KJOAʼMIYA XI CHOTʼAYA 43
KJOAJNDA 90 Kʼoainganʼiolee xíngiaa
Jósʼiaan tsa to jao sʼe tokoán
“Nanda chótʼajion ngayije” (1 TES. 5:21).
XI TÍNCHJA̱NI
Jmé xi koasenkaoná nga tsínkui kʼoetʼaná josʼin tinixálee Jeobá tsa sakʼoa jao sʼe tokoán.
1, 2. 1) Jméni xi sakʼoa nikjaʼaitsjeen. 2) Jmé xi chótʼayajiaan i̱ kjoaʼmiya jebi.
NGATSʼIÑÁ nga sakʼoa jao sʼe tokoán. a Tsa jngolani ti xi tsín tjínjngo kon nga kuenta sʼín Jeobá alikuijin kuitso kon nga koaisʼenngindá. Tsa jngo ndsʼee xi kui xále Niná títjon kisikʼéjna nga sʼa xti ʼndele nga tse tao̱n koa̱njngí, tonga nga jechixan alikui timasonnile je tao̱n nga bajngiʼa familiale kʼoa kui síkjaʼaitsjen tsa nda kisʼin nga je Jeobá kisixále ngasʼa xti. Kʼoa jngo tichjaa xi jejchínga, tsakui nichxin síkinroajen kon nga tsín tinanda chókjoanile nga kʼoakji síxále Jeobá jokisʼin ngasʼa. Tsakui nichxin sakʼoa i̱ bixoán tsanda ñá: “A mandosin kjoaixile Jeobá xi tʼatsʼan. A nda tisʼian nga je Jeobá tisixále. A kuenta sʼínna je Jeobá”.
2 Kʼianga kʼoasʼe tokoán nroajen kjoamakjainná kʼoa tsakui nichxin tsín tije Jeobá si̱xánilee. I̱ kjoaʼmiya jebi kui chótʼayajiaan jósʼin basenkaoná Biblia tsa kʼoasʼin tinikjaʼaitsjeen nga tsín mandosinle Jeobá xi tʼatsaan. Tsa kʼoabixoán nga tsín nda kinʼia nga je tinixálee. Kʼoa tsa kʼoasʼin nikjaʼaitsjeenje̱ nga tsín tikuenta sʼínniná.
JMÉ XI KOA̱N SʼIAAN TSA JAO TJÍN TOKOÁN
3. Jmé xi koasenkaoná nga tsín jao sʼe̱ tokoán.
3 Je Énle Niná basenkaoná nga sʼejngo tokoán, basenkaoná nga ninʼiotʼaa Jeobá kʼoa nga mamiyoaa. Kʼoa nʼio sʼejna je kjoamakjainná (1 Cor. 16:13).
4. Tojo tso 1 Tesalonicenses 5:21, jméni xi koa̱n sʼiaan.
4 (Tʼexkiai 1 Tesalonicenses 5:21). b Je Biblia itso: “Nanda chótʼajion ngayije”. Tsa jao tjín tokoán machjén nga kui si̱kjaʼaitsjenjiaan jme xi tso Biblia. Tobʼelañá, tsa jngo ti xi tsín tjínjngo kon nga mandosin kjoaixile Jeobá xi tʼatsʼe, machjén nga kʼoexkia je Biblia nga skoe̱ josʼin síkjaʼaitsjen Jeobá xi tʼatsʼe.
5. Jméni xi sʼiaan nga kuinóʼyalee Jeobá kʼianga fákaoná.
5 Kʼianga bʼexkiaa Biblia joxi jesoani Jeobá fákaoná. Nga jchaa jmeni xi tso, kjoásjaiyaa ya Biblia kao xo̱n xi bʼasje naxinandále xi kui nchja̱ni jmeni xi makjáojinná (Prov. 2:3-6). Kʼoakʼuínlee Jeobá nga katabasenkaoná nga koa̱njinná jmeni xi tichotʼayá. Kʼoétʼaxoaan je textole Biblia kao kjoafaʼaitsjen xi koasenkaoná. Kʼoati koa̱n chótʼayajiaan jokisʼin chjota xi síkʼaxki̱ Biblia xi kʼoati jao kisatio kon.
