1. Jósʼin bakóyaná 2 Corintios 3:1-3 nga tseni kjoanda kʼianga fisʼenngindá jngo chjota xi Biblia ʼmiyalee (chótsenlai sén xi faʼaitʼa ya portada).

NʼIO tsjoa satío tokoán kʼianga fisʼenngindá jngo chjota (Mat. 28:19, TNM). Kʼiatsa ñá tsakʼinyalee Biblia ngisaa titsjoa satíongáni tokoán (1 Tes. 2:19, 20). Jngo chjota xi chriansʼa kisʼenngindá yaa mangóson joni jngo “xo̱nkarta” xi nda nchja̱ni tʼatsaan kao tʼatsʼe jtín (tʼexkiai 2 Corintios 3:1-3). *

2. 1) Jméni xi ndatjín nga si̱kjaʼaitsjeen, kʼoa ánni. 2) Jósʼin tíjna nga estudio bʼailee chjota (chótsenlai nota).

² Tsjoa satío tokoán nga je xi ño nó tífaʼato tela millón chjota tsakʼaile estudio * nga xki̱ sá jngo tjíjtsa Sonʼnde. Kʼoa tsʼato 280,000 chjota kisʼenngindá nga xki̱ nó. Tojosʼin tiʼyaa, millón mani chjota xi tosʼa tjíokotʼaya Biblia xi sʼa cha nga koaisʼenngindá. Jósʼin koa̱n kuinyakoaa. Tsejtaa kjima Jeobá kʼoa títsjoásale nichxin je chjota nga chjotatjenngile Cristo katama. Tonga tochoasa nichxin tíjna, kuinga bʼenenilee yaoná nga binyakoaa je chjota nga̱ maxátíyale nga skoe̱ jotso je Énle Niná ánni nga koa̱n koaisʼenngindáni (1 Cor. 7:29a; 1 Ped. 4:7).

3. Jmé xi chótʼayajiaan i̱ kjoaʼmiya jebi.

 ³ Nga nʼio maxátíyale ndʼaibi nga koaisʼenngindá je chjota, je Cuerpo Gobernante kiskonangile nga jngó jngó sucursal jméni xi koa̱n sʼiaan nga kuinyakoaa je chjota xi tosʼa tjíokotʼaya Biblia nga koa̱n koaisʼenngindá. I̱ kjoaʼmiya jebi kao xi ijngo, kui jchaa jotjíosʼín kʼa superintendente xi tsʼe circuito, misionero kʼoa kao precursor (Prov. 11:14; 15:22). * Jmeni xi tso ndsʼee jebi binyakao xi jetsoyason Énle Niná kao je xi tosʼa tjíoʼmiyale Biblia. I̱ kjoaʼmiya jebi aon koya tjínni xi kuitsoyaná jmeni xi tjínnele sʼin xi tosʼa tíkotʼaya Biblia nga koa̱n koaisʼenngindá kʼoa jósʼin koa̱n kuinyakoaa.

4. Jósʼin bichómani nga toya jchxo xo̱ntjoale chjota ʼmiyalee je Énle Niná.

⁴ Nkjín ndsʼee xi toya tsoyale chjota ya jchxo xo̱ntjoale. Ningalani ndatjín nga kʼoanʼia nga tokʼia ʼmiyalee je chjota, tojngo jao minuto nga ma chjakaonajmiá kʼoa likuijin tongantsjai nga sa̱téjiaan. Nga tosi tonda tsoyale Biblia je chjota, tjínkʼa ndsʼee xi síjéle númerole teléfonole, kʼoa xijema nchjaale kʼoa tsa maije̱ mensaje síkasénle nga tsoyale Biblia. * Sakʼoaa nkjín sá faʼato kʼoa tojo kje bejin chjota jotjínni xi tʼatsʼe Niná. Alikuijin josʼin koaisʼenngindáni tsa tokʼoakji nichxin si̱kʼayalee nga skótʼaya je Énle Niná.

