1, 2. 1) Jmé kjoa xi sʼele je chjota xi tsín male kjoéxkó yaole. 2) Ánni nga machjénsíni nichxin xi tiyoaa ndʼaibi nga koa̱nná chjoéxkoá yaoná.

JE Jeobá mele koasenkaoná nga koa̱nná chjoéxkoá yaoná (Gál. 5:22, 23). Jé Jeobá xi nʼio ndasʼin bakó nga male kʼoasʼín. Tonga nga chjotajée maa, ñʼai maná nga chjoexkoá yaoná. Nkjín koya kjoa xi tjín i̱ Sonʼnde xi ya nroani nga tsín male kjoéxkó yaole je chjota. Kui xosíkao nga tsín tikui títjon kʼoasʼínni jmeni xi ngisa chjíle, tsín tinda síxáni kʼoa tsín tinda kotʼayani. Kʼianga tsín male kjoéxkó yaole je chjota, éntsʼeen nchja̱, xán ʼbi, tsʼeen ma, tsjion xínkjín, tao̱n mjétʼain yaole, kui tsjentʼale xi chʼaotjín, ndoyá batioʼya, tsín tinda satíoni kon, chʼin bakinle kʼianga fayokao xínkjín kʼoa tjín yánchjín xi ʼndí tjíosʼele ninga tsín mele (Sal. 34:11-14).

² Tojosʼin tiʼyaa, je xi tsín male kjoéxkó yaole tsee kjoa batiojin kʼoa kʼoati kjoa bajngile xi kjaʼaí. Kʼoa nichxin xi tiyoaa ndʼaibi, sa ñʼai sa ñʼai male je chjota kʼianga kjoéxkó yaole. Alikui tjínnele tokʼoakoa̱nná xi tʼatsʼe jebi, nga̱ je Biblia tongini kʼoakitso nga toxá kʼoakoa̱nni nga toje “nichxin xi kjoetʼa” tiyoaa (2 Tim. 3:1-3).

3. Ánni nga machjénsíni nga koa̱nná chjoéxkoá yaoná.

³ Ánni nga machjénsíni nga koa̱nná chjoéxkoá yaoná. Jaola  koya kataʼyaa anni. Xi títjon, kuinga je chjota xi male kjoéxkó yaole likui nanda kjoa sʼele. Nda fikao xi kjaʼaí kʼoa alikui yaole síjtile kʼoa tsín nʼio síkjáojin. Xi majaoni, kʼianga nda kuiyoaa ngixko̱n Niná, tjínnele kʼoéchjoalee yaoná nga tsínkui kʼoasʼiaan xi chʼaotjín. Yaa bakóniná jokoan kʼianga tsakajngijée je Adán kao Eva (Gén. 3:6). Tojo koan nga kʼia, nichxin xi tiyoaa ndʼaibi nʼio nkjín chjota xi kjoa batiojin kʼianga tsín male kjoéxkó yaole.

4. Jméni xi koasenkao je xi ñʼai male nga kjoéxkó yaole.

⁴ Je Jeobá be nga chjotajée maa kʼoa nga ñʼai maná chjoéxkoá yaoná. Tonga mele koasenkaoná nga koa̱nná chjoéxkoá yaoná nga tsínkui kʼoasʼiaan xi chʼaotjín (1 Rey. 8:46-50). Sínʼio tokoán nga miyoná mani, kʼoa basenkao je xi ñʼai male nga kjoéxkó yaole. I̱ kjoaʼmiya jebi, kui títjon jchaa je choa̱ xi bʼéjnaná je Jeobá. Xijekoa̱n, kui jchaa je choa̱ xi ndatjín kao xi chʼaotjín xi ya Biblia faʼaitʼa. Kʼoati jchaa jméni xi koa̱n sʼiaan nga koa̱nná chjoéxkoá yaoná.

5, 6. Jósʼin bʼéjnaná choa̱ je Jeobá nga male kjoéxkó yaole.

⁵ Je Jeobá nʼio ndasʼin bakó nga male kjoéxkó yaole, nga̱ ñaki kixi ngayeje jmeni xi sʼín (Deut. 32:4). Tonga ñá chjotajée maa. Kʼianga koa̱nná chjoéxkoá yaoná, machjén nga chótʼayajiaan josʼín je Jeobá. Kui xi koasenkaoná nga jchaa josʼiaan kʼiatsa jme kjoa kuitjátojiaan. Jñánile je choa̱ xi bakóná josʼín je Jeobá.