6. Jósʼin basenkaoná kʼianga mangián kjoajtín nga tsín jao sʼe tokoán.
6 Kʼoati noʼyalee Jeobá kʼianga mangián je kjoajtín xi satíoná. Tsa ntsjaintsjai koanngián je kjoajtín, tsakui nichxin jngo kjoanokjoaya kjoaʼa kʼoa tsa jngo comentario kuinóʼyá xi kuikjoan tínchja̱ni jmeni xi makjáojinná (Prov. 27:17). Kuila chótʼayajiaan ndʼaibi jmeni xi jao bʼé tokoán kʼoa jósʼiaan nga sʼe̱jngo tokoán.
A MANDOSIN KJOAIXILE JEOBÁ XI TʼATSʼAN
7. Jméni xi sakʼoa nikjaʼaitsjenjiaan.
7 Tsakui nichxin kʼoasʼin nikjaʼaitsjain nga tsín kuenta sʼínli Jeobá. Kʼoa tsa kʼoasʼin nikjaʼaitsjain nga tsín koa̱n miyole koai̱n je Niná xi kisinda ngʼajmi kao sonʼnde. Je rey David kʼoatisʼin kisikjaʼaitsjen kʼoa tokʼoakoanle nga koanjinle nga kuenta sʼín Jeobá je chjota. I kitso: “Ji Jeobá, ʼyáni je chjota nga kuenta nʼiani, je ʼndíle chjota nga nisinnilai” (Sal. 144:3). Tonga jósʼin jchañá tsa mandosin kjoaixile Jeobá xi tʼatsaan.
8. Tojo tso 1 Samuel 16:6, 7, 10-12, jméni xi kuenta sʼín Jeobá.
8 Je Biblia kʼoatso nga chjí bekon Jeobá je chjota xi tsín kuenta ma. Tobʼelañá, kʼianga kisikasén je Samuel nga skoéjin je xi rey koa̱n ya naxinandá Israel, je Jesé ñato xtile jaʼaikaotʼale je Samuel, tonga tsín kinchja̱le David, je tile xi maʼndí. c Tonga je Jeobá jé David kiskoejin nga rey koa̱n (tʼexkiai 1 Samuel 16:6, 7, 10-12). d Kuinga je kiskoejinni nga̱ tsabe jotjín kon kʼoa ningalani sʼa xti tsjoake koan Niná.
9. Ánni tjínjngoni tokoán nga mandosin kjoaixile Jeobá xi tʼatsaan (kʼoati chótsenlai sén xi faʼaitʼa).
9 Si̱kjaʼaitsjenjiaan josʼin tíbakóná Jeobá nga mandosinle xi tʼatsaan. Kuikjoán kjoafaʼaitsjen tsjoáná xi machjénná (Sal. 32:8). Kuinga bexkonná Jeobá nga kʼoasʼínni (Sal. 139:1). Kʼianga nitjosoán jmeni xi tsoná kʼoa nga ʼyaa nga nda bichómani, sʼejngo tokoán nga mandosin kjoaixile xi tʼatsaan (1 Crón. 28:9; Hech. 17:26, 27). Je Jeobá kuenta sʼín jñani nda nʼia kʼoa jme xi nʼia nga je nixálee (Jer. 17:10). Kʼoa mele nga miyole koaan (1 Juan 4:19).