5. Jméni xi kitsoya je Jesús tojosʼin faʼaitʼa ya Lucas 14:28-33 xi kuinyakao je xi tosʼa tjíokotʼaya Biblia.

⁵ Je Jesús jao choa̱ kisichjén nga kitsoya jmeni xi tjínnele sʼin je xi mele nga chjotatjenngile koa̱n. Kui kinchja̱ni tʼatsʼe jngo chjota xi mele jngo torre kʼoenda kao tʼatsʼe jngo rey xi mele koaikján kao kontrale. Kʼoakitso nga je xi mele torre kʼoenda, tjínnele “skósonnile jotjín sʼe̱ngile, tsa tjínle xi machjénle nga sikjetʼa”, kʼoa kʼoakitso nga je rey títjonkjoanla skósonnile tsa koa̱n skaan kao kontrale (tʼexkiai Lucas 14:28-33). * Tikʼoasʼinni, je Jesús kʼoakitso nga je  xi mele nga chjotatjenngile koa̱n, tjínnele skósonnile jmeni xi sʼin nga chjotale Cristo koa̱n. Nga kʼoasʼin je chjota jokitso je Jesús machjén nga xki̱ xomana skótʼaya. Jósʼin koa̱n kuisenkoaa.

6. Jméni xi koa̱n sʼiaan nga ngisa ngotjo katabeni jotjínni xi tʼatsʼe Niná je xi tiʼmiyalee Biblia.

⁶ Xi títjon sʼiaan kuinga ngisasa tse kʼuínyalee je chjota ya jchxo xo̱ntjoale. Koaan nga nkjín textole Biblia kʼuínyale nga ñandia ñandia kuichonixatʼaa. Kʼianga jekoa̱nngale chjota nga tse jetiʼmiyalee, kʼoakʼuínlee tsa tjín ʼnde jña koa̱n kuiyoaa nga chótʼayá jmeni xi tso Biblia. Yaa jchañá tsa mandosin kjoaixile je Énle Niná. Kʼoa nga jenkjín kʼa tiʼmiyalee, koaan kʼoakʼuínlee tsa mele nga jao kʼa kʼuínyalee nga xki̱ xomana, nga̱ kui xi koasenkao nga ngisa ngotjo skoe̱ni jotjínni xi tʼatsʼe Niná. Ijngolasa koya kataʼyaa jmeni xi tjínnele sʼin xi tosʼa tíkotʼaya Biblia.

7. Jósʼin tjínnele kuiyondaa nga ñandia ñandia kʼuínyalee je chjota.

⁷ Nʼio tjínle kjoandosin nga tongini nda chótʼayá nga jngó jngó kʼa kʼuínyalee Biblia je chjota. Koaan títjonkjoanla kʼoéxkiaa ngayeje xi kʼuínyalee kʼoa kjoásjee je texto xi faʼaitʼa. Si̱jinlee yaoná jme xi ngisa tínchja̱ni. Si̱kjaʼaitsjenjiaan jotso je título xi faʼaitʼa, subtítulo, kjoachjonangi xi faʼaitʼa, texto xi maxkia, sén xi faʼaitʼa kʼoa tsa jme video xi koasenkaoná nga kʼuínyalee je chjota. Xijekoa̱n, si̱kjaʼaitsjenjiaan josʼin tíjna je chjota xi tiʼmiyalee kʼoa jósʼiaan nga ngisa choa ñʼai sʼin kʼuínyalee, ánni nga koa̱njinnile kʼoa nga kʼoasʼinni jotso je Énle Niná (Neh. 8:8; Prov. 15:28a).

