoaʼmininá ndʼaibi nga chótʼayajtían kao je familianá nga xki̱ xomana. Nʼio kʼoatíʼmile je xi jko̱ sʼin tjío ya yaniʼya nga katasíkuinda je familiale”.

¹⁵ Kʼianga ʼyaa josʼin tíbándiaaná Cristo, majinná nga mele koasenkaoná nga taja katasʼejna je kjoamakjainná. Je Patrick, jngo xi chjotajchínga sʼin tíjna, itso: “Nga títjon, tjínkʼa xi kisikinroajen kon nga kʼoasʼin kisʼendajin nga tsen tsen sa̱tío je grupo kʼianga koakoyasoán”. Tonga je ndsʼee jebi kʼoatso nga kʼoasʼin bakóni Jesús nga mandosinle je jtín. Tobʼelañá, je ndsʼee kao tichjaa xi tsokjón nga tsoyason kʼoa tsa jeje̱ xi tosakʼoa bitjotsoyason, ngisaa majinle ndʼaibi nga nʼio chjíle nga tsoyason. Kʼoa ngisaa ndasʼin tjíosíxále je Jeobá.

¹⁶ Nichxin xi tiyoaa ndʼaibi, je Cristo kʼoati basenkaoná nga ʼmiyasoán, nga̱ kui jebi je xá xi ngisa nʼio chjíle (tʼexkiai Marcos 13:10). * Je André, jngo xi chriansʼa nga chjotajchínga sʼin tíjna xi nʼio kuenta sʼín ngantsjai jmeni xi bʼantjaiyajin naxinandále Niná, itso: “Nga kʼoasʼin kisʼendajin nga tochoa koa̱nni je xi sixá nga jngó jngó sucursal, kui síkjaʼaitsjenjinná nga jenichxin fetʼa tiyoaa kʼoa nga ngisa machjén nga nʼio kʼuínyasoán”.

17, 18. Ánni nga ndatjínsíni nga si̱kjaʼaitsjenjiaan josʼin basenkaoná jmeni xi chriansʼa tíbʼantjaiyajin naxinandále Niná.

¹⁷ Josʼin tíbándiaaná je Cristo, je xi Rey sʼin tíjnaná, koasenkaoná ndʼaibi kʼoa kao nichxin xi nroaján. Kuinga machjénsíni nga si̱kjaʼaitsjeen jósʼin tíbasenkaoná jmeni xi chriansʼa tíbʼantjaiyajin naxinandále Niná. Kʼianga chotʼayajtían ya yaniʼyaná koaan kʼia chótʼayá  jmeni xi tíbʼantjaiyajin josʼin satío kjoajtínná kʼoa kao josʼin ʼmiyasoán. Tsa kʼoasʼiaan, nʼio koasenkaoná.

¹⁸ Tsa majinná nga ndasʼin bichómani josʼin bándiaaná je naxinandále Niná, kaojin kjoatsjoa si̱tjosoán. Tobʼelañá, tsjoa satío tokoán nga tsín titse tao̱n feyani kʼianga tsín tinkjín xo̱n bitjoni. Nga kui ki̱cha̱ xi sʼa kjimatsen chjotse kjimachjén, ngisaa nkjín chjota tíʼmiyasonle je Énle Niná. Tsa kʼoakoa̱nná, koaan kui ngisa si̱chjén je xo̱n kao grabación xi ya satíotʼa je pájina xi tíjnaná ya Internet. Tsa kʼoasʼiaan, jé Jesús tichjenngilee nga ndasʼin tinichjén jmeni xi tsjoáná je naxinandále Niná.

19. Ánni machjénsíni nga kʼoasʼin si̱tjosoán josʼin tíbándiaaná je Cristo.

¹⁹ Kʼianga kao ni̱ma̱ná nitjosonñá josʼin bándiaaná je Cristo sítajaa je kjoamakjainná kʼoa jtín sʼin biyoaa kao ndsʼee. Je André, je ndsʼee xi sa kanikʼaxki̱ná, i kitso xi tʼatsʼe nga koanchoa je ndsʼee xi ya Betel síxá: “Kʼianga ʼbe nga tsjoa tjíole je ndsʼee xi kitjo ya Betel, basenkaona nga sʼena kjoanʼiotʼa kao kjoaxkóntokon xi kao je. Tsjoa tjío kon je ndsʼee tojñani nikasén nga̱ kʼoasʼin tjíofitjenngi josʼin tísíxá je karrole Jeobá”.

20, 21. 1) Ánni nga tosi tonda je si̱nʼiotʼasíñá je Cristo, xi ngʼajko̱ná mani. 2) Jméni xi chótʼayajiaan ya kjoaʼmiya xi ijngo.

²⁰ Tochoasa nichxin cha nga je Jesucristo, xi ngʼajko̱ tíjnaná, sikinje kʼoa kui kʼoasʼin jmeni xi tomaxkónná (Apoc. 6:2; Sal. 45:4). Tonga ndʼaibi, tjen tísíkatíondaná nga koa̱n ya kuiyoaa sonʼnde chjotse kʼoa nga koa̱nná kʼoasʼiaan je xá xi sʼe̱, kʼianga koakoyalee je xi kjoaʼáyanile kʼoa nga kʼoainganʼioá nga ʼndenaxó koa̱n i̱ Sonʼnde.

²¹ Koaan kuitjásʼeen ya sonʼnde chjotse tsa tosi tonda si̱nʼiotʼaa je Jesús, xi Rey sʼin tíjnaná, ninga tojmeni xi koa̱n (tʼexkiai Salmo 46:1-3). * Tsakui nichxin sakʼoa ñʼai koa̱nná tsa jmeni xi kʼoantjaiyajin josʼin tinijchá yaoná kʼoa kao josʼin tinixálee je Jeobá. Jósʼiaan nga tosi tonda nyʼán sʼe̱ tokoán kʼoa nga je Jeobá si̱nʼiotʼaa, kui jebi chótʼayajiaan ya kjoaʼmiya xi ijngo.