1. Jméni xi fiya jkoaa kʼianga je nikjaʼaitsjeen jngo chjota xi tjínle kjoamatokon.

KʼIANGA je nikjaʼaitsjeen jngo chjota xi tjínle kjoamatokon, jé fiya jkoaa jngo chjota xi ndʼé kʼoa xi tjotʼa jme xi tjínle. Kʼoa tsakui nichxin je faʼaitsjennáje̱ je chjota samaritano xi kinchja̱ni Jesús. Chjota jebi tsakakóle kjoamatokon je chjota judío xi chjotaché kisikiʼaon. Je chjota samaritano koanmake je chjota judío, kʼoa nga tjínle kjoatsjoacha kikao tsʼe chjinexki (Luc. 10:29-37). Choa̱ jebi kui bakóná jokjoan je Niná nga tjínle kjoatsjoacha kʼoa nga nyaon nyaon bakóná kjoamatokon.

2. Jósasʼin sakóná kjoamatokon.

² Jngo chjota xi tjínle kjoamatokon alikui kjoañʼai tsjoále jngo chjota ninga bakinle nga kʼoanikao. Je Jeobá kʼoasʼin bakóná kjoamatokon, tojo kitso je xi kiski jngo salmo, tsín kʼoasíkaoná “josʼin bakinná tʼatsʼe jée xi tibijnyaa” (Sal. 103:10). Kʼianga ai jée bajngi jngo chjota, je Jeobá batekjáyale josʼin tjen ndiaale.

3. Jmé xi chótʼayajiaan i̱ kjoaʼmiya jebi.

³ I̱ kjoaʼmiya jebi kui chótʼayajiaan jmeni xi tso Biblia xi tʼatsʼe jebi: ánni bakóni kjoamatokon je Jeobá, jósʼin tíjna kʼianga bichakjáyaná kʼoa nga sakóná kjoamatokon, kʼoa jmé xi koasenkaoná nga koakoá kjoamatokon.

4. Ánni bakóni kjoamatokon je Jeobá.

⁴ Kuinga tsjoakená je Jeobá nga bakóni kjoamatokon. Je pastro Pablo kʼoakitso nga tjínle kjoamatokon je Niná. Kʼianga kʼoakitso kui kinchja̱ni nga je Niná kiskoéjin kʼa chjota  i̱ Sonʼnde nga ya koai ngʼajmi (Efes. 2:4-7). Tonga ali tsa tojejin chjota xi ya tjínle kjoachoya ya ngʼajmi xi bakóle kjoamatokon je Niná. Itso jngo salmo xi kiski David: “Je Jeobá bakóle kjoanda ngatsʼi, kʼoa kao jmeni xi kisinda bakóni je kjoamatokonle” (Sal. 145:9). Kʼianga tsjoakená je Jeobá bakóná kjoamatokon kʼianga tjen ndiaale.

5. Jósʼin tsabeni je Jesús nga tjínle kjoamatokon je Jeobá.

⁵ Je Jesús nda be nga bakó kjoamatokon je Jeobá. Je Jesús jmi nó nga ya tsakʼejnakao Nʼaile ya ngʼajmi nga kjesa faʼaijin i̱ Sonʼnde (Prov. 8:30, 31). Nkjín kʼa tsabe josʼin bakóle Niná kjoamatokon je chjota (Sal. 78:37-42). Kʼianga kitsoya je Jesús me tokjitʼa nga kui kisikʼaxki̱ josʼin bakó kjoamatokon je Nʼaile.

6. Jmé choa̱ xi tsakakóya Jesús nga koa̱njinná nga tjínle kjoamatokon je Nʼaile.

⁶ Tojosʼin tsaʼyaa ya kjoaʼmiya xi jaʼato, je Jesús kui tsakʼéyanajmí tʼatsʼe choa̱le je ti xi ki nga kitsoya josʼin bakó kjoamatokon je Jeobá. Je ti xi kinchja̱ni Jesús xin ki kʼoa kisikjeya “xi kitsʼaikjoatjaole” nga tsín nda kikao yaole (Luc. 15:13). Kʼianga jeki nichxin kʼoakoannile jmeni xi kisʼin kʼoa kini ndʼiale. Jókisʼin je nʼaile ti jebi. Ti jebi alikui nʼio tse kiskoya. Je Jesús i kitso: “Kʼia nga kjinsa tíjna, nʼaile tsabe koanmake, kitokanʼio, kitsoakjá, nʼio tsakʼéndsoʼa”. ʼNdele nga totaon skoe̱, je nʼaile ti jebi tsakakóle kjoamatokon, kisichatʼale kʼoa kiskoétjao ijngokʼa. Ningalani tse jée tsakajngi ti jebi, je nʼaile kisichatʼale nga̱ kʼoakoannile jme xi kisʼin. Je choa̱ xi kitsoya Jesús, je xi nʼai ma jé Jeobá tsoyanile. Nga kʼoakitso je Jesús, kui kitsoya nga je Nʼaile síchatʼale chjota xi ai jée bajngi kʼianga kʼoama kjoaixinile jme xi kasʼín (Luc. 15:17-24).