8. Tojo kitso Pablo josʼin faʼaitʼa ya Colosenses 1:9, 10, jméni xi koa̱n sʼiaan nga kuisenkoaa xi tiʼmiyalee Biblia.

⁸ Kʼoati tongini biyondaa kʼianga bʼetsʼoalee Jeobá nga nikʼaxkiaa xi tiʼmiyalee Biblia kʼoa bʼeyanajmílee jñani ñʼai male. Kʼoakʼuínlee je Jeobá nga katabasenkaoná josʼin si̱chjén Biblia nga katabichókajin ni̱ma̱le chjota jmeni xi kʼuínyalee (tʼexkiai Colosenses 1:9, 10). * Tongini si̱kjaʼaitsjeen tsa jme xi ñʼai koa̱nle nga skótʼaya Biblia, nga̱ kui xi mena nga kuisenkoaa nga koa̱n koaisʼenngindá.

9. Jósʼin koa̱n kuisenkoaa je xi tiʼmiyalee Biblia nga tongini kʼoéjnanda.

 ⁹ Nga ntsjaintsjai skótʼaya Biblia je chjota ngisaa chjí skoe̱ jmeni xi tísʼín Jeobá kao Jesús, kʼoa kui xosikao nga tosi tonda skótʼaya (Mat. 5:3, 6). Kʼianga koasenkao jmeni xi tso Biblia, je xi tiʼmiyalee tjínnele nga ngisa kuenta sʼin jmeni xi kjimajinle. Kʼoakʼuínlee nga tongini katakotʼaya jmeni xi sa̱kóyale kʼoa nga katasíkjaʼaitsjen josʼin koaitjenngi. Koaan kuisenkoaa jósʼin nga tongini skótʼaya. * Kuisenkoaa nga koa̱nsjaile ya jin párrafo je én xi ngisa tjínle kjoandosin jñani tsoya jmeni xi tíchjonangi, kʼoa nga tochoa én koandiaangile ngisaa ngotjo kjoaʼaítsjennile jme xi tínchja̱ni párrafo. Xijekoa̱n, kʼoakʼuínlee nga jesoa kʼoakatatso josʼin majinle. Kʼoasʼin jchañá tsa nda kamajinle jme xi tichotʼayá. Kataʼyala xi majanni koya xi tjínnele sʼin xi tiʼmiyalee Biblia.

10. Ánni nga nʼio tjínnile kjoandosin nga nyaon nyaon kʼoexkia Biblia je xi tosʼa tíkotʼaya, kʼoa jméni xi tjínnele sʼin nga ngisa nda koa̱njinle jmeni xi kʼoexkia.

¹⁰ Ningalani sa̱kóya ʼndeʼndele nga xki̱ xomana je xi Biblia tíkotʼaya, kʼoati machjén nga jesoa kʼoetsʼoale Jeobá. Kʼianga skoe̱ jmeni xi tso je Jeobá kʼiaa nga nyaon nyaon kʼoexkia je Biblia (Jos. 1:8; Sal. 1:1-3). Kʼuínyalee josʼin koaitjenngi je programa jñani faʼaitʼa josʼin bʼexkiaa Biblia, xi faʼaitʼa ya jw.org kʼoa kʼoati koa̱n nga ñaki xo̱n kʼoasje. * Nga ngisa nda koa̱njinle jmeni xi kʼoexkia, katasíkjaʼaitsjenjin jmeni xi bakóyale xi tʼatsʼe Jeobá kʼoa jósʼin koaitjenngi je kjoafaʼaitsjen xi tsjoá Biblia (Hech. 17:11; Sant. 1:25).

11. Jmé xi koasenkao nga koa̱nle kʼoetsʼoa je xi tosʼa tiʼmiyalee Biblia, kʼoa ánni nga nʼio tjínnile kjoandosin nga kjitʼa kʼoasʼin.

