1, 2. 1) Jméni xi sakʼoa síkjaʼaitsjen je xti xi Jeobá síxále. 2) Jméni xi tso je Énle Niná.

YA Gran Bretaña, jngo tsoti xi ñatjen fi skuela je tichjaa i kitsole: “Chjinengósʼin matsainni, ánni nga tʼatsʼe Niná makjainnili”. Kʼoa ya Alemania ijngo ndsʼee xi i̱ kitso: “Je maestrona kʼoatso nga to kuento nga Niná kisindaná kʼoa tsín jao tjínle nga tʼatsʼe evolución makjainnajin”. Kʼoa ya Francia, jngo tichjaa xi i̱ kitso: “Je maestro xi tsoyana tokʼoamale nga tojo tjínsa xti xi makjainle tʼatsʼe Biblia”.

² Nʼio nkjín chjota xi tsín makjainle tsa Niná kisindaná. Tsa sʼa xti kʼoa tsa je Jeobá jetinixálai kʼoa tsa sʼa kjimali xi tʼatsʼe, tsakui nichxin kui nikjaʼaitsjain jósʼin koakui nga je kisindaná. Je Biblia basenkaoná nga nda nikjaʼaitsjenjiaan jmeni xi bʼexkiaa kʼoa jmeni xi noʼyá kʼoa nga ñásoa nijinlee yaoná. Je Énle Niná itso: “Nga koa̱nli nda si̱kjaʼaitsjain koasenkaoli”. Jósʼin basenkaoná je Énle Niná. Basenkaoná nga chʼasjengiaa jmeni xi tsínni kʼoatjín kʼoa ngisaa matajasa kjoamakjainná xi tʼatsʼe Jeobá (tʼexkiai Proverbios 2:10-12). *

3. Jméni xi jchaa i̱ kjoaʼmiya jebi.

³ Nga nʼio sʼe̱jna kjoamakjainná, tjínnele nga nda jchaa je Jeobá  (1 Timoteo 2:4). Kʼianga kʼoéxkiai Biblia kao xo̱n xi Énle Niná faʼaitʼa, nʼio chjíle nga si̱kjaʼaitsjenjin. Tijinlai yaoli jmeni xi tibʼexkiai (Mateo 13:23). Kʼiatsa kʼoasʼiain, nkjín choa̱ jchai nga je Jeobá kisindaná kʼoa nga tʼatsʼe jaʼaini je Biblia (Hebreos 11:1). Kʼoa kui chótʼayá i̱ kjoaʼmiya jebi.

4. 1) Jósʼin mangóson jngo chjota xi makjainle tʼatsʼe Niná kao xi tʼatsʼe evolución makjainle. 2) Jméni xi tjínnele sʼiaan ngatsʼiaa.

⁴ Tsakui nichxin tjín xi i̱ kuitsoli: “Makjainna tʼatsʼe evolución nga̱ je chjota científico kʼoatso nga ñaki kʼoatjín. Ánni nga makjainnili xi tʼatsʼe Niná nga̱ kjesa ʼyajin xi be tsa ñaki tíjna kjoaixi”. Nkjín chjota xi kʼoasʼin síkjaʼaitsjen. Kjoaixi nga kjesa ʼyajin xi be je Niná kʼoa tsín ñaki xkoaan tsaʼyañá jme xi koannda (Juan 1:18). Tonga je xi tʼatsʼe evolución makjainle kʼoati likui ñaki tjíobeni xko̱n tsa kʼoatjín xi tʼatsʼe evolución. Nisaʼyajinla xi sa tsabe tsa chjota tsakʼónya jngo koni (Job 38:1, 4). Tjínnele nda si̱kjaʼaitsjenjiaan kʼoa ñásoa kataʼyaa jmeni xi ñaki kʼoatjín. Nʼio nkjín chjota xi síkjaʼaitsjenjin nga kotsenle jmeni xi tjín, jolani je yá, cho̱, naxó kʼoa tsa jmesani. Kʼoa majinle nga tíjna je Niná xi kisinda. Tojo tso Biblia, tjíobee nga je Niná kisinda ngayeje, nga nʼio tse nganʼio tjínle kʼoa nga nʼio tsesa xi bakó jokjoan je Niná (Romanos 1:20).