⁶ Si̱kjaʼaitsjenla jokisʼin kʼianga yátsʼi̱n tsakasénle je Na̱i. Kʼianga kʼoakisʼin je Na̱i, nʼiojin koanjtile kʼoa tsínjin nda kisatio kon je ánkje xi kixi xi tjío ya ngʼajmi. Tsakui nichxin kʼoati satío tokoán nga ʼyaa nga kʼoasikji kjoa tíbajngi je Na̱i. Je Jeobá be nga tjínnele sʼe̱ndajin kjoa jebi, tonga tsín kitsjoaʼnde nga kjoajti kisikinjele. Nda kiskosonnile jmeni xi kisʼin. Je Jeobá “likui tokjoan síjtile yaole” kʼoa ñaki kixi tíjna josʼin tíbʼéndajin je kjoa nga yátsʼi̱n tsakasénle je Na̱i (Éx. 34:6; Job 2:2-6). Ánni nga títsjoáʼndeni nga tse nichxin tífaʼato. Kuinga tsín mele nga kjoeson je chjota, tosaa kui xi mele nga kuitjontjai ngatsʼi (2 Ped. 3:9).

7. Jméni xi tsoyaná je choa̱le Jeobá.

⁷ Je choa̱le Jeobá kui tsoyaná nga tsín tokjoan kʼoasʼiaan tsa jmeni, tjínnele nda chósonnilee jokuixoán kʼoa ndakjoanla si̱kjaʼaitsjenjiaan nga kjesa jme xi nʼiajián. Kʼianga jmeni xi chjoéjiaan, machjén nga si̱kʼayaa nichxin nga si̱kjaʼaitsjeen kʼoa si̱jélee je Jeobá nga katatsjoáná je kjoachjine nga kui kʼoasʼiaan kʼoa kui kʼoakuixoán je xi kixi tjín (Sal. 141:3). Kʼiatsa jtiná nga jme xi sʼiaan, alikui ndasʼin kuichomani. Kuinga sakʼoa skan kʼoamaniná jmeni xi bixoán kʼoa tsa jmeni xi nʼia (Prov. 14:29; 15:28; 19:2).

8. 1) Jñáni so̱kosjainá je choa̱ xi nʼio nda kuitsoyaná josʼiaan nga koa̱nná chjoéxkoá yaoná. 2) Jméni xi tsakasenkao je José nga tsín tsakajngijée (chótsenlai sén xi fitsʼiani kjoaʼmiya jebi).

⁸ Jmé choa̱ xi faʼaitʼa ya Biblia tsoyaná nga nʼio chjíle nga maná chjoexkoá yaoná. Nkjín chjota xi síkʼaxki̱ je Biblia xi koanle kiskoéxkó yaole kʼianga kjoa jaʼatojin. Kataʼyala jokisʼin je José, xi tile koanni Jacob, kʼianga ya tísíxá ya niʼyale Potifar. Je chjoónle Potifar, tsabee nga nʼio naskákisʼe je José kʼoa nkjín kʼa kʼoakitsole nga katabajnakao. Tonga je  José i kitso: “Ánni nga kui kʼoasʼinsíña je xi nʼio chʼaotjín kʼoa nga jée koanjngisíña ngixko̱n Niná”. Jméni xi tsakasenkao je José nga tsín tsakajngijée. Alikui jao tjínná nga kui kisikjaʼaitsjen josʼin kuichomani kʼiatsa kʼoasʼin. Kʼoa kʼianga je chjoón jebi koanmele koájnakao, je José kitjotoka (Gén. 39:6, 9; tʼexkiai Proverbios 1:10 *).

