1. 1) Jósʼin kitsoyale Moisés jokjoan je Jeobá. 2) Ánni nga tjínnile kjoandosin jmeni xi kitsole Jeobá je Moisés.

KʼIANGA tsakʼéjnatsen Niná je jaʼaínle, nga kitsoyale je Moisés, kʼoati kitsoyale jokjoan. ʼNdele nga kui kʼoakuitso nga tjínle kjoachjine kʼoa nga tjínle nganʼio, je xi títjon kʼoakitso kuinga tjínle kjoamatokon kʼoa nga mamake chjota (tʼexkiai Éxodo 34:5-7). * Je Jeobá be nga je Moisés mele nga ñaki sʼe̱jngo kon nga je Niná tíbasenkao, kʼoa kuinga kʼoakitsonile jokjoan kʼoa nga tíjnanda nga koasenkao je choʼndale (Éx. 33:13). A tsí kjoaixi nga tsjoánganʼioná nga mandosinle je Niná xi tʼatsaan. I̱ kjoaʼmiya jebi kui kuinchja̱ni tʼatsʼe je kjoamatokon, xi tsonile nga mamachaa je xi kjoañʼai faʼá kʼoa nga binyakoaa.

2, 3. 1) Ánni nga toxá bakoñá je kjoamatokon. 2) Ánni nga tʼatsʼe kjoamatokon kuinókjoasíñá.

 ² Tojosʼin tiʼyaa, je Jeobá tjínle kjoamatokon. Kʼoa ñá sénle kichʼa. Kuinga mandosinniná je xíngiaa, saʼnda je chjota xi tsín be je Énle Niná bakó kjoamatokon (Gén. 1:27). Ya Biblia nkjín choa̱ faʼaitʼa tʼatsʼe chjota xi tsakakó kjoamatokon. Tobʼelañá, si̱kjaʼaitsjenla je choa̱le yánchjín xi jao mani xi ʼndílee tsakjáotiyani ngixko̱n Salomón. Kʼianga kʼoakitso Salomón nga jaoya ni̱kao je ʼndílee, je chjoón xi ñaki na̱le mani nʼio ba koanle kʼoa kuinga kitsjoaʼndeni nga tosa je chjoón xi ijngo katabʼaile ánni nga tsín ni̱kʼienni je ʼndílee (1 Rey. 3:23-27). Ijngolasa choa̱ kataʼyaa xi tʼatsʼe tsotile faraón. Kʼianga sʼa ʼndílee je Moisés, yaa ndai xo̱ngá kijna nga koansjaile je tsotile faraón, tsabee nga chjota judío kitjenni kʼoa nga tsín tjínnele kʼoasjentjai. Tonga koanmake kʼoa jo tile sʼin kisijchá (Éx. 2:5, 6).

³ Ánni nga tʼatsʼe kjoamatokon kuinókjoasíñá. Kuinga je Biblia kʼoatso nga tjínnele chjénngilee je Jeobá (Efes. 5:1). Toxá kʼoasʼin kisindaniná je Jeobá kʼianga bakoá kjoamatokon. Tonga nga ya kitjenñá je Adán, chjotajée maa kʼoa sakʼoaa to yaoná mangínñá. Sakʼoaa ñʼai maná nga chjoejiaan jmeni xi nʼia, tsa kuisenkoaa xi kjaʼaí kʼoa tsa tokui kʼoasʼiaan jmeni xi toñá mandosinná. Jméni xi koasenkaoná nga jchaa josʼiaan. Kuila títjon kataʼyaa jósʼin bakó je Jeobá kao xi kjaʼaí chjota je kjoamatokon. Kʼoa xijekoa̱n, kui chótʼayajiaan jósʼin koa̱n chjénngilee je Jeobá kʼoa jósʼin koasenkaoná tsa kʼoasʼiaan.

4. 1) Ánni nga ánkje kisikasénni je Jeobá ya Sodoma. 2) Jméni xi tsoyaná jokoan je Lot kao familiale.

