JNGO tjíjtsa Sonʼnde, je xi chjotajchínga sʼin tjío nʼio chjí be je xá xi sʼín ya jinnaxinandále Niná. Nʼio tsjoa maná nga tsjoánganʼioná ndsʼee jebi. Tochriansʼaa nga kʼoatsakʼinle je xi chjotajchínga sʼin tjío xi jetjínle nó nga je katatsjoá kʼale je xá xi kjinele je ndsʼee xi sʼa xti xi kʼoati chjotajchínga sʼin tjío.

Nga kʼoasʼin kisʼendajin, je ndsʼee xi superintendente viajante kʼoa kao ndsʼee xi tsoya skuela xi satío jinnaxinandále Niná, síkatío je xále kʼianga jebichóle 70 nó. Kʼoa je xi coordinador sʼin tíjnale je Comité xi tsʼe Sucursal kʼoa tsa xi coordinador sʼin tíjnale je xi chjotajchínga sʼin tjío ya jinjtín, jé tsjoále je xá xi kjinele je ndsʼee xi sʼa xti xi kʼoati chjotajchínga sʼin tjío kʼianga jebichóle 80 nó. Jótjíosatío kon ndsʼee jebi nga kʼoasʼin kisʼendajin.

Je Ken xi 49 nó nga coordinador sʼin tsakʼejnale je Comité xi tsʼe Sucursal, itso: “Kʼianga kisʼejinna nga kʼoasʼin kisʼendajin, kʼoakixian nga ndatjín. Nga tikuini nichxin nga tanjio, tokʼoa jekʼoakixinle Jeobá nga tsakʼetsʼoale nga jngo coordinador xi sʼa xti machjén”. Jngo tjíjtsa Sonʼnde, nʼio nkjín  ndsʼee xi jetjínle nó xi kʼoatisʼin síkjaʼaitsjen joni Ken. Ngatsʼi ndsʼee jebi kao kjoatsjoa binyakao je ndsʼee, kʼoa kʼianga sʼejinle nga sikatío xále kʼa xi ba satío kon.

Je Esperandio, xi coordinador sʼin tsakʼejnale je xi chjotajchínga sʼin tjío ya jtín jña tíjna, kʼoatso nga ba koanle kʼianga jekisʼejinle nga tsínti coordinador sʼin kʼoéjnani. Tonga kʼoati tso nga jechʼin bʼetʼale kʼoa nga tjínnele sikuinda yaole. Ndʼaibi, tojo ndasʼin tísíxále Jeobá kʼoa tsjoa tjío kon je ndsʼee nga tojo kʼoasʼin tsjoánganʼiole.

Kʼoa jótjíosatío kon je ndsʼee xi jenkjín nó nga superintendente viajante koan, tonga xi tsín tikʼoasʼin tjíosíxáni ndʼaibi. Je Allan xi 38 nó nga superintendente koan, itso: “Kʼianga kisʼejinna, tokʼoakoanna”. Tonga kʼoati tso nga ndasʼin bichómani nga nikatíonda je ndsʼee xi sʼa xti. Kʼoa je ndsʼee jebi tosi tonda nda tísíxále Jeobá.

Je Russell 40 nó nga superintendente viajante koan kʼoa tsʼakaole nga kitsoyaa skuela xi satío jinnaxinandále Niná. Kʼoatso nga ba kisatio kon nga sʼa kisʼejinle kao chjoónle nga tsín tikui xá sʼinni. Itso: “Chjí tsaʼyatokuinjin je xá xi kinʼiaijin, kʼoa kʼoasʼin kinikjaʼaitsjainjin nga tojo kuitjosonnajin tsakai”. Ndʼaibi, tojo kʼoasʼin binyakao je ndsʼee ya jtín jñani tjíotsjoánganʼio. Kʼoa je ndsʼee tsjoa tjío kon nga kʼoasʼin tíbʼainganʼiole.

Tsakui nichxin kje kʼoasatíojin tokoán joni ndsʼee jebi. Kʼianga chótʼayajiaan je choa̱ xi faʼaitʼa ya 2 Samuel koasenkaoná nga koa̱njinná jebi.

