Je pastro Pablo kʼoakitso kʼianga je Jeobá * jéní “Nʼai xi tsʼe kjoamatakon, kʼoa Niná xi tsʼe ngayije kjoanijetakon, xi síjekonná ngayije kjoañʼainá” (2 Corintios 1:3, 4). Tojo tso én jebi, kʼoatsoná je Biblia nga koa̱nle Niná koasenkaoná ngatsʼiaa ninga nʼio ai tíjna kjoa xi kuitjátojiaan. Je Nʼainá xi tíjna ngʼajmi koaanle sinʼio tokoán.

Tonga jméni xi machjénná xi sʼiaan kʼiatsa mená nga sinʼio tokoán je Niná. Cha̱niyalai jkui jebi: Jósʼin koasenkaoniná jngo chjinexki kʼiatsa tsín kjoanla kʼoakaʼmilee nga je kjuinnrʼoe. Je profeta Amós me kʼoati tso én xi kisichjén, kitso: “A koaan kʼoétsomajao chjota tsa tsín kjoanla títjon kabʼéndajin” (Amós 3:3). Kʼoa kuinga i̱ tsosíniná je Biblia: “Tichriantʼalao Niná,  kʼia kʼoati je sichriantʼano nga jon” (Santiago 4:8).

Tonga jósʼin ʼyañá nga ñaki sichriantʼa kjoaixiná je Niná. Xi títjon, ngotjo ngosa kʼoatsoniná nga mele koasenkaoná (chótsenlai  rekuadro xi faʼaitʼa ibi). Xi majaoni, tjíoná choa̱le je chjota xi kisinʼio kon Niná nichxin kjoatse kao nichxin xi tiyoaa ndʼaibi.

Je rey David nʼio tse kjoa jaʼatojin, tojo kjima chjota nichxin xi tiyoaa ndʼaibi, tonga je David jé Niná kisijéle nganʼio. Kitsole: “Tinóʼyanái kʼianga sijéle nganʼio”. A kinrʼoéle je Jeobá. Kinrʼoéle nga̱ je David i kitsosa: “Tíbasenkaona kʼoa tsjoa sʼele ni̱ma̱na” (Salmo 28:2, 7).

Jé Niná xosʼin koanmele nga katasínʼio tokoán je Jesús. Jé Jeobá kitsjoale xá “nga sindaya je chjota xi kjoaʼaon tjíojin ni̱ma̱le” kʼoa nga sinʼio kon “ngatsʼi xi kjoaba tjíojin” (Isaías 61:1, 2). Tojo tso én jebi, je Jesús nʼio koanndosinle ngatsʼi chjota xi nʼio tjíosíxá kʼoa xi tse chʼá yʼa (Mateo 11:28-30).

Je Jesús nda kjoafaʼaitsjen kitsjoale je chjota kʼianga kisinʼio kon, ngasin nganda kʼoakitsole, kʼoa sakʼoaa saʼnda kisindaya je chʼinle. Ñandia kʼianga jngo xi tífiʼndojon yaole xi i kitsole: “Tsa meli koaan si̱tsjenái”. Je Jesús koanmake kʼoa kitsole: “Mena, katamatsjai” (Marcos 1:40, 41). Kʼoa koanndaya chjota jebi.

Ninga tsín tiʼi̱ tíjnani i̱ Sonʼnde je ʼNdíle Niná, tonga je “Niná xi tsʼe ngayije kjoanijetakon”, tojo tísínʼio kon je xi kjoañʼai tjíofaʼá (2 Corintios 1:3). Ñola koya kataʼyaa jmeni xi tísʼín je Niná.

• Je Biblia. “Je kjoa [xi] kichjitʼa ngasʼa, kichjitʼa xi tʼatsʼe nga koakoyaná, jméni nga sʼe̱síniná kjoachoyakaokjoa xi totʼatsʼe kjoatsejta kao kjoanijetakon xi tjínle xo̱n Escrituras” (Romanos 15:4).

• Je espíritu santo. Jméni xi tsakasenkao je chjotale Cristo nga nyʼán sʼin tsakationi kʼianga jekʼien je Jesús. Je Biblia kʼoatso kʼianga je jtínle Cristo “kʼoasʼin tjíoma, nga kitsakjonke Nainá. Je Espíritu Santo tsakasenkao” nga kisinʼio kon (Hechos 9:31). Je xi espíritu santo ʼmi kuiní je nganʼiotsjele Niná kʼoa nʼio tse nganʼio tjínle, kʼoa male nga kui síchjén je Niná kʼianga sínʼio kon tojme kjoa xi tífaʼatojin jngo chjota.

• Je kjoabʼetsʼoa. Je Biblia itso: “Ali kʼoajin mano. [...] Kʼoasʼin katasʼejinle Niná jme xi nijáo. Je kjoanyʼántakonle Niná xi ñaki faʼatole ngayije kjoafaʼaitsjenle chjota, jé xi sikuinda ni̱ma̱no kao kjoafaʼaitsjenno” (Filipenses 4:6, 7).

• Je ndsʼee. Je ndsʼee xi ngikʼa sakʼoaa je nijélee nganʼio kʼianga sínʼio tokoán kʼoa ʼyañá nga koasenkaoná nga̱ miyoná mani. Je pastro Pablo i kitso tʼatsʼe ndsʼe̱ xi ñatjen tsakʼetsomakao: “Tojésa xi síjekonna” ninga “kjoafáo kjoañʼai tjínnajin” (Colosenses 4:11; 1 Tesalonicenses 3:7).

Tonga a basenkaoná jebi tsakui nichxin tisi. Kataʼyala jmeni xi jaʼatojin je chjota xi kanikʼaxki̱ná je kjoaʼmiya xi kafaʼato. Tojo koan chjota jebi, jchaní kʼianga tojo tísítjoson Niná je én jebi: “Tojo sʼín jngo na̱ nga sínʼio kon je ʼndíle, kʼoasʼin sinʼioa tokon tsanda jon” (Isaías 66:13).