5. Jméni xi koasenkaoná nga ngisa nda koa̱njinná tʼatsʼe jmeni xi kisinda Niná.

⁵ Kʼianga chotsenlee jmeni xi tjín kʼoa nda nikjaʼaitsjenjiaan, tokʼoamaná josʼin koannda ngayeje. “Kui nga makjainná, machoyaná” nga tíjna je Niná ninga tsín matsen. Majinná nga nʼio chjine kʼoa nga nkjínsa koya jokjoan (Hebreos 11:3, 27). Ngisasa tse xi koa̱njinná tʼatsʼe jmeni xi kisinda je Niná kʼianga kʼoéxkiaa jmeni xi tjíobe je chjota científico. Faʼaitʼa choa xi tʼatsʼe jebi ya video Las maravillas de la creación, je foyeto Obra de un Creador kao El origen de la vida, kʼoa kao libro ¿Existe un Creador que se interese por nosotros? Kʼoa ya rebista ¡Despertad! faʼaitʼa sakʼoa jmeni xi tso je chjota científico kao xi kjaʼaí chjota xi tsín makjainle tsakai nga tíjna je Niná, kʼoa kʼoatso anni nga makjainnile ndʼaibi. Kʼoa xi tiyani rebista jebi kʼoati faʼaitʼa xi “¿Casualidad o diseño?” ʼmi, kui tsoya tʼatsʼe cho̱ kʼoa jmeni xi koannda kʼoa kʼoatso nga ya kotsenle je chjota científico jokjoan xi sínda.

6. Jósʼin koasenkaoli je xo̱n xi kjioná xi Énle Niná faʼaitʼa.

⁶ Ya Estados Unidos, jngo ndsʼee xi 19 nóle i kitso tʼatsʼe je foyeto Obra de un Creador kao El origen de la vida: “Nʼio nda tíbasenkaona. Nʼio nkjín kʼa jetsakʼexkia”. Ya Francia jngo tichjaa xi i̱ kitso: “Jmeni xi nroatʼa ya artículo ¿Casualidad o Diseño? nʼio tse xi tsoyana. Kui tsoya nga je chjota ingeniero ya kotsenle jokjoan xi kisinda Niná kʼianga jme xi sínda, tonga tsínkʼia kʼoakoa̱nle nga ñaki kʼoakjoan sikjoan”. Kʼoa ya Sudáfrica, je xijchále jngo tsoti xi 15 nóle i kitso: “Je xi títjon bʼéxkia je tsotinajin ya rebista ¡Despertad! yaa jñani Entrevista tso”. Tsa kʼoéxkiai je xo̱n xi kanikʼaxkiaa, kʼoati koasenkaoli tsanda ji. Koakoli jme choa̱ xi tjín nga Niná kisinda ngayeje kʼoa koasenkaoli nga jchai jmeni xi tsínni kʼoatjín. Kʼoa xi ijngosani, koasenkaoli nga koa̱ntajasa kjoamakjainli kʼoa yaa koa̱nngóson joni  jngo yá xi nʼio kjin fi ja̱ma̱le kʼoa tsín jme xi male ninga ntjao̱nʼio faʼa (Jeremías 17:5-8).

7. Ánni nga kui xi menile Niná nga nanda chótʼajin ngayeje.

⁷ Alikui chʼaotjín nga i̱sí: “Ánni nga koa̱nkjainnina jmeni xi tso je Biblia”. Je Jeobá alikui mele nga tokui nga makjainle xi ngikʼa nga kʼoati koa̱nkjainnili tsanda ji. Kui xi mele nga nanda chótʼajin ngayeje ánni nga jchasíni jme xi tso je Biblia kʼoa jchasíni nga tʼatsʼe Niná kinroani. Nga sa nda sa nda koa̱njinli jmeni xi tso ngisasa koa̱ntaja kjoamakjainli (tʼexkiai 1 Tesalonicenses 5:21; * 1 Timoteo 2:4 *). Jngo koya josʼin nga ngisa nda jchai je Biblia kʼiaa nga kui chótʼayai jmeni xi meli jchai.

8, 9. 1) Jméni xi tsjoake kʼa je chjota nga kotʼaya. 2) Jósʼin bichómani nga síkjaʼaitsjenjin jmeni xi bʼéxkia je chjota.