⁴ Ya Biblia nkjín koya choa̱ faʼaitʼa tʼatsʼe josʼin bakó Jeobá je kjoamatokon. Kataʼyala jokisikao je Lot, jngo chjota xi kixi kʼoa xi nʼio aon koanle tʼatsʼe nga chʼao tjíosʼín je chjota ya Sodoma kao Gomorra. Nʼio xájndí kisʼin je chjota xi ya tsʼe, kuinga kʼoakitsoni je Niná nga bakinle ni̱kjeson (2 Ped. 2:7, 8). Kʼianga tsakʼasjentjai je Lot, je Jeobá ánkje kisikasén nga kʼoakitsole nga jekjoeson je naxinandá, kʼoa nga je kao familiale tjínnele koa̱nnga. Kʼoa kʼianga kisikʼachxin, je ánkje kitsoaa ntsja je Lot kao chjoónle kʼoa kao xtiyánchjínle nga tsakʼaonsje ya naxinandá (Gén. 19:16). Jebi kui tsoyaná nga je Jeobá nʼio nda be je kjoa xi faʼatojin je choʼndale xi kixi fitʼale (Is. 63:7-9; Sant. 5:11; 2 Ped. 2:9).

5. Jméni xi tsoyaná tʼatsʼe je kjoamatokon ya 1 Juan 3:17.

⁵ Je Jeobá bakóná kjoamatokon, tonga kʼoati tsoná nga tjínnele koakoá tsanda ñá je kjoamatokon. Si̱kjaʼaitsjenla jngo kjoatéxoma xi tsakʼaile je naxinandá Israel. Kʼiatsa jngo chjota israelita xi tao̱n kisikinyale xi kjaʼaí, koaan najñole kisikʼéjnangi (tʼexkiai Éxodo 22:26, 27). * Tsakui nichxin je xi tao̱n kisikinya koanmele nga tondiaa kisikʼéjna je najño, tonga tsa kʼoalani, koantsínjinle je xi tsakajnaya chjota xi tsʼe najño. Kuinga kʼoatsakʼinnile je chjota israelita nga katabakó kjoamatokon kʼoa katatsjoáni je najño kʼianga jeska̱ntjai je Tsʼuí. Jméni xi tsoyaná je kjoatéxoma jebi. Kui tsoyaná nga tjínnele kuisenkoaa je ndsʼee kʼiatsa nganʼio machjénle (Col. 3:12; Sant. 2:15, 16; tʼexkiai 1 Juan 3:17 *).

6. Jméni xi tsoyaná nga tsakakóle Jeobá kjoamatokon je chjota israelita ninga tsakajngijée.

 ⁶ Je Jeobá tsakakóle kjoamatokon je chjota israelita ninga tsakajngijée. Je Biblia itso: “Je Jeobá, Ninále chjotajchíngale tosi tonda kisikasén je xi fikao én nga tsakájinkon, kʼoa ntsjaintsjai tsakájinkon, nga̱ koanmale je naxinandále kʼoa kao niʼyale” (2 Crón. 36:15). Tikʼoasʼinni, machjén nga koakolee kjoamatokon je chjota xi tsín be Niná, je xi tjínsale ʼnde nga kʼoakoa̱nnile je jéele kʼoa koa̱n miyole Niná koa̱n. Je Jeobá alikui mele nga kjoeson je chjota (2 Ped. 3:9). Kʼianga tíjnasa nichxin, tosi tonda kjoájinkoaan je chjota tʼatsʼe Énle Niná ánni nga sʼe̱nile je kjoamatokonle Niná.

7, 8. Ánni kʼoakitsoni jngo familia nga tsakakóle kjoamatokon je Jeobá.

