Nga sa nkjín sa nkjín koanni xi kitsoyason kʼoati sa nkjín sa nkjín xo̱n koanchjén. Yaa Betel xi tíjna Brooklyn (Nueva York, Estados Unidos) kitjo je revista, tonga tojo kjaʼaí chjota sʼexále nga bʼasje libro xi pasta dura tjínle. Nkjín sá nga tsín tikitjoni je libro kʼoa kuinga tsín tikitsoyasonni je ndsʼee. Je ndsʼee Rutherford kʼoakitsole je ndsʼee Robert Martin, xi je kjinele nga bitjo je xo̱n, tsa koa̱n nga kʼoati kʼoasje libro.

Je ndsʼee Martin i kitso: “Tokʼoakoannajin nga kʼoatsakʼinnajin, nga̱ jngo ʼnde koa̱nchjénnajin jñani koa̱n satíonda ngayeje jmeni xi machjén nga koa̱n kuitjo je libro”. Je ndsʼee yaa kisʼin renta jngo ndʼia ya calle Concord, número 18, ya Brooklyn kʼoa kisokole ngayeje jmeni xi koanchjénle.

Tonga tjínkʼa xi tsín tsjoa kisatio kon nga kʼoakoan. Je chjota xi séntítjonle jñani sʼexále tsakai nga bʼasje libro, kichokotsen jñani sʼa kisʼenda chjotse nga kuitjo je libro kʼoa i kitso: “Kui máquina xi ngisasa nda xi tjínno nga koa̱n chʼa̱sjao je libro, tonga tsín ʼyao jósʼin si̱xákao. Nga kuicho jaon sá jejin chitson ngayeje”.

Je ndsʼee Martin i kitso: “Tsakui nichxin kʼoatjín kjoaixi jmeni xi kitso chjota jebi, tonga alikui kuenta tjíosʼín je Nainá, nga̱ ʼyañá nga je basenkaoná ngantsjai”. Kʼoatjín kjoaixi jokitso je ndsʼee Martin, tochoatse jaʼato nga 2,000 libro kitjo nga nyaon nyaon.

Je choʼndale Jeobá jesoaa tsakʼasje kʼa libro xi kisichjén, tonga kʼoati kisichjén je radio nga kitsoyason je Énle Niná. Je ndsʼee Rutherford kʼiaa kinchja̱ya títjon radio nga taingo koanxon nga 26 sá febrero nó 2019 nó 1922. I ʼmi kjoanokjoaya xi kitsjoa: “Millón mani xi  tjío ndʼaibi xi tsínkʼia kuiyá”, kʼoa kui estación KOG xi tíjna ya Los Ángeles (California, Estados Unidos) kisichjén nga kitsoya.

Je chjota xi kinrʼoé 25,000 koanni. Tjínkʼa xi carta kisikasén nga kitsjoa kjoanda. Tobʼelañá, je Willard Ashford xi ya Santa Ana (California) tsʼe, kʼoakitsole je ndsʼee Rutherford nga nʼio nda kitsjoa kjoanokjoayale kʼoa nga nʼio nda tso jmeni xi kitsoya. I kitsosa: “Alikuijin koan kinoʼyaijin kjoanokjoaya jebi tsa tsín ya radio kinokjoayai, nga̱ jan mani chjota xi chʼin tjínle xi tjío ya yaniʼyana, alikuijin koan kinoʼyaijin ninga tiya chrian kinokjoayani”.

Xi koanskanni, je xomana xi jaʼatosa, nkjínsa discurso jaʼa ya radio. Kʼianga jeje nó, je revista The Watch Tower kʼoatso én xi jaʼaitʼa nga janla siento jmi koanni chjota xi ya tjen radio kinrʼoénile je Énle Niná.

Nga kʼoasikji nkjín chjota kinrʼoé Énle Niná, je Chjota xi kotʼaya Biblia kui tsakʼénda jngo estación xi tsʼe radio ya ʼnde jñani Staten Island ʼmi, ʼnde jebi tiyaa chrian tíjnani ya Betel xi tíjna Brooklyn. Kʼianga koanskanni, je Chjota xi kotʼaya Biblia kui radio jebi kisichjén, je WBBR nga kitsoyason je Énle Niná.

