1. Jósʼin ʼyañá nga kuenta sʼín Jeobá je choʼndale.

 JE Jeobá kuenta sʼín je kjoa xi bitjatojiaan. Be kʼiani nga tsjoa tjín tokoán kʼoa kʼiani nga ba tjínná (Sal. 37:18). Tsjoa sʼe kon kʼianga je nixálee ninga tse kjoa bitjatojiaan, tonga kʼoati basenkaoná kʼoa sínʼio tokoán.

2. Jósʼin basenkao Jeobá je xi aon tjío kon, kʼoa jósʼin ʼyañá nga basenkaoná.

² Ya Salmo 147:3 kʼoatso nga síndaya Jeobá “xi aon tjío kon”. Je texto jebi kʼoatso jósʼin síkuinda Jeobá je xi aon tjío kon. Jmé xi sʼiaan nga jchaa josʼin basenkaoná Jeobá. Jngola choa̱ kataʼyaa. Tsa jngo chjota kamiʼaon tjínnele tsʼe chjinexki koai. Tonga nga koa̱nndaya tjínnele sitjoson jme xi kuitsole je chjinexki. I̱ kjoaʼmiya jebi kui chótʼayajiaan jmé kjoafaʼaitsjen tsjoále Jeobá je xi aon tjío kon kʼoa jósʼin koaitjenngi kjoafaʼaitsjen jebi.

JE JEOBÁ KʼOATSONÁ NGA NʼIO CHJÍ BENÁ

3. Ánni nga tjínkʼani xi kʼoasʼin síkjaʼaitsjen nga tsín jme chjíle.

³ Nichxin xi tiyoaa ndʼaibi alikui titsjoakeni xínkjín chjota kʼoa totaon be xínkjín. Je xi totaon ʼya kʼoasʼin síkjaʼaitsjen nga tsín jme chjíle. Jngo tichjaa xi Helen ʼmi, a itso: “Kʼianga sʼa koanjchínga alikui tjao tsabena xijchána. Je pana tsʼeen koan kʼoa nyaon nyaon kʼoakitsonajin nga tsín jme chjínajin”. Tsakui nichxin kʼoati koantʼain tsanda ji. Tsa totaon tsaʼyali kʼoa tsa kʼoatsakʼinli nga tsín jme chjíli. Tsakui nichxin kuinga tsín makjainnili nga ʼya xi kʼoatsoli nga makjáojinle xi tʼatsi.

4. Jméni xi tsoná Jeobá tojosʼin faʼaitʼa ya Salmo 34:18.

 ⁴ Ninga totaon beli chjota kuenta tʼiain nga tsjoakeli Jeobá kʼoa nga chjí bekonli nga̱ “je Jeobá chrian tíjnale je xi nʼio aon tjío ni̱ma̱le” (tʼexkiai Salmo 34:18). b Kʼiatsa jetínroajen tokuin, tikjaʼaitsjenjin nga kui kuenta kisʼin Jeobá jñani nda nʼiai kʼoa nga je xi kʼoasʼin koanmele nga choʼndale koain (Juan 6:44). Kʼoa nga nʼio tsjoakeli alikuikʼia tsjiónkonli.

5. Jmé xi bakóyaná josʼin tsabekon Jesús je chjota xi totaon tsaʼya.

⁵ Majinná josʼin bekonná je Jeobá kʼianga kuenta nʼia jokisʼin Jesús kʼianga jaʼai i̱ Sonʼnde. Je Jesús kuenta kisʼin je chjota xi totaon tsaʼya kʼoa koanmake (Mat. 9:​9-12). Tobʼelañá, je chjoón xi táo chʼin tjínle kʼoasʼin kisikjaʼaitsjen nga koa̱nndaya kʼiatsa najñole Jesús sikao. Je Jesús nda tso én tsakjákao kʼoa kʼoakitsole nga nʼio tíjna je kjoamakjainle (Mar. 5:​25-34). Jmeni xi kisʼin je Jesús kʼoasʼin tsakakóni jokjoan je Nʼaile (Juan 14:9). Kuinga tʼejngoni tokuin nga chjí beli Jeobá kʼoa nga kuenta sʼín jñani nda nʼiai, jolani nga makjainli xi tʼatsʼe kʼoa nga tsjoachai.