⁸ Tjínkʼa chjota xi tsjoake nga kui kotʼayajin je én xi tongini kinokjoa. Kʼoa tjínkʼa xi kui síngósonkao jmeni xi tso je Biblia kao jmeni xi tso je chjota xi kui kotʼayason jmeni xi koan nichxin kjoatse, jotso je científico kao arqueólogo. Tobʼelañá, tikjaʼaitsjenlai jotso Génesis 3:15. Tiʼakʼiaa kʼoakitsoni Jeobá én jebi kʼianga jetsakajngijée je Adán kao Eva kʼoa nga tsín tikoanmenile nga je tsakatéxomale. Je én xi faʼaitʼa ya Génesis basenkaoná nga majinná jósʼin je Chjotaxále Niná nga koako nga toje Niná xi bakinle koatexoma kʼoa nga tjóxin je kjoañʼai. Jósʼin koa̱n chótʼayai Génesis 3:15. Tʼetʼaxuin je bersíkulo xi kui tínchja̱ni jósʼin kuitjoson. Xijekoa̱n, tijnatsʼinyai kʼiáni kichji bersíkulo jebi kʼoa tatio chʼin chʼin. Jchaní nga kjaʼaí kjaʼaí nichxin tsakatio je chjota xi kiski, tonga nga jngó jngó tsakʼétʼaxoon xi koasenkaoná nga koa̱njinná josʼin kuitjoson je én xi tongini kinokjoa ya Génesis. Tsa kʼoasʼiain, koasenkaoli nga koakui nga je Jeobá kitsjoale nganʼiotsjele je chjota xi kiski je Biblia (2 Pedro 1:21).

⁹ Jngo ndsʼee xi Alemania tíjna koanjinle nga jngó jngó librole Biblia nchjani xi tʼatsʼe Chjotaxále Niná ninga je chjota xi kiski ñachanla koanni, ninga kjaʼaí kjaʼaí nichxin tsakatio kʼoa ninga tsín tsabexkon kʼa xínkjín. Jngo tichjaa xi Australia tsʼe, kʼianga kui tíkotʼaya jngo kjoaʼmiya xi faʼaitʼa Xo̱n xi Bájinkonná, koanjinle josʼin nga tikui tínchja̱ni je sʼuí Paxko, Génesis 3:15 kao tʼatsʼe Mesías. ^[1] I kitso: “Nga kiskotʼayajian nʼiosa tse xi koanjinna xi tʼatsʼe Jeobá. Xi tokʼoakoanna, kuinga kʼoakitsole Jeobá je chjota israelita nga katabʼasje je sʼuí Paxko kʼoa josʼin kitjoson jebi xi kao Jesús. Kisikjaʼaitsjenjinña jmeni xi tongini kitsoya Jeobá nga kisʼejna sʼuí Paxko”. Ánni nga kʼoakisʼeni kon je tichjaa. Kuinga kisikjaʼaitsjenjin jmeni xi tsakʼéxkia kʼoa koanjinle. Nga kʼoakisʼin, koantajasa kjoamakjainle kʼoa ngisaa koanchriantʼale je Jeobá (Mateo 13:23).

10. Jmésani xi koasenkaoli nga ngisa sʼe̱jngo tokuin nga ñaki kʼoatjín jmeni xi tso je Biblia.

¹⁰ Jmésani xi koasenkaoli nga ngisa sʼe̱jngo tokuin nga ñaki kʼoatjín jmeni xi tso je Biblia. Kuinga si̱kjaʼaitsjenjin nga ñaki kʼoatjín én xi kinchja̱ je xi kiski kʼoa nga nʼiojin koan. Je chjota xi tsakatio nga kui nichxin, tokui tsakʼéyanajmí jmeni xi ndatjín kisʼin je naxinandále kʼoa kao chjota xi tsakatéxomale. Tonga je profetale Jeobá alikui tokui kisikʼaxki̱ jmeni xi ndatjín kisʼin je chjota israelita kao je xi rey sʼin tsakatiole. Kʼoati kisikʼaxki̱ jñani chʼao kisʼin (2 Crónicas 16:9, 10; 24:18-22). Kʼoa tije tsakʼétʼaxo̱nni jmeni xi chʼao kisʼin je kʼoa kao choʼndale Niná xi ngikʼa (2 Samuel 12:1-14; Marcos 14:50). Jngo ndsʼee xi sʼa xti, xi Inglaterra tsʼe i kitso: “Aliʼya  xi tsoya kʼiatsa jmeni xi chʼaotjín kasʼín, kʼoa nga tsakʼéyanajmíyeje chjota xi kiski Biblia kuinga ngisa makjainnina nga tʼatsʼe Jeobá jaʼaini”.

