1. Ánni bakinnile nga toje Jeobá jchaxkoán.

JE Jeobá bakinle nga toje jchaxkoán nga̱ jé kisindaná kʼoa jé títsjoáná kjoabijnachon (Apoc. 4:11). Ningalani tsjoachaa kʼoa ʼyaxkoán je Jeobá, sakʼoaa tjín jmeni xi bʼéchjoaná nga tsín toje ʼyaxkoán. Kuinga machjénni nga jchaa jméni xi bʼéchjoaná nga tsín kʼoanʼiañá. Xi títjon jchaa kui jmé xi tsoyanile nga toje Jeobá ʼyaxkoán.

2. Tojo tso Éxodo 34:14, jméni xi tsín kʼoasʼiaan tsa toje Jeobá ʼyaxkoán.

² Nga nʼio tsjoachaa je Jeobá yaa nroani nga toje ʼyaxkoán. Kʼoa nga toje ʼyaxkoán kui xi tsonile nga toje bʼetsʼoalee. Alikui kʼoaiʼndee nga jme xi kʼoechjoaná nga toje Jeobá jchaxkoán (tʼexkiai Éxodo 34:14). *

3. Ánni nga ʼyaxkónñá je Jeobá.

³ Nga ʼyaa xi tʼatsʼe Jeobá yaa nroani nga ʼyaxkoán. ʼYañá jokjoan. ʼYañá jmeni xi sasénle kʼoa jmeni xi mai. Majinná nga kui xi mele Jeobá nga tsjoa sa̱tío tokoán ngantsjai nichxin nga kʼoasʼin kjuinkoaa yaoná jotso kjoatéxomale. Tsee kjoanda tjínná nga miyole Niná maa (Sal. 25:14). Ngayeje jmeni xi ʼyaa xi tʼatsʼe Niná basenkaoná nga machriantʼalee (Sant. 4:8).

4. 1) Jmé xi síchjén je Na̱i nga tsín toje Jeobá jchaxkoán. 2) Jmé xi jchaa i̱ kjoaʼmiya jebi.

 ⁴ Jé Na̱i kjinentsja jmeni xi chon sonʼnde, kui xi mele nga kui xi chʼaotjín kʼoasʼiaan kʼoa kui batíobasenná jmeni xi nʼio nimetokoán (Efes. 2:1-3; 1 Juan 5:19). Kui xi mele nga kui katamatsjoachaa jmeni xi tjín sonʼnde kʼoa nga tsín toje Jeobá jchaxkoán. Jaola koya kataʼyaa tʼatsʼe che̱n xi batíoná. Xi títjon, kui xi mele nga kjoanyiná kjoásjee. Kʼoa xi majaoni, nga kui kʼoétsaojinkoaa xi tsín ndatjín.

5. Ánni machjénsíni nga si̱kuindalee yaoná nga tsín tao̱n koa̱ntsjoachaa.

⁵ Ngatsʼiñá nga mená sʼe̱ná je tsojmi xi ma chine, najño kʼoa kao ʼnde jñani kuiyoaa. Tonga machjén nga si̱kuindalee yaoná nga tsín tao̱n koa̱ntsjoachaa. Nichxin xi tiyoaa ndʼaibi, nʼio nkjín chjota xi tao̱n tsjoake (2 Tim. 3:2). Je Jesús be nga choa ñʼai tíjna nga kui koa̱ntsjoake je chjotatjenngile, kuinga i̱ kitsonile: “Niʼyajin xi jao naile ma síxále. Kʼoa jtike koa̱n jngo, kʼoa xijngo tsjoake, kʼoa koaitʼale jngo kʼoa xijngo chʼao skoe̱kon. Alikui koa̱n nixálao nga jao, Niná kao kjoanyiná” (Mat. 6:24). Tsa jngo chjota xi Niná bexkón tonga xi kʼoati tse nichxin síkʼayale nga kjoanyiná básjai joxi jao nai tísíxále. Alikui tsa toje Jeobá tíbexkón.