7. Jósʼin tíjna je kjoachjine xi tjínle Jeobá kao kjoamatokon xi tjínle.

⁷ Kuinga tjínle kjoachjine je Jeobá nga bakóni kjoamatokon. Je kjoachjinele Jeobá nʼio basenkaoná. Je Biblia kʼoatso nga je kjoachjine xi ngʼá nroani tsee “kjoamatakon xi tjínle” kʼoa “nda xále” (Sant. 3:17). Tojo sʼín jngo nʼai xi tsjoake je ʼndíxtile, je Jeobá be nga kuinyakaoná je kjoamatokon xi bakóná (Sal. 103:13; Is. 49:15). Jebi nʼio nda binyakaoná ninga chjotajée maa. Nga nʼio tjínle kjoachjine je Jeobá, bakóle kjoamatokon je xi ai jée bajngi kʼianga tjen ndiaale. Tonga kʼoati kosonnile josʼin bakó kjoamatokon. Nga nʼio tjínle kjoachjine je Niná, alikui toxkia sʼín kʼoa tsín totsjoáʼndeyeje.

8. Jméni xi tjínnele ma sakʼoa, kʼoa ánni.

 ⁸ Tsa jngo chjota xi tsín kʼoakoa̱nnile je jéele kʼoa tosi tonda koa̱njngijée, je Pablo kʼoakitso nga tsín koa̱n nga tosi tonda je si̱miyoaa chjota jebi (1 Cor. 5:11). Je chjota xi tsín kʼoamanile je jée xi bajngi, bichonsjejin naxinandále Niná. Kuinga bichonsjejinni chjota jebi nga makuinda je ndsʼee xi kixi tjíofitʼale Jeobá, nga̱ kui xi mele Jeobá nga tsje sʼin kʼoéjna naxinandále. Tjínkʼa xi kʼoatso nga tsín kjoamatokonle Niná sakóle je xi bichonsjejin. Chótʼayajinla xi tʼatsʼe jebi.

9, 10. 1) Tojo tso Hebreos 12:5, 6, ánni kʼoabixónsíñá nga kjoamatokon sakóle je xi bichonsjejin naxinandále Niná. 2) Jmé choa̱ni xi nʼio nda tsoyaná josʼin tíjna jebi.

⁹ Ba sʼe tokoán kʼianga kʼoatso én faʼa ya jinjtín nga tsínti testigole Jeobá mani jngo xíngiaa. Tsakui nichxin kʼoasʼin si̱kjaʼaitsjeen nga tsínkjoan machjén nga tsakichonsjejin. Tonga nga kʼoanikao jngo chjota kʼoasʼin sakónile kjoamatokon. Ngisaa ndatjín nga tikjáyale jngo chjota kʼiatsa tjen ndiaale nga kʼoakoa̱n, kʼoa kʼoasʼin sakónile kjoamatokon kao kjoatsjoacha (Prov. 13:24). Kʼianga bichonsjejin naxinandále Niná jngo chjota, sakʼoa kui basenkao nga kʼoamanile jme xi kisʼin. Nʼio nkjín xi tsakichonsjejin naxinandále Niná xi kʼoatso nga kui tsakinyakao je kjoafaʼaitsjen xi kitsjoale xi chjotajchínga sʼin tjío nga kisikjaʼaitsjenjin ijngokʼa, nga kisindaya yaole kʼoa nga kisichriantʼa ijngokʼanile Jeobá (tʼexkiai Hebreos 12:5, 6). *

