KJOAʼMIYA XI CHOTʼAYA 44
Kʼoéjngoaa tokoán nga kuitjoson jme xi choyalee
“Je Jeobá chóyalai” (SAL. 27:14).
KJOAJNDA 144 Kui tikjaʼaitsjain ngantsjai
XI TÍNCHJA̱NI a
1. Jmé kjoachoya xi tsjoáná Jeobá.
KUI kjoachoya tsjoáná Jeobá nga koa̱n kuiyoaa ngantsjai nichxin. Tjínkʼa choʼndale Niná xi ya koyale koatio ngantsjai nichxin ya ngʼajmi nga tsín tikʼia kuiyáni (1 Cor. 15:50, 53). Tonga ngisaa nkjín mani xi i̱ Sonʼnde koyale koatio ngantsjai, nga tsjoa sa̱tío kon kʼoa nga tsín tijme chʼin sʼe̱nile (Apoc. 21:3, 4). Chjí ʼyatokoán ngatsʼiaa je kjoachoya xi tjínná, ni ya ngʼajmi tjínná kjoachoya kʼoa ni i̱ Sonʼnde.
2. Jósʼin tíjna je kjoachoya xi tjínná.
2 Kʼianga kui nchja̱ni Biblia tʼatsʼe kjoachoya kui síkʼaxki̱ nga ñaki tjínjngo tokoán nga nʼio ndatjín jmeni xi koa̱n. Alikui jao tjínná nga kʼoakoa̱n jmeni xi choyalee nga̱ jé Jeobá xi kʼoatso (Rom. 15:13). ʼYañá jmeni xi tongini tso je Jeobá kʼoa nga sítjoson ngantsjai jmeni xi tso (Núm. 23:19). Tjínjngoo tokoán nga mele Jeobá kʼoa nga koa̱nle kʼoasʼin ngayeje jmeni xi tsoná. Ali tsa toxitsjoajin jme xi choyalee nichxin xi sʼa nroa, ʼyañá nga kuitjoson kjoaixi.
3. Jmé xi jchaa i̱ kjoaʼmiya jebi (Salmo 27:14).
3 Je Jeobá nʼio tsjoakená kʼoa mele nga si̱nʼiotʼaa (tʼexkiai Salmo 27:14). b Tsa kʼoatjín tokoán nga je Jeobá tichoyalee, chókjoajinná kjoa xi kuitjátojiaan kʼoa tsjoa sʼe̱ tokoán tojme xi koa̱n nichxin xi sʼa nroa. I̱ kjoaʼmiya jebi kui chótʼayajiaan jósʼin basenkaoná je kjoachoya xi tjínná. Xi títjon, kui jchaa ánni kʼoabixónsíñá nga je kjoachoya xi tjínná yaa mangóson jngo ki̱cha̱ʼba̱ kao jngo xombeki̱cha̱. Xijekoa̱n, kui chótʼayajiaan jósʼiaan nga ngisa sʼe̱jngo tokoán nga kuitjoson jme xi choyalee.
JE KJOACHOYANÁ YAA MANGÓSON JNGO KI̱CHA̱ʼBA̱
4. Ánni kʼoabixónsíñá nga ya mangóson jngo ki̱cha̱ʼba̱ je kjoachoya xi tjínná (Hebreos 6:19).
4 Kʼianga kiskile Pablo je chjota hebreo xi chjotale Cristo ma, kui kisingósonkao je kjoachoya xi tjínná kao jngo ki̱cha̱ʼba̱ (tʼexkiai Hebreos 6:19). c Je Pablo me tokjitʼa nga ndáchikon kijin. Kuinga beni je ki̱cha̱ʼba̱ xi síkájnanʼio je barco nga tsín koaijen koaikjá. Ñandia nga ntjao̱nʼio jaʼajin ndáchikon kʼianga tíjnaya barco, kʼoa nga kʼoakjima je chjota xi tjíoya barco kisikʼatsaongindá je ki̱cha̱ʼba̱ ánni nga tsín la̱jao̱ kuichosatétʼani je barco (Hech. 27:29, 39-41). Je kjoachoya xi tjínná yaa mangóson jngo ki̱cha̱ʼba̱, nga̱ kui xi basenkaoná nga tsín bisenxinlee Jeobá kʼianga kjoa bitjatojiaan, xi ya mangóson ntjao̱nʼio. Je kjoachoya xi tjínná basenkaoná nga chókjoajinná je kjoa xi bitjatojiaan ndʼaibi, nga̱ ʼyañá nga tsín tikui kjoa kuitjátojinñá nichxin xi sʼa nroa. Kuenta sʼiaan nga kʼoakitso je Jesús nga chjota koaitjenngikená (Juan 15:20). Nga kui nikjaʼaitsjenjiaan je kjoanda xi tsjoáná Jeobá nichxin xi sʼa nroa, basenkaoná nga tosi tonda nixálee.