6. Jmé xi sʼiaan tsa sakʼoa kʼoasʼin nikjaʼaitsjeen nga tsín jme chjíná.

⁶ Jméni xi koa̱n sʼiain tsa tosi tonda kʼoasʼe tokuin nga tsín jme chjíli. Tʼexkiai kʼoa tikjaʼaitsjenjin jñani kʼoatso Biblia nga nʼio bechjíli Jeobá (Sal. 94:19). c Kʼiatsa tsín kʼoamali nga kʼoasʼin nixálai josʼin meli tsakai, ali nikinroajenjin tokuin kʼoa ali yaolijin nijtilai. Je Jeobá majinle jokji tjen bichó nganʼioná kʼoa  tsínkui síjéná jmeni xi tsín kuitjosonná (Sal. 103:​13, 14). Tsa ʼya xi totaon tsabeli kʼoa tsa jokisikaoli, ali kʼoajinsʼin nikjaʼaitsjain nga ji kisʼeli jée nga kʼoakoantʼain. Kui tikjaʼaitsjenjin nga kuenta sijéle Jeobá je chjota xi chʼao sʼín (1 Ped. 3:12). Je Sandra, totaon tsaʼya nga sʼa ʼndí kji kʼoa itso: “Kʼoaxin ʼndeʼndele Jeobá nga katabasenkaona nga skoe jñani nda sʼian”.

7. Ningalani kjoa kitjatojiaan ngasʼa, jméni xi koa̱n sʼiaan ndʼaibi.

⁷ Ali kʼoajinsʼin nikjaʼaitsjain nga tsín koa̱n kuisenkoai xi kjaʼaí, nga̱ je Jeobá kui kjoanda títsjoáli nga kʼuínyai xi tʼatsʼe (1 Cor. 3:9). Je kjoa xi bitjatojiaan basenkaoná nga ngisa ndʼé maa kʼoa nga majinná josatío kon xi ngikʼa. Je Helen, xi kabʼaxki̱ná ya párrafo 3, jé Jeobá kao je ndsʼee tsakasenkao nga chjí tsabe yaole, kʼoa ndʼaibi kʼoati tíbasenkao xi kjaʼaí. Itso: “Kʼoasʼin kisikjaʼaitsjen tsakai nga tsín jme chjína. Tonga jé Jeobá tíbasenkaona nga chjí tiʼbe yaona, kʼoa an kʼoati tibasenkoa xi kjaʼaí”. Ndʼaibi, je Helen precursora regular sʼin tísíxá kʼoa nʼio tsjoa tjín kon.

JE JEOBÁ KUI XI MELE NGA KʼOÉJNGOAA TOKOÁN NGA JEKISICHATʼANÁ

8. Jméni xi tsoná Jeobá tojosʼin faʼaitʼa ya Isaías 1:18.

⁸ Tjínkʼa ndsʼee xi tsín chajinle je jée xi tsakajngi ngasʼa. Tsakui nichxin kʼia kʼoakisʼin nga kjesa bexkonjin Jeobá kʼoa tsa kʼiaje̱ nga jekisʼenngindá. Tonga nga nʼio tsjoakená je Jeobá jetsakʼéchjíntjainá, kuinga kʼoéjngosíñá tokoán nga jekisichatʼaná je jée xi tsakijnyaa. Je Jeobá itsoná: “Nroáo, kʼoa kʼoéndajiaan je kjoa xi tjínná”. d Tsa kʼoasʼiaan, sichatʼa je jéená (tʼexkiai Isaías 1:18). e Bʼailee kjoanda Jeobá nga síchatʼaná je jée xi tsakijnyaa ngasʼa kʼoa nga tsín sichajin jñani nda nʼia (Sal. 103:​9, 12; Heb. 6:10).

