1, 2. 1) Jósʼin nga tsín mangóson je Jeobá kao chjota xi tjínle nganʼio i̱ Sonʼnde. 2) Jméni xi chótʼayá i̱ kjoaʼmiya jebi.

NʼIO nkjín chjota xi xángʼa tjínle kao xi tjínle nganʼio i̱ Sonʼnde, xi totaon be xi kjaʼaí chjota (Ecl. 8:9; Mat. 20:25). Tonga je Jeobá alikui kʼoasʼín. Ningalani nʼio tse nganʼio tjínle kuenta sʼínná, bakóná kjoanda, kuenta sʼín josatío tokoán, kʼoa be jmeni xi machjénná. Kʼoati be jokji tjen bichó je nganʼioná nga̱ “faʼaitsjenle nga to chaoñá” (Sal. 103:13, 14).

² Ya Biblia nkjín choa̱ faʼaitʼa jñani tsoyaná nga kuenta kisʼin Jeobá je choʼndale. Janla choa̱ kataʼyaa. Xi títjon, kʼianga tsakasenkao je Samuel nga jngo én tsakájinkon je naʼmitítjon Elí. Xi majaoni, kʼianga nʼio tsejta koan kao je Moisés nga kʼoakitso nga tsín mele koandiaale je chjota Israelita. Kʼoa xi majanni, kʼianga tsakʼasjentjai je chjota Israelita ya Egipto. Kʼianga chótʼayajiaan choa̱ jebi, nikjaʼaitsjeen jméni xi bakóyaná tʼatsʼe Jeobá kʼoa jósʼin koa̱n chjenngilee.

3. 1) Jmé xi koan ñandia kʼianga jekijnafe je Samuel (chótsenlai sén xi faʼaitʼa ibi). 2) Jméni xi chjonangiaa tʼatsʼe jebi.

³ Sʼaa nʼio ʼndí kji je Samuel kʼianga kisixá ya ndʼianajñole Jeobá (1 Sam. 3:1). Ñandia kʼianga jekijnafe tjín xi koan * (tʼexkiai 1 Samuel 3:4, 8-10). * Jngo jta̱ kinrʼoé je Samuel xi kinchja̱jaʼaínle, kʼoasʼin kisikjaʼaitsjen nga je Elí xi kinchja̱le. Ki jñani tíjna je Elí, kʼoa i kitsole: “I tijna, nga̱ kanokjoanái”. Kʼoa je Elí kʼoakitsole nga tsín je xi kinchja̱le. Kʼoa je Samuel ijngokʼá tikinrʼoéngáni nga tjín xi tínchja̱le. Tonga xi koanjanni kʼa, kʼiaa koanjinle je Elí nga jeni Jeobá xi kinchja̱le je Samuel. Kʼiaa kitsoyale jmeni xi kuitso kʼoa kʼoakisʼin je Samuel. Ánni nga tsín ndi̱to̱n kʼoakitsonile je Jeobá nga je xi kinchja̱le. Je Biblia alikui tsoya. Tonga jmeni xi koan kui bakóyaná nga kuenta kisʼin Jeobá jotjín kon je Samuel.

4, 5. 1) Jmé xi kisʼin Samuel kʼianga kʼoakitsole Jeobá nga jngo én katabájinkon je Elí. 2) Jméni xi bakóyaná choa̱ jebi xi tʼatsʼe Jeobá.

⁴ (Tʼexkiai 1 Samuel 3:13, 15-17). * Je kjoatéxoma xi kitsjoa Jeobá kʼoatso nga je xti tjínnele skoe̱xkón xi jechjotajchínga, kʼoa ngisaa jngo xi séntítjonle je naxinandá (Éx. 22:28; Lev. 19:32). Nʼiojin ñʼai koanle je Samuel kʼianga tsakʼéyanajmíle je Elí jmeni xi kitsole Jeobá. Je Biblia kʼoatso nga saʼnda kitsokjon Samuel nga kui én koajinkon je Elí. Tonga je Niná kʼoakitsole je Elí nga je xi tínchja̱le je Samuel. Kʼoa je Elí kʼoakitsole je Samuel nga katabʼéyanajmíle ngayeje jmeni xi kitsole je Jeobá.

