1. Ánni tsjoa tjíoni tokoán xi testigole Jeobá maa.

NʼIO tsjoa tjío tokoán nga testigole Jeobá maa. Jaʼaínle Niná kichʼá kʼoa kʼoasʼin bakoñá nga testigole maa kʼianga ʼmiyasoán kʼoa nga Biblia ʼmiyalee je chjota. Tsjoa satío tokoán nga ʼmiyalee Énle Niná je chjota xi mele so̱kole kjoabijnachon xi tsínkʼia fetʼa nga je Jeobá katasíxále (Hech. 13:48). Kʼoatisʼin tsjoa satío tokoán jokoan je Jesús nga “nʼio koantsjoale xi tʼatsʼe Espíritu Santo” kʼianga jekichoni je chjotatjenngile nga kikakóyason kʼoa nga tsakʼéyanajmíle josʼin kitsoyason (Luc. 10:1, 17, 21).

2. Jósʼin bakoñá nga nʼio chjí ʼyaa nga ʼmiyasoán.

² Nʼio chjí ʼyatokoán nga ʼmiyasoán. Je pastro Pablo i kitsole Timoteo: “Tikuindai yaoli, kʼoa tikuindai je xi tibakoyai”. Kʼoa i kitsosale: “Kʼoasʼin kuitjo̱ntjai nga tijini, kʼoati je xi nrʼoéli” (1 Tim. 4:16). Én jebi kui bakóyaná nga xkón tjío je chjota ndʼaibi. Nikuindañá josʼin mangínkoaa yaoná nga̱ ʼyañá nga je Chjotaxále Niná batéxomaná. Nga je Jeobá ʼyaxkoán kʼoasʼin mangínkoaa yaoná josʼin mele kʼoa kʼoasʼin bakoñá nga makjainná je Énle Niná xi bakoyasoán (Filip. 1:27). Kʼoati nʼio bʼailee kjoandosin nga ʼmiyasoán nga tongini biyondaa, kʼoa jé Jeobá nijélee nga katabasenkaoná kʼianga kʼuínyalee je chjota.

3. Jósʼín je chjota nga sakóyale je Énle Niná. Jngo choa̱ tʼejnai.

³ Ninga bʼenelee yaoná nga ʼmiyasoán, tsakui nichxin tsín kjuinrʼoéná je chjota ya jñani bʼakaoná ʼmiyasoán. Kataʼyala jokoan je ndsʼee Georg Lindal, xi toje tojngo kitsoyason ya naxinandá Islandia nga nó 1929 saʼnda nó 1947. Ninga jmi xo̱n xi Énle Niná yʼangini tsakáyo, alikui ʼya xi testigole Jeobá koan. I kitso: “Tjínkʼa xi kontra tsakatiole je Énle Niná kʼoa me tongatsʼi nga tsín kisasenle”. Nga koanskanni, kicho je ndsʼee xi misionero, tonga kʼoati tsín kinrʼoé je chjota. Kʼianga jeñajan  nó jaʼato tjínkʼa chjota xi kitsjoatʼale yaole je Jeobá kʼoa kisʼenngindá. *

4. Jósatío sakʼoa tokoán kʼianga tsín nrʼoéná je chjota nga ʼmiyasoán.

⁴ Tsín tsjoa satío tokoán kʼianga tsín nrʼoéná je chjota nga ʼmiyasoán. Tsakui nichxin kʼoati satío tokoán jokoan je Pablo nga ba kisʼe kon nga tsín koankjainle je chjota judío nga je Jesús je Mesías xi tíchoyale (Rom. 9:1-3). Tonga jósʼin si̱kjaʼaitsjeen kʼiatsa nʼio tibʼenelee yaoná nga tiʼmiyalee jngo chjota kʼoa tsa tsín bakó nga mele sitjosonle Niná, kʼoa tsa chan tsín tikʼuínyanilee. Kʼoa tsa kje ʼya xi bisenkaojián nga fisʼenngindá, a kʼoasʼin si̱kjaʼaitsjeen nga ñá tjínná jée kʼoa nga tsín tísíchikontʼain Jeobá je xá xi tinʼia. I̱ kjoaʼmiya jebi kui chótʼayajiaan jebi: Xi títjon, jósʼin jchañá tsa nda tinitjosoán je xá xi kjinená nga ʼmiyasoán. Kʼoa xi majaoni, jméni xi kuenta sʼiaan kʼianga ʼmiyasonlee je chjota.

