1, 2. Ánni nga nʼio tsjoánile kjoandosin je testigole Jeobá nga ndakjoan najño xi bʼakjá (chótsenlai sén xi faʼaitʼa ibi).

JNGO periódiko xi bitjo ya naxinandá Holanda kui kisikʼaxki̱ jokjoan najño xi yʼakjá je chjotatítjonle relijión kʼianga ki je kjoajtín xi kisatiole. Periódiko jebi kʼoakitso nga nʼio nkjín xi tojokjoan najño xi yʼakjá kʼoa ngisaa nga sjeya. Kʼoati kisikʼaxki̱ jokjoan najño xi yʼakjá je testigole Jeobá kʼianga ki je kjoajtíntse. Periódiko jebi kʼoakitso nga je xtiʼndí kao chjotajchínga corbata tjíongile kʼoa traje yʼakjá. Kʼoakitso nga je xi yánchjín kʼoa ninga je xi sʼa xtiʼndí, alikui koto kjoan najño xi yʼakjá ninga kui yʼakjá najño xi tjín ndʼaibi. Me kjitʼa nga nda bʼaxki̱ jokjoan najño xi bʼakjá je testigole Jeobá. Je pastro Pablo kʼoakitso nga je chjotale Cristo tjínnele nga kui kʼoakjá “najño xi nda xi bakinle” kʼoa nga “katasʼe i̱tséle kjoasoatakon nga nda katafikao yaole” (1 Timoteo 2:9, 10). Ninga je xi yánchjín xokitsole je pastro Pablo kʼoati machjénle kjoafaʼaitsjen jebi je xi xʼin.

² Ñá xi choʼndale Jeobá maa nʼio bʼailee kjoandosin jokjoan najño xi chʼakjá nga̱ ʼyañá nga kʼoati kuenta sʼín je Niná  jokjoan najñoná (Génesis 3:21). Jé Jeobá batéxomale ngʼajmi kao Sonʼnde. Kʼoa je Biblia kʼoatso nga tjínle kjoatéxoma jotjínnele kjoáyo je choʼndale. Kuinga tsín koa̱n tokui kjuinñá jokjoan najño xi tsjoachaa. Je xi ngisa chjíle kuinga kʼoati katasasénle je Jeobá, je xi Nináná mani kʼoa xi batéxomaná.

3. Jméni xi tsoyaná je Kjoatéxomale Moisés tʼatsʼe najño xi chʼakjá.

³ Je kjoatéxoma xi tsakʼaile chjota israelita tsakinyakao nga tsín kʼoati kisʼin josʼín je naxinandá xi ya tjíondaile. Je kjoatéxoma jebi bakó nga nʼio jtike je Jeobá nga kui bʼakjá je chjota najño xi tsín tsa ʼyale tsa tsʼe yánchjín kʼoa tsa tsʼe xʼin (tʼexkiai Deuteronomio 22:5). * Je Kjoatéxomale Moisés kui xi bakóyaná nga tsín tsjoake je Jeobá nga kui bʼakjá je xi xʼin najño xi joyánchjín síkjoan kʼoa nga kui bʼakjá je xi yánchjín najño xi joxʼin síkjoan. Kʼoa tsakuije̱ najño xi tsín ʼyale tsa chjoón kʼoa tsa xʼin je xi yʼakjá.

4. Jméni xi koasenkao je chjotale Cristo nga ndakjoan najño xi skoéjin.

⁴ Je kjoafaʼaitsjen xi tsjoá je Biblia basenkaoná nga ʼyaa jokjoan najño xi chʼakjá. Kjoafaʼaitsjen jebi machjénná tojñani tsaan kʼoa tojo chon ʼndená, ni nyʼán kʼoa ni sjeya ma. Alikui machjén nga ñaki jngo xo̱n sʼe̱tʼaná jokjoan najño xi koa̱n chʼa̱kjá kʼoa jokjoan xi mai. Koaan kui chʼa̱kjá jokjoan najño xi mená tonga kuenta sʼiaan je kjoafaʼaitsjen xi nroatʼa Biblia. Kataʼyala kʼaa kjoafaʼaitsjen xi nroatʼa Biblia xi koasenkaoná nga jchaa “jmeni xi Niná mele, jñale xi nda, xi sasénle, xi ñaki tjíjngo” (Romanos 12:1, 2).