Je revista The Watch Tower xi tsʼe 15 de junio de 1922, kʼoatso én xi jaʼaitʼa nga jngo kjoajtíntse sʼe̱jna ya Cedar Point (Ohio) tjen 5 saʼnda 13 sá septiembre nó 1922. Nʼio tsjoa kisatio kon je Chjota xi kotʼaya Biblia xi kicho.

Nga tosʼa tsakʼétsʼiakao nga kinchja̱ya je ndsʼee Rutherford, i kitso: “Ñaki kʼoatjín tokoan nga je Nainá […] sichikontʼain nga sʼe̱jna kjoajtíntse jebi, kʼoa jé xosʼin nga nʼio nkjín chjota sa̱kóyasonle Énle Niná i̱ Sonʼnde”. Je xi kʼoati kinchja̱ya ya kjoajtíntse jebi nkjín kʼa kʼoakitso nga katatsoyason je ndsʼee.

Nga bixine, 8 sá septiembre jinla jmi koanni chjota xi ya kichosʼen jña tísʼejna kjoajtíntse, nga̱ nʼio tsjoa tjíole nga kjuinrʼoé je kjoanokjoaya xi tsjoá je ndsʼee Rutherford. Kui xi koanmele nga kuitsoya je ndsʼee jósʼin tsoyanile je letra xi “ADV” tso xi kisʼetʼa  xo̱n xi tsakʼaile. Kʼianga kicho, nʼio nkjín xi ya kiskotsenle je lona xi nʼioje kji xi kjixkóya xi ya kitjen jña tíjna plataforma. Je Arthur Claus xi ya kini ya tjen Tulsa (Oklahoma, Estados Unidos) yaa kichokʼejna jñani nda kjuinrʼoé kʼoa nga kʼia nʼio ñʼai koanle xi ya kicho nga̱ tsín tsa micrófono koanchjén kʼoa tsín aparato nga kui nichxin.

Xi tsakʼétsʼiakao kjoajtíntse kʼoakitso nga tsín ʼya xi koa̱n kjoaʼasʼen nga tísʼejna kjoajtíntse kʼianga jetíjna kjoanokjoaya ánni nga tsín ʼya xi sikitsónjinni. Kʼianga 9:30 nga tanjio kʼiaa tsakʼétsʼiakao kjoanokjoayale je ndsʼee Rutherford, kui kisikʼaxki̱ jmeni xi kitso Jesús, tojosʼin faʼaitʼa ya Mateo 4:17: “Jenroa machrian kjoatéxomale ngʼajmi”. Kʼianga kitsoya josʼin kjuinrʼoé Énle Niná je chjota, i kitso: “Jesoa Jesús xi kʼoakitso nga sʼe̱xkó chjota kʼianga jetíbatéxoma, nga sikatíoxkó je xi ñaki chjotatjenngile ma xi kixi fitʼale”.

Je ndsʼee Claus yaa chrian tsakʼejna jñani jaʼa je ndsʼee xi kinchja̱ya, kʼoa i kitso: “Nʼio nda tsakinyañuijin jmeni xi jaʼa”. Tonga kitjochʼinle kʼoa kitjoo. Ninga tsín mele kuitjo tsakai nga̱ be nga tsín tikʼoaiʼndenile nga kjoaʼasʼen ijngokʼa.

Tojngo jao minuto jaʼato nga nda kisʼe ijngokʼani kon. Nga jetínroá ijngokʼani jñani tínchja̱ya je ndsʼee Rutherford kinrʼoéle nga nʼio kisijtsinya ntsja je chjota, kʼoa nʼio tsjoa kisʼe kon. Saʼnda kʼoasʼin kisikjaʼaitsjen nga ya koaikʼejnason ndʼia ánni nga koa̱n kjuinrʼoénile kjoanokjoayale je ndsʼee. Nga kui nichxin 23 nóle, kʼoa kimijon ya ndʼia jñani tísʼejna je kjoajtíntse. Kʼoa nga tixʼa̱ choa ya sonngʼale ndʼia, nʼio nda kinrʼoé je kjoanokjoayale ndsʼee Rutherford.