9. Jósʼin tongini kuiyondaa kʼiatsa kui sʼe̱jnabasenná je xi jée ska̱nijinná.

⁹ Jméni xi tsoyaná je choa̱le José. Kʼianga tsín kuitjátoné je kjoatéxomale Niná machjén nga kuinyaxinlee jmeni xi sʼejnabasenná. Nga kjesa testigole Jeobá majin, tjínkʼa je ndsʼee xi nʼio tsakʼi, xi na̱jno̱ kisken, xi droga kisikao kʼoa xi kjoachajngi kisʼin. Ninga kʼia nga jefisʼenngindá, tsakui nichxin tojo kui símekon sakʼoa jmeni xi kisʼin ngasʼa. Kʼiatsa kʼoamaa, si̱kjaʼaitsjenjiaan nga tsín tinda kuiyoñá kao Jeobá kʼiatsa tsín koa̱nná chjoéxkoá yaoná. Tongini si̱kjaʼaitsjeen jméni xi sʼiaan kʼiatsa kuilani sʼe̱jnabasenná je xi jée ska̱nijinná (Sal. 26:4, 5; Prov. 22:3). Kʼoa tsa kuilani kjoa kuitjátojiaan, si̱jélee je Jeobá nga katatsjoáná kjoachjine kʼoa nga koa̱nná chjoéxkoá yaoná.

10, 11. 1) Jmé kjoa xi faʼatojin je xti ya ndʼiaskuela. 2) Jméni xi kuinyakao je xti xi chjotale Cristo ma nga chókjoajinle nga tsínkui kʼoasʼin xi chʼaotjín.

¹⁰ Nichxin xi tiyoaa ndʼaibi, nʼio nkjín chjotale Cristo xi sʼa xti xi kʼoati kui kjoa faʼatojin jokoan je José. Kataʼyala jokoan je Kim. Me ngatsʼi je xti xi ñatjen fi skuela xi ñaki tokui fáoyani nga tjín xi fayokao nga fe xomana. Tonga je Kim alikui kʼoasʼín. Nga tsín kʼoati sʼín josʼín je xti xi ngikʼa, kʼoatso nga sakʼoa toje tíjna male, kʼoa je xtixínkjín kʼoatsole nga chjotachini ma nga tsín ʼya xi bitjokao. Ninga kʼoalani, je Kim be nga nʼio ñʼai maná nga sʼa xtiaa nga bʼechjoalee yaoná je kjoa jebi (2 Tim. 2:22). Je xti xi ñatjen fi skuela kjonangile tsa tojo kje ʼya xi bajnakaojin, kʼoa je Kim tsoyale ánni nga kʼoatjínni kon nga tsín ʼya xi bajnakao. Nʼio tsjoa sʼe tokoán nga tjíochókjoajinle je xti nga tsín kjoachajngi tjíofijin. Kʼoa je Jeobá kʼoati tsjoa sʼe kon.

¹¹ Je Biblia tsoya tʼatsʼe chjota xi tsín koanle kiskoéxkó yaole kʼoa kisichajngi kʼoa tsoya josʼin kichomani nga kʼoakisʼin. Kʼiatsa ʼyani xi kui kjoa tífaʼatojin jokoan je Kim, ndatjín nga kui sikjaʼaitsjenjin jokoan je ti xi síkʼaxki̱ ya kapítulo 7 xi tsʼe Proverbios. Kʼoati ndatjín nga kui sikjaʼaitsjen jokisʼin je Amnón kʼoa josʼin kichomani nga kʼoakisʼin (2 Sam. 13:1, 2, 10-15, 28-32). Je xi xijchá ma, koaan kui choa̱ jebi sichjén nga skótʼayajtín ya niʼyale nga kuinyakao je xtile nga koa̱nle skoéxkó yaole kʼoa kui kʼoasʼin xi ndatjín.

12. 1) Ánni nga tsín kitsjoaʼndeni je José nga kui kisikinjele jokisʼe kon kʼianga tsabe je xtindsʼe̱. 2) Kʼiáni nga ndatjín nga chjoéxkoá yaoná.