5, 6. Jósʼin tjínnele koasenkao je chjota jokjoan najño xi chʼakjá.

⁵ Je pastro Pablo kao nganʼiotsjele Jeobá kiski je én xi faʼaitʼa ya 2 Corintios 6:4 * (tʼexkiai). Jokjoan najño xi chʼakjá kui bakó jokjoaan (1 Samuel 16:7). Nga choʼndale Niná maa, alikui tsa tokuijin kjuinñá nga nda chʼakjá jngo najño kʼoa tsa tokui nga naskánakjoan. Je kjoafaʼaitsjen xi tsjoá Biblia koasenkaoná nga tsínkui chʼa̱kjá najño xi sʼeyanʼio yaoná, xi matsenya kʼoa tsa xi koto kjoan. Alikui koa̱n nga kui chʼa̱kjá najño xi tosa je xíngiaa koa̱nsoale nga skótsenná kʼoa tosa toxin skótsen.

⁶ Tsa tsje kjoan najñoná kʼoa ndasʼin matsen, tochale ngisa skoe̱xkón chjota je naxinandále Niná kʼoa ngisa skoe̱xkónnáje̱ ñá xi choʼndale maa. Kʼoa tsakui nichxin saʼnda koa̱nndosinle tʼatsʼe Niná kʼoa kjuinrʼoéná kʼianga kʼuínyasonlee.

7, 8. Kʼiáni nga nʼio machjén nga kui chʼa̱kjá najño xi ndasʼin matsen.

⁷ Nga koakolee kjoaxkóntokon je Niná, je xíngiaa kʼoa kao chjota xi tjín jñani ʼmiyasoán, tjínnele nga kui chʼa̱kjá najño xi Jeobá bʼasjengʼa kʼoa xi sasénle je én xi ʼmiyasoán (Romanos 13:8-10). Nʼio machjén nga nda sóyoaa kʼianga mangián kjoajtínná kʼoa nga mangínkʼinyasoán. Je najño xi chʼakjá tjínnele koako nga Niná ʼyaxkoán (1 Timoteo 2:10). Tsakui nichxin tjín najño xi koa̱n chʼa̱kjá jngo ʼnde tonga tsín koa̱n chʼa̱kjá jñani xin. Tonga tojñani tsaan, ñá xi testigole Jeobá maa tjínnele nga kui chʼa̱kjá najño xi tsín chʼaosʼin skoe̱kon chjota.

 ⁸ (Tʼexkiai 1 Corintios 10:31). * Kʼianga mangián kjoajtíntse xi satíoná tjínnele nga kui chʼa̱kjá najño xi ndasʼin matsen kʼoa xi tsín tokjaʼaíngá kjoan. Alikui koa̱n nga ya chjénngilee jofayo chjota xi tjín ndʼaibi. Kʼoati tsín koa̱n nga to josóyoaa kʼianga sʼa timangián kjoajtíntsená kʼoa kʼianga jekjoetʼa. Kʼoa ninga kʼiaje̱ nga kuichoaa ya hotel jña kuiyoñá kʼoa tsa kʼianga jekoanngínñá. Tsa ndakjoan najño xi kichʼakjá kao kjoatsjoa kʼoakuixoán nga testigole Jeobá maa kʼoa koaan chja̱kaoñá Énle Niná je chjota tokʼiani.

9, 10. Jósʼin koasenkaoná Filipenses 2:4 nga chjoéjiaan jokjoan najño xi chʼa̱kjá.