¹¹ Kʼoakʼuínlee je xi tiʼmiyalee Biblia nga nyaon nyaon katabʼétsʼoale Jeobá. Kʼianga ʼmiyalee je chjota kʼoétsʼoaa kʼianga tongini kʼoa kʼianga jefetʼaná nga chotʼayá, kʼoa si̱kʼaxkiaa je chjota xi tiʼmiyalee. Kʼoasʼin koa̱nnile josʼin kʼoetsʼoale Jeobá nga jaʼaínle Jesucristo sichjén (Mat. 6:9; Juan 15:16). Ngisaa koa̱nchriantʼale Niná kʼianga kjitʼa kʼoetsʼoale kʼoa nga nyaon nyaon kʼoexkia Biblia (Sant. 4:8). Kʼiatsa kjitʼa kʼoasʼin, kui xi koasenkao nga miyole Jeobá koa̱n kʼoa nga koa̱n koaisʼenngindá.

12. Jósʼin kuisenkoaa je chjota xi tiʼmiyalee Biblia nga miyole Jeobá katama.

¹² Ali tokuijin xi machjén nga koa̱njinle chjota jmeni xi tiʼmiyalee, kʼoati machjén nga ñaki ni̱ma̱le katabichókajin, nga̱ yaa ni̱ma̱ná nroajinni jmeni xi nimetokoán kʼoa josʼin nikjaʼaitsjeen, kʼoa yaa nroani nga nitjosoán jmeni xi tso Énle Niná. Je Jesús nkjín koya jmeni xi kitsoya, kʼoa je chjota kao kjoatsjoa kinrʼoéle. Tonga kʼoati kuinga kinrʼoénile nga̱ kichokajin ni̱ma̱le jmeni xi kitsole (Luc. 24:15, 27, 32). Je xi tiʼmiyalee Biblia tjínnele koa̱njinle nga ñaki tíjna je Jeobá, nga kʼoasʼin katabekon nga Ninále mani, nga Nʼaile kʼoa nga Miyole mani (Sal. 25:4, 5). Kʼianga tiʼmiyalee je chjota, si̱kʼaxkiaa jokjoan je Niná (Éx. 34:5, 6; 1 Ped. 5:6, 7). Kʼianga tiʼmiyalee chjota, machjén nga kʼoati si̱kʼaxkiaa jokjoan je Jeobá, ningalani tsín ñaki kui tichotʼayá. Kuisenkoaa nga katabechjí nga bakóná kjoatsjoacha je Jeobá, nga bakó kjoanda kʼoa bakó kjoamatokon. Je Jesús kʼoakitso nga je “kjoatéxoma xi ngisa ngʼa tíjna kʼoa xi tíjnatítjon” kuinga tsjoacha koaan je Jeobá (Mat. 22:37, 38, TNM). Kuisenkoaa je chjota jokji tjen kʼoakoa̱nná nga nʼio tsjoake katama je Niná.

13. Jngo choa̱ tʼejnai jósʼin koa̱n kuisenkoaa je xi tiʼmiyalee Biblia nga katabe jokjoan je Jeobá.

¹³ Kʼianga chja̱kaonajmiá je xi tiʼmiyalee Biblia, kʼoakʼuínlee ánni nga tsjoachañá je Jeobá. Kʼoajinti koasenkao nga tjínnele simiyo je Jeobá kʼoa nga tsjoake koa̱n (Sal. 73:28). Tobʼelañá, tsa jngo xo̱n xi Énle Niná yʼangini kʼoa tsa jngo texto tichotʼayajiaan xi tʼatsʼe kjoatsjoacha, kjoachjine, kjoakixi, kʼoa kao jokji nganʼio tjínle Jeobá, koaan kʼoakʼuínlee je xi tiʼmiyalee Biblia jósʼin basenkaoná ñá jebi, kʼoa nga nkjínsa koya tjín anni nga tsjoachañá je Jeobá kʼoa nga tojngola koya xi kanikʼaxki̱lee. Kataʼyala xi maʼaonni koya jmeni xi tjínnele sʼin xi tosʼa tíkotʼaya Biblia nga koa̱n koaisʼenngindá.