Si̱kjaʼaitsjenla kʼianga kitjenngikontrale Absalón je rey David. Yaa Mahanaim tsakanga David, ya ʼnde xi tíjna ya xingoatʼale xo̱ngá Jordán. Kʼianga ya tjío David kao chjota xi tjenkao, tsojmi koanchjénle xi ski̱ne. Jókoanni.

Jan chjota xi ya tsʼe kichokaole tsojmi xi kiskine, jolani je xi Barzilai, kichokaole xi tsakjayone kʼoa jmesani xi koanchjénle (2 Sam. 17:27-29). Kʼianga jekisʼendajin je kjoa xi kisʼele Absalón kao David, je David kini ya Jerusalén kʼoa jé Barzilai kikaoyandiaa saʼnda xo̱ngá Jordán. Kʼoa kʼoakitsole nga katafikao saʼnda Jerusalén kʼoa nga je tsjoále tsojmi xi ski̱ne. Je Barzilai nyiná koan kʼoa tsín jme xi kichale (2 Sam. 19:31-33). Tsakui nichxin je David nʼio chjí tsabekon jokoankjoan je Barzilai, nga̱ be nga ngisa tjínle kjoafaʼaitsjen kʼoa nga koa̱n koasenkao. Nʼiojin tse kjoanda tjenkao tsakai nga ya kʼoéjna je Barzilai ya niʼyale David.

Je Barzilai nangitokon koan nga kʼoakitsole David nga jeñokan nóle kʼoa nga tsín timajinnile jmeni xi ndatjín kao xi chʼaotjín. Ánni kʼoakitsosíni Barzilai. Nʼiojin tse  kjoachjine kisʼele chjota jebi nga̱ jechjotajchínga. Kʼoa tojo koanjinle nga kitsjoa kjoafaʼaitsjen, tojo kisʼin je chjotajchínga xi kitsjoale kjoafaʼaitsjen je Rehoboam nga koanskanni (1 Rey. 12:6, 7; Sal. 92:12-14; Prov. 16:31). Tsakui nichxin kui kʼoakitsoni Barzilai nga tsín tichókjoanile nga jechjotajchínga kʼoa saʼnda kʼoakitso nga tsín tibeni tsʼoa jochine tsojmi kʼoa nga tsín tinrʼoéni (Ecl. 12:4, 5). Kui kʼoakitsonile David nga tosa je Kimham katafingajaole ya Jerusalén. Tsakui nichxin tile Barzilai koan je Kimham (2 Sam. 19:35-40).

Je choa̱ xi kaʼyaa nga fitsʼiani kjoaʼmiya jebi, mangóson jokoan je Barzilai. Alikui tikʼoakoannile nga jme xá kisʼin kʼoa kʼoakitso nga tsín tichókjoanile. Kʼoa nichxin xi tiyoaa ndʼaibi, kui kuenta ma jokji tjen bichó nganʼiole je xi chjotajchínga sʼin tjío jngo tjíjtsa Sonʼnde.

Je ndsʼee jebi, xi jetjínle nó, bakó nga nangitokon ma kʼoa majinle nga ndasʼin bichómani jmeni xi bʼantjaiyajin naxinandále Niná. Kʼianga tsjoáʼnde nga je ndsʼee xi sʼa xti xi kʼoati chjotajchínga sʼin tjío bʼaile je xá xi kjinele tsakai, ngisaa nda sʼendiaale je naxinandále Niná. Tije ndsʼee jebi síkationdani je ndsʼee xi sʼa xti josʼin sixá, tojo kisikao Barzilai je tile kʼoa jokisʼin je pastro Pablo nga kitsoyale je Timoteo (1 Cor. 4:17; Filip. 2:20-22). Ndsʼee jebi xi sʼa xti xi chjotajchínga sʼin tjío bakó nga jngoyale jngo “kjoatjao” nga tsjoánganʼiole je naxinandále Cristo (Efes. 4:8-12; tingósonkoai Números 11:16, 17, 29).

Jngo tjíjtsa Sonʼnde, nkjín ndsʼee xi kjaʼaí xi bánele je xá xi sʼín kʼoa ngisaa tsesa síxále Jeobá kʼianga kʼoasʼín.