6. Jmé xi bakóyaná jokitsole Jesús je chjotale Cristo xi tsakatio ya Laodicea.

⁶ Je chjotale Cristo xi tsakatio ya naxinandá Laodicea kui tsakʼasjengʼani yaole nga nyiná koan, tsee tao̱n kisʼele kʼoa tsín jme xi kichale. Tonga ngixko̱n Niná kao Jesús alikui nda tsakatio. I kitsole je Jesús: “Likui ʼyao nga ñʼai tiyo, kʼoa nga chʼoao, kʼoa nga yo̱ma̱o, kʼoa nga xka̱o kʼoa nga tisoyojtio”. Je xi kitsole je Jesús  ali tsakuijin nga nyiná koan, kuinga kui kjoanyiná ngisa kitsjoale kjoandosin kʼoa tsín tinda tsakationi ngixko̱n Jeobá (Apoc. 3:14-17). Tsakui jekjimatsjoachaa nga nkjín tsojmi sʼe̱ná, machjén nga kjitʼanangi chja̱ʼaxinlee yaoná je kjoafaʼaitsjen jebi (1 Tim. 6:7, 8). Tsa tsín kʼoasʼiaan, kuijin koa̱ntsjoachaa je tao̱n kʼoa tsínjin tindasʼin kuiyoñá ngixkon Jeobá, nga̱ je kui xi mele nga toje jchaxkoán (Deut. 4:24). Jmé xosikaoná nga tao̱n nʼio koa̱ntsjoachaa.

7-9. Jmé xi bakóyaná jokisʼin je ndsʼee xi chjotajchínga sʼin tíjna xi David ʼmi.

⁷ Kataʼyala choa̱le jngo ndsʼee xi chjotajchínga sʼin tíjna xi Estados Unidos tsʼe xi David ʼmi. Kʼoatso nga nʼio ndasʼin kisixá. Ya jñani kisixá ngʼa xá tsakʼaile, kʼoa tʼatsʼe je xá xi kisʼin kʼoasʼin tsaʼyale nga je xi ngisasa nda kisixá ya Estados Unidos. Itso ndsʼee jebi: “Nga kui nichxin kʼoasʼin kisikjaʼaitsjen nga je Jeobá tísíchikontʼainna nga nʼio nda tisixá”. Tonga a jé Jeobá kisichikontʼain kjoaixi.

⁸ Je David koanjinle nga tsín tindasʼin tsakʼejnani ngixko̱n Jeobá xi totʼatsʼe xále. Itso: “Nga fia je kjoajtín kʼoa nga xinyasoan, tokui sikjaʼaitsjen je kjoa xi tjín ya tʼaxána. Ningalani tse tao̱n kinjena, sa tse sa tsee kjoanikjáojin kisʼena kʼoa kʼoati kisʼena kjoa ya yaniʼyana”.

⁹ Je David koanjinle nga tjínnele kui xále Niná títjon sikʼéjna. Itso: “Ñaki kʼoatsakʼe tokoan nga kʼoasʼian”. Je David jngoo xo̱n tsakʼétʼa josʼin sixá kʼoa tsa koa̱n nga ngisasa choa hora sixá, kʼoa kitsjoale xo̱n jebi je naile. Tonga nga kʼoakisʼin kisichaa xále. Kʼoa jméni xi kisʼin nga kisicha xále. Itso: “Nga koannyaonni, jngoo solicitud tsakʼenda nga mena  precursor auxiliar sʼin sixá ʼndeʼnde”. Nga tsakajngiʼa yaole, je kʼoa kao chjoónle ndʼia kisitsje. Nga jeki nichxin, je David precursor regular sʼin kisixá, kʼoa xijekoan kʼoati precursora regular sʼin kisixá je chjoónle. Alikui ʼya xi nanda tsjoake je xá xi kisʼin nga tsakajngiʼa yaole, tonga alikui kui xi ngisa kitsjoale kjoandosin. Ninga ngisa choa njele jotjín njele tsakai, masonnile nga xki̱ sá jotjín njele. Kui xále Jeobá xi ngisa tjíotsjoále kjoandosin kʼoa tjíobee josʼin tjíosíchikontʼain Jeobá nga kui Chjotaxále títjon tjíosíkatío (Mat. 6:31-33).

10. Jósʼin si̱kuindaa je ni̱ma̱ná.

¹⁰ Ni tse kʼoa ni choa tjínná, machjén nga si̱kuindaa je ni̱ma̱ná, xi tsonile alikui kʼoaiʼndee nga tao̱n ngisa koa̱ntsjoachaa kʼoa alikui kui nʼio kʼoailee kjoandosin je xá xi nʼia tikʼoajinni je xále Jeobá. Nga jchaa tsa jekʼoakjimaa, machjén nga si̱kjaʼaitsjenjiaan jebi: “A kui xána sikjaʼaitsjen kʼianga tísʼejna je kjoajtín kʼoa tsa kʼiaje̱ nga fixinyasoan. A tokui tisikjaʼaitsjen ngantsjai jókoa̱nni tao̱n xi sichjén nichxin xi nroaján. A kjoa tjínna ya yaniʼyana xi totʼatsʼe tao̱n kʼoa tsa jmesani. A tijnandaña nga kui xá sʼian xi tsín nanda ʼya xi tsjoake nga kui xá sʼín tsa tokʼoasʼin nga koa̱n ngisasa tse sixále je Jeobá” (1 Tim. 6:9-12). Kʼianga si̱kjaʼaitsjenjiaan xi tʼatsʼe jebi, kuenta sʼiaan nga tsjoakená je Jeobá kʼoa nga i̱ tsole je xi ni̱ma̱le nroajinni nga síxále: “Likui xin koatejnale, nitsjionkonjinle”. Kuinga i̱ kitsoni je pastro Pablo: “Kʼoasʼin tiyo ali kjoanyinájin nimetakon” (Heb. 13:5, 6).