¹² Kataʼyala ijngoaa choa̱ josʼin tsakakó je José nga koanle kiskoéxkó yaole. Kʼianga kikatse je xtindsʼe̱ tsojmi xi ma chine ya Egipto, je José koanmele tsabe jotjío kon je xtindsʼe̱. Alikui tokjoan tsakakóle yaole kʼianga tsakjákao. Kʼoa nga tsín tikoanjenile kon, xin kikjiʼndá (Gén. 43:30, 31; 45:1). Kʼiatsa jngo xíngiaa kʼoa tsa jngo ndsʼee xi josikaoná, je choa̱le José koasenkaoná nga tsín yaoná si̱jtilee (Prov. 16:32; 17:27). Xi ijngosani, tsín koa̱n nga je nʼio si̱sinlee kʼiatsa jngo xíngiaa tsakichonsjejin naxinandále Niná. Tsakui nichxin ñʼai koa̱nná nga kʼoasʼiaan, tonga ngisaa choa ñʼai  koa̱nná kʼiatsa si̱kjaʼaitsjenjiaan nga je Jeobá tichjenngilee kʼoa nga kui tinitjosoán je kjoatéxomale.

13. Jméni xi jao koya xi nʼio chjíle tsoyaná jokoan je rey David.

¹³ Ijngosa choa̱ xi nʼio ndatjín xi masjaitʼaná ya Biblia, kui tsʼe rey David. Kʼianga kitjenngike je Saúl kʼoa nga tsakʼetʼale je Simeí, je David alikui yaole kisijtile kʼoa alikui jokisikao (1 Sam. 26:9-11; 2 Sam. 16:5-10). Tonga alikui tongantsjai nga koanle kiskoéxkó yaole. Si̱kjaʼaitsjeen nga tokjoan kisijtile yaole kʼianga tsín kʼoakisʼin je Nabal jmeni xi kitsole, kʼoa nga tsakajngijée kao Bat-seba (1 Sam. 25:10-13; 2 Sam. 11:2-4). Jméni xi bakóyaná jokisʼin je David. Xi títjon, nga je xi xá kjinele jinnaxinandále Niná tjínnele sikuinda yaole nga tsín sikʼatone choa̱le josʼin. Kʼoa xi majaoni, alikui ʼya xi koa̱n nga toje kʼoa̱ yaole kʼoa tsa kʼoasʼin sikjaʼaitsjen nga chókjoajinle tojmeni xi sʼe̱jnabasenle (1 Cor. 10:12).

14. 1) Jmé kjoa xi jaʼatojin jngo ndsʼee. 2) Kʼiatsa kuilani kjoa kuitjátojiaan, ánni nga nʼio chjínile nga tsín yaoná si̱jtilee.

¹⁴ Jméni xi sʼiaan nga koa̱nná chjoéxkoá yaoná. Kataʼyala jmeni xi koanle jngo ndsʼee xi Luigi ʼmi. Ñandia kʼianga jngo karro tsakʼétʼale ya ngitotsʼin karrole. Ningalani tsín je kisʼele jée je ndsʼee, tosaa je koanjtile chjota xi ijngo kʼoa me tsakʼéle je ndsʼee. Je Luigi, jé Jeobá kisijéle nganʼio nga tsín yaole kisijtile kʼoa kʼoakitsole je chjota xi tsʼe karro nga tsín yaole katasíjtile, tonga chjota jebi likui kʼoakisʼin. Ninga kʼoalani, je Luigi alikui yaole kisijtile. Nga jejaʼato jngo xomana, je Luigi kisíxatʼaa je chjoón xi Énle Niná tíbakóyale kʼoa tsabee nga xʼinle mani je chjota xi tsakʼetʼale. Chjota jebi kisijé kjoanichatʼa kʼoa kʼoakitso nga je koasenkao Luigi nga sʼe̱ndaya je karrole. Xi ijngosani, kʼoati kinrʼoé nga tísakóyale je chjoónle kʼoa kisasenle. Kʼianga kisikjaʼaitsjen je Luigi xi tʼatsʼe jebi, je xi koanjinle kuinga nʼio ndasʼin kichomani nga tsín yaole kisijtile (tʼexkiai 2 Corintios 6:3, 4). *

15, 16. Nga koa̱nná chjoéxkoá yaoná, jósʼin koasenkaoná nga chotʼayá je Biblia ñá kʼoa kao familianá.