¹⁰ Si̱kjaʼaitsjenjinla choa̱ jebi. Kʼianga be nga tímʼe jngo barréle je chjota xi cho̱ koʼnda, tjínnele nga tʼaxin sikʼéjna je barréle nga sixkile. Tonga je barré alikui ngale nga tʼaxin batio, kui xi mele nga ya koatiojinle xínkjín kʼoa tsín sasénle nga tʼaxin nikatío. Kʼiatsa je xi koʼnda barré tʼaxin sikʼéjna je barré xi tímʼe, a kui xi tsonile nga totaon tíbe. Mai. Je xi cho̱ koʼnda majinle nga kʼoati tjóchʼinle je barré xi ngikʼa kʼiatsa tosi tonda ya kʼoéjnajinle je barré xi tímʼe. Nga tʼaxin síkʼéjna síkuinda ngatsʼi barré xi ngikʼa (tingósonkoai Levítico 13:3, 4).

11. 1) Ánni nga ya ningósonkaoni je chjota xi bichonsjejin naxinandále Niná kao jngo barré xi tímʼe. 2) Jmé xi kuinyakao xi jetsakichonsjejin naxinandále Niná.

¹¹ Joni jngo barré xi tímʼe yaa mangóson je chjota xi bichonsjejin naxinandále Niná (Sant. 5:14). Tojo ma je chʼinʼbi, kʼoatisʼinni jngo chjota xi tsín tinda tíjnani ngixko̱n Niná, tsakui nichxin kʼoati skénngi xi ngikʼa nga kui kʼoasʼin xi chʼaotjín. Kuinga sakʼoa bichonsjejinni naxinandále Niná jngo chjota xi bajngijée. Nga kʼoanikao jngo chjota kʼoasʼin bakónile kjoatsjoacha Jeobá je choʼndale xi kixi fitʼale, kʼoa kui xi koasenkao nga kʼoakoa̱nnile jéele je xi bichonsjejin. Je xi bichonsjejin naxinandále Niná, koaan koai kjoajtín nga̱ yaa sa̱kóyale xi tʼatsʼe Niná ánni nga nʼio sʼe̱jna ijngokʼani kjoamakjainle. Kʼoati koa̱n koasjai xo̱n kao video xi bʼasje naxinandále Niná kʼoa skótsenle JW Broadcasting^®. Kʼoa kʼianga skoe̱ xi chjotajchínga sʼin tjío nga jetísíndaya yaole, koaan tsjoá sakʼoale kjoafaʼaitsjen xi koasenkao nga nda kʼoéjna ijngokʼani ngixko̱n Niná kʼoa nga testigole Jeobá koa̱n ijngokʼa. *

12. Jmé xi sʼin xi chjotajchínga sʼin tjío nga koakole kjoatsjoacha kao kjoamatokon jngo chjota xi tsín kʼoamanile je jéele.

¹² Kuenta sʼiaan nga toje xi bichonsjejin naxinandále  Niná je xi tsín kʼoamanile je jée xi bajngi. Je xi chjotajchínga sʼin tjío be nga tsín tokjoaská tjenkao nga jngo kjoa sʼendajin, kʼoa tjínnele nga sikjaʼaitsjenjin tsa machjén nga kuichonsjejin naxinandále Niná jngo chjota kʼoa tsa mai. Kʼoati be nga je Jeobá kʼoasʼin batekjáya “jokji tjen choa̱le” (Jer. 30:11). Je xi chjotajchínga sʼin tjío tsjoake je ndsʼee kʼoa alikui mele nga kui kʼoasʼin xi chʼaosʼin sikatío ngixko̱n Niná. Tonga sakʼoa machjén nga bichonsjejin naxinandále Niná jngo chjota xi bajngijée, nga̱ kʼoasʼin sakónile kjoatsjoacha kao kjoamatokon.

13. Ánni nga tsakichonsjejinni ya jtín xi kisʼejna ya Corinto jngo chjotale Cristo.

¹³ Kataʼyala josʼin tsakʼéndajin kjoa je pastro Pablo kʼianga siglo 1 nga tsín kʼoakoannile je jéele jngo chjota. Je chjotale Cristo jebi xi Corinto tsʼe kisichajngi nga̱ jé tsakʼejnakao chjoónle nʼaile. Nʼio chʼao kisʼin chjota jebi, nga̱ je Jeobá i kitsole naxinandá Israel: “Je chjota xi chjoónle nʼaile bajnakao alikui tíbexkón je nʼaile. Tjínnele ni̱kʼien nga jao” (Lev. 20:11). Je Pablo alikui kʼoakitsole je jtín xi kisʼejna ya Corinto nga katasíkʼien chjota jebi, tonga kʼoakitsole nga katamʼaonsjejin jinjtín. Nga tsakajngijée chjotale Cristo jebi kisikiʼaon je jtín, nga̱ tjínkʼa xi kʼoasʼin kisikjaʼaitsjen nga tsín nʼio ai jée xi tíbajngi (1 Cor. 5:1, 2, 13).