5. Ánni nga sakʼoa tsín kʼoasʼin bichómani josʼin mená nga tinixálee je Jeobá.

⁵ Je Biblia itso tʼatsʼe chjota xi kʼoasʼín josʼin mele Niná: “Tojmeni xi sʼin nda kuichotsjoá” (Sal. 1:3). Tonga jebi tsínkui xi tsonile nga ñaki kʼoakjoan koa̱n josʼin mená nga tinixálee Jeobá. Nga chjotajée maa ngatsʼiaa, kuinga kjoa sʼe sakʼoani (Job 14:1). Xi ijngosani, je chjota xi jtike je Énle Niná tsakui nichxin tsín titsjoáʼnde choatseni nga Énle Niná sa̱kóyason (1 Cor. 16:9; 1 Tes. 2:18). Jméni xi kuenta sʼín je Jeobá kʼianga ʼmiyasoán. Kʼianga koa̱njinná xi tʼatsʼe jebi kataʼyala jotso Biblia.

6. Jméni xi kuenta sʼín je Jeobá kʼianga ʼmiyasoán.

⁶ Je Jeobá kuenta sʼín jokji bʼenelee yaoná kʼoa be nga tsín tinixa̱nlee. ʼMiyasonñá nga̱ tsjoachañá je Jeobá kʼoa bʼenelee yaoná jokji tjen kʼoamaná, kʼoa kui jebi xi kuenta sʼín je Jeobá ni kjuinrʼoéná kʼoa ni mai je chjota. Je Pablo i kitso: “Niná tjínle kjoakixi, likui chajinle xáno kao je kjoatjaocha xi tsen tsaʼyanino xi tʼatsʼe jaʼaínle. Koantsen kjoatjaochabe nga kinisinlao je chjotale Cristo, kʼoa nga tojo nisinlao” (Heb. 6:10). Je Jeobá alikui chajinle nga tsjoachaa kʼoa jokji bʼenelee yaoná nga nixálee ningalani tsín nrʼoéná je chjota kʼianga ʼmiyasoán. Kʼoati ñá xotsoná je Pablo tojo kitsole je chjotale Cristo xi Corinto tsʼe, nga kitsole: “ʼYanío nga je xáno nga tiyokao Nainá ali tokjoatjaojin” (1 Cor. 15:58). Tojo nʼio chjíle je xá xi nʼia ningalani tsín kʼoasʼin bichómani josʼin mená tsakai.

7. Jmé xi bakóyaná jokitso pastro Pablo tʼatsʼe nga kitsoyason.

⁷ Je pastro Pablo nʼio ndasʼin kisitjoson je xále nga misionero koan kʼoa nʼio nkjín jtín kisatio ya jñani kikakóyason. Tjínkʼa chjotale Cristo xi ngʼa koanle kʼoa kʼoakitso nga tsín nda kitsoya je Pablo. Tonga je Pablo alikui kʼoakitso jotjín chjota tsakasenkao nga kisʼenngindá, tosaa kʼoakitso nga ngisa tse kisixále  Niná (2 Cor. 11:23). Kjuintjenngiaa je choa̱le Pablo kʼoa kuenta sʼiaan nga kui xi ngisa chjí be je Jeobá jokji tibʼenelee yaoná kʼoa nga tsín tinixa̱nlee nga tiʼmiyasoán.

8. Jméni xi kuenta sʼiaan kʼianga ʼmiyasoán.

⁸ Tsjoa sʼe kon je Jeobá nga ʼmiyasoán. Ñandia nga 70 chjotale kisikasén je Jesús nga kitsoyason. Je Biblia kʼoatso nga nʼio tsjoa kisatio kon kʼianga jekoan kitsoyason. Ánni nga nʼio tsjoa kisationi kon. I kitso: “Nda tsa na̱i xi ndajin sítjosonnajin kao jaʼaínli”. Tonga je Jesús i kitsole: “Ali nitsjoajion xi kui jebi nga ntjao̱ xi ndajin sítjosonno, tosa katatsjoano nga je jaʼaínno jetjítʼa ya ngʼajmi” (Luc. 10:17-20). Je Jesús be nga tsín tongantsjai nga nda kuichomani nga kuitsoyason je chjotale. Ningalani nkjín chjota kinrʼoéle je chjotale Cristo nga kitsoyason, alikui ʼyaa jotjín koanni xi chjotale Cristo koan nga koanskanni. Je xi tjínnele koanjinle je chjotatjenngile Jesús kuinga tsín tokui tsjoa koayani kon nga kjuinrʼoéle je chjota, je xi tsjoa koaya kon kuinga sasénle je Jeobá jokji tjíobʼénele yaole.