⁷ Nichxin xi tiyoaa ndʼaibi, nʼio nkjín je testigole Jeobá xi tjíobe josʼin tíbakóle kjoamatokon je Niná. Kataʼyala jokoan kʼianga tosʼa tífitsʼia nó 1990 kʼianga kjoabixkan kisʼe ya Bosnia. Jngo jtín mani je testigole Jeobá xi karro kikao nga ki ya Serbia. Jngo tiʼndí xi tosʼa 12 nóle xi ya ki, je xi Milan ʼmi, kʼoati ya ki je tindsʼe̱ kao xijchále. Kjoajtíntse tjíofi kʼoa kʼiaa nga sʼe̱jna je kjoajtíntse koaisʼenngindá je xijchále Milan. Kʼianga jekicho jñani tíjna je chinróle naxinandá Bosnia kao Serbia, je sondado tsakʼaonsjee karro je ndsʼee kao familiale nga xin tsʼe, tonga kitsjoaʼndele nga jaʼato xi ngikʼa testigole Jeobá. Jao nichxin koanskanni, je sondado kao radio kinchja̱le je xi séntítjonle nga kiskonangile jósikao je chjota xi ya kisikatíonʼio. Nga ya chrian tjío je ndsʼee nga tínchja̱ radio je sondado, kinrʼoé ngatsʼi nga i̱ kitso je xi séntítjonle je sondado: “¡Tichonsjai kʼoa tʼelai chʼinsá!”.

⁸ Kʼianga tjíofáonajmí je sondado, jao chjota kichonrʼoe je ndsʼee kʼoa chéché i̱ kitsole: “Testigole Jeobá maijin, je ndsʼee xi ya tjíoya je karro tsakʼéyanajmínajin jmeni xi koan”. Xijekoan, kʼoakitsole je Milan kao tindsʼe̱ nga katabatioya je karrole nga koa̱n kjoaʼato, nga̱ je sondado kuila tjíokotʼajin je xo̱nle xti, tsa ndatjío. Xijekoan, je ndsʼee i kitsole je xijchále Milan: “Jon koaan ya jto̱nni titjáo jñani tjío je sondado”. Kʼianga kinrʼoé jebi je Milan, alikui be tsa skiʼndá kʼoa tsa kuijno. Je xijchále i kitso: “Likuijin tsjoáʼndenajin nga kuitjáijin”. Tonga koan jaʼato, kʼoa ninga tjíokotsen je sondado nga tjíofi, likui tsabe. Yaa kisatejin ijngokʼa xínkjín nga jejaʼato kʼoa kicho saʼnda jñani kisʼejna je kjoajtíntse. Alikui jao kisatio kon nga kinrʼoé Jeobá je kjoabʼetsʼoale. Je Biblia tsoya nga tsín tongantsjai nga ñaki kʼoasʼin ʼyaa nga bʼasjentjai Jeobá je choʼndale (Hech. 7:58-60). Tonga nga kui kjoa jebi jaʼatojin je Milan itso: “Jé ánkje tsakʼéchjoangi xko̱n je sondado kʼoa jé Jeobá tsakʼasjentjainajin” (Sal. 97:10).

9. Jókisʼin je Jesús kʼianga tsabe je chjota xi kitjenngile (chótsenlai sén xi fitsʼiani kjoaʼmiya jebi).

⁹ Kʼoati nʼio nda choa̱ tsakʼéjnaná je Jesús. Kʼianga tsabe je chjota nga tsín ʼya xi tsakándiaale “joni barré xi tsínle xi koʼnda”, jókisʼin je Jesús. “Koanmake” kʼoa nʼio nkjín koya jme xi “tsakakóyale” (Mat. 9:36; tʼexkiai Marcos 6:34 *). Je Jesús alikui kʼoakisʼin jokisʼin je chjota fariseo nga tsín tsakinyakao je chjota (Mat. 12:9-14; 23:4; Juan 7:49). A kʼoanʼia jokisʼin je Jesús kʼoa a ñaki yaa ni̱ma̱ná nroajinni nga binyakoaa je chjota nga katabe xi tʼatsʼe Jeobá.

10, 11. A tongantsjai nga koakoá kjoamatokon.