14. Jósʼin tsakakóle kjoamatokon Pablo je chjota xi tsakichonsjejin je jtín xi kisʼejna ya Corinto, kʼoa ánni (2 Corintios 2:5-8, 11).

¹⁴ Kʼianga jeki nichxin, je Pablo kisʼejinle nga jekisindaya yaole chjota xi tsakichonsjejin naxinandále Niná kʼoa nga kʼoakoan kjoaixinile je jéele. Ningalani chʼaosʼin tsʼaxki̱ je jtín nga tsakajngijée chjota jebi, je Pablo kʼoakitso nga tsín kisikʼatone choa̱le jokisikao. Kʼoakitsole je xi chjotajchínga sʼin tsakatio nga katasíchatʼale kʼoa nga katasínʼiojin. Kʼoa kʼoakitsole ánni nga kʼoasikaoni. Kitsole: “Jméni nga je xi kʼoakisʼin likui ya kjoejin kjoaba xi nʼio tse”. Je Pablo koanmake chjota jebi nga̱ kʼoakoannile je jéele. Je pastro Pablo kui xi koanmele nga tsín nʼio sikjáojin kʼoa nga tsín nʼio sibale kon chjota jebi xi totʼatsʼe je jée xi tsakajngi, nga tosa kui katabásjai nga jchatʼa je jéele (tʼexkiai 2 Corintios 2:5-8, 11). *

15. Jósʼin batekjáya je xi chjotajchínga sʼin tjío, tonga jósʼin bakó kaoni kjoamatokon.

 ¹⁵ Tojo sʼín je Jeobá, je xi chjotajchínga sʼin tjío kʼoati bakó kjoamatokon. Batekjáya kʼianga tjen ndiaale, tonga kʼoati bakó kjoamatokon kʼianga kʼoamanile jéele chjota xi bajngijée. Kʼiatsa tsín koatekjáyale je xi bajngijée, alikuijin tjíobakó kjoamatokon kʼoa totjíotsjoáʼndejin jme xi kjima. A tojé xi chjotajchínga sʼin tjío xi tjínnele koako kjoamatokon.

16. Tojo tso Proverbios 21:13, jósikao Jeobá je xi tsín bakó kjoamatokon.

¹⁶ Ngatsʼiñá nga mená koakoá kjoamatokon tojo sʼín je Jeobá. Ánni. Kuinga tsín nrʼoéle Jeobá je xi tsín bakóle kjoamatokon xi kjaʼaí (tʼexkiai Proverbios 21:13). * Nga mená nga kjuinrʼoéná je Jeobá kʼianga kʼoétsʼoalee, kuinga tsín totaon ʼyañá xi kjaʼaí. ʼNdele nga tojtaya si̱koaa je xi kjoañʼai tífaʼá, tosaa binyakoaa kʼoa mangíntjenngiñá je kjoafaʼaitsjen xi tsjoá Biblia nga tso: “Alijme kjoamatakon xi sʼe̱ xi tʼatsʼe je xi tsínkui tjínle kjoamatakon” (Sant. 2:13). Tsa nangitokon maa kʼoa tsa ʼyaa nga machjén nga sa̱kóná kjoamatokon, kʼoatisʼin bakoá kjoamatokon tsanda ñá. Ngisaa machjén nga koakolee kjoamatokon jngo xi tsakajngijée xi faʼaijin ijngokʼani jinjtín.

17. Jmé xi kisʼin David nga ñaki kʼoatjín kon nga tsakakó kjoamatokon.

¹⁷ Ya Biblia nkjín choa̱ faʼaitʼa josʼin koakolee kjoamatokon xi kjaʼaí kʼoa nga tsín totaon jchaa. Si̱kjaʼaitsjenla je rey David, xi nkjín kʼa tsakakó kjoamatokon. Je Saúl koanmele kisikʼien David, tonga je David tsakakóle kjoamatokon nga̱ koanjinle nga je Niná tsakasénnda Saúl kʼoa tsínkʼia kisijndani jme xi koantʼain (1 Sam. 24:9-12, 18, 19).