“Kʼiatsa kjoásjai [Jeobá], sichriantʼali” (1 Crón. 28:9) (Chótsenlai párrafo 9) g
A NDA TISʼIAN NGA JE JEOBÁ TISIXÁLE
10. Nga je Jeobá tinixálee, jósʼin nikjaʼaitsjen sakʼoa.
10 Tsakui nichxin sakʼoa kui nikjaʼaitsjenjiaan tsa nda kinʼia nga je Jeobá tinixálee. Tobʼelañá, nga tsín ya kinixá jñani nda kuinjená tao̱n tsakai. Kʼoa tsa jenkjín nó nga je Jeobá tinixálee, tsakui nichxin sa̱téjiaan je chjota xi ʼyaxkoaan xi ndasʼin tjío kʼoa xi tjínle tao̱n. Tsakui nichxin i̱ kuixoán: “A nda kisʼian nga je Jeobá tisixále axo ngisaa nda tijna tsa tsínlani kʼoakisʼian”.
11. Ánni nga tsín tinda kisʼeni kon je xi kiski Salmo 73.
11 Tsa sakʼoa kʼoasʼe tokoán tsanda ñá, si̱kjaʼaitsjenjiaan jokitso je xi kiski Salmo 73. Kui kini nga ngisa ndatjío chjota xi tsín je Jeobá síxále, nga tsín jme chʼin tjínle kʼoa nga ngisa tjínle tao̱n (Sal. 73:3-5, 12). Nga kui kini nga ndatjío chjota jebi, je xi kiski salmo kʼoakitso nga toxitsjoani nga je Jeobá tísíxále. Nga tokui jebi kisikjaʼaitsjenjin ʼndeʼnde alikui tinda kisʼeni kon (Sal. 73:13, 14). Jméni xi tsakasenkao nga tsín tikʼoasʼin kisikjaʼaitsjenni.
12. Tojo tso Salmo 73:16-18, jméni xi tsakasenkao je xi kiski Salmo 73 nga tsín tijao kisʼeni kon.
12 (Tʼexkiai Salmo 73:16-18). e Je xi kiski Salmo 73 ki ya yo̱ngo̱le Jeobá. Nga ya kichokʼejnajinle chjota xi je Jeobá bexkón koanjinle nga tsín ndasʼin koatio nichxin xi nroaján chjota xi tsín je Jeobá síxále. Alikui tijao kisʼeni kon nga koanjinle nga ndani tísʼín nga je Jeobá tísíxále kʼoa tosi tonda je kisixále (Sal. 73:23-28).
13. Jmé xi sʼiaan nga nda sʼe̱ tokoán (kʼoati chótsenlai sén xi faʼaitʼa).
13 Nda sʼe̱ tokoán tsa kʼoati sʼiaan jokisʼin je xi kiski Salmo 73. Koaan kui si̱kjaʼaitsjenjiaan je kjoanda xi tjínná nga je Jeobá tinixálee kʼoa nga nda tiyoaa ngixko̱n. Je chjota xi tsín je Jeobá síxále tokui sínʼiotʼa je tsojmi xi tjínle kʼoa tsín jme kjoanda sʼe̱le nichxin xi nroaján. Tonga ñá, kʼoatsoná je Jeobá nga nʼio ndasʼin kuiyoaa nichxin xi sʼa nroa (Sal. 145:16). Alikuijin ndasʼin tiyoaa tsa tsínlani je Jeobá tinixálee. Síchikontʼainná je Jeobá nga̱ kuinga tsjoachaa nga je nixánilee kʼoa kʼoati tsjoachaa je chjota.
Kuenta sʼiaan ngantsjai jmeni xi tso Jeobá (Chótsenlai párrafo 13) h
A KUENTA SʼÍNNÁ JE JEOBÁ
14. Jmé kjoa xi faʼatojin kʼa je ndsʼee kʼoa jósʼin síkjaʼaitsjen.
14 Tjínkʼa ndsʼee xi mele nga ngisasa tse sixále Jeobá, tonga tsín tikʼoamanile nga jejchínga, nga chʼin bʼetʼale kʼoa tsa jmesani xi ñʼai male. Kʼianga kʼoama, tsakui nichxin kʼoasʼin sikjaʼaitsjen nga tsínti chjí beni Jeobá kʼoa tsa i̱ kuitso: “A tojo kuenta sʼín tsokʼoa Jeobá josʼin tisixále”.