⁹ (Tʼexkiai Filipenses 2:4). * Ánni nga tjínnenile si̱kjaʼaitsjeen josikao je ndsʼee jokjoan najño xi chʼakjá. Jngo koya anni kuinga kui kjoafaʼaitsjen jebi mangíntjenngiaa: “Tinyachʼaolao yaono, joni tsa tinikʼaon yaono, tʼatsʼe je kjoa xi tjín sonʼnde: kjoachajngi, kjoajndí, kjoachi̱nga̱” (Colosenses 3:2, 5). Tjínkʼa xi kisichajngi kʼianga kjesa testigole Jeobá majin, kʼoa tsakui nichxin tojo kui tjíokjántʼakao  xi chʼaotjín. Tsa tsín chósonnilee jokjoan najño xi chʼa̱kjá, tochale ngisa ñʼai koa̱nle je ndsʼee nga sitjoson jotso Biblia kʼoa ngisa ñʼai koa̱nle nga skantʼakao xi chʼaotjín (1 Corintios 6:9, 10). Alikui mená nga kʼoakoa̱n.

¹⁰ Kʼianga ya tiyokoaa je ndsʼee tiyotʼaxinlee je chjota xi kjoachajngi tsjoake. Tsa ndakjoan najño xi chʼakjá tibʼainganʼioñá nga tosi tonda tsje kuiyoaa ya Ndʼia jña chotʼayá kʼoa tojñani nga tiyoaa. Ninga tiʼndená nga ñá chjoéjiaan jokjoan najño xi chʼa̱kjá, kʼoati kui kjinená nga kui chʼa̱kjá najño xi koasenkao je xi ngikʼa nga kʼoasʼin sikjaʼaitsjen, kʼoasʼin kuinchja̱ kʼoa kʼoasʼin jmeni xi tsje sʼin tíjna ngixko̱n Niná (1 Pedro 1:15, 16). Je xi tjínle kjoatsjoacha alikui to yaole fini (1 Corintios 13:4, 5).

11, 12. Jósʼin basenkaoná Eclesiastés 3:1 kao 17 nga chosonnilee jokjoan najño xi chʼakjá.

¹¹ Tsen tjín nichxin jokjoan najño xi bakinle nga chʼakjá (Eclesiastés 3:1, 17). Tobʼelañá, kui xi tsoni jochon ya jñani tsaan kʼoa jme cha̱n xi tiyoaa. Tonga je kjoatéxomale Jeobá alikui bʼantjaiya (Malaquías 3:6).

¹² Ya jñani nʼio sjeya ngisaa ñʼai ma nga chjoejiaan jokjoan najño xi ndasʼin matsen. Kʼoa je tichjaa kao ndsʼee nʼio chjí be nga tsínkui chʼakjá najño xi sʼeyoyanʼio yaoná kao xi nʼio xjoe kjoan, xi matsenya (Job 31:1). Kʼoa ninga ya tiyoaa jña nandá tjín, tjínnele nga kui chʼa̱kjá je najño xi ndasʼin matsen (Proverbios 11:2, 20). Nʼio nkjín chjota xi kui bʼakjá je najño xi tsín nanda bʼéʼma yaole kʼianga ya tjío jñani nandá tjín. Tonga ñá, tjínnele si̱kjaʼaitsjeen nga je Jeobá nʼio tsje kʼoa machjén nga kui chʼa̱kjá je najño xi je kʼoasjengʼa.

13. Ánni nga kuenta sʼiansíñá jmeni xi tso 1 Corintios 10:32, 33 tʼatsʼe jokjoan najño xi chʼa̱kjá.