11. Jósʼin koa̱nle sikitsón kjoafaʼaitsjenná je kjoasʼetsaojin xi tjín.

¹¹ Je Jeobá kui xi mele nga tsjoa sa̱tío tokoán, kʼoa tsjoa sʼená kʼianga bʼetsaojiaan. Je Biblia itso: “Tsínsa jmeni xi ngisa nda tikʼoajinni nga koakje̱n je chjota, nga skʼuí kʼoa nga katabe kjoanda xi tjenkao jokji nʼio síxá” (Ecl. 2:24). Tonga je kjoasʼetsaojin xi tjín, me ngayeje nga síkitsón je kjoafaʼaitsjenná, nga̱ tsínkui xi ndatjín tsoyaná kʼoa yaa nroani nga kui matsjoake chjota jmeni xi tsín sasénle Niná.

12. Tojo tso 1 Corintios 10:21, 22, ánni nga tjínnenile nda chósonnilee josʼin kʼoétsaojiaan.

¹² Ñá kui xi mená nga toje Jeobá jchaxkoán, kuinga tsín koa̱nni nga ya  kuiyotʼaa je “yámixa̱ xi tsʼe Nainá kao yámixa̱ xi tsʼe na̱i xi ndajin” (tʼexkiai 1 Corintios 10:21, 22). * Bichikaoñá je xi miyoná mani. Tikʼoasʼinni, kʼianga kui bʼetsaojinkoaa xi kjoatsʼen tjenkao, je kjoabʼenda, kjoachajngi kʼoa tsa jmesani xi símekon yaoná, kui xi tsonile nga ya tibichikoaa je kontrale Niná kʼoa kui tichinee xi je bʼénda. Tsa kʼoasʼiaan, tiñá nikiʼaonñá yaoná kʼoa tsín tinda biyoñá ngixko̱n Jeobá.

13, 14. 1) Jósʼin mangóson josʼin bʼetsaojiaan kao jmeni xi chinee. 2) Tojo tso Santiago 1:14, 15, ánni nga tsínkui si̱metokonsíñá je xi chʼaotjín.

¹³ Jósʼin mangóson nga bʼetsaojiaan kao jmeni xi bichiñá. Kʼianga bichaa kuenta nʼia jmeni xi chinee. Tonga kʼianga jechinee tsa jmeni alikui tiʼyañá joma ya yandsʼoaa. Yaa majngokao je yaoná jmeni xi chinee. Kʼianga kui chinee je tsojmi xi nda, basenkaoná nga tsín jme chʼin sʼená, tonga tsakui chinee je tsojmi xi tsín nda síkiʼaonná. Kʼoa alikui tokjoan kʼoama, kʼiaa bʼetʼaná nga jefi nichxin.

¹⁴ Tikʼoasʼinni, ñá chjoejiaan josʼin bʼetsaojiaan, tonga xijemani, bʼetʼale josʼin nikjaʼaitsjeen kʼoa josatío tokoán. Nga kui chjoejiaan xi ndatjín josʼin bʼetsaojiaan nda sʼe tokoán, tonga nga kui bʼetsaojinkoaa xi chʼaotjín síkiʼaonná (tʼexkiai Santiago 1:14, 15). * Alikui tokjoan ʼyaa josʼin bʼetʼaná, kʼiaa ʼyaa nga jefi nichxin. Kuinga i̱ tsoni je Biblia: “Ali chʼanachajinsalao yaono. Niná alikui taon ʼya. Je ngayije xi kʼoentje chjota kʼoatisʼin tikui kʼoexkóni. Je xi tʼatsʼe yaole bʼéntje, kʼoatisʼin tsʼe yaole kʼoexkóni xi chitsonya” (Gál. 6:7, 8). Kuinga tjínnenile chja̱ʼaxinlee yaoná ngayeje kjoabʼetsaojin xi jtike Jeobá (Sal. 97:10).