 ¹⁰ Je Énle Niná tsoya nga tsín tjínnele tongantsjai koakoá je kjoamatokon. Nga koa̱njinná xi tʼatsʼe jebi, kataʼyala jngo choa̱ kʼiáni nga tsín tsakakó Jeobá je kjoamatokon. Kʼianga kʼoakitsole je Saúl nga tjínnele sikjeson je chjota amalequita kao cho̱ntjele, je Saúl likui kisikʼien je rey kʼoa kisikinjengi je cho̱ xi ngisasa ndakjoan. Tsakui nichxin kʼoakitso nga kjoamatokon tsakakó, tonga je Jeobá tsakʼasjengi nga tsín kisitjoson (1 Sam. 15:3, 9, 15). Je Jeobá jngoo Jues xi ñaki kixi, kʼoa male kotʼajin jotjío je ni̱ma̱le chjota, kuinga beni kʼiani nga tsín machjén nga koakoá kjoamatokon (Lam. 2:17; Ezeq. 5:11). Tochoasa cha nga tsjoále kjoañʼai je xi tsín sitjosonle (2 Tes. 1:6-10). Nga kui nichxin tsín tikoakonile kjoamatokon. Sikjeson je xi tsín sitjosonle, tonga kʼoasjentjai kʼoa koakole kjoamatokon je choʼndale xi kixi tjíofitʼale.

¹¹ Alikui ñá bʼakaoná kʼoakuixoán ʼyani xi kʼoasjentjai je Jeobá kʼoa ʼyani xi mai, je xi bʼakaoná kʼoasʼiaan, kuinga kuinyakoaa je chjota nga katabe xi tʼatsʼe Niná nichxin xi tiyoaa ndʼaibi. Jósʼin koakolee kjoamatokon je xi kjaʼaí. Kataʼyala kʼaa kjoafaʼaitsjen xi koasenkaoná.

12. Jósʼin koa̱n koakolee kjoamatokon je xíngiaa.

¹² Kuisenkoaa xíngiaa ngantsjai. Jngo chjotale Cristo tjínnele koakole kjoamatokon je ndsʼe̱ kao chjota xi kjaʼaí (Juan 13:34, 35; 1 Ped. 3:8) Kʼianga bakoá kjoamatokon kui xi tsonile nga “chjaʼakoaa kjoañʼai” xíngiaa kʼoa nga bisenkoaa je xi kjoañʼai tjíofaʼá. Kjoásjelee josʼin kuisenkoaa xíngiaa. Tobʼelañá, koaan kuisenkoaa tsa ʼyani xi tjín xi machjénle ya niʼyale kʼoa tsa tjín xi koaikatse (Mat. 7:12).

13. Jósʼin bakó kjoamatokon je choʼndale Niná kʼianga kjoaxkón sʼe.

¹³ Kʼoainganʼioá jña kjoaxkón sʼe. Nʼio nkjín ndsʼee xi bakó kjoamatokon kʼianga kjoaxkón sʼe. ʼYale je choʼndale Jeobá nga kʼoasʼín (1 Ped. 2:17). Jngo tichjaa xi Japón tsʼe, yaa tíjna tsakai ya ʼnde jña jaʼa cháonnʼio kao tsunami kʼianga nó 2011. Kʼoakitso nga nʼio kitsjoanganʼiole nga nʼio nkjín koanni je ndsʼee, xi tiyani tsʼe Japón kʼoa  xi xin naxinandále, kichokʼéndaya je niʼya kao Ndʼia jña chotʼayá. Itso je tichjaa: “Ngayeje jebi, tsakakóna nga tsjoakená je Jeobá, nga mandosinná xíngiaa xi testigole Jeobá maa, kʼoa nga nʼio nkjín mani je ndsʼee jngo tjíjtsa Sonʼnde xi tjíobʼétsʼoantjainá”.