¹⁵ Je xi koasenkaoná xi chjotale Cristo maa nga koa̱nná chjoéxkoá yaoná kuinga nyaon nyaon kʼoéxkiaa je Biblia. Si̱kjaʼaitsjeen nga i̱ kitsole Niná je Josué: “Je xo̱n kjoatéxoma jebi tjínneli nga ntsjaintsjai kʼoéxkiai. Kʼoa nichxin kao nitje̱n tjínneli chéché kʼoéxkiai, ánni nga nda si̱tjosonsíni ngayeje xi tjítʼa. Tsa kʼoasʼiain nda kuitjo tojmeni xi sʼiain kʼoa ñaki nda sʼiain” (Jos. 1:8). Jósʼin basenkaoná nga chotʼayá je Biblia kʼianga koa̱nná chjoéxkoá yaoná.

¹⁶ Tojosʼin tiʼyaa, ya Biblia faʼaitʼa choa̱ xi bakó josʼin bichómani nga chjoexkoá yaoná kʼoa josʼin bichómani kʼianga tsín kʼoanʼia. Jé Jeobá xi kʼoasʼin koanmele nga kisʼetʼaxo̱n jmeni xi koan ngasʼa nga ñá kuitsoyaná (Rom. 15:4). Kuinga machjénni nga kʼoéxkiaa, chótʼayajiaan kʼoa nga si̱kjaʼaitsjenjiaan jmeni xi tso. Si̱kjaʼaitsjenjiaan josʼin koasenkaoná ñá kʼoa kao familianá, kʼoa si̱jélee je Jeobá nga katabasenkaoná nga si̱tjosoán jmeni xi tsoya je Biblia. Kʼiatsa bele tokoán nga tsín maná chjoexkoá yaoná, kʼoétsʼoalee je Jeobá kʼoa kʼoénelee yaoná jñani chaná  nga ni̱ndayaa yaoná (Sant. 1:5). Kʼoati koasenkaoná nga chótʼayajiaan je xo̱n xi Énle Niná yʼangini.

17. Jósʼin je xi xijchá ma nga kuinyakao je ʼndíxtile nga koa̱nle skoéxkó yaole.

¹⁷ Jon xi xijchá mao, jósʼin kuisenkao je ʼndíxtino nga koa̱nle skoéxkó yaole. Je ʼndíxti alikui to jekʼoasʼín nga tsin, kuinga machjénsíni nga jon koatiolao choa̱ (Efes. 6:4). Kʼiatsa ʼyao nga ñʼai male je ʼndíxtino nga kjoéxkó yaole, chjónangilao yaono jmé choa̱ xi tibʼejnalao. Tikjaʼaitsjaon nga nʼio chjíle nga ntsjaintsjai kʼuínyason, nga ntsjaintsjai koanngíon je kjoajtín kʼoa nga ntsjaintsjai chótʼayajtíon ya niʼyano. Kʼoa ali nokjonjion nga mai kʼuín sakʼoalao je ʼndíxtino kʼianga jmeni xi mele sʼin. Jokji tjen kitsjoaʼndele Jeobá je Adán kao Eva jmeni xi kisʼin, kui tsakakóle nga toje Jeobá xi bakinle nga koatexomale. Tikʼoasʼinni, kʼianga kuichákjayalao je ʼndíxtino kʼoa nga koatiolao choa̱, kui xi kuitsoyale je ʼndíxti nga koa̱nle skoéxkó yaole. Nga sasénná nga je Jeobá batéxomaná kʼoa nga ʼyaxkoán je kjoatéxomale kui xi nʼio chjíle xi koa̱n kʼuínyalao je ʼndíxtino (tʼexkiai Proverbios 1:5, 7, 8). *

18. Ánni machjénsíni nga nda chjoéjiaan je miyoná.

¹⁸ Ni tjínná xti kʼoa ni mai, ngatsʼiñá nga machjénná nga nda chjoéjiaan je miyoná. Tsa tsjoake Jeobá je miyoná, koasenkaoná nga nda si̱xálee je Niná kʼoa nga tsín kjoa kuinójiaan yaoná (Prov. 13:20). Xi ijngosani, kʼoajinti chjénngilee nga male kjoéxkó yaole kʼoa josʼin tjíosíjchá yaole. Kʼoa jonʼia ñá, kʼoati koasenkao tsanda je. Kʼiatsa nyaon nyaon bakoá nga maná chjoexkoá yaoná, nda kuiyoaa ngixko̱n Niná, tsjoa sʼe tokoán kʼoa nda biyoaa kao xíngiaa.