5. Jósʼin tsakasenkao kjoachoya xi kisʼele Jesús kʼianga tojeme ni̱kʼien.
5 Kataʼyala jósʼin tsakasenkao Jesús je kjoachoya xi kisʼele nga kixi kitʼale Niná ningalani be nga ni̱kʼien. Kʼianga sʼuí Pentecostés nga nó 33, je pastro Pedro kui kisikʼaxki̱ je én xi tongini kinokjoa xi tʼatsʼe Jesús xi faʼaitʼa ya Salmos xi tsoya jokisʼe kon je Jesús kʼoa nga tsín jme xi kitsokjonle. Itso: “Yaona nda sikjáya nga tíkoyakaokjoa. Likui si̱kʼéjnai ni̱ma̱na ngi kjoatéxomale kjoabiya. Likui kʼoaiʼndelai Cristo xi ʼndítsjeli nga kjuiʼndo. [...] Kjaínga totsjoa koa̱n ni̱ma̱na kʼia nga tijnakaonái” (Hech. 2:25-28; Sal. 16:8-11). Ningalani be Jesús nga ni̱kʼien, ñaki kʼoatjín kon nga sikjaʼáyanile Niná kʼoa nga nʼio tsjoa sʼe̱ kon nga koai ijngokʼani ya ngʼajmi jñani tíjna Nʼaile (Heb. 12:2, 3).
6. Jméni xi kitso jngo ndsʼee tʼatsʼe kjoachoya xi tjínná.
6 Xi totʼatsʼe kjoachoya xi tjínná, nʼio nkjín chjotale Cristo xi tjíochókjoajinle kjoa xi tjíofaʼatojin. Kataʼyala je choa̱le Leonard Chinn, jngo ndsʼee xi kixi kitʼale Niná xi ya Inglaterra tsʼe. Kʼianga kisʼejna Kjoajchántse xi títjon ndoyá kinikʼéjnaʼya, nga̱ tsín koanjyole nga sondado koa̱n. Kʼoa alikui tsakʼaiʼndele nga ʼya xi tsakjákaonajmí xi jao sá, kʼoa xijekoan xáʼai kisʼenele. Xi jeki nichxin, i kitso: “Jmeni xi koantʼen tsakasenkaona nga tsaʼbe nga nʼio basenkaoná je kjoachoya xi tjínná nga chókjoajinná je kjoa xi bitjatojiaan. Je choa̱le Jesús, pastro kao profeta kʼoa jmesani xi tso je Biblia tsjoáná kjoachoya tʼatsʼe nichxin xi sʼa nroa kʼoa basenkaoná nga chókjoajinná je kjoa xi bitjatojiaan”. Je kjoachoya xi kisʼele Leonard yaa mangóson joni jngo ki̱cha̱ʼba̱ kʼoa kʼoati koa̱n kʼoasʼin koasenkaoná tsanda ñá.
7. Jósʼin ngisa sʼejngo tokoán nga kuitjoson jme xi choyalee kʼianga kjoa bitjatojiaan (Romanos 5:3-5; Santiago 1:12).
7 Ngisaa sʼejngo tokoán nga kuitjoson jme xi choyalee kʼianga chókjoajinná je kjoa xi bitjatojiaan, nga ʼyaa nga je Jeobá basenkaoná kʼoa nga nda tiyoaa ngixko̱n (tʼexkiai Romanos 5:3-5; d Santiago 1:12 e). Ndʼaibi ngisaa nʼio tíjna je kjoamakjainná tikʼoajinni nga sʼa tsaʼyaa je Énle Niná. Je Na̱i kui xi mele nga nʼio si̱kjáojiaan je kjoa xi bitjatojiaan, tonga jé Jeobá koasenkaoná nga chókjoajinná tojme kjoa xi kuitjátojiaan.