⁵ Je Elí alikui tokʼoakoanle jmeni xi kitso je Samuel, nga̱ jesa jngo “chjotale Niná” jaʼainrʼoe nga títjon xi kʼoati me tso én tsakjákao (1 Sam. 2:27-36). Je choa̱ jebi kui bakóyaná nga nʼio chjine je Jeobá kʼoa bakóná kjoanda.

6. Jmé xi bakóyaná josʼin tsakasenkao Niná je Samuel.

⁶ Jmeni xi koan kao Samuel kʼoati kui bakóyaná nga je Jeobá majinle je kjoa xi faʼatojin je xi sʼa xti kʼoa jotjío kon. A sakʼoaa nokjuin kʼoa a ñʼai mali nga chjakaonajmíni je Énle Niná je xi jechjotajchínga kʼoa tsa jeje̱ xti xi ñatjen timao je skuela. Ali jaojin bʼai tokuin nga je Jeobá mele koasenkaoli, kuinga tʼeyanajmínilai jmeni xi makjáojinli kʼoa jotjín tokuin (Sal. 62:8). Tikjaʼaitsjenjin je choa̱le xti xi síkʼaxki̱ je Biblia, jolani je Samuel, kʼoa chja̱kaonajmí je ndsʼee xi ngóson tjín nóli kao je xi jejchínga, xi kʼoati kui kjoa tjíofaʼatojin je kjoa xi tjínli. Tsakui nichxin kui kʼoakuitsoli josʼin tsakinyakao je Jeobá nga kjoa jaʼatojin.

7, 8. Jósʼin tsakakó je Jeobá nga nʼio tsabechjí jokisʼe kon je Moisés.

⁷ Kʼianga 80 nóle Moisés, je Jeobá kui xá kitsjoale nga sikatíondái je naxinandá Israel (Éx. 3:10). Nga cho̱ kiskoʼnda je Moisés  ya Madián xi ñachan nó, tokʼoajinkoanle nga kui xá tsakʼaile. Kuinga i̱ kitsonile je Jeobá: “ʼYáni an nga ya kjuínrʼoesíña je Faraón kʼoa nga an kʼoasjesíña je chjota israelita ya Egipto” (Éx. 3:11, 12). Kʼoati kitsole nga kjuinrʼoéle je chjotajchínga xi tsʼe naxinandá Israel jmeni xi kuitsole. Ninga kʼoalani, je Moisés i kitso: “Tonga tobʼelañá tsa tsín koa̱nkjainle kʼoa likui kjuinrʼoé je én xi kuichokaole” (Éx. 3:18; 4:1). Je Moisés alikui koanmele kʼoakisʼin jmeni xi kitsole Niná. Tonga je Jeobá tosi tonda tsejta koan xi kao je, kʼoa saʼnda kitsjoale nganʼio nga koan tsakatío kjoaxkón. Je chjotasonʼnde xi títjon tsakʼaile nganʼio nga tsakatío kjoaxkón jéní Moisés (Éx. 4:2-9, 21).

⁸ Ninga kʼoalani, je Moisés tikui xi kitsongáni nga tsín nanda male nchja̱. Je Jeobá kʼoakitsole nga ya tjen kʼoéjnakao kʼoa nga je kuitsoyale jmeni xi kuitso. A kisʼejngo kon je Moisés. Mai, kʼoakitsole Jeobá nga tosa kjaʼaí chjota katasíkasén. Je Jeobá koanjtile xi kao Moisés. Tonga kʼoati kuenta kisʼin jotjín kon je Moisés kʼoa kʼoakitsole nga je Aarón koasenkao (Éx. 4:10-16).

9. Jósʼin tsakasenkao je Moisés nga tsejta koan je Jeobá kʼoa nga kuenta kisʼin.

⁹ Jméni xi bakóyaná xi tʼatsʼe Jeobá jmeni xi koan kao Moisés. Nga nʼio tse nganʼio tjínle Niná, koanjin tsakʼénele je Moisés nga katasítjosonle. Tonga tsín kʼoakisʼin, tosaa tsejta koan kʼoa ndʼé koan xi kao Moisés, kʼoa kui xi koanmele nga nda sʼe̱ kon je Moisés, jngo chjota xi tsakakó kjoanangitokon. A ndasʼin kichomani. Jaon. Nga̱ je Moisés nʼio ndasʼin tsakasentítjonle je naxinandá Israel kʼoa tsakʼénele yaole nga tsejta koan, kʼoa kʼoati tsakakóle kjoanda xi kjaʼaí, tojo kisʼin Jeobá xi kao je (Núm. 12:3).

