1. Jósʼin síkjaʼaitsjen chjota ndʼaibi tʼatsʼe kjoachjine xi faʼaitʼa Biblia (Proverbios 1:20, 21).

 NGAKJIJNDA ʼyale je xi tsoyason Énle Niná nga tsjoa tjío kon kʼianga tsoya jñani nʼio tjín chjota, nga tsjoále chjota je xo̱n xi Énle Niná yʼangini. A sa jetsʼakaoli ji nga kʼoasʼin ʼmiyasuin. Tsa jekʼoasʼin tsakʼinyasuin kuijin kinikjaʼaitsjain jmeni xi ningósonkao je kjoachjine tojosʼin faʼaitʼa ya libro xi tsʼe Proverbios. Nga kʼoatso nga nʼio tínchja̱ je kjoachjine ya jinle chjota nga katanrʼoé kjoafaʼaitsjen xi tsjoá (tʼexkiai Proverbios 1:20, 21). b Je Biblia kao xo̱n xi Énle Niná yʼangini ñaki kjoachjine kjoaixi xi faʼaitʼa, je kjoachjine xi tʼatsʼe Jeobá nroani. Kui én jebi xi machjénle chjota nga koa̱n ya koaiya ndiaa xi tsʼe kjoabijnachon. Tsjoa satío tokoán nga ʼya xi kjoe je xo̱n xi Énle Niná yʼangini, tonga tsín tongatsʼi chjota nga kjoé. Tjínkʼa xi kʼoatso nga tsín mele skoe̱ jmeni tsoya je Biblia. Tjínkʼa xi tobijnokená nga̱ kʼoasʼin síkjaʼaitsjen nga tsín timachjénni je kjoafaʼaitsjen xi faʼaitʼa Biblia, kʼoa kʼoatso nga tsín kixi tíjna jmeni xi tsoná je Biblia nga sʼiaan. Kʼoa nga je xi kui kjoatéxoma xi faʼaitʼa Biblia fitjenngi nga síkʼatone choa̱le kʼoa nga tsín jme xi sasénle. Ninga kʼoalani, je Jeobá ngasin nganda kʼoatítsole ngatsʼi chjota nga katanrʼoé je kjoachjine. Jméni xi tísʼín Jeobá.

2. Jósʼin koa̱nsjainá xi ñaki kjoachjine nichxin xi tiyoaa ndʼaibi, tonga jósʼín je chjota.

² Jñánile xi jngo koya xi síchjén Jeobá kʼianga katanrʼoé chjota je xi ñaki kjoachjine. Kui je Biblia síchjén. Me tongatsʼi  chjota nga kjiole Biblia. Jé Jeobá tísíchikontʼain je xá xi kjima nga tsʼato 1,000 én tíbitjo je xo̱n xi ya Biblia yʼangini. Nʼio nda binyakao je xi nrʼoé, xi tsonile, xi bʼéxkia Biblia kao xo̱n xi Énle Niná yʼangini kʼoa xi sítjoson jmeni xi tso. Tonga me tongatsʼi chjota nga tsín nrʼoé je xi ñaki kjoachjine. Kʼianga jme xi sʼín tokui fini josʼin síkjaʼaitsjen kʼoa tsa kjaʼaí chjota síjéle kjoafaʼaitsjen. Tsakui nichxin saʼnda bʼasjenginá nga kui nitjosoán jmeni xi tso Biblia. I̱ kjoaʼmiya jebi kui chótʼayajiaan ánni nga kʼoasʼínni je chjota. Kuila títjon kataʼyaa jósʼin so̱koná je kjoachjine xi tʼatsʼe Jeobá nroani.