18, 19. Kʼiáni nga jao kʼa tsín tsakakó kjoamatokon je David.

¹⁸ Tonga je David tsín tongantsjai nga tsakakó kjoamatokon. Tobʼelañá, kʼianga tokitso tomanile je Nabal kʼoa nga tsín kitsjoale tsojmi xi tsakjenni je David kao chjotale, nʼio koanjtile je David kʼoa kʼoakitso nga sikʼien je Nabal kʼoa nga sikjeson ngatsʼi xi tjío niʼyale. Tonga je Abigaíl, je chjoónle Nabal, tokjoan kikonle je David kʼoa ngasin nganda tsakjákaonajmí. Nga kʼoakisʼin je Abigaíl alikui njín tsakʼéjten je David (1 Sam. 25:9-22, 32-35).

¹⁹ Je profeta Natán ñandia nga kui tsakʼéyanajmíle je David tʼatsʼe jngo chjotanyiná xi kisichéle barréle jngo chjota xi tojngo mani barréle xi nʼio tsjoake. Je David nʼio koanjtile kʼoa i kitso: “Josʼin nga tíjnakon Jeobá, je chjota xokisʼin tjínnele nga ni̱kʼien” (2 Sam. 12:1-6). Je David be nga kʼoatso kjoatéxoma nga tjínnele ño barré tsjoángajaoni kʼiatsa jngo barré kisiché chjota (Éx. 22:1). Nʼio kisikʼatone jokitso kʼianga tjínnele si̱kʼien je chjota xi barré kisiché. Je Natán kui choa̱ kisichjén  nga katamajinle je David nga ngisa tse jée tsakajngi je. Je Jeobá ngisaa tsakakóle kjoamatokon je David tikʼoajinni josʼin kisikjaʼaitsjen je tʼatsʼe chjota xi kinchja̱ni je Natán (2 Sam. 12:7-13).

20. Jmé xi bakóyaná je choa̱le David.

²⁰ Nga tokui kini je David nga koanjtile, kʼoakitso nga bakinle ni̱kʼien je Nabal kao ngatsʼi chjotale. Kʼoa xi jeki nichxin, je David kʼoakitso nga katanikʼien je chjota xi kinchja̱ni je Natán. Tsakui nichxin kʼoakuixoán ánni nga kʼoakitsoni je David nga̱ nda chjota. Nga kui nichxin alikui ndatjín kon tʼatsʼe jée xi tsakajngi. Kʼianga nikʼatoné choa̱le jobixoán tʼatsʼe xi ngikʼa kʼianga nikʼaxkiaa, yaa bakoñá nga tsín tinda tiyoñá ngixko̱n Niná. Je Jesús i kitso: “Ali jéejin fanao, jméni nga tsín jée koanenino” (Mat. 7:1, 2). Kuinga tsín koa̱n jée kjoáneñá xíngiaa kʼoa kʼoénelee yaoná nga koakoá kjoamatokon tojo sʼín je Niná.

21, 22. Jósʼin koakoá kjoamatokon.

²¹ Kʼianga bakoá kjoamatokon ali tsa tokuijin nga kʼoabixoán nga mamachaa je chjota. Koaan si̱kjaʼaitsjenjiaan ngatsʼiaa jósʼin kuinyakoaa je xíngiaa, je ndsʼee kao chjota xi ya tsʼe jñani ʼmiyasoán. Nkjín koya josʼin koa̱n koakolee kjoamatokon. A ʼyaxkonñá tsa ʼyani xi machjénle nga si̱nʼioá kon. A koaan kjuinkaole tsa ʼyani je tsojmi xi ma chine kʼoa tsa josasʼin kuisenkoaa. A tíjna jngo ndsʼee ya jinjtín xi jaʼaikʼejnajin ijngokʼani naxinandále Niná xi machjén nga si̱nʼiojiaan kʼoa kʼoainganʼiolee. A koaan kʼuínyalee Énle Niná je chjota. Tsa kʼoasʼiaan, kʼoasʼin koakonilee kjoamatokon (Job 29:12, 13; Rom. 10:14, 15; Sant. 1:27).

²² Nkjín koya josʼin koa̱n koakolee kjoamatokon je chjota kʼiatsa kuenta sʼiaan ʼyani xi nganʼio machjénle. Kʼiatsa koakoá kjoamatokon nʼio tsjoa sʼe̱ kon je Niná xi bakóná kjoamatokon.