JE KJOACHOYANÁ YAA MANGÓSON JNGO XOMBEKI̱CHA̱
8. Ánni nga ya mangósonni je kjoachoya xi tjínná jngo xombeki̱cha̱ (1 Tesalonicenses 5:8).
8 Je Biblia kʼoatso nga je kjoachoya xi tjínná yaa mangóson jngo xombeki̱cha̱ (tʼexkiai 1 Tesalonicenses 5:8). f Je sondado kui xombeki̱cha̱ basenkao jko̱ nga tsín kontrale sikiʼaon. Kʼoa ñá, nga kao Na̱i tibixkan machjén nga si̱kuindaa je kjoafaʼaitsjenná. Je Na̱i cheen batíoná kʼoa kui kjoafaʼaitsjenle kaníbason nga mele sikiʼaon kjoafaʼaitsjenná. Tojosʼin basenkao jko̱ sondado je xombeki̱cha̱, je kjoachoya xi tjínná kʼoati basenkao je kjoafaʼaitsjenná nga tosi tonda kixi kjuintʼalee Jeobá.
9. Jméni xi ma kʼianga tsín jme kjoachoya sʼele chjota.
9 Nga kui choyalee nga koa̱n kuiyoaa ngantsjai nichxin, koasenkaoná nga nda chjoéjiaan jmeni xi sʼiaan. Tonga tsa tokui si̱kjaʼaitsjeen jmeni xi nimetokoán ñá, tsakui nichxin tsín tisʼe̱niná kjoachoya. Si̱kjaʼaitsjenjinla jmeni xi koanle chjotale Cristo xi ya naxinandá Corinto tsakatio nichxin kjoatse. Alikui tikoankjainnile jmeni xi nʼio tjínle kjoandosin xi kitso Niná, nga sʼe̱ kjoafaʼáya (1 Cor. 15:12). Je Pablo kʼoakitso nga je chjota xi tsín makjainle tʼatsʼe kjoafaʼáya tokui fini jmeni xi símekon (1 Cor. 15:32). Nichxin xi tiyoaa ndʼaibi, nʼio nkjín chjota xi tsín makjainle jmeni xi tongini tso Niná, kʼoa kuinga tokui kʼoasʼínni jmeni xi símekon kʼoa tobʼétsaojin. Tonga ñá, makjainná jmeni xi tso Niná tʼatsʼe nichxin xi sʼa nroa. Je kjoachoya xi tjínná yaa mangóson jngo xombeki̱cha̱ xi basenkao je kjoafaʼaitsjenná kʼoa basenkaoná nga tsín tokui mangínñá jmeni xi nimetokoán, nga̱ kui xi mená nga tosi tonda miyoná koa̱nni je Jeobá (1 Cor. 15:33, 34).
10. Jósʼin basenkaoná je kjoachoya xi tjínná kʼianga tsínkui kuenta nʼia je énndiso xi tsoya chjota.
10 Je kjoachoya xi tjínná xi ya mangóson jngo xombeki̱cha̱, basenkaoná nga tsínkui kuenta nʼia nga kʼoatso je chjota nga tsín nʼio tjínle kjoandosin nga kui kʼoasʼiaan jmeni xi tsjoa báya kon Jeobá. Tobʼelañá, tsakui nichxin tjín xi i̱ kuitso: “Alikuijinkʼia koatejna an ngantsjai nichxin nga̱ tsín nda sʼian. Alikuijinkʼia kuitjosonna jmeni xi síjéle Niná choʼndale”. Si̱kjaʼaitsjenjiaan jokitso je Elifaz, je xi kichokjákaonajmí je Job. I kitsole: “Jósʼin tsje koa̱nni chjota xi kjoabiya koʼnda”. Kʼoa i kitsosale: “Koeni, je Niná alikui sínʼiotʼa je ánkjele, kʼoa ni kuijinla ngʼajmi xi tsje sʼin bekon” (Job 15:14, 15). Tonga alikui kʼoatjín jebi. Kuenta sʼiaan nga je Na̱i xi kʼoasʼin mele nga kʼoasʼin si̱kjaʼaitsjeen. Be nga tsín tisʼe̱niná kjoachoya tsa tosi tonda kui ni̱kjaʼaitsjeen jebi. Kuinga machjénsíni nga tsínkui cha̱nisʼenjiaan kjoafaʼaitsjenná je xi tsínni kʼoatjín, tosa kui kuenta sʼiaan jmeni xi tsoná je Jeobá. Alikuikʼia jao kʼoé tokoán nga kui xi mele Jeobá nga koatio ngantsjai nichxin ngatsʼi choʼndale kʼoa koasenkaoná nga kuichotjenngiaa jebi (1 Tim. 2:3, 4).