¹³ Xi kʼoati kuenta sʼiaan nga chja̱ʼajiaan jokjoan najño xi chʼa̱kjá kui je kjoafaʼaitsjen xi kʼoatso nga tsín si̱katéngiaa xi ngikʼa (tʼexkiai 1 Corintios 10:32, 33). * Tjínnele nga tsínkui chʼa̱kjá je najño xi sikaténgi je ndsʼee kao tichjaa, kʼoa tsa je chjota xi tsín kotʼaya Biblia. Je pastro Pablo i kitso: “Nga jngójngoábi si̱tsjoayalee xíngiaa xi tʼatsʼe nga ngisa nda koa̱nle kʼoa nga kuinngʼasa. Nga̱ Cristo likui tije kisitsjoayanile yaole” (Romanos 15:2, 3). Je Jesús alikui to yaole kini, je xi ngisa títjon kisikʼéjna kuinga kʼoakisʼin jme xi mele je Nʼaile kʼoa nga tsakasenkao xi ngikʼa. Kʼoati tjínnele sʼiaan tsanda ñá. Alikui koa̱n nga kui chʼa̱kjá najño xi toñá ndakjoanná kʼiatsa sikaténgi je chjota kʼoa tsa tokui nga tsín kjuinrʼoéniná nga chja̱kaoñá je Énle Niná.

14. Jósʼin kuitsoyale ʼndíxtile je xi xijchá ma nga je Jeobá katabʼasjengʼa je najño xi kʼoakjá.

¹⁴ Je xijchá xi chjotale Cristo ma jé kjinele nga kuitsoyale ʼndíxtile nga katasítjoson je kjoafaʼaitsjen xi faʼaitʼa ya Biblia. Jé kjinele nga koakoyale ʼndíxtile nga nda katafayo kʼoa nga kui katabʼakjá najño xi ndasʼin matsen, xi sasénle Jeobá (Proverbios 22:6; 27:11). Jmé xi sʼin je xi xijchá ma nga kuitsoyale je ʼndíxtile nga katasítjosonle Niná. Kʼiaa nga je koatiole choa̱ kʼoa nga kao kjoatsjoacha kuitsoyale jósʼin so̱kole najño xi ndakjoan kʼoa jñáni koasjai. Kʼoati tjínnele kuitsoyale ʼndíxtile nga tsín tsa tokui katakjoéjin najño xi tsjoake, nga je xi ngisa chjíle kuinga je Jeobá kʼoasjengʼa najño xi skoéjin.

15. Jméni xi koasenkaoná nga nda chjoéjiaan jokjoan najño xi chʼa̱kjá.

¹⁵ Je Biblia nʼio nda kjoafaʼaitsjen tsjoáná xi basenkaoná nga kui chjoejiaan jmeni xi je Niná bʼasjengʼa. Ninga kʼoalani, tsen tjín jokjoan najño xi tsjoachaa nga jngó jngoá kʼoa kjaʼaí kjaʼaí kjoan najño xi bindaa. Tonga tjínnele nga tsje kjoan najño xi chʼa̱kjá, nga ndakjoan kʼoa nga tsín síxkón kjoan. Je najño xi bakinle jme xi tinʼia, jñani tiyoaa kʼoa xi tsín sikaténgi je chjota xi tjín jñani ʼndená.

16. Ánni nga nʼio chjínile nga kʼoénelee yaoná nga kui chʼa̱kjá najño xi ndakjoan.

¹⁶ Nʼio ñʼai maná nga sokóná najño xi ndakjoan ya tienda nga̱ nʼio nkjín xi tokui baténa je najño xi sʼa kjimatsen. Tsakui nichxin ñʼai sokoniná falda xi ndakjoan, blusa kao chʼótji. Kʼoa tsakuije̱ traje kao pantalón xi tsín sʼeyanʼio je chjotaxʼin. Tonga nʼio chjíle nga kjoásjee. Ánni. Xi títjon, kuinga sa̱sénle je ndsʼee kʼoa skoee nga bʼenelee yaoná nga ndakjoan kʼoa nga naskánakjoan najño xi chʼakjá. Xi majaoni, kuinga je Jeobá chʼa̱sjengʼaa. Ninga ñʼai koa̱nná nga so̱koná najño xi ndakjoan, je xi ngisa tsjoa kʼoee tokoán kuinga je Jeobá kuitjongʼa kʼoa kui xi ngisa chjíle.