3. Jméni xi sʼiaan nga sʼe̱ kjoaixiná kjoachjine.

³ Kʼianga sʼená kjoachjine kui xi tsonile nga kui mangíntjenngiaa je kjoafaʼaitsjen xi sʼená kʼianga jmeni xi nʼia. Tonga tjínsa xi machjén. Je Biblia itso: “Nga nokjonchá Jeobá yaa nroani nga sʼená kjoachjine, kʼoa je kjoankjíntokonle xi nʼio ngʼa tíjna kui je kjoamajintokon” (Prov. 9:10). Kuinga kui kuenta sʼianñá je kjoankjíntokon xi tsjoáná je xi Nʼio tsje, kʼianga jmeni xi sʼiaan, xi tsonile, kui kuenta sʼiaan josʼin síkjaʼaitsjen Jeobá. Je kjoankjíntokon jebi yaa faʼaitʼa Biblia kao xo̱n xi Énle Niná yʼangini. Tsa ya kjoásjaiyaa kʼoasʼin koakoñá nga tjín kjoaixiná kjoachjine (Prov. 2:5-7).

4. Ánni nga tʼatsʼe Jeobá nroani je xi ñaki kjoachjine.

⁴ Tʼatsʼe Jeobá nroani je xi ñaki kjoachjine (Rom. 16:27). Ánni kʼoabixónsíñá. Xi títjon, kuinga je kisindaná kʼoa nʼio nda be tʼatsʼe ngayeje xi kisinda (Sal. 104:24). Xi majaoni, jmeni xi sʼín je Jeobá bakó nga nʼio chjine (Rom. 11:33). Kʼoa xi majanni, binyakao ngantsjai je xi fitjenngi kjoafaʼaitsjen xi tsjoá (Prov. 2:10-12). Tsa mená nga chjine koa̱n kjoaixiaa, machjén nga ñaki kʼoakʼoé tokoán nga kʼoatjín je xi jan koya kanikʼaxkiaa, kʼoa kui kuenta sʼiaan kʼianga jme xi chjoéjiaan kʼoa jme xi sʼiaan.

5. Jósʼin tjíobatio chjota nga tsín makjainle nga tʼatsʼe Jeobá nroani je xi ñaki kjoachjine.

⁵ Nʼio nkjín chjota xi ʼmiyasonlee xi kʼoatso nga nʼio naskásʼin koannda jmeni xi tjín i̱ Sonʼnde, tonga tsín makjainle nga Niná kisinda, tosaa kui makjainle tʼatsʼe evolución. Tjínkʼa xi kʼoatso nga makjainle tʼatsʼe Niná, tonga kʼoatso nga tsín timachjénni ndʼaibi je kjoafaʼaitsjen xi tsjoá Biblia, kʼoa tosa tokui fini josʼin síkjaʼaitsjen. Jósʼin tíbichómani nga kʼoasʼin síkjaʼaitsjen chjota. A ngisaa nda tjíobatio nga tokui fini josʼin síkjaʼaitsjen, nga tsínkui kuenta sʼín je kjoachjine xi tʼatsʼe Niná nroani. A tsjoa tjío kjoaixi kon kʼoa a tjínle kjoachoya tʼatsʼe nichxin xi sʼa nroa. Mai. ʼYañá nga ñaki kʼoatjín jmeni xi tso én jebi: “Tsín kjoachjine, tsín kjoamajintokon, kʼoa nijmejin kjoafaʼaitsjen tjín xi koa̱n kontra kʼoéjnale je Jeobá” (Prov. 21:30). Nga ʼyaa jebi kui xi basenkaoná nga tosi tonda nijélee je Jeobá je xi ñaki kjoachjine. Tonga ánni nga me tongatsʼini chjota nga tsín kʼoasʼín.

6. Tojo tso Proverbios 1:22-25, ʼyáni xi tsín binyáño je xi ñaki kjoachjine.

⁶ Nʼio nkjín xi tsín nrʼoé kʼianga chja̱ ya yandiaa je kjoachjine. Je Biblia kʼoatso nga jan koya tjínni je chjota xi bʼasjengi je kjoachjine: “Xi tsínle kjoafaʼaitsjen”, “xi sinʼa” kao “chjotachini” (tʼexkiai Proverbios 1:22-25). c  Chótʼayajinla ánni nga bʼasjengini chjota jebi je kjoachjine xi tʼatsʼe Niná nroani kʼoa jméni xi sʼiaan nga tsín ya koa̱nngósoán chjota jebi.

7. Ánni nga tjínkʼani chjota xi toxá tsín menile nga sʼe̱le “kjoafaʼaitsjen”.