KʼOÉJNGOAA TOKOÁN NGA KUITJOSON JME XI CHOYALEE
11. Ánni machjénni nga tsejta koaan saʼnda nga kuitjoson jmeni xi tichoyalee.
11 Ninga sakʼoa ñʼai maná, machjén nga kʼoéjngoaa tokoán nga kuitjoson jme xi choyalee. Tsakui nichxin kʼoasʼin si̱kjaʼaitsjeen nga tsín ndi̱to̱n tísítjoson Niná jmeni xi tso. Tonga nga tíjnantsjai je Jeobá alikui kʼoasʼin be je nichxin josʼin ʼyatokoán ñá (2 Ped. 3:8, 9). Jé Jeobá xi ngisasa nda be kʼiáni sitjoson jmeni xi tso, kʼoa tsakui nichxin tsínkjoan kʼia kʼoasʼin nga tichoyalee ñá. Jméni xi koasenkaoná nga nʼio sʼe̱jna je kjoachoya xi tjínná kʼoa nga tsejta koaan nga chóyalee je nichxin kʼianga sitjoson Niná jmeni xi tsoná (Sant. 5:7, 8).
12. Tojo tso Hebreos 11:1, 6, jósʼin basenkao kjoachoya xi tjínná je kjoamakjainná.
12 Ngisaa sʼe̱jngo tokoán nga kuitjoson jme xi choyalee tsa si̱chriantʼalee Jeobá, nga̱ jé xi kʼoatsoná nga kʼoakoa̱n. Je Biblia kʼoatso tsa tjínná kjoachoya kʼoati makjainná nga tíjna je Jeobá kʼoa nga tsjoále “chjíle je chjota xi nʼio básjai nga je” (tʼexkiai Hebreos 11:1, 6). g Kʼianga ngisasa nda jchaxkoaan je Jeobá, ngisaa si̱nʼiotʼaa kʼoa ngisaa koa̱nkjainná kʼianga sitjoson jmeni xi tongini tso. Kataʼyala jméni xi sʼiaan nga tosi tonda si̱miyoaa Niná ánni ngisa sʼe̱jngoni tokoán nga kuitjoson jme xi choyalee.
Nga bʼetsʼoaa kʼoa nga nikjaʼaitsjenjiaan basenkaoná nga ngisa sʼejngo tokoán nga kuitjoson jme xi choyalee (Chótsenlai párrafo 13-15) h
13. Jósʼiaan nga miyole Niná koaan.
13 Kʼoétsʼoalee je Jeobá kʼoa kʼoéxkiaa je Énle. Ningalani tsín ʼyañá xkoaan je Jeobá koaan miyole koaan. Koaan chja̱kaonajmiá kʼianga kʼoétsʼoalee nga̱ ʼyañá nga kjuinrʼoéná (Jer. 29:11, 12). Kʼoati koa̱n kuinóʼyalee nga kʼoéxkiaa je Énle kʼoa nga si̱kjaʼaitsjenjiaan jmeni xi tso. Nga kʼoéxkiaa jósʼin kisikuinda Jeobá je choʼndale xi kixi kitʼale nichxin kjoatse, koasenkaoná nga ngisa sʼe̱jngo tokoán nga kuitjoson jme xi choyalee. Ngayeje jmeni xi kichjitʼa Énle Niná, kui xá kichjitʼani “nga koakoyaná, jméni nga sʼe̱síniná kjoachoyakaokjoa xi totʼatsʼe kjoatsejta kao kjoanijetakon xi tjínle xo̱n Escrituras” (Rom. 15:4).
14. Ánni ndatjínni nga si̱kjaʼaitsjenjiaan josʼin tíbasenkao Jeobá xi kjaʼaí.