15. Ánni nga tsakʼéjngoni kon je xi kiski Salmo 71.
15 Kʼoati kisʼe kon je xi kiski Salmo 71. I kitsole Jeobá: “Ali tsa njiotokonjinnái kʼianga jetínroajen nganʼiona” (Sal. 71:9, 18). Ñaki tsakʼéjngo kon xi kiski salmo jebi nga je Jeobá koasenkao kʼoa sikuinda kʼiatsa tosi tonda kixi koaitʼale. Koanjinle nga tsjoa sʼe kon Jeobá nga kʼoakji nixálee jokji tjen kʼoamaná (Sal. 37:23-25).
16. Ánni nga chjí bekonni Jeobá je ndsʼee xi jejchínga (Salmo 92:12-15).
16 Kʼiatsa jejchíngai, kʼoasʼin jchatokuin yaoli josʼin bekonli Jeobá, ningalani tsín tikʼoamanili nga tse nixálai koasenkaoli nga tojo nda kʼoainganʼiui jinnaxinandále (tʼexkiai Salmo 92:12-15). f ʼNdele nga tokui si̱kjaʼaitsjenjin xi tsín bitjosonli, tosa kui kuenta tʼiain jmeni xi koa̱n sʼiain. Nʼio nda binyakao je ndsʼee nga nda choa̱ bʼejnai kʼoa nga mandosinli xi tʼatsʼe. Kʼoati koa̱n kʼoéyanajmílai josʼin tísíchikontʼainli Jeobá nga je tinixálai kʼoa nga meli jchai josʼin kuitjoson nichxin xi sʼa nroa jmeni xi tsoná. Kʼoati kuinyakao je ndsʼee nga kʼoétsʼoantjai (1 Ped. 3:12). Ningalani tsínti chókjoaniná nga tse nixálee Jeobá, koaan kjoásjailee jmeni xi sʼiaan nga si̱xálee kʼoa josʼin kuinyakoaa je ndsʼee.
17. Ánni nga tsín je si̱ngósonkaoñá yaoná xi ngikʼa.
17 Kʼiatsa tsín nda sʼe tokuin nga tsín tikʼoakji nixánilai Jeobá josʼin meli tsakai, tikjaʼaitsjenjin nga chjí be jmeni xi tinʼiai nga je tinixálai. Ali jejin ningósonkoai yaoli xi ngikʼa, nga̱ je Jeobá alikui ʼya xi síngósonkaoná (Gál. 6:4). Tobʼelañá, je María, jngo siti̱ xi naskánje̱ kʼoa xi nʼio chjíle tsakʼéjtenjon ndso̱ko̱ Jesús (Juan 12:3-5). Kʼoa je ʼndíchjoónkʼan, to jao tao̱n xi choa chjíle tsakatíoya je kaxa̱ xi tíjna ya yo̱ngo̱ (Luc. 21:1-4). Nga kʼoakisʼin nga jao yánchjín jebi, kʼoakitso Jesús nga nʼio tjío kjoamakjainle. Kʼoa je Jeobá chjí be nga kʼoakji nixálee jokji tjen kʼoamaná nga̱ kui kʼoanʼiañá nga tsjoachaa.
18. Jmé xi koasenkaoná kʼiatsa sakʼoa to jao sʼe tokoán (kʼoati chótsenlai je recuadro “ Je Énle Niná basenkaoná kʼianga to jao sʼe tokoán”).