9. Tojo tso Gálatas 6:7-9, jósʼin kuichomani tsa tsín kjoájñálee nga kʼuínyasoán.

⁹ Tsa tsín kjoájñálee nga kʼuínyasoán, so̱koná kjoabijnachon xi tsínkʼia fetʼa. Kʼianga bʼenelee yaoná jokji tjen kʼoamaná nga ʼmiyasoán kʼoa nga Biblia ʼmiyalee je chjota, kʼoati “tʼatsʼe Espíritu Santo bʼéntje”, xi tsonile, bʼaiʼndelee nga kui nganʼiotsjele Jeobá bándiaaná. Tsa tsín kjoájñálee nga kʼuínyasoán, je Jeobá kʼoatsoná nga tsjoáná kjoabijnachon xi tsínkʼia fetʼa ninga tsín ʼya xi kuisenkoaa nga koaisʼenngindá (tʼexkiai Gálatas 6:7-9). *

10. Jmé xi kuitsoni tsa kjuinrʼoéná kʼoa tsa mai je chjota nga ʼmiyasoán.

¹⁰ Kʼiatsa kjuinrʼoéná kʼoa tsa mai je chjota nga ʼmiyasoán kui xi kuitsoni jotjío ni̱ma̱le. Kui jebi xi kitsoya je Jesús kʼianga tsakʼéjna je choa̱ xi tʼatsʼe chjota xi bántje. Je Jesús kʼoakitso nga xinxin kitsao je na̱xi̱n xi kikojndí je chjota xi na̱xi̱n bántje. Tonga toyaa nda koan tsojmintje ya jñani nda nangi kitsao je na̱xi̱n (Luc. 8:5-8). Je Jesús kʼoakitso nga je nangi kui tsoyanile jotjío je ni̱ma̱le chjota, tjínkʼa xi nrʼoé je Énle Niná kʼoa tjínkʼa xi mai (Luc. 8:11-15). Tojo koan je chjota xi na̱xi̱n kiskojndí, kʼoati tsín ʼyaa tsanda ñá josʼin kuichomani nga ʼmiyasoán, nga̱ kui xi kuitsoni jotjío je ni̱ma̱le chjota. Je xá xi kjinená kuinga tosi tonda kʼuínyasoán je Énle Niná. Tojo kitso je pastro Pablo, nga jngó jngó chjota tjoéle kjoanda tʼatsʼe xá xi sʼin, ali tsakuijin josʼin kuichomani je xále (1 Cor. 3:8).

11. Ánni kʼoabixónsíñá nga ndasʼin kichomani nga kitsoyason je Noé (chótsenlai sén xi faʼaitʼa ya portada).

¹¹ Jokji tífaʼato nichxin, tjínkʼa chjota xi tsín nrʼoé kʼianga tsoyason je choʼndale Niná. Tobʼelañá, je Noé nʼio nkjín nó nga kitsoyason je Énle Niná (2 Ped. 2:5). Je Noé kuijin xi koanmele nga kjuinrʼoé je chjota, tonga je Jeobá alikui kʼoakitsole tsa kʼoasʼin je chjota. Kʼianga kʼoakitsole nga sinda je arca, i kitsole: “Tjínneli kuitjásʼain ya arca ji kʼoa kao xtili kao chjoónli kʼoa kao yánchjínle xtili” (Gén. 6:18). Kʼianga kʼoakitsole Jeobá josiká je arca, je Noé koanjinjinle nga tochoa chjota kjuinrʼoé nga kuitsoyason (Gén. 6:15). Kʼoa kʼoakoan kjoaixi, nijngojinla chjota koankjainle nga kitsoyason (Gén. 7:7). Je Jeobá alikui kʼoakitso tsa toxitsjoa nga kitsoyason je Noé, tosaa kʼoakitso nga nʼio nda  kisixá, nga̱ ñaki kʼoakjoansʼin kisitjoson jokitsole (Gén. 6:22).