15. Jmé kjoatjao xi títsjoáná je Jeobá.

¹⁵ Nʼio nkjín je ndsʼee kao tichjaa xi nʼio tsjoake nga kotsenle jmeni xi faʼaitʼa ya JW Broadcasting^®. Jngo tichjaa xi Marilyn ʼmi, itso: “Jmeni xi faʼaitʼa ya JW Broadcasting nʼio tíbasenkaona nga̱ nʼio ndatjín ngayeje. Kʼianga ba sʼe tokoan, kui kotsenle jme xi faʼaitʼa ya JW Broadcasting kʼoa masjaina je kjoanokjoaya xi basenkaona kʼoa tsakuije̱ nga maxkia texto kʼianga tanjio. Ngayeje jebi basenkaona nga ngisa kjimachriantʼale je Jeobá kao naxinandále. Nʼio tíbasenkaona je JW Broadcasting”. A kʼoati chotsenlee tsanda ñá je kjoatjao jebi xi títsjoáná je Jeobá. Koaan chotsenlee je programa xi satío nga xki̱ sá, je video, canción kʼoa xi kjaʼaísanile.

16, 17. Ánni chósonsínilee jokji nichxin si̱kʼayalee nga kʼoétsaojiaan, kʼoa jósʼiaan.

¹⁶ Ali tokuijin xi si̱kuindalee yaoná josʼin bʼetsaojiaan. Kʼoati machjén nga chósonnilee jokji nichxin nikʼayalee. Tsa mai, ngisajin tse nichxin si̱kʼayalee nga kʼoétsaojiaan tikʼoajinni jokjitse si̱xálee je Jeobá. Tjínkʼa xi ñʼai male nga kosonnile jokjitse bʼétsaojin. Tobʼelañá, jngo tichjaa xi 18 nóle xi Abigail ʼmi, itso: “Kʼianga jemaxon nga jesikjáya, nda sʼe tokoan nga televisión kotsenle. Tonga tsa tsín skosonnile jokjitse skotsenle televisión toyajin koaina nichxin”. Kʼoa jngo ti xi  Samuel ʼmi, itso: “Sakʼoaa tse nichxin sikʼayale nga video kotsenle ya Internet. Kʼianga jeʼbe jejan kʼoa tsa ño hora nga kui tikotsenle”.

¹⁷ Jósʼiaan nga chósonnilee jokjitse kʼoétsaojiaan. Xi koasenkaoná kuinga kuenta sʼiaan jokjitse nichxin nikʼayalee je kjoasʼetsaojin. Koaan jngo calendario kʼoétʼaa jotjín hora nikʼayaa nga jngo xomana nga chotsenlee televisión, nga ya Internet bitjasʼeen kʼoa tsa kʼiaje̱ nga celularná niskákoaa. Tsa jchaa nga nʼio tse nichxin nikʼayalee, koaan kʼoétʼaxoaan jmeni xi sʼiaan. Xi títjon kʼoétʼaxoaan kui jmeni xi ngisa tjínle kjoandosin, kʼoa xijekoa̱n jokjitse kʼoétsaojiaan. Xijekoa̱n, ni̱jélee je Jeobá nga katabasenkaoná nga kuitjosonná josʼin kabʼendajiaan. Tsa kʼoasʼiaan, sʼeená nichxin nga chótʼayá nga toñá je Biblia, nga chótʼayajtían ya niʼyaná, nga kjuian kjoajtín, nga kʼuínyasoán kʼoa nga koakoyalee Biblia je chjota. Kʼoa tsa kuinje̱nginá nichxin koa̱njin kʼoétsaojin ngotjoá.

18, 19. Jósʼin koakoá nga toje Jeobá ʼyaxkoán.

¹⁸ Nga jekiski pastro Pedro jmeni xi koa̱n nga to jekjoetʼa jme xi chon sonʼnde kʼoa nga kui kinchja̱ni jokoa̱nchon nga jeʼndenaxó koa̱n, i kitso: “Kui kjoa nga tichoyalao je kjoabi, jon xi tsjoake̱no, tixítíyalao yaono nga nda koanngínkao yaono, jméni nga koa̱nsjaisínino ngixko̱n Jesucristo, nga tsín jme kjoajndí tsín jme jée sʼe̱no, kʼoa nga nyʼán kuiyo” (2 Ped. 3:14). Kʼianga nitjosoán kjoafaʼaitsjen jebi kʼoa nga bʼenelee yaoná nga tsje mangínkoaa yaoná kʼoa nga kʼoasʼin ʼyaxkoán Niná josʼin mele, kʼoasʼin bakoñá nga toje Jeobá ʼyaxkoán.

¹⁹ Je Na̱i kao jmeni xi chon sonʼnde tosi tonda kʼoechjoaná nga kui títjon xále Jeobá si̱kʼéjnaa (Luc. 4:13). Tojme kjoa xi kuitjátojiaan, alikui kʼoaiʼndee nga kui kʼoechjoaná nga je Jeobá títjon si̱kʼéjnaa. Ñaki kʼoakʼoé tokoán nga toje jchaxkoán.