⁷ Je “xi tsínle kjoafaʼaitsjen” jé xi tomakjainyejele jmeni xi ʼmile kʼoa xi ngotjo chʼanachanile (Prov. 14:15, nota). Kʼianga ʼmiyasoán nʼio nkjín chjota satéjiaan xi kʼoasʼín. Je xi nyatítjonle religión kao chjota político millón chjota bʼanachale. Kʼoa tjínkʼa chjota jebi xi tsín nda satío kon kʼianga sʼejinle nga tokachʼanachanile. Tonga je chjota xi síkʼaxki̱ ya Proverbios 1:22 toxá je xi tsín menile nga sʼe̱le kjoachjine (Jer. 5:31). Je xi nʼio tsjoake kuinga to kjoafaʼaitsjenle fini kʼianga jme xi sʼín. Tsín mele nga skoe̱ jmeni xi tso Biblia kʼoa tsín mele nga kui kjoatéxoma koaitjenngi. Nʼio nkjín xi kʼoasʼin síkjaʼaitsjen tojo kitso jngo chjoón xi ya Quebec (Canadá) tsʼe. I kitsole jngo testigole Jeobá xi tsakjákaonajmí: “Tsa je naʼmi xi bʼanachanajin koainda tsʼejin, alikui tsa jin tjínnajin jée”. Alikui mená nga je chjénngilee chjota xi toxá sʼínni nga tsín mele sʼe̱le kjoafaʼaitsjen (Prov. 1:32; 27:12).

8. Jmé xi koasenkaoná nga chjine koaan.

⁸ Je Biblia kʼoatsoná nga katasʼená kjoafaʼaitsjen. Itso kjoafaʼaitsjen xi tsjoáná: “Jchínga katamao tʼatsʼe kjoafaʼaitsjenno” (1 Cor. 14:20). Sʼená kjoachjine kʼianga nitjosoán je kjoafaʼaitsjen xi tsjoáná Biblia. Tobijbi majinná nga je kjoafaʼaitsjen xi tsjoá Biblia kui xi basenkaoná nga nʼio nda chjoejiaan jmeni xi nʼia. Kʼoati basenkaoná nga tsín kjoa jtsaojiaan. Ndatjín nga si̱kjaʼaitsjenjiaan jókji kjoachjine jetjínná. Tobʼelañá, tsa jekjoatse nga tichotʼayá Biblia kʼoa jekjoatse nga mangián kjoajtín, tonga tsa kje bʼaitʼajinlee yaoná Jeobá kʼoa tsa kje mangínsʼenngindájián, koaan si̱kjaʼaitsjenjiaan ánni nga kje kʼoanʼiajinñá. Kʼoa tsa jetsangínsʼenngindá, a jengisa nda ʼmiyasoán kʼoa a jengisa nda bakoyalee Biblia chjota. Kʼianga jme xi nʼia, a kui kuenta nʼia jotso kjoafaʼaitsjen xi tsjoáná Biblia. A kʼoanikoaa xi ngikʼa tojo kisʼin je Jesús. Tsa ʼyaa nga machjén nga si̱ndayaa yaoná, kuenta sʼiaan jotso kjoafaʼaitsjen xi tsjoáná Jeobá. Nga̱ je Jeobá “síchjinee je xi tsínle kjoafaʼaitsjen” (Sal. 19:7).

9. Jósʼin bakó je chjota xi sinʼa nga bʼasjengi je xi ñaki kjoachjine.

⁹ Je xi majaoni koya chjota xi tsín kuenta sʼín je kjoachjinele Niná jé chjota “xi sinʼa”. Satéjinñá chjota xi kʼoasʼín kʼianga ʼmiyasoán. Nʼio tsjoake kʼianga besin xi kjaʼaí (Sal. 123:4). Je Biblia tongini kʼoakitso nga nʼio nkjín chjota xi sinʼa sʼe̱ kʼianga jetífikjetʼa nichxin (2 Ped. 3:3, 4). Tojo kisʼin je xkaʼndale Lot, tjínkʼa chjota xi kʼoati sʼín ndʼaibi, alikui kuenta sʼín jmeni xi tso Niná (Gén. 19:14). Nkjín chjota xi tobijnokená nga kʼoasʼin mangínkoaa yaoná jotso Énle Niná. Je chjota jebi tokui fini josʼin síkjaʼaitsjen (Jud. 7, 17, 18). Jmeni xi tso Biblia tʼatsʼe chjota xi sinʼa, kʼoasʼín je xi yátsʼi̱n binyále Niná kao xi tsín sasénle tʼatsʼe Jeobá.