14 Si̱kjaʼaitsjenjiaan jósʼin tísítjoson Jeobá jmeni xi tongini tso. Si̱kjaʼaitsjenjiaan jókisʼin je Jeobá xi tʼatsʼe Abrahán kao Sara. Kʼianga jejchínga alikui tikoa̱n nga xti sʼe̱nile, tonga je Niná kʼoakitsole nga sʼe̱ jngole ʼndí (Gén. 18:10). Jókitso je Abrahán. Je Biblia itso: “Koankjainnile Abraham, nga koa̱n nʼaile nkjín naxinandá” (Rom. 4:18). Je chjota kʼoajinsʼin sikjaʼaitsjen nga tsínkʼia kʼoakoa̱n jme xi kiskoyale Abrahán, tonga je ñaki tsakʼéjngo kon nga sitjoson Jeobá jme xi kitsole. Je Abrahán kixi kitʼale Niná, kʼoa je Niná kisitjoson jmeni xi kitsole (Rom. 4:19-21). Jmeni xi tso Biblia jolani tʼatsʼe Abrahán kao Sara, kui bakóyaná nga koa̱n koa̱nkjainná ngantsjai jmeni xi tso Jeobá kʼoa nga sitjoson jmeni xi tso, ningalani sakʼoa kʼoasʼin si̱kjaʼaitsjeen ñá nga tsínkʼia kʼoakoa̱n.
15. Ánni machjénni nga si̱kjaʼaitsjenjiaan jmeni xi tísʼín Niná xi tʼatsaan.
15 Si̱kjaʼaitsjenjiaan jmeni xi tísʼín Jeobá xi tʼatsaan. A sakʼoa nikjaʼaitsjenjiaan jósʼin tísítjoson Jeobá jmeni xi tso je Énle. Tobʼelañá, je Jesús kʼoakitso nga tsjoáná Niná jmeni xi kuiyochonñá (Mat. 6:32, 33). Je Jesús kʼoati kitso nga je Jeobá tsjoáná nganʼiotsjele kʼiatsa si̱jélee (Luc. 11:13). Je Jeobá tísítjoson jmeni xi kitso je Jesús. Tsakui nichxin kʼoati faʼaitsjenná jmesani xi tísʼín Jeobá xi tʼatsaan, jolani nga síchatʼaná, nga tsjoánganʼioná kʼoa tsjoáná jmeni xi koasenkaoná nga si̱chriantʼalee (Mat. 6:14; 24:45; 2 Cor. 1:3). Tsa si̱kjaʼaitsjenjiaan jmeni xi tísʼín Niná xi tʼatsaan, ngisaa koa̱nkjainná nga kuitjoson jmeni xi tso tʼatsʼe nichxin xi sʼa nroa.
TSJOA KʼOÉ TOKOÁN TʼATSʼE KJOACHOYA XI TJÍNNÁ
16. Ánni nga jngoni kjoatjao xi nʼio chjíle je kjoachoya xi tsjoáná Niná.
16 Je kjoachoya xi tjínná nga koa̱n kuiyoaa ngantsjai nichxin jngoo kjoatjao xi tʼatsʼe Niná. Jemená nga katafaʼai nichxin nga koa̱n kuiyoaa ngantsjai kʼoa tsín jao tjín tokoán nga kʼoakoa̱n. Je kjoachoya xi tjínná yaa mangóson jngo ki̱cha̱ʼba̱ nga̱ basenkaoná nga chókjoajinná nga kjoa bitjatojiaan, nga chjota fitjenngikená kʼoa tsa kʼoakʼuínná nga si̱kʼienná. Kʼoati ya mangóson jngo xombeki̱cha̱ je kjoachoya xi tjínná nga̱ síkuindaa je kjoafaʼaitsjenná kʼoa basenkaoná nga tsínkui faʼasʼenjin xi chʼaotjín, nga tosa kui nikjaʼaitsjeen xi ndatjín. Je kjoachoya xi tsjoáná Biblia basenkaoná nga ngisa machriantʼalee Niná kʼoa kʼoasʼin bakóná Niná nga nʼio tsjoakená. Basenkaoná nga ngisa sʼejngo tokoán nga kuitjoson jme xi choyalee.
17. Ánni nga tsjoa sʼeni tokoán nga kui nikjaʼaitsjeen je kjoachoya xi tjínná.
17 Kʼianga kiskile Pablo je chjotale Cristo xi Roma tsʼe, i kitsole: “Kjoatsjoa katasʼeno xi tʼatsʼe xi choyalao” (Rom. 12:12). Je Pablo tsjoa kisʼe kon nga̱ tsínkʼia jao kisʼele nga kʼoéjna ngantsjai nichxin ya ngʼajmi tsa kixi koaitʼale je Jeobá. Ñá kʼoati koa̱n tsjoa kʼoé tokoán tʼatsʼe kjoachoya xi tjínná nga̱ tsín jao tjínná nga sitjoson Jeobá jmeni xi tso. Tojo kitso jngo xi kiski salmo: “Tsjoa tjínle [...] xi je Jeobá Ninále sínʼiotʼa, [...] xi kixi ngantsjai” (Sal. 146:5, 6).