9. Jméni xi sʼiaan nga tsín tokui si̱kjaʼaitsjen ʼndeʼndee je jée xi tsakijnyaa ngasʼa.

⁹ Tsín tokui si̱kjaʼaitsjenjin ʼndeʼndee je jée xi tsakijnyaa ngasʼa, tosa kui kuenta sʼiaan je kjoanda xi tjínná ndʼaibi kʼoa josʼin kuiyoaa nichxin xi sʼa nroa. Si̱kjaʼaitsjenjinla jokoan je pastro Pablo. Chʼao kisʼe kon nga kʼoasʼin chjotale Cristo kitjenngike, tonga kʼoati koanjinle nga jekisichatʼale Jeobá ningalani kʼoakisʼin (1 Tim. 1:​12-15). Tsínkui kisikjaʼaitsjen ʼndeʼnde je jée xi tsakajngi kʼoa tsínkui kini jmeni xi kisʼin nga ya tsakʼejnajinle je chjota fariseo (Filip. 3:​4-8, 13-15). Tosaa kao kjoatsjoa kitsoyason kʼoa kui kisikjaʼaitsjenjin je kjoanda xi kiskoyale. Kʼoati koa̱n kʼoasʼiaan tsanda ñá jokisʼin Pablo, kui kuenta sʼiaan josʼin si̱xálee Jeobá ndʼaibi kʼoa josʼin kuiyoaa nichxin xi sʼa nroa.

10. Jmé xi koa̱n sʼiaan tsa ʼyani xi kisikiʼaon jmeni xi kinʼia.

¹⁰ Tsakui nichxin tsín ndatjín tokuin nga kʼoati kisikiʼaon xi kjaʼaí jmeni xi kinʼiai. Jméni xi koa̱n sʼiain tsa kʼoalani kjima. Tijélai kjoanichatʼa kʼoa kʼoatʼinlai nga kʼoamanili jmeni xi kinʼiai (2 Cor. 7:11). Kʼoatʼinlai Jeobá nga katabasenkao.  Jé Jeobá koasenkao kʼoa kʼoati koasenkaoli nga ndasʼin kuiyo ijngokʼao.

11. Jméni xi bakóyaná jokisʼin Jonás (chótsenlai sén xi faʼaitʼa ya portada).

¹¹ Si̱ndayaa yaoná, alikui tikʼoasʼianñá jokinʼia ngasʼa kʼoa kuenta sʼiaan jósʼin mele Jeobá nga si̱xálee. Si̱kjaʼaitsjenla jokisʼin Jonás. ʼNdele nga ya koai naxinandá Nínive jñani kitsole Niná, tosaa xin ʼnde ki. Tonga nga tsakatekjáyale Jeobá kisindayaa yaole (Jon. 1:​1-4, 15-17; 2:​7-10). Alikui kʼoakitso Jeobá nga tsín titsjoáxánile je Jonás, tosaa tsakʼéxá ngindiale nga katafi ya Nínive, kʼoa je Jonás kisitjoson. Ninga chʼao kisʼe kon nga tsín kisitjoson nga títjon, alikui kui kisikʼajennile kon. Tosi tonda kisitjoson je xá xi tsakánele Jeobá (Jon. 3:​1-3).

JE JEOBÁ KUI SÍCHJÉN NGANʼIOTSJELE NGA SÍNʼIO TOKOÁN

12. Jósʼin basenkaoná Jeobá nga nda sʼe tokoán kʼianga tse kjoa bitjatojiaan (Filipenses 4:​6, 7).

¹² Kʼianga tse kjoa bitjatojiaan kui nganʼiotsjele Jeobá síchjén nga basenkaoná. Tobʼelañá, tsee kjoa tsakatiojin je Ron kao Carol kʼianga kisikʼien yaole je tile. Itso: “Jesa tse kjoa kitjatojinjin, tonga kui xi ngisa tsakʼetʼanajin nga kʼoakisʼin tinajin. Nkjín nitje̱n nga tsín nda kisʼefaijin, tsakʼetsʼoalaijin Jeobá kʼoa nda kisʼe tokuinjin tojo tso ya Filipenses 4:​6, 7” f (tʼexkiai). Tsa tse kjoa tibitjatojin kʼoa tsa tsín ndatjín tokuin, tʼeyanajmílai Jeobá jomali. Kjuinrʼoéli ninga tse chja̱kaonajmí kʼoa ninga nkjín kʼa kʼoakʼuínlai jmeni xi makjáojinli (Sal. 86:3; 88:1). Tosi tonda kʼoatʼinlai Jeobá nga katabasenkaoli, nga̱ kjuinrʼoéli kʼoa tsjoáli nganʼiotsjele (Luc. 11:​9-13).