Tonga je Arthur tsabe nga kʼoati ya tjíokʼa miyole ya sonngʼa ndʼia. Kʼoa jngo miyole xi Frank Johnson ʼmi, xi i̱ kitsole: “A tsí kichʼa jngui navaja xi yao”.

 Jaon, yʼaña kitso je Arthur.

Jótonda kichʼai, kuikjoán xi kanijélaijin je Niná nga kabʼetsʼoalaijin. A tiʼyaní je lona xi kjixkóya, én tjítʼa kʼoa kui xo jebi tjínʼioni. Nda tinóʼyalai je juez, a kʼianga i̱ kuitso: “Tixónyao, tixónyao...”, kʼia tichái nga ño nʼó jebi.

Je Arthur jeyʼatonntsja navaja nga tíkoyale kʼianga kʼoakuitso je ndsʼee. Kʼoa tojngo jaosa minuto jaʼato nga tojeme sikjetʼa kjoanokjoayale ndsʼee Rutherford. Nga nʼio tsjoa tjín kon, nʼio kinchja̱ nga i̱ kitso: “Ñaki kʼoatʼao tokon kʼoa ñaki kixi tangíntʼalao je Nainá. Tosi tonda takoyason saʼnda nga jchangi je Babilonia. Tʼinyason Énle Niná ngakjijnda kao ya jñani nʼio kjin. Ngatsʼi chjota tjínnele sʼe̱jinle nga je Jeobá xi Niná kʼoa nga je Jesucristo xi Rey sʼin tíjnale je xi batéxoma kʼoa jé xi Nai sʼin tíjnale je xi nai ma. Jmeni xi kjima ndʼaibi nʼio tjínle kjoandosin. Koeni, je Rey jetíbatéxoma. Kʼoa jonño xi koanngínkaoson én. Kuinga tixónyaño, tixónyao, tixónyao xi tʼatsʼe Rey kao tʼatsʼe Chjotaxále”.

Je Arthur kʼoakitso nga kʼia tsakate kao ndsʼee xi ngikʼa je nʼó xi kitsoa lona kʼoa nga tobijbi kitjojndáya. Je én xi tjítʼa itso: “Tixónyao xi tʼatsʼe Rey kao tʼatsʼe Chjotaxále”. Je letra xi “ADV” tso kui fitsʼianile je én xi advertise tso nga én inglés, xi “tixónyao” tsonile nga jefaʼatoya.

Je kjoajtíntse xi kisʼejna ya Cedar Point nʼio tsakinyakao je ndsʼee nga kui ngisa kitsjoale kjoandosin nga kitsoyason, kʼoati nʼio tsjoa kisatio kon nga kitsjoanganʼio je xi tjíonda nga kitsoyason. Jngo colportor (xi precursor ʼmile ndʼaini) xi ya Oklahoma tsʼe, i kitso: “Yaa tsakʼinyasuinjin jñani bitjo je ki̱xo̱n kʼoa ya ʼnde jebi nʼio ma̱ tjío je chjota”. Kʼoakitso nga me tongantsjai nga kjiʼndá je chjota xi ya tsʼe kʼianga sʼejinle jmeni xi tso je én xi faʼaitʼa ya revista The Golden Age. Kʼoa i kitsosa je ndsʼee: “Nʼio tsjoa satío tokuinjin nga ninʼiuijin kon”.

Je Chjota xi kotʼaya Biblia koanjinle nga nʼio maxátíyale nga sa̱kóyason, tojo kitso je Jesús josʼin faʼaitʼa ya Lucas 10:2: “Nʼio tse xi majchá, tonga tochoa mani xi síxá”. Nga to jetífikjetʼa xi tikuini nó, ñaki kʼoatjío kon nga kuitsoyale ngatsʼi chjota je Énle Niná.