10. Tojo tso Salmo 1:1, jméni xi koasenkaoná nga tsín kʼoati sʼiaan josʼín je chjota xi sinʼa.

¹⁰ Jméni xi koasenkaoná nga tsín kʼoati sʼiaan josʼín je chjota xi sinʼa. Alikui koa̱n nga ya si̱miyoaa je xi totsín sasényejele (tʼexkiai Salmo 1:1). d Kui xi tsonile nga tsín koa̱n kui kuinóʼyalee kʼoa tsín koa̱n kui kʼoéxkiaa jmeni xi tso je chjota xi yátsʼi̱n binyále Niná. Tsa tsín si̱kuindaa yaoná tsakui nichxin kʼoati tsín tisa̱sénniná jmeni xi kʼuínná, kʼoa to jao sʼe̱ tokoán jmeni xi tsoná Jeobá kao naxinandále. Kʼianga tsín kʼoakatamaa, si̱kjaʼaitsjeen jebi: “A tsín sasénna jmeni xi bʼantjaiyajin josʼin bakóyaná naxinandále Niná kao kjoafaʼaitsjen xi  tsjoá. A kui kuenta sʼian jñani tsín nda sʼín je ndsʼee xi bándiaaná”. Tsa kʼoalanisʼin nikjaʼaitsjeen, si̱ndayaa yaoná kʼoa tsjoa sʼe̱ kon je Jeobá (Prov. 3:34, 35).

11. Jósʼin síkjaʼaitsjen je “chjotachini” tʼatsʼe kjoatéxomale Jeobá.

¹¹ Je xi majanni koya chjota xi bʼasjengi je kjoachjine jé “chjotachini”. Kuinga kʼoaʼminile nga̱ tsín mele kʼoasʼin fikao yaole jotso kjoatéxomale Niná. Tokui fini jmeni xi ndatjín male (Prov. 12:15). Bʼasjengi je Jeobá, je xi tsjoá kjoachjine (Sal. 53:1). Kʼianga satéjiaan chjota jebi nga ʼmiyasoán, nkjín xi totso tomaniná nga kʼoasʼin mangínkoaa yaoná jotso kjoatéxomale Niná. Je Biblia itso: “Alikui masjaile je chjotachini xi ñaki kjoachjine; alikui jme xi tso ya xo̱ntjoale naxinandá” (Prov. 24:7). Alikui josʼin koasenkaoná jmeni xi tso chjotachini. Kuinga i̱ tsoniná Jeobá: “Kjin tijnalai je chjotachini” (Prov. 14:7).

12. Jméni xi koasenkaoná nga tsín kʼoati sʼiaan josʼín je chjotachini.

¹² Alikui kʼoanʼia josʼín je chjota xi jtike kjoafaʼaitsjen xi tsjoá Niná. Tosaa tsjoachaa josʼin síkjaʼaitsjen Niná kao kjoatéxomale. Kʼianga ngisasa tsjoacha koaan je Jeobá kao kjoatéxomale kʼiaa nga kuenta sʼiaan josʼin bichómani nga nitjosoán kjoatéxomale kʼoa josʼin bichómani nga tsín nitjosoán. Kuenta sʼiaan kjoa xi batiojin chjota nga bʼasjengi kjoafaʼaitsjen xi tsjoá Jeobá kʼoa si̱kjaʼaitsjeen nga ngisa nda biyoaa nga nitjosonlee Niná (Sal. 32:8, 10).