13. Jósʼin basenkaoná nganʼiotsjele Jeobá nga tosi tonda kixi mangíntʼalee (Efesios 3:16).

¹³ Tsa tse kjoa tibitjatojin, tsakui nichxin kʼoasʼin nikjaʼaitsjain nga tsín tichókjoajinnili. Kui nganʼiotsjele Jeobá koasenkaoli nga tosi tonda kixi kʼuíntʼalai (tʼexkiai Efesios 3:16). g Kataʼyala jokoan je tichjaa xi Flora ʼmi. Misionero sʼin tjíosíxá tsakai kao xʼinle, tonga je xʼinle kjaʼaí chjoón kikao kʼoa kitsjion xínkjín. Je tichjaa itso: “Nga kʼoasʼin tsakʼanachana je xʼinna nʼio ba kisʼe tokoan, tokui ngotjo ngosa jaʼaitsjennina jmeni xi koantʼen. Kisijéle nganʼiotsjele Jeobá nga katabasenkaona nga katachókjoajinna kjoa xi tifaʼatojian. Kʼoasʼin kisikjaʼaitsjen nga tsín tikʼia nda sʼe̱ni tokoan, tonga jé Jeobá tsakasenkaona”. Je tichjaa kʼoatso josʼin tíbasenkao Niná, ngisaa kjimanʼiotʼa kʼoa tjínjngo kon nga je koasenkao tojme kjoa xi kjoaʼatojin. Je tichjaa kʼoatso nga kʼoasʼin tíbasenkao Jeobá jotso ya Salmo 119:​32, nga i̱ tso: “Tosi tonda sitjosoan jotso je kjoatéxomali, nga̱ ji xonʼiai nga kʼoasʼin mamele je ni̱ma̱na”.

14. Jméni xi sʼiaan nga tsjoáná Niná je nganʼiotsjele.

¹⁴ Jméni xi machjén nga sʼiaan kʼianga jekʼoaʼmilee Jeobá nga katatsjoáná nganʼiotsjele. Machjén nga koanngián je kjoajtín xi satíoná kʼoa nga kʼuínyasoán, nga̱ kui nganʼiotsjele Jeobá bándiaa kʼianga biyojtián kʼoa nga ʼmiyasoán.  Kʼoa nga nyaon nyaon kʼoéxkiaa Biblia, kui kuenta sʼiaan josʼin síkjaʼaitsjen je Jeobá (Filip. 4:​8, 9). Kʼianga kʼoéxkiaa Biblia, si̱kjaʼaitsjenjiaan jmé kjoa xi jaʼatojin je chjota xi síkʼaxki̱ kʼoa jósʼin tsakasenkao Jeobá. Je Sandra, xi kabʼaxki̱ná ya párrafo 6, tsee kjoa jaʼatojin kʼoa itso: “Je choa̱le José nʼio nda basenkaona, alikui kisikjinle Jeobá ninga tse kjoa jaʼatojin” (Gén. 39:​21-23).