18 Ngatsʼiñá nga sakʼoa to jao sʼe tokoán. Tonga tojosʼin kaʼyaa, je Énle Niná basenkaoná nga sʼejngo tokoán. Kuinga machjénni nga ya Biblia kjoásjaiyaa jmeni xi jao bʼé tokoán. Tsa kʼoasʼiaan, sʼe̱jngo tokoán kʼoa jé Niná si̱nʼiotʼaa. Je Jeobá kuenta sʼínná, chjí be jmeni xi nʼia nga je tinixálee kʼoa sichikontʼainná. Alikui si̱chajiaan nga tsjoakená kʼoa nga síkuindaná nga kixi mangíntʼalee.
KJOAJNDA 111 Xi tsjoa fáya tokoán
a JÓSʼIN TSOYANILE: Kʼianga jao sʼe tokoán tso én bʼaxki̱ i̱ kjoaʼmiya jebi ali tsakuijin tínchja̱ni nga tsínti makjainniná xi tʼatsʼe Jeobá kao jmeni xi tso. Kui tínchja̱ni nga sakʼoa kʼoasʼin nikjaʼaitsjeen nga tsín chjí bená, kʼoa tsa to jao sʼe tokoán nga je tinixálee.
b 1 Tesalonicenses 5:21: “Nanda chótʼajion ngayije. Ali njiojion jñale xi nda tjín”.
c Ningalani tsín kʼoatso Biblia jotjín nóle David nga kiskoejin Jeobá nga rey koa̱n, tosʼajin ti nga kʼia (chótʼai je revista La Atalaya xi tsʼe 1 de septiembre de 2011, página 29 párrafo 2).
d 1 Samuel 16:6, 7, 10-12: “Kʼianga jaʼasʼen, nga tsabe Samuel je Eliab, i kitso: Jejin chjota jebi xi tíkjoejin Jeobá. 7 Tonga je Jeobá i kitsole Samuel: Alikuijin chotsenlai josʼin matsen kʼoa jokji ngʼa, nga̱ likui je tikjoejian. Je Niná alikui kui kotsenle jmeni xi kotsenle je chjota. Je chjota tokui kotsenle jmeni xi beni xko̱n; tonga je Jeobá kui kotsenle jotjín je ni̱ma̱le chjota. 10 Je Jesé tsakakóle nga ñato xtile je Samuel, tonga je Samuel i kitsole Jesé: Nijngojinla xi je tíkjoejin Jeobá. 11 Tochan i̱ kitsole Samuel je Jesé: A tokʼoatjín mani je xtili. Kʼoa i kitso: Je xi maʼndí tsín i̱ kjimaxki̱kao, barré tísíkuinda. Kʼoa je Samuel i kitsole Jesé: Katafichʼa, nga̱ tsín kuichaa saʼnda nga je xi kjoaʼaí. 12 Tsakʼéxání nga katafichʼa kʼoa jaʼai. Chanjko kji kʼoa naskákjoan je xko̱n, kʼoa ndasʼin matsen. Kʼoa je Jeobá i kitso: Tisotjain, chjoéjin nga̱ jéní jebi”.
e Salmo 73:16-18: “Kʼianga kui kisikjaʼaitsjenjian, nʼio kisikjáojian, 17 tonga kʼianga jaʼa̱sʼe̱n ya yo̱ngo̱le Niná koanjinna jmeni xi koyale je chjotatsʼen. 18 Yaa tinikinyái jñani nindojon chon. Tinikjesonní”.
f Salmo 92:12-15: “Je chjota xi kixi koaale naxó joni jngo yáxka̱jén kʼoa koa̱nngʼa joni yákon xi tjín ya Líbano. 13 Yaa nyantje ya niʼyale Jeobá, bale naxó ya nditsinle Nináná. 14 Ninga jejchínga tosi tonda nda kuichotsjoá jme xi sʼin; tosi tonda sʼe̱le nganʼio kʼoa nda sa̱tío kon. 15 Kʼoatso nga kixi je Jeobá. Jé Na̱xi̱na, ñaki kixi jmeni xi sʼín ngantsjai”.