13. A kjoanʼio bʼénená Jeobá nga kjuintjenngiaa je kjoafaʼaitsjen xi tsjoá.

¹³ Je Jeobá tíjnandaa nga tsjoále kjoachjine ngatsʼi chjota, tonga alikui ʼya xi bʼénele nga kjuinrʼoéle. Tonga kʼoatsoná jmeni xi koa̱nle je xi tsín kuenta sʼín kjoachjinele (Prov. 1:29-32). Je xi tsín sítjosonle Jeobá tijé koa̱njngínile kjoa yaole. Tsee kjoa kuichomani kʼoa to kjoañʼai koatiojin tʼatsʼe josʼin fikao yaole, kʼoa xijekoa̱n chaan to kjoeson. Tonga je xi nrʼoé kjoafaʼaitsjen xi tsjoá Jeobá kʼoa xi sítjoson, i ʼmile: “Je xi kjuinrʼoéna alijme xi tso̱kjonle, alikui tso̱kjonle jmeni xi kjoaʼaíne” (Prov. 1:33).

14, 15. Jméni xi bakóyaná Proverbios 4:23.

¹⁴ Basenkaoná ngantsjai nga kʼoasʼin mangínkoaa yaoná jotso kjoachjinele Niná. Tojosʼin tiʼyaa, je Jeobá kui xi mele nga kataʼyaa ngatsʼiaa je kjoafaʼaitsjen xi tsjoá. Tobʼelañá, je kjoafaʼaitsjen xi faʼaitʼa libro xi tsʼe Proverbios nʼio nda basenkaoná ngantsjai, kʼoa ndasʼin biyoaa nga mangíntjenngiaa jmeni xi tso. To ñola koya kataʼyaa tʼatsʼe kjoafaʼaitsjen jebi.

¹⁵ Si̱kuindaa jotjín je ni̱ma̱ná. Je Biblia itso: “Je xi ngisasa nda tikuindai jé ni̱ma̱li, nga̱ yaa nroani je kjoabijnachon” (Prov. 4:23). Si̱kjaʼaitsjenla jméni xi koasenkaoná nga si̱kuindaa je ni̱ma̱ná. Machjén nga ndakjoan tsojmi chi̱nee, nga ejercicio sʼiaan kʼoa tsínkui kʼoasʼiaan jmeni xi sikiʼaonná. Kʼoatisʼinni,  machjén nga si̱kuindaa jotjín jinni̱ma̱ná. Machjén nga nyaon nyaon kʼoéxkiaa je Énle Niná, tongini chótʼayajiaan jmeni xi faʼa nga sa̱tíoná kjoajtín, kjuian kjoajtín kʼoa kʼoee je comentarioná. Kjitʼa kʼuínyasoán. Kʼoa tsínkui si̱kʼasʼenjiaan kjoafaʼaitsjenná jmeni xi sikiʼaonná, jolani nga tsínkui kʼoétsaojinkoaa xi kjoajndí tjenkao kʼoa nga tsín je si̱miyoaa xi tsín nda sʼín.

16. Ánni nga nda basenkaoniná je kjoafaʼaitsjen xi tsjoá Proverbios 23:4, 5.

¹⁶ Tokatamaniná jokji tjínná. Itso kjoafaʼaitsjen xi tsjoá je Biblia: “Ali tsa kjoanyinájin nʼio fasjai. [...] Tsa si̱kjaʼaitsjain, to chaní, nga̱ jnga kuitjole jokjoan jngale ja̱, kʼoa koaitjeen ya ngʼá” (Prov. 23:4, 5). Ninga tjínle tsojmi kao tao̱n je chjota sakʼoa tosasa síchani. Ninga kʼoalani, nichxin xi tiyoaa ndʼaibi, ni je xi nyiná kʼoa ni je xi ma̱ tjíosíjchá yaole kui xi mele nga tao̱n sʼe̱le. Kʼoa nga kui básjai, sakʼoa kui kʼoasʼín xi tsín kixi tíjna kʼoa alikui tinda bʼaxki̱ni, alikui tinda fikaoni xi kjaʼaí kʼoa saʼnda tjochʼinle (Prov. 28:20; 1 Tim. 6:9, 10). Tonga nga chjine maa, alikui kui nʼio nikjáojiaan xi tʼatsʼe tao̱n. Kui xi basenkaoná nga tsín xkaiʼa maa, tomajngoni tokoán jokji tjínná kʼoa tsjoa satío tokoán (Ecl. 7:12).