11. Jméni xi ñaki kʼoejngo tokoán nga tʼatsʼe Niná jaʼaini je Biblia.

¹¹ Kʼianga kui Biblia bándiaaná josʼin mangínkoaa yaoná ndasʼin bichótsjoá. Kʼoa kui xi basenkaoná nga ngisa makjainná nga tʼatsʼe Niná kinroani je Biblia (tʼexkiai Salmo 19:7-9). * Jngo tichjaa xi sʼa xti, xi Japón tsʼe i kitso: “Nga sítjoson familiana jmeni xi tso je Biblia nʼio ndasʼin tiyuijin. Nyʼán tiyuijin, jtín tiyuijin kʼoa tsjoachaníjin xíngijin”. Je Biblia kʼoati binyakao chjota nga be nga tsínni kʼoatjín jmeni xi makjainle tsakai (Salmo 115:3-8). Kʼoa tjíobinyakao nga tjíosínʼiotʼa je Niná. Je chjota xi tsín makjainle tʼatsʼe Niná kui niná tsole jmeni xi koannda. Kʼoa tjínkʼa xi kʼoatso nga je chjotaxá sonʼnde xi koa̱nle kuinyakaoná nga ngisa nda kuiyoaa nichxin xi nroaján. Tonga nga ʼyaa jmeni xi tjíosʼín saʼnda ndʼaibi, ʼyañá nga tsín koa̱nle kʼoendajin je kjoa xi tjín sonʼnde. Tojé Biblia xi tsjoáná kjoachoya (Salmo 146:3, 4).

12, 13. Jókoa̱n kʼuínlai je chjota nga chja̱kaoni tʼatsʼe Biblia kʼoa tsa tʼatsʼe tsojmi xi koannda.

¹² Kʼianga chja̱kaonajmí je chjota xi tʼatsʼe Biblia kʼoa tsakuije̱ tʼatsʼe tsojmi xi kisinda Niná, títjon kjoanla kataʼyai jme xi makjainle. Tjínkʼa xi tʼatsʼe evolución makjainle tonga kʼoati makjainkaonile tʼatsʼe Niná. Kʼoasʼin makjainle nga kui evolución kisichjén Niná nga kisinda ngatsʼi je xi tjíokon. Kʼoa tjínkʼa chjota xi kuinga makjainnile tʼatsʼe evolución nga kui sakóya ya ndʼiaskuela. Kʼoa tjínkʼa xi kuinga tsín timakjainnile tʼatsʼe Niná nga tsín kisasenle josʼín je relijión. Kʼianga chja̱kaonajmí je chjota títjon kjoanla chjónangilai jmé xi makjainle kʼoa ánni nga kʼoasʼin makjainnile. Tsa nda kuinóʼyalai jme xi kuitso tochale kʼoati kjuinrʼoéli tsanda je (Tito 3:2).

¹³ Tsa ʼya xi tobijnokeli nga tʼatsʼe Niná makjainli, jókʼuínlai. Takolai kjoaxkóntokon kʼoa chjónangilai jósʼin síkjaʼaitsjen tʼatsʼe josʼin kitsʼiani nga kisʼe kjoabijnachon. Koaan kʼoakʼuínlai tsa kjoaixilani nga kʼoatjín xi tʼatsʼe evolución, tjínnejinle koannkjínya je célula xi títjon koantsen. Jngo maestro xi tsʼe química kʼoakitso nga je célula xi títjon koantsen, tjínnejinle kisʼele xjoa̱, tjínnejinle koan kisʼele nganʼio kʼoa koan kisichjén nganʼiole. Kʼoajinti koanchjénle jme xi kʼoakitsole josʼe̱ kʼoa jokji tjen koa̱nje (ADN) kʼoa nga kisikʼatole ngayeje jebi xi kjaʼaí célula. Kʼoati kitso nga tokʼoakoanle nga tsabe nga nʼio ñʼai sʼin tjínnda ninga je tsojmi xi tojngo célula machjénle.

14. Kʼianga chja̱kaoni chjota tʼatsʼe tsojmi xi koannda, jókoa̱n kʼuínlai.

¹⁴ Kʼianga chja̱kaoni chjota tʼatsʼe tsojmi xi koannda koaan jngo choa̱ tʼejnalai xi tochoa ñʼai tíjna, joni xi kisichjén je Pablo nga kitso: “Ngayije ndʼia tjín jngo xi bʼénda, tonga je xi tsakʼénda ngayije, jé Niná” (Hebreos 3:4). Jngo ndʼia alikui toje matsen. Tjín xi bʼénda kʼoa síkjaʼaitsjeen josíka. Kʼoa je tsojmi xi koannda ngisaa nʼio ñʼai tjío tikʼoajinni jngo niʼya. Kuinga kʼoabixónsíñá nga tjín xi kisinda. Kʼianga kuinókjoani tʼatsʼe tsojmi xi koannda koaan si̱chjain xo̱n xi bʼasje naxinandále Niná. Jngo tichjaa jé tsakjákao jngo ti xi tsín makjainle tʼatsʼe Niná kʼoa kitsjoale je foyeto Obra de un Creador kao El origen de la vida. Kʼianga jaʼato jngo xomana, je ti i kitso: “Ndʼaibi makjainna nga tíjna je Niná”. Ti jebi kiskotʼaya Biblia kʼoa xijekoan kisʼenngindá.