JÉ NDSʼEE SÍCHJÉN JEOBÁ NGA SÍNʼIO TOKOÁN

15. Jósʼin binyakaoná je ndsʼee, kʼoa jósʼin sínʼio tokoán (kʼoati chótsenlai sén xi faʼaitʼa).

¹⁵ Sínʼio tokoán je ndsʼee kʼianga kjoa bitjatojiaan (Col. 4:11). Yaa bakóni jokji tsjoakená Jeobá nga je ndsʼee síchjén nga binyakaoná. Nda sʼe tokoán kʼianga síxatʼaná je ndsʼee kʼoa nga nrʼoéná tsa jme xi bʼeyanajmílee. Kʼoati nda sʼe tokoán nga jngo textole Biblia bʼéxkianá kʼoa tsa bʼétsʼoantjainá (Rom. 15:4). h Basenkaoná nga kʼoatsoná je ndsʼee josʼin síkjaʼaitsjen Jeobá kʼianga kjoa tibitjatojiaan. Kʼoa nkjínsa koya josʼin binyakaoná, jolani tsakui kuichokaoná je tsojmi xi ma chine.

16. Jmé xi tjínnele sʼiaan nga koa̱n kuinyakaoná je ndsʼee.

¹⁶ Je ndsʼee tsjoakená kʼoa mele kuinyakaoná.  Tonga machjén nga ñá kʼoakʼuínlee jósʼin mená nga kuinyakaoná (Prov. 17:17). Nga̱ tsín be jotjío tokoán kʼoa jme nganʼio xi machjénná (Prov. 14:10). Kʼiatsa ba tjín tokoán, je ndsʼee xi nʼiotʼaa kʼoéyanajmílee kʼoa kʼoakʼuínlee jósʼin mená nga kuinyakaoná. Kʼoati koa̱n kʼoéyanajmílee jotjín tokoán je xi chjotajchínga sʼin tjío, tsa jngo kʼoa tsa jao chja̱kaonajmiá. Kʼoa tjínkʼa tichjaa xi ngisa tso kon nga jngo tichjaa bʼéyanajmíle jotjín kon.

17. Jméni xi sʼiaan kʼiatsa tsín tso tokoán nga ʼya xi chjakaonajmiá.

¹⁷ Kʼianga ba tjín tokoán sakʼoa tsín mená nga ʼya xi chjakaonajmiá. Tonga tsín ndatjín nga toñá chʼaa yaoná. Tsakui nichxin likui majinle ndsʼee jotjín tokoán kʼoa tsakui kʼoakuitsonáje̱ jmeni xi tsín sa̱sénná (Sant. 3:2). Tsín koa̱n nga tokui si̱kjinnilee je ndsʼee, tosa kʼoaiʼndee nga katatsjoánganʼioná. Jngo ndsʼee xi chjotajchínga sʼin tíjna, xi Gavin ʼmi, depresión tjínle kʼoa itso: “Sakʼoa ñaki tsín tso tokoan nga ʼya xi kjoakaonajmía”. Je Gavin bʼénele yaole nga símiyo je ndsʼee kʼoa ndani sʼe kon. Jngo tichjaa xi Amy ʼmi, itso: “Nga tse kjoa jaʼatojian ñʼai mana nga ʼya xi sinʼiotʼa. Tonga mena nga tsjoake̱ koa̱n je ndsʼee kʼoa nga sinʼiotʼa tojo sʼín je Jeobá. Tsjoa sʼe tokoan nga kʼoasʼian kʼoa kʼoati tsjoa sʼe kon je Jeobá”.

JMENI XI SʼIN JEOBÁ NICHXIN XI SʼA NROA KʼOATI SÍNʼIO TOKOÁN

18. Jósʼin kuiyoaa nichxin xi sʼa nroa, kʼoa jméni xi sʼiaan ndʼaibi.

¹⁸ Tsjoa sʼe tokoán nga jeme kjoaʼaxin Jeobá ngayeje jmeni xi kjoañʼai síkjaʼáná (Apoc. 21:​3, 4). Kʼianga jeya tiyoaa ʼndenaxó alikui tikui kjoaʼaítsjenniná jmeni xi kjoañʼai síkjaʼáná (Is. 65:17). Ningalani kjoañʼai tichjaʼá ndʼaibi, nkjín koya josʼin basenkaoná je Jeobá nga nda sʼe tokoán kʼoa ʼyañá nga nʼio tsjoakená. Kuinga machjénni nga kʼoaiʼndee nga je katabasenkaoná (1 Ped. 5:7).