10. Jósʼin basenkaoná nga chjenngilee je Jeobá kʼoa nga kuenta nʼia xi kjaʼaí.

¹⁰ Jmeni xi tso je Biblia tʼatsʼe Moisés tsee jmeni xi bakóyaná. Nga̱ kʼoati xá kjinená kʼiatsa jechixán, tsa xijchá maa, kʼoa tsa chjotajchínga sʼin tiyoaa jinjtín. Tojo sʼín je Jeobá, nʼio machjén nga tsejta koaan, nga  koakoá kjoanda kʼoa nga kuenta sʼiaan jotjío kon xi ngikʼa (Col. 3:19-21; 1 Ped. 5:1-3). Kʼiatsa kʼoénelee yaoná nga chjénngilee jokjoan je Jeobá kao Jesús, ngisajin choa ñʼai koa̱nle je xíngiaa nga kʼoeyanajmíná je kjoa xi sʼele kʼoa koa̱njin kʼoainganʼiolee (Mat. 11:28, 29). Xi ijngosani, ndajin choa̱ kʼoéjnaa (Heb. 13:7).

11, 12. Jmé xi kisʼin je Jeobá kʼianga tsakʼasje je chjota israelita ya naxinandá Egipto.

¹¹ Tsʼatola jan miyón mani je chjota israelita nga kitjo ya Egipto, kʼianga nó 1513, tongini nga nó 1. Tjenjin je xtiʼndí kao chjotajchínga, kʼoajinti tjenjin xi chʼin tjínle. Je xi tsakasentítjonle ngatsʼi chjota jebi, tjínnele tsakakó kjoatsjoacha kʼoa kuenta kisʼin jokisatio kon nga jngó jngó. Kʼoakisʼin je Jeobá, kuinga je Moisés kiskoejinni. Kʼoa je chjota israelita alikui kitsokjon kʼianga kitjo ya naxinandá Egipto (Sal. 78:52, 53).

¹² Jmé xi kisʼin je Jeobá nga tsín kitsokjon je naxinandále kʼianga kitjoni ya Egipto. Kuinga ndasʼin kisikatíoxkó (Éx. 13:18). Kʼianga kʼoakisʼin Jeobá je chjota israelita ñaki kʼoatsakatío kon nga je koandiaale kʼoa nga sikuinda. Xi ijngosani, jé Jeobá xokisʼin nga jngo yojbi tsakájnachjoa nga nichxin, kʼoa kʼianga njio jngoo lʼí kisiʼisenle je chjota israelita (Sal. 78:14). Joxi i kitsole je Jeobá: “Ali nokjonjion nga̱ i tijnakaono, an koandiaano kʼoa an sikuindano”. Kʼoa koanchjénle je kjoanʼiojin jebi nga koanskanni.

13, 14. 1) Jmé xi kisʼin Jeobá xi tʼatsʼe chjota israelita ya ndáchikon Ní. 2) Jósʼin tsakakóle Jeobá je chjota egipcio nga nʼio tse nganʼio tjínle.

¹³ Kʼoalasʼin si̱kjaʼaitsjeen nga ya tjíondainá je chjotakjoajchánle faraón ya ndáchikon Ní. Kʼoa toxijña ʼyaa nga basenkaoná je Jeobá, kʼoa jngo yojbi faʼachjoale je chjota egipcio (Éx. 14:19, 20). Kʼoa je chjota egipcio tsín tima faʼani nga to njio machon jñani tjío, tonga isen machon ya jñani tiyoaa ñá. Kʼoa je Moisés mjé ntsja kʼoa jngo ntjao̱ nʼio faʼa xi síjaoya je ndáchikon. Kʼoa ñá, chʼin chʼin mangián, kao xíngiaa kao je cho̱ntjená kʼoa kao ngatsʼi je chjota kʼianga bitjatojiaan ya ngabasenle ndáchikon. Kʼoa jmeni xi tokʼoamaná kuinga ñaki kixí chon jñani tibitjaa. Kʼoa saʼnda je xi tojbi fi nda faʼatojin (tʼexkiai Éxodo 14:21, 22). *