12. Jméni xi tsakasenkao Jeremías nga tsjoa kisʼe kon nga kitsoyason ninga tsín kinrʼoéle je chjota kʼoa ninga tsakatiochjoale.

¹² Je profeta Jeremías kʼoati nʼio nkjín nó nga kitsoyason ningalani tsín kinrʼoé je chjota kʼoa ningalani tsakatiochjoale. Nga tokitso tokoannile chjota kʼoa nga totsabesin kisikʼajenle kon kʼoa kʼoakitso nga tsín tikuitsoyasonni (Jer. 20:8, 9). Tonga alikui kisixa̱nle. Jméni xi tsakasenkao nga tsín tikʼoasʼin kisikjaʼaitsjenni kʼoa nga tsjoa kisʼe kon nga kitsoyason. Jao koya tjínni xi nʼio chjíle xi kuenta kisʼin. Xi títjon, kuinga kuinyakao chjota je Énle Niná nga sʼe̱le kjoachoya (Jer. 29:11). Xi majaoni, nga je kiskoéjin Jeobá nga kuinchja̱ni xi tʼatsʼe (Jer. 15:16). Ñá kʼoati kui ʼmiyalee je chjota jmeni xi tsjoále kjoachoya nga ñʼai chon sonʼnde ndʼaibi kʼoa kui nokjoañá xi tʼatsʼe Jeobá nga testigole maa. Nga kuenta nʼia nga jao koya jebi tsjoa sʼe tokoán nga ʼmiyasoán ni kjuinrʼoéná je chjota kʼoa ni mai.

13. Jméni xi bakóyaná je choa̱ xi tsakʼéjna Jesús tojo tso Marcos 4:26-29.

¹³ Nichxin tjenkao nga nʼio sʼejna kjoamakjainle chjota. Je Jesús kui kitsoya xi tʼatsʼe jebi kʼianga tsakʼéyanajmí choa̱le chjota xi na̱xi̱n kojndí xi bajnafe (tʼexkiai Marcos 4:26-29). * Chjota jebi tsabee nga tobijbi koanngʼa jmeni xi tsakʼéntje kʼoa tsín koan jokisʼin nga ngotjo koanjcháni. Kʼoati ma nga Énle Niná ʼmiyalee chjota, nichxin tjenkao nga tobijbi nʼio sʼejna kjoamakjainle. Tojo ma je chjota xi tsojmintje bántje nga tsín koa̱nle josʼin nga ngotjo koa̱njcháni je tsojmintjele, kʼoati ma je chjota xi Biblia ʼmiyalee, alikui koa̱n kʼoénelee nga ngotjo koa̱nkjainnile. Alikui si̱kʼajenlee tokoán kʼoa tsín si̱xa̱nlee tsa tsín ndi̱to̱n síkʼantjaiya yaole chjota josʼin mená. Tojo sʼín je chjota xi tsojmi bántje nga tsejta ma, kʼoati machjén nga tsejta koaan kao je chjota xi Biblia ʼmiyalee nga kuicho nichxin nga je Niná sixále (Sant. 5:7, 8).

14. Jmé choa̱ xi bakó nga sakʼoa nʼio tse bichómani nga nrʼoé Énle Niná je chjota.

¹⁴ Tjín ʼnde jñani tsín nrʼoé chjota je Énle Niná ninga jenkjín nó nga tísakóyason. Kataʼyala jokoan Gladys kao Ruby Allen, xi ndichja mani, xi Canadá tsʼe. Kʼianga nó 1959, precursora regular sʼin kinikasén ya Quebec. * Je chjota jé naʼmi católico kitsokjonke kʼoa kui kitsokjonle jokuitso je chjota, kuinga tsín kinrʼoéni je Énle Niná. Je Gladys itso: “Kʼianga ʼmiyasuinjin jinjin hora ʼmiyasuinjin nga xki̱ ndʼia xki̱ ndʼia kʼoa jao nó nga kʼoakinʼiaijin, tonga niʼyajinla xi kinrʼoé. Je chjota toyaa jchxo ventanale beninajin kʼoa tokjoan bʼéchjoa. Tonga tsín kinikʼajenlaijin tokuinjin”. Nga jeki nichxin chaan tsín tikʼoakisʼinni je chjota kʼoa kinrʼoé je Énle Niná. Ndʼaibi, jan jtín tjío ya ʼnde jebi (Is. 60:22).