14. Jósʼin kuinyakoaa xi jejchínga kao xi chʼin tjínle.

¹⁴ Kuinyakoaa xi jejchínga kao xi chʼin tjínle. Bakolee kjoamatokon kʼianga ʼyaa nga kjoañʼai faʼá tsa ʼyani xi totʼatsʼe nga jejchínga kʼoa tsa chʼin tjínle. Nijélee je Jeobá nga katafaʼai je Chjotaxále. Tonga nga kjesa kʼoamajin, binyakaoñá jokji tjen kʼoamaná ʼyani xi nganʼio machjénle. Jngo chjotachjine xi kui tsakʼéyanajmí jmeni xi koanle je na̱le nga kui chʼin xi Alzheimer ʼmi kisʼele. Ñandia kʼianga tsín tikichokjoanile nga ki baño kʼoa toyaa tsakʼejnangile yaole. Kʼianga tísítsje, jao tichjaa xi bichókonntsjaile kicho. Kʼianga tsabe jmeni xi koan tsakinyakao. Je chjoón i kitso: “Koa̱njin kuisenkaonáo, ninga soa mana”. Je tichjaa tsakinyakao, kʼoa jngo tasa té tsakʼéndale kʼoa tsakjáonajmí. Je tile chjoón jebi nʼio kitsjoa kjoanda kʼoa nʼio tsabexkón je tichjaa nga kʼoakisʼin, kʼoakitso nga kʼoasʼin fitjenngi je tichjaa jmeni xi tsoyason. A bakolee kjoamatokon je chjotajchínga kao xi chʼin tjínle nga binyakoaa jokji tjen kʼoamaná (Filip. 2:3, 4).

15. Ánni nga binyakaosíñá xi kjaʼaí kʼianga ʼmiyasoán.

¹⁵ Kuinyakoaa je chjota nga katabe je Jeobá. Nichxin xi tiyoaa ndʼaibi, je chjota tsee kjoa faʼatojin kʼoa síkjáojin. Je xi ngisa ndatjín nga sʼiaan, kuinga kʼuínyalee tʼatsʼe Niná kʼoa jmeni xi sʼin Chjotaxále. Kʼoati koa̱n kuisenkoaa nga katamajinle nga ndasʼin biyoaa kʼianga nitjosoán je kjoatéxomale Niná (Is. 48:17, 18). Kʼianga ʼmiyasoán, kʼoasʼin bakoñá nga ʼyaxkoán je Jeobá kʼoa bakolee kjoamatokon xi kjaʼaí. A koaan nga ngisasa tse kʼuínyasoán (1 Tim. 2:3, 4).

16. Jmé kjoanda xi sokóná kʼianga bakoá kjoamatokon.

¹⁶ Tojo tso je chjota xi kui kotʼayason tʼatsʼe jkoaa, kʼianga bakoá kjoamatokon tsín jme nanda chʼin sʼená kʼoa ngisaa nda biyoaa kao xíngiaa. Kʼianga binyakoaa je xi kjoañʼai faʼá, ngisaa tsjoa satío tokoán kʼoa ngisaa kui nikjaʼaitsjeen xi ndatjín, majinná nga tsín toñá tiyoaa kʼoa alikui kui nikjaʼaitsjeen xi síkʼajenle tokoán. Alikui jao tjínná nga tse kjoanda sokóná nga bakoá kjoamatokon (Efes. 4:31, 32). Kʼiatsa tsjoachaa xíngiaa kʼoa bijnyisjailee josʼin bisenkoaa, nda sʼe tokoán nga̱ ʼyañá nga kui kʼoatinʼia jmeni xi mele je Jeobá. Kʼoa basenkaoná nga ngisa nda xijchá maa, nga ngisa nda biyokoaa xíngiaa ya yaniʼya, kʼoa ngisaa ndasʼin biyoaa kao miyoná. Xi ijngosani, je xi bakó kjoamatokon kʼoati bʼainganʼiole kʼianga machjénle nganʼio (tʼexkiai Mateo 5:7; * Lucas 6:38 *).

17. Ánni nga menili koakui kjoamatokon.

¹⁷ Alikui tsa tokui nga nda kuiyoaa nga bakoñá kjoamatokon. Kuinga kʼoanʼiañá nga̱ mená chjénngilee je Jeobá kʼoa kui xi mená nga je kuitjongʼa, nga̱ tʼatsʼe Jeobá tínroani je kjoatsjoacha kao kjoamatokon (Prov. 14:31). Kʼoénelee yaoná jokji tjen kʼoakoa̱nná nga chjénngilee je Jeobá. Tsa kʼoasʼiaan, ngisaa koa̱nchriantʼalee je ndsʼee kʼoa ndasʼin kuiyoaa kao ngatsʼi chjota (Gál. 6:10; 1 Juan 4:16).