17. Jméni xi kuenta sʼin jngo ndsʼee kʼiatsa kui tísíkjaʼaitsjen nga tsín kʼoejon ntsja̱nkjaín.

¹⁷ A koaan nga ntsja̱nkjaín kjoáyo je ndsʼee. Je kjoatéxoma xi tsakʼaile chjota israelita kʼoatso nga je xi xʼin tjínnele ntsja̱nkjaín kjoáyo. Tonga ñá xi chjotale Cristo maa, alikui tikui kjoatéxoma mangíntjenngiñá kʼoa alikui tjínnele nga kui si̱tjosoán (Levítico 19:27; 21:5; Gálatas 3:24, 25). Tjín ʼnde jñani tsín chʼaosʼin ʼyale kʼianga ntsja̱nkjaín fayo je chjota, kʼoa tsakui nichxin likui ʼya xi saténgi kʼoa tojo nrʼoé chjota je Énle Niná ninga kʼoakji je ndsʼee nga títsoyason. Ya ʼnde jñani kʼoasʼin ngale je chjota, tjínkʼa je ndsʼee xi xá tjínle ya jinjtín xi ntsja̱nkjaín kjoan. Ninga kʼoalani, tsakui nichxin tojo tsín kʼoakjoáyo kʼa je ndsʼee (1 Corintios 8:9, 13; 10:32). Kʼoa tjín ʼnde jñani tsín ngale chjota nga ntsja̱nkjaín kjoáyo je xi xʼin kʼoa alikui nda be nga kʼoafayo je xi chjotale Cristo ma. Tsa tsín kʼoasʼin ngale je chjota kʼoa tsa jngo ndsʼee xi kʼoakjoá alikuijin je Jeobá tíbʼasjengʼa kʼoa alikuijin tísítjoson je xi tso ya Biblia nga je xi xá tjínle ya jinjtín “alijme jée sʼele” (1 Timoteo 3:2, 7; Romanos 15:1-3).

18, 19. Jósʼin basenkaoná Miqueas 6:8.

¹⁸ Nʼio bʼailee kjoanda je Jeobá nga tsín ñaki tjítʼaxo̱nle ngayeje jmeni xi koa̱n chʼa̱kjá kʼoa jmeni xi mai, kʼoa kao josóyoaa. Je Jeobá tsjoáná kjoafaʼaitsjen tʼatsʼe jokjoan najño xi chʼa̱kjá kʼoa tsjoáʼndená nga ñá chjoéjiaan. Kʼianga chjoejiaan je najñoná kʼoa josoyoaa tjínnele koakoá nga nangitokon maa kʼianga tinixálee je Jeobá, tojo tso Miqueas 6:8.

¹⁹ Nangitokon katamaa nga̱ ʼyañá nga nʼio tsje je Jeobá kʼoa nga nʼio basenkaoná je kjoafaʼaitsjen xi tsjoáná. Tsa tjínná kjoanangitokon tosi tonda si̱tjosoán kjoatéxomale kʼoa kui xi koasenkaoná nga koakolee kjoaxkóntokon je xi kjaʼaí.

20. Jósʼin koasenkao xi kjaʼaí jokjoan najño xi chʼakjá kʼoa josoyoaa.

²⁰ Je najño xi chʼakjá tjínnele koako nga testigole Jeobá maa. Je kjoatéxomale Jeobá nʼio ngʼa tíjna kʼoa kao kjoatsjoa nitjosoán. Bʼailee kjoanda je ndsʼee kao tichjaa nga nʼio nda fayo kʼoa nga nda fikao yaole. Kʼianga kʼoasʼín, bʼasjengʼa je Jeobá, báyatsjoa ni̱ma̱le kʼoa je chjota xi ndatjío ni̱ma̱le nrʼoé je Énle Niná. Tsa nda chjoéjiaan jokjoan najño xi chʼa̱kjá, tosi tonda chʼa̱sjengʼaa je Jeobá nga̱ nʼio jeya tíjna (Salmo 104:1, 2).