JMÉ xi nʼia kʼianga mená jchaa je ora. Tsakui nichxin relojná chotsenlee. Kʼoa jóʼmilee tsa ʼya xi kjonanginá jme orani. Nkjín koya joma bixoán.

Tobʼelañá, tsa jngo ora basen jejaʼato nga nyisen, ma una y media bixoán, kʼoa tsa maije̱ una treinta bixoán. Kʼoati ma basen ora chale nga las dos bixoán kʼoa tsa maije̱ kante minuto chale nga las dos. Kʼoa tsa ya tiyoaa jñani machjén xi 24 ora, koa̱njin 13:30 kuixoán.

Kʼianga bʼexkiaa Biblia tsakui nichxin sakʼoa i̱ bixoán: “Jósʼin kisʼexki̱ ora kʼianga kui nichxin”. Joni tsa ndʼaibi, nkjín koya josʼin kisʼexki̱. Ya Escrituras Hebreas síkʼaxki nga “tanjio”, nga “nyisen” kʼoa nga “maxon” (Gén. 8:11; 19:27; 43:16; Deut. 28:29; 1 Rey. 18:26). Tonga je Biblia sakʼoaa ñaki tsoya kixi jochon nga tínchja̱ni jme xi tísíkʼaxki̱.

Nichxin kjoatse, tsakatio chjota xi kisikuinda naxinandá nga nitje̱n. Siento nó nga kjesa tsinjin Jesús, je chjota israelita janya kisikao je nitje̱n nga tsakʼéxki̱ kʼoa vigilia kitsole nga jngó jngó ya (Sal. 63:6). Tobʼelañá, jmeni xi tso Jueces 7:19 kʼiaa nga jeme basenya nitje̱n tínchja̱ni. Kʼoa nga nichxinle Jesús, je chjota judío kui jekisichjén josʼin bʼéxki̱ nitje̱n je chjota griego kao chjota romano kʼoa ñoya kisikao je nitje̱n.

Je xi ño Evangelio síkʼaxki jebi. Tobʼelañá, kʼiaa xi mani ño vigilia nga tsakʼamjeson nandá je Jesús kʼianga kikonle chjotale nga tjíoya chitso (Mat. 14:25). Kʼoa ñandia nga i̱ kitso je Jesús: “Tsa je naile ndʼia tsabe jo chon nga kjoaʼaí chjotaché, tsakʼejnakonʼnda tsakai, kʼoa likui kitsjoaʼnde nga tsakakjánjchxo xjáo niʼya nga jaʼasʼenché” (Mat. 24:43).

Je Jesús kisikʼaxki nga ño vigilia jebi kʼianga kitso: “Tjenyatokon tiyo, nga̱ tsín ʼyao kʼia kjoaʼaí je naile ndʼia, tsa sʼaingixon, axo basennitje̱n, kʼia nga skíʼndía cháxichá, axo nga tanjioya” (Mar. 13:35). Je vigilia xi títjon kʼiaa nga “ngixon” kʼoa kʼiaa fitsʼiani nga jekantjai Tsʼuí kʼoa las nuevela fetʼani. Je vigilia xi majaoni kʼiaa nga “basennitje̱n”, las nuevela fitsʼiani kʼoa las doce fetʼani. Je vigilia xi majanni kʼiaa nga “kjiʼndía cháxichá” kʼoa kʼiaa fitsʼiani nga basennitje̱n kʼoa las tresla nga tanjioya fetʼani. Kʼoa tochale kʼoachon kiskiʼndá je cháxichá kʼianga jetíjnanʼio Jesús (Mar. 14:72). Kʼoa je vigilia xi mañoni kʼiaa “nga tanjioya”, las tresla fitsʼiani kʼoa kʼiaa fetʼa saʼnda nga bitjo Tsʼuí.

Tojosʼin tiʼyaa, ninga tsín reloj koanchjén nichxin kjoatse tojo kisʼele chjota josʼin tsakʼéxki̱ je ora.