14. Tojo tso Hebreos 10:24, 25, jméni xi koasenkao je xi tiʼmiyalee Biblia nga ngisa skoe̱ xi tʼatsʼe Niná.

¹⁴ Kui xi mená ngatsʼiaa nga kuicho nichxin nga koaisʼenngindá je xi tiʼmiyalee Biblia. Jngo koya xi koa̱n sʼiaan kuinga kʼoakʼuínlee nga katafi je kjoajtín xi satíoná. Tjínkʼa ndsʼee xi kʼoatso nga ngisa ngotjo majinnile xi tʼatsʼe Niná je chjota xi tokjoan fi kjoajtín nga tosʼa tíʼmiyale (Sal. 111:1). Tjínkʼa ndsʼee xi kʼoatsole je chjota xi tsoyale nga ngisa tse xi koa̱njinle  tsa koai kjoajtín, ningalani ʼmiyale nga xki̱ xomana. Kʼoéxkialee jme xi tso Hebreos 10:24, 25 * je xi tiʼmiyalee Biblia kʼoa kʼoakʼuínlee josʼin basenkaoná nga mangián kjoajtín (tʼexkiai). Kʼoati koa̱n koakolee je video xi Jméni xi ma kʼianga biyojtínjin ʼmi. * Kuisenkoaa je xi tiʼmiyalee Biblia nga ntsjaintsjai katafi je kjoajtín xi satíoná.

15. Jmé xi koa̱n sʼiaan nga kuisenkoaa je xi tiʼmiyalee Biblia nga ntsjaintsjai koai je kjoajtín xi satíoná.

¹⁵ Jméni xi koa̱n sʼiaan tsa je xi tiʼmiyalee Biblia kjesa fijin je kjoajtín xi satíoná, kʼoa tsa tosakʼoa fije̱. Koaan kʼoéyanajmílee jme xi koanjinná nga kisʼejnaná je kjoajtín, ngisaa koasenkao tsakui kʼoéyanajmílee tikʼoajinni tsa tokui kʼoakʼuínlee nga katafi kjoajtín. Koaan kʼoai jngolee je xo̱n xi tichotʼayá nga kui xomana, tsakui Xo̱n xi Bájinkonná kʼoa tsakuije̱ Xo̱n xi tjítʼa jme xi chotʼayá nga jinle xomana. Koakolee jme xi chótʼayajiaan nga sʼe̱jna ijngokʼa kjoajtín, kʼoa kʼoakʼuínlee jñánile xi ngisa sasénle. Jmeni xi skoe̱ kʼoa jmeni xi kjuinrʼoé nga tosʼa koai títjon kjoajtín, skoee nga tsín kʼoama jñani kjaʼaí religión (1 Cor. 14:24, 25). Skoe̱xkon je ndsʼee xi nda choa̱ batío kʼoa xi kuinyakao nga koa̱n koaisʼenngindá.

16. 1) Jósʼin kuisenkoaa je xi tiʼmiyalee Biblia nga koa̱n koaisʼenngindá. 2) Jméni xi chótʼayajiaan ya kjoaʼmiya xi ijngo.

¹⁶ Tojosʼin jekaʼyaa, jósʼin kuisenkoaa je xi tiʼmiyalee Biblia nga koa̱n koaisʼenngindá. Kʼianga koa̱njinle nga nʼio chjíle nga Biblia tísakóyale, kʼoakʼuínlee nga katakotʼaya nga xki̱ xomana kʼoa nga tongini katakotʼaya jmeni xi chótʼayá nga ñandia ñandia. Kʼoakʼuínlee nga nyaon nyaon katabʼétsʼoale Jeobá kʼoa nga katasímiyo. Kʼoa kʼoakʼuínlee nga katafi je kjoajtín xi satíoná (chótsenlai je recuadro “ Xi tjínnele sʼin je xi Biblia tíʼmiyale”). Ya kjoaʼmiya xi ijngo, aon koya tjínni xi chótʼayajiaan jmeni xi tjínnele sʼiaan nga kuisenkoaa je xi tiʼmiyalee Biblia nga koa̱n koaisʼenngindá.