15, 16. 1) Tiʼani nga kje joʼmijinlai chjota nga tʼatsʼe Niná kinroani Biblia, jméni xi sʼiain. 2) Jméni xi tsín koa̱n sʼiaan nga chja̱kaonajmiá je chjota.

 ¹⁵ Tsa jngo xi tsín makjainle nga tʼatsʼe Niná jaʼaini Biblia, jósʼin chja̱kaonajmí. Títjon kjoanla chjónangilai jmé xi makjainle kʼoa jmé xi mandosinle (Proverbios 18:13). Tsa tsjoake xi tʼatsʼe ciencia, koaan koatiolai choa̱ xi bakó nga ñaki kʼoatjín jme xi tso je Biblia nga kui nchja̱ni jmeni xi tso je chjota científico. Kʼoa tsa historia tsjoake, koaan kui chja̱kaoni jmeni xi nroatʼa je libro xi tsʼe historia kʼoa xi nkjín nó tongini kʼoakitso je Biblia nga kʼoakoa̱n. Tochale kʼoati tjín je chjota xi kjuinrʼoéli tsakui kʼuínyalai jmeni xi koasenkao nga ngisa nda koatio. Tobʼelañá, koaan kʼuínya kʼalai je kjoafaʼaitsjen xi kitso je Jesús ya jngo jko̱nindo.

¹⁶ Kʼianga chja̱kaonajmí je chjota tikjaʼaitsjain nga tsín koa̱n kuixkan. Kui xi mená nga nda sa̱tío kon nga kjoakaonajmíná kʼoa nga tosi tonda katabe jotso je Biblia. Kuinga takonilai kjoaxkóntokon kʼianga jme xi chjónangilai kʼoa nda tinóʼyai jme xi kuitso. Kao kjoaxkóntokon tʼinyalai jme xi makjainli. Kʼoa ngisaa tsa je tichjakaonajmí je chjota xi ngisa jchínga tikʼoajinni ji. Tsa koakolai kjoaxkóntokon kʼoati skoe̱xkónli. Kʼoa tokʼoakoa̱nle nga nda nikjaʼaitsjain tʼatsʼe jme xi makjainli ninga sʼa xti. Kʼoa tsa ʼyani xi to kjoabixkan mele kʼoa toskoe̱sinli tosa lijojin ʼmilai (Proverbios 26:4).

17, 18. 1) Jméni xi koasenkaoli nga ngisa koa̱nkjainli xi tʼatsʼe Biblia. 2) Jméni xi chótʼayá ya kjoaʼmiya xi ijngo.

¹⁷ Ninga jeʼyai xi tochoa ñʼai tjín xi faʼaitʼa Biblia, machjén nga si̱tajasai kjoamakjainli. Tjínnele kjoásjaiyai jmeni xi ñʼai tíjna, josʼin kjoásjai tsa tao̱nchjí (Proverbios 2:3-6). Jngo koya josʼin koa̱ntaja kjoamakjainli kʼianí nga kʼoéxkiai ngakjijngo Biblia. Koaan kʼoénelai yaoli nga jngo nó kʼoéxkiani ngakjijngo. Jngo superintendente xi tsʼe circuito kʼoatso nga kʼoakisʼin kʼianga sʼa xti kʼoa nga ngisa koanmiyo je Jeobá. Itso: “Je xi tsakasenkaona nga koankjainna nga Énle Niná je Biblia kuinga tsakʼexkia ngakjijngo. Kʼiaa koanjinna jme xi kiskotʼaya nga sʼa ʼndí kjiʼe̱”. Jmésani xi koa̱n sʼiain. Koaan si̱chjain xi koasenkaoli nga koa̱njinli jme xi bʼexkiai. Tobʼelañá, koaan si̱chjain je disko Watchtower Library, je BIBLIOTECA Watchtower kʼoa kao Xo̱n xi síchjén je testigole Jeobá nga jme xi básjaiya.

¹⁸ Xi xijchá mao, jon tjínneno kʼuínyalao je ʼndíxtino xi tʼatsʼe Jeobá. Kuinga kui chótʼayasíñá ya kjoaʼmiya xi ijngo jmeni xi koa̱n sʼin je xi xijchá ma nga kuinyakao ʼndíxtile nga katamatajasa kjoamakjainle.