15. Jméni xi bakóyaná 1 Corintios 3:6, 7 tʼatsʼe nga chjotatjenngile Cristo nikoaa je chjota.

¹⁵ Machjénná nganʼiole xíngiaa nga chjotatjenngile Cristo koa̱n jngo chjota. Binyakaoñá ngatsʼiaa xi tiyoaa ya jinjtín nga fisʼenngindá jngo chjota (tʼexkiai 1 Corintios 3:6, 7). * Tobʼelañá, tsa jngo tratado kʼoa  tsa jngo revista tsjoále jngo ndsʼee chjota xi koa̱nndosinle je Énle Niná. Tsakui nichxin tsín kʼoakoa̱nle je ndsʼee nga koaisíxatʼa ijngokʼa chjota jebi kʼiani nga koanmele skótʼaya. Kuinga kjaʼaí ndsʼee kʼoatsonile nga katafisíxatʼa. Je ndsʼee estudio tsjoále chjota jebi kʼoa kʼoatsole xi ngikʼa nga katafikao nga tsjoále estudio. Kʼoa nga jngó jngó ndsʼee binyakao chjota jebi nga besa xi tʼatsʼe Jeobá. Tojo kitso je Jesús, tsjoa satío kon ngatsʼi xi binyakao chjota xi Biblia ʼmiyale nga fisʼenngindá (Juan 4:35-38).

16. Ánni nga tsjoa kʼoéni tokuin nga kʼuínyasuin jokji tjen kʼoakoa̱nli ningalani jetínroajen nganʼioli kʼoa tsa chʼin tíbʼetʼali.

¹⁶ Koaan tsjoa kʼoái tokuin nga kʼuínyasuin ninga tsín tichókjoanili nga tse ʼmiyasuin xi totʼatsʼe nga jetínroajen nganʼioli kʼoa tsa chʼin tíbʼetʼali. Kataʼyala jokoan je rey David kao chjotale kʼianga kisikjeson je chjota amalequita xi kichosíchéle. Kitjoénile je familiale kao je tsojmi xi koanchéle. Jao siento koanni chjotale David xi tsín ki nga kikján nga̱ jenʼio kijtale, kʼoa jé kisikuinda je tsojmi xi tjíosale. Kʼianga jejaʼaini David nga kikján, kʼoakitso nga ngóson ngóson tjín kʼoakaole je tsojmi xi kisokole (1 Sam. 30:21-25). Kʼoati ma nichxin xi tiyoaa ndʼaibi nga tíʼmiyason je Énle Niná jngo tjíjtsa Sonʼnde. Ninga tsín kʼoakoa̱nná kʼoakji kʼuínyasoán josʼin mená tsakai, tsa kʼoénelee yaoná nga kʼoasʼiaan jokji tjen kʼoakoa̱nná nga si̱xálee Jeobá, tsjoa sa̱tío tokoán ngatsʼiaa kʼianga jngo chjota skoe̱ xi tʼatsʼe Jeobá kʼoa koaisʼenngindá.

17. Ánni nga bʼainilee kjoanda je Jeobá.

¹⁷ Bʼailee kjoanda je Jeobá nga̱ nʼio chjí be josʼin tinixálee. Be nga tsín koa̱n kjoanʼio kʼoénelee chjota nga katanrʼoéná. Kui kuenta sʼín jokji bʼenelee yaoná nga nixálee kʼoa nga kuinga tsjoachaa nga kʼoanʼiañá, kʼoa je Jeobá tsee kjoanichikontʼain tsjoáná. Kʼoati bakóyaná jósʼiaan nga tsjoa sa̱tío tokoán nga ʼmiyasoán je Énle (Juan 14:12). Alikui jao tjín tokoán nga tsjoa sʼe kon je Jeobá kʼiatsa tsín si̱xa̱nlee.