¹⁴ (Tʼexkiai Éxodo 14:23, 26-28). * Tonga je faraón fitjennginá kʼoa je Moisés mjé ngindia je ntsja kʼoa je ndáchikon majngo ijngokʼani. Kʼoa je faraón kao chjotakjoajchánle yaa mʼejin (Éx. 15:8-10).

15. Kʼianga chotʼayajiaan xi tʼatsʼe jebi, jmé xi bakóyaná xi tʼatsʼe Jeobá.

¹⁵ Jmeni xi koan nga kui nichxin kui bakóyaná nga je Jeobá jngoo Niná xi nʼio ndasʼin bʼéndajin josʼin bándiaale je naxinandále, kʼoa kui xi binyakaoná nga tsín nokjoaan (1 Cor. 14:33). Kʼoati kui xi bakóyaná nga kao kjoatsjoacha síkuindaná. Je  Jeobá basenkaoná kʼoa bʼasjentjainá nga tsín josikaoná je chjota xi fitjenngikená. Kʼianga ʼyaa jebi tsjoánganʼioná kʼoa ngisaa ndʼaibi nga jenichxin fetʼa tiyoaa (Prov. 1:33).

16. Jósʼin basenkaoná nga kui chotʼayajiaan josʼin tsakasenkao Jeobá je chjota israelita.

¹⁶ Nichxin xi tiyoaa ndʼaibi, je Jeobá kʼoati tsjoále je choʼndale jmeni xi machjénle nga nyaon nyaon kao jmeni xi binyakao nga taja katasatío je kjoamakjainle. Kʼoa tosi tonda kʼoasʼin josaʼnda nga kjoaʼaí je kjoañʼai xi tse (Apoc. 7:9, 10). Ninga sʼa xtiaa kʼoa ninga jetjínná nó, ni chʼin tjínná kʼoa ni mai, machjén nga tsín kuinókjoaan kʼianga kjoaʼaí je kjoañʼai xi tse. * Tosa kui si̱kjaʼaitsjenjiaan nga i̱ kitso Jesús: “Chótsenngʼao, kʼoa chjómitjaon jko, nga̱ je kjoabitjontjaino nroachrian” (Luc. 21:28). Tojo jé Jeobá si̱nʼiotʼaa kʼianga kʼoetʼaná je Gog xi tsʼe Magog, jngo jtín naxinandá xi ngisa tse nganʼio tjínle tikʼoajinni faraón (Ezeq. 38:2, 14-16) Ánni nga tsín jme xi si̱kjáojinñá. Kuinga ʼyaa nga je Jeobá koasenkaoná, nga̱ je alikuikʼia bʼantjaiya (Is. 26:3, 20).

17. 1) Jméni xi koa̱n sʼiaan nga koasenkaoná je choa̱ xi faʼaitʼa Biblia josʼin síkuinda Jeobá je naxinandále, kʼoa jmé kjoanda xi so̱koná. 2) Jmé xi chótʼayá ya kjoaʼmiya xi ijngo.

¹⁷ I̱ Kjoaʼmiya jebi jan choa̱ kaʼyaa nga je Jeobá bakó kjoatsjoacha kao kjoanda kʼianga síkuinda, nga bándiaale kʼoa nga bʼasjentjai je naxinandále. Nga si̱kjaʼaitsjenjiaan tʼatsʼe choa̱ jebi koasenkaoná nga tosi tonda jchaa jokjoan je Jeobá. Kʼoati koasenkaoná nga tosi tonda tsjoacha koaan je Jeobá kʼoa nga tosi tonda nʼio sʼe̱jna je kjoamakjainná. Ya kjoaʼmiya xi ijngo kui jchaa tʼatsʼe jósʼin koa̱n chjénngilee je Jeobá kʼianga koakoá kjoanda kao je familianá, ya jinjtín kʼoa kʼianga ʼmiyasoán.