Je Seth * itso: “Je chjoónna kʼoa kao an ñatjen koantsínnajin je xá. Jaonóla nga tokui kinichjáinjin je nganʼio xi kitsjoanajin familianajin, kʼoa kao xi kisokonajin nga sakʼoa kisokoxánajin je xi kitjatonilaijin yaonajin. Kʼianga kʼoakoainjin, je Priscilla, je chjoónna, depresión kisʼele, kʼoa an joxi tsín jme chjína koanna”.

Je Seth itsosa: “Jméni xi kinʼiaijin nga kui kjoa kitjatojinjin. Je Priscilla kui kisikjaʼaitsjen kjitʼa je énle Jesús xi faʼaitʼa ya Mateo 6:34, jñani kʼoatso nga tsínkui si̱kjáojiaan tʼatsʼe xi koa̱nnyaonni, nga kjaʼaí kjaʼaí kjoa nikjáojiaan nga nyaon nyaon. Xi ijngosani, josʼin tsakʼétsʼoa kui xi tsakasenkao nga tsakʼénele yaole nga nyaon nyaon. Kʼoa an kui kisinʼio tokoan xi tso Salmo 55:22. Tojo kitso je salmista, jé Jeobá kisikʼamia je chʼána kʼoa tsaʼbeña nga tsakasenkaona. Ninga tjínna xá ndʼaibi, tokjimaninajin josʼin tiyuijin, kui timangíntjenngijin kjoafaʼaitsjen xi kitsjoa Jesús ya Mateo 6:20-22. Nda tiyokoaijin xíngijin kʼoa nda tiyuijin kao Niná”.

Kʼoa je xi Jonathan ʼmi itso: “Kʼianga jetsín tikoanni je negosio xi i̱natjín tíjnanajin nʼio kitsokjoan. Kʼianga nʼio ñʼai koanchon je tao̱n, toxitsjoani xi 20 nó kinixáijin. Je chjoónna kao an totʼatsʼe tao̱n chobatiyanijin. Saʼnda tsín tikinichjénnijin je tarjeta de crédito, kui kinokjonlaijin tsa tsín tijme tao̱n tjínnile”.

Je Jonathan itsosa: “Tonga tsakasenkaonajin je Biblia kʼoa kao nganʼiotsjele Niná kʼianga kui kichjoejinjin xi kixi tíjna. Kisixáña tojme xáni, ninga kui xá xi nangi síkatío chjota, kʼoa alikui titoxkia kinikjeyanijin tao̱n. Kʼianga testigole Jeobá maijin, je xi ngóson sʼin makjainnajin kʼoati tsakinyakaonajin. Kisinʼio tokuinjin kʼoa tsakinyakaonajin kʼianga jmeni xi ñʼai koannajin”.

Je Raquel itso: “Kʼianga toʼi̱koan kisikʼéjnana je xʼinna, nʼio koanjtina kʼoa aon koanna. Nʼio ba koanle ni̱ma̱na, tonga kisichriantʼale je Niná kʼoa jé kisinʼio tokoan. Nyaon nyaon tsakʼetsʼoale, kʼoa nyʼán tsakʼé ni̱ma̱na. Jngoyale jé kisindaya ni̱ma̱na”.

Je Raquel itsosa: “Je Biblia tsakasenkaona, nga tsín tichʼao kisʼeni koan kʼoa nga tsín tikoanjtinina. Ñaki kisichjénña je én xi kinchja̱ Pablo ya Romanos 12:21: “Ali jejin síkinjeli xi chʼao tjínbe, tonga tikinjelai xi chʼao tjín xi totʼatsʼe xi nda tjín”.

Itsosa: “Jngo miyona xi kʼoakitsona nga koa̱n sichajian. Kui tsakakóna Eclesiastés 3:6 kʼoa ngasin nganda kʼoakitsona nga tosa nda nga sichajian. Ñʼai koanna nga kʼoakisʼian tonga kui kjoafaʼaitsjen jebi xi tsakasenkaona. Kʼoa ndʼaibi jetsakʼendajian jmeni xi mena sʼian”.

Je Elizabeth itso: “Kʼianga jebixoya kjoabixanná nganʼio machjénná. Jngo miyona xi nyaon nyaon kitsjoana nganʼio. Kiskiʼndákaona, kisinʼio tokoan kʼoa tsakakóna kjoatsjoacha kʼoa alikui tsakʼasjengina. Ñaki tjínjngo tokoan nga je Jeobá kisichjén kʼianga nda kisʼeni je kjoafaʼaitsjenna”.

Je Luis, je xi kanikʼaxki̱ná ya kjoaʼmiya xi títjon, jngo chʼin tjínle ya ni̱ma̱le kʼoa jao kʼa tjínni nga me kʼien. Kʼoa nga nyaon nyaon 16 ora nga oxígeno sʼetʼale. Itso je Luis: “Kjitʼaa bʼetsʼoa kʼoa nga jebʼetsʼoale je Jeobá, ñaki tsen mana nga tsjoánganʼiona. Kʼianga bʼetsʼoa kui xi basenkaona nga tosi tonda bʼenele  yaona, makjainná xi tʼatsʼe Niná kʼoa ñaki kʼoatjín tokoan nga mandosinle xi tʼatsʼan”.