KJOAJNDA 139 A fiya jkui nga tijnai ya sonʼnde chjotse
a Je kjoachoya xi tsjoáná je Jeobá kui xi basenkaoná nga tsínkui nʼio nikjaʼaitsjenjiaan je kjoa xi bitjatojiaan. Basenkaoná nga kixi mangíntʼalee Jeobá ninga kjoa bitjatojiaan kʼoa basenkaoná nga tsínkui faʼasʼenjin kjoafaʼaitsjenná xi sikiʼaonná. Tojosʼin jchaa i̱ kjoaʼmiya jebi, nga nʼio nda basenkaoná je kjoachoya xi tjínná kuinga machjénni nga tosi tonda nʼio katasʼejna.
b Salmo 27:14: “Je Jeobá chóyalai; nʼiojin katamai, kʼoa nʼiojin katama ni̱ma̱li. Je Jeobá chóyalai”.
c Hebreos 6:19: “Je kjoachoyakaokjoabi xi tjínná kjoakixiní, kʼoa síkʼéjnanʼio ni̱ma̱ná joni tsa jngo ki̱cha̱ʼba̱ xi kjitʼanʼio, xi faʼasʼen ʼndetsje saʼnda jto̱n najño xi tje̱njchxo”.
d Romanos 5:3-5: “Ali tsa tokui jebi, tonga kʼoati chʼasjejeyaa yaoná tʼatsʼe kjoañʼai xi tjínná, nga ʼyaa nga je kjoañʼaibe síjchájinná kjoatsejta. 4 Je kjoatsejtabe síjchájinná nga nda kuitjoaa. Kʼoa nga nda kuitjoaa, kui xi síjchájinná kjoachoyakaokjoa. 5 Kʼoa je kjoachoyakaokjoa alikui sísoa, nga̱ je kjoatjaochale Niná kisitseya ni̱ma̱ná xi totʼatsʼe je Espíritu Santo xi tsakʼainá”.
e Santiago 1:12: “Jó tondale chjota xi síkjaínle kjoañʼai. Kʼia nga je kichotʼale, kuinjele kjoabijnachon xi joni jngo korona, xi Niná kitsjoa tsʼoa nga tsjoále je xi tsjoake nga je”.
f 1 Tesalonicenses 5:8: “Tonga ñá xi nichxin tsaan, nda tjaínkoaa yaoná. Je xi makjainná, je kjoatjaocha katasʼená joni tsa chingaki̱cha̱ xi sondado yʼakjá. Je kjoachoyakaokjoa nga kuitjo̱ntjé katasʼená joni tsa xombeki̱cha̱ xi kjisonle sondado”.
g Hebreos 11:1, 6: “Kui xi makjainná, kui xi nda nʼiotʼatakoán, nga kjoakixi nga tjío je kjoa xi choyalee, xi bʼéjnachoya tʼatsʼe kjoa xi tsín matsen. 6 Tsa tsín makjainná, likui nda sʼekon Niná xi tʼatsaan. Je xi faʼaikonle Niná, machjén nga koa̱nkjainle nga tíjna Niná, kʼoa nga Niná tsjoá chjíle je chjota xi nʼio básjai nga je”.
h XI TÍNCHJA̱NI SÉN XI FAʼAITʼA: Tojosʼin basenkao xombeki̱cha̱ jko̱ sondado kʼoa nga kui ki̱cha̱ʼba̱ xi síkájnanʼio je barco, je kjoachoya xi tjínná kʼoati basenkao je kjoafaʼaitsjenná kʼoa basenkaoná kʼianga kjoa bitjatojiaan. Jngo tichjaa xi tíbʼétsʼoale Jeobá nga̱ ñaki kʼoatjín kon nga kjuinrʼoéle. Jngo ndsʼee kui tísíkjaʼaitsjenjin jósʼin kisitjoson Jeobá jmeni xi kitsole Abrahán. Ijngo ndsʼee xi kui tísíkjaʼaitsjenjin je kjoanichikontʼain xi títsjoále Niná.
