XI NGISA TÍNCHJA̱NI REBISTA JEBI | JMÉNI XI SINʼIO TOKOÁN
Machjéntsʼiná nga ʼya xi sinʼio tokoán
A faʼaitsjenli jmeni xi koanli kʼianga kiskai nga sʼa ʼndí tisui. Tsakui nichxin kiti je ndsai kʼoa tsa kixjajon je xkóli. Jósʼin tsakasenkaoli je na̱li. Tsakui nichxin kisitsje kʼoa tsakájtéjon jñani nga kitsiʼoain. Ninga kichjiʼndalani tonga kisikʼéjyoli nga tsakjákaoli kʼoa saʼnda kitsoakjáli. Kʼianga sʼa ʼndí tisui, tjío ʼyani xi kisinʼio tokuin.
Kʼianga jefi nó, sa ñʼai sa ñʼai maná josʼin tinijchá yaoná kʼoa sa ai sa ai tjío kjoa xi faʼainená. Kʼoa tsín ʼyaa jmeni xi sinʼio tokoán. Je kjoa xi sʼele je chjotajchínga alikui sasa sʼendajinni, alikui kʼoama tojo sʼín jngo na̱ nga bájtéjon jñani kamiʼaon je ʼndíle kʼoa tsoakjá. Kataʼyala je kjoa xi bitjatojiaan.
-
A ba tjínli kʼianga kinikitjoli tʼaxáli. Je Julián kui faʼaitsjenle kʼianga jetsín tibeni josʼin nga kinikitjo tʼaxále. I kitso: “Jósʼin koanjngiʼanda je familiana. Kʼianga kʼoasikji nʼio kisixá nó xotjín, ánni nga kʼoatsosíni je xi nyatítjonna nga jetoxitsjoasa”.
-
A tsín tisin tjínni tokuin nga jekinjio xíngio. Je Raquel itso: “Jexjaʼaonjan sá tjínle nga toʼikoan kisikʼéjnana je xʼinna. Nʼio ba koanna, kʼoa nʼio aon kisʼe ni̱ma̱na. Kʼoa ali tsa toyajin ni̱ma̱na jñani aon kisʼe kʼoati tsakʼetʼale je yaona. Ñaki kitsokjonña”.
-
A nʼio táo chʼin tjínli, kʼoa a tsín timaxannili. Tsakui nichxin kʼoasʼe tokuin jokoanle je Job kʼianga kitso: “Jekichobena josʼin tijna. Alikui timenina koatejnakoan” (Job 7:16). Kʼoa tsakui nichxin kʼoasi jokitso jngo chjota xi Luis ʼmi xi 80 nóle, kitso: “Sakʼoa kʼoasʼe tokoan nga to kjoabiyasa tikoyale”.
-
Axo kui machjénli nga ʼya xi sinʼio tokuin nga jngo xíngi kʼien. Je Robert itso: “Kʼianga jngo kjoaxkón kisokole je avión xi tíjnaya je ʼndína kʼoa nga ya kʼien, toxokʼoajin kjimaná kixinña. Xi jeki nichxin kʼia nʼio aon kisʼe tokoan..., je kjoaʼaon xi síkʼaxki̱ Biblia je xi kʼoama joni tsa ki̱cha̱ndo kjoaʼatokjáná” (Lucas 2:35).
Ninga nʼio tse kjoa jaʼatojin je Julián, Raquel, Luis kao Robert, jé kisinʼio kon je Niná xi ngisasa tse nganʼio tjínle. Jósʼin sínʼio tokoán je Niná. A kʼoati sinʼio tokuin tsanda ji kʼianga koa̱nchjénli.