Je Petra, xi jetsʼato 80 nóle itso: “Mena nga toʼan kʼoasʼian tojmeni..., tonga alikui kʼoamana. Nʼio ñʼai maná kʼianga sa nroajen sa nroajen nganʼioná. Jetobijtasana kʼoa tokui xki tijnakonña. Kʼoa nʼio kjitʼa kui sikjaʼaitsjenjian je én xi kitsole Jesús je Nʼaile: Tsa koa̱nni chjaʼaxinnái je kjoañʼaibi. Tonga ʼndele nga kʼoasʼin je Jeobá tosa kitsjoanganʼiole. Kʼoati síkaona tsanda an. Kʼianga bʼetsʼoa kui xkina. Nda sʼe je tokoan kʼianga jefakaonajmía je Niná” (Mateo 26:39).

Je Julián, xi jeme 30 nó tíjnakao je chʼin xi esclorosis múltiple ʼmi itso: “Jekisikʼéjna xángʼa xi tjínna kʼoa ndʼaibi jeto silla de rueda tijnasoan, tonga ngisaa ndasʼin tijna ndʼaibi nga basenkaoña je chjota. Kʼianga kʼoanʼia basenkaoná kjoañʼai xi tibitjatojiaan, kʼoa je Jeobá tsjoánganʼioná ninga kjoa tibitjatojiaan. Kʼoati xian jokitso je Pablo: Kʼoakoa̱nna tojmeni nga̱ tjínna nganʼio xi totʼatsʼe je xi kʼoasʼin tsjoána nganʼio” (Filipenses 4:13, TNM).

Je Antonio itso: “Kʼianga jngo kjoaxkón kisokole je nʼaina kʼianga jngo karro kisatetʼale, toxokʼoajin kjimaná to kixinña. Saʼnda tsín je kisʼele jée nga toyaa sénjna ya carretera. Tonga alijme xi koan kisʼian. Kʼianga kjesa biyajin, aon nichxin nga totsakʼejnakonni̱ma̱. Tsakʼenele yaona nga tsín ya kiskiʼndá ngixko̱n na̱na, tonga ñaki toxkia kjiʼndáña nga toʼan tijna. Ngotjo ngosa i̱ kixian: Ánni. Ánni”.

Je Antonio itsosa: “Jotjín nichxin nga kjoaba tsakatejnajian, kʼoakixinntsjaile Jeobá nga katabasenkaona nga tsín kjoafaʼaitsjenna katasíkinjena kʼoa nga katatsjoána kjoanyʼán. Tobijbi nda kisʼe kjoafaʼaitsjenna. Kui kisikjaʼaitsjen kʼianga je Biblia kʼoatso nga je nichxin kʼoa xi tsín choyalee faʼainele toʼyani. Kʼianga tsín male bʼéndiso je Niná, ñaki tjínjngo tokoan nga skoe ijngokʼaña je nʼaina kʼianga kjoaʼáyale” (Eclesiastés 9:11; Juan 11:25; Tito 1:2).

Je Robert, xi kanikʼaxki̱ná kjoaʼmiya xi títjon kʼoati i̱ tso: “Kʼianga tsakʼetsʼoalaijin je Jeobá, je chjoónna kʼoa kao an ñaki kui kisʼenajin kjoanyʼán xi síkʼaxki̱ ya Filipenses 4:6, 7. Nga nyʼán kisʼe ni̱ma̱najin kui xi tsakinyakaonajin nga koan kinokjoakaonijin je periodista nga kjoaʼáyanile je kʼien. Ninga ya kʼien ʼndínajin je kjoaxkón xi kisokole je avión, kui nikjaʼaitsjainjin jonaskásʼin tsakiyuijin nga tíjnakonsa. Kʼoa kui xi ngisa nʼiaijin kuenta”.

Je Robert itsosa: “Kʼianga kʼoakitsonajin xi tongóson sʼin makjainnajin, nga tsabenajin ya telebisión nga tsín nʼio ba tjínnajin, kʼoatsakʼinlaijin nga kui kjoabʼetsʼoa xi tjíobatío xíngiaa tsakasenkaonajin. Jéjin Jeobá xokisʼin nga kʼoasikji mensaje kichonajin kʼianga kisinʼio tokuinjin”.

Jokoan nga jngó jngó chjota jebi kui bakóyaná kʼianga sínʼio kon je Niná ʼyani xi kjoa faʼatojin. Kʼoati koa̱nle sinʼio tokuin tsanda ji, je Niná. Alikui koaini tojme kjoa xi tibitjatojin, kʼoati koa̱nle tsjoánganʼioli kʼianga nda kuijna ijngokʼani. * Tjasjai je Jeobá je “Niná xi tsʼe ngayije kjoanijetakon” (2 Corintios 1:3).