Je Marco xi 19 nó nga superintendente viajante koan. Itso: “Josʼin tisixá ndʼaibi, ngisaa nda titsjoanganʼiole je xʼinle tichjaa xi tsín testigole Jeobá ma ya jtín jñani tijna”.

Je Geraldo xi 18 nó nga superintendente viajante koan itso: “An kao ʼndíchjoónna, kʼoasʼin tibʼendajinjin nga kʼoainganʼiolaijin je ndsʼee xi jekisikatío xále Niná kʼoa nga nkjínsa chjota kʼoailaijin estudio”. Kʼoatso ndʼaibi nga 15 mani chjota xi bakóyale Biblia kʼoa nga nkjín xi jekisikatío xále Niná tsakai xi jefini kjoajtín.

Je Allan xi kanikʼaxki̱ná nga fitsʼiani kjoaʼmiya jebi, itso: “Ndʼaibi, ngisaa maʼanajin nga ʼmiyasuinjin. Nʼio tsjoachaijin nga ʼmiyasuinjin jñani nkjín chjota tjín, jñani negosio tjín kʼoa ya ndaindʼianajin. Jao xi ya tsʼe ndaindʼianajin xi jefi kjoajtín”.

Kʼiatsa jekjaʼaí xá tíbʼaili ndʼaibi ya jinnaxinandále Niná, koaan tosi tonda kʼoainganʼiui je xále Jeobá nga kuisenkoai je ndsʼee xi sʼa xti xi kʼoati chjotajchínga sʼin tjío nga kʼoailai kjoafaʼaitsjen. Je Russell xi jenása kanikʼaxkiaa, itso: “Je Jeobá tíbakóyale kʼoa jé tísíchjén ndsʼee xi sʼa xti, xi nda síxá kʼoa xi nda sítjoson. Nga kʼoasʼin nda bakóya je ndsʼee jebi, nda bʼejna je naxinandále Niná (chótsenlai je rekuadro “ Tinyakao je xi sʼa xti nga ngisa nda katasíxá”).

Kʼiatsa chriansʼa nga tsʼantjaiyajin josʼin tinixálai Jeobá, ali nikinroajenjin tokuin. Je xá xi tinʼiai nʼio nkjín chjota tjíobinyakao kʼoa koaan tosi tonda kʼoatʼiain. Je ndsʼee nʼio tsjoakeli.

Je xi ngisa tjínle kjoandosin kuinga tsín chajinle Jeobá je xá xi tinʼiai. Je kʼoatso nga “likui chajinle xáno kao je kjoatjaocha xi tsen tsaʼyanino xi tʼatsʼe jaʼaínle. Koantsen  kjoatjaochabe nga kinisinlao je chjotale Cristo, kʼoa nga tojo nisinlao” (Heb. 6:10). Én jebi kui bakóyaná nga tsín chajinle Jeobá josʼin tinixálee. Nga nʼio chjí bekonli Jeobá alikui sichajin josʼin tinixálai kʼoa nga tosi tonda kʼoatinʼiai jmeni xi sasénle.

Ninga tsín tíbʼantjaiya josʼin tinixálee Jeobá. Tojo bʼakaotʼaná jebi. Ánni.

Kʼiatsa je nimiyoaa je ndsʼee xi jetjínle nó, xi jetsʼantjaiyajin josʼin tjíosíxále Niná, nʼio koasenkaoná je kjoafaʼaitsjen xi tjínle. Koaan si̱jélee kjoafaʼaitsjen. Xi ijngosani, kuenta sʼiaan josʼin síchjén kjoafaʼaitsjen xi tjínle josʼin tjíosíxále Niná ndʼaibi.

Kʼiatsa jetjínná nó kʼoa jetsʼantjaiyajin josʼin tinixálee Niná, kʼoa tsa kuinga ñá koasenkaoná je kjoafaʼaitsjen xi tjínle je ndsʼee, si̱kjaʼaitsjeen nga nʼio bechjí je Jeobá je choʼndale xi kixi kisixále ngasʼa kʼoa xi tosi tonda kʼoatjíosʼín ndʼaibi.