17. Jósʼin sʼe̱ná “je énle chjota xi chjine” tojo tso Proverbios 12:18.

¹⁷ Títjonkjoanla si̱kjaʼaitsjeen nga kjesa nokjoajián. Tsa tsín si̱kuindaa jmeni xi bixoán, si̱kiʼaonjián xi kjaʼaí. Je Biblia itso: “Je énle chjota xi tsín síkjaʼaitsjen yaa mangóson joni tsa ki̱cha̱ tíbʼésʼenjin yaoná, tonga je énle chjota xi chjine síndayaná” (Prov. 12:18). Tsa tsínkui cho̱bayañá jñani chao sʼín xi kjaʼaí nda kjuinkoaa xíngiaa (Prov. 20:19). Tsa tsín mená nga sikiʼaon xi kjaʼaí jmeni xi kuixoán tsa tosa kui xi mená nga kuinyakao, machjén nga kʼoéxkiaa kʼoa si̱kjaʼaitsjenjiaan jmeni xi tso Énle Niná (Luc. 6:45). Kʼianga nikjaʼaitsjenjiaan je kjoafaʼaitsjen xi tsjoá Biblia, basenkaoná nga kui nokjoaa je én xi tsjoánganʼiole xi kjaʼaí (Prov. 18:4).

18. Jósʼin basenkaoná jmeni xi tso Proverbios 24:6 nga ngisa nda ʼmiyasoán je Énle Niná.

¹⁸ Kjuintjenngiaa kjoafaʼaitsjen xi tsjoáná naxinandále Niná. Itso kjoafaʼaitsjen xi tsjoá Biblia:  “Si̱nkjínlai tokuin nga kʼoéjnai kjoajchán; nga nkjín mani xi tsjoá kjoafaʼaitsjen ndasʼin bichótsjoá” (Prov. 24:6, nota). Si̱kjaʼaitsjenla jósʼin basenkaoná nga mangíntjenngiaa kjoafaʼaitsjen jebi kʼianga ʼmiyasoán kʼoa nga ʼmiyalee Biblia je chjota. ʼNdele nga tokui kʼoasʼiaan josʼin nikjaʼaitsjeen ñá, tosaa kui mangíntjenngiaa je kjoafaʼaitsjen xi bʼainá. Bʼainá kjoafaʼaitsjen kʼianga satíoná kjoajtín, tsee xi majinná nga noʼyá kjoanokjoaya xi faʼa kʼoa nga faʼachoya je ndsʼee kao tichjaa. Ngayeje jebi yaa Biblia bʼangini je ndsʼee. Xi ijngosani, je naxinandále Jeobá bʼasjee je xo̱n kao video xi binyakao chjota nga majinle jotso Biblia. A tinichjénñá ngayeje jebi.

19. Jósʼin nikjaʼaitsjain tʼatsʼe kjoachjine xi tsjoá Jeobá (Proverbios 3:13-18).

¹⁹ (Tʼexkiai Proverbios 3:13-18). e Chjí ʼyatokoán nga nda kjoafaʼaitsjen tsjoáná je Énle Niná. Tsínsa jña so̱koná je kjoafaʼaitsjen xi ngisasa nda. I̱ kjoaʼmiya jebi kui kachotʼayajin kʼa kjoafaʼaitsjen xi nʼio nda basenkaoná xi faʼaitʼa libro xi tsʼe Proverbios. Nʼio nda kjoafaʼaitsjen faʼaitʼa ngakjijngo Biblia. Ñaki kʼoakʼoé tokoán nga kjuintjenngiaa je kjoachjinele Niná. Alikui kui kuenta nʼia josʼin síkjaʼaitsjen chjota tʼatsʼe kjoachjinele Niná. Nga̱ tjínjngo tokoán nga tsjoa sa̱tío kon je xi sitjoson kjoachjinele Niná.