1. Ánni nga tsjoa tjíonile je choʼndale Niná (chótsenlai sén xi faʼaitʼa ibi).

XI CHOʼNDALE Jeobá maa nʼio tsjoa tjío tokoán. Tobʼelañá, tsjoa satíoná kʼianga biyojtián nga ʼyaxkoán je Jeobá kʼoa nga bʼetsaojiaan kao je ndsʼee. Ánni nga nʼio tsjoa satíoni tokoán. Kuinga je Jeobá, “je Niná xi tsjoa tjínle” nixálee kʼoa jé chjénngilee (1 Tim. 1:11; Sal. 16:11). Tʼatsʼe Jeobá nroani je kjoatsjoa, kʼoa kui xi mele nga tsjoa sa̱tío tokoán, kʼoa nkjín koya tjínni anni nga tsjoa satíoni tokoán (Deut. 12:7; Ecl. 3:12, 13).

2, 3. 1) Jmé xi tsoyanile nga tsjoa satío tokoán. 2) Jméni xosikaoná nga tsín tsjoa sa̱tíoni tokoán.

² Jóbixoán nga jngó jngoá. A tsjoa tjío tokoán. Jméni xi koa̱n sʼiaan nga ngisa tsjoa sa̱tío tokoán. Nga tsjoa tjínle jngo chjota, kui xi tsonile nga ndatjín kon. Tsa mená nga ñaki tsjoa sʼe̱ kjoaixi tokoán, je Biblia kʼoatso nga machjén nga miyole Jeobá katamaa. Tonga nichxin xi tiyoaa ndʼaibi, alikui choa ñʼai maná nga tsjoa satío tokoán. Ánni.

³ Alikui tsjoa satío tokoán kʼianga kjoa bitjatojiaan. Tobʼelañá, tsa xáná si̱chaa, tsa tsjión xínkjín xi jechixán, tsa xíngiaa  kuichonsjejin naxinandále Niná kʼoa tsa jngo xíngiaa kuiyáje̱. Kʼoati tsín tsjoa kʼoe tokoán tsa kjoa tjínná kao je familianá, tsa skoe̱sinná je xi ñatjen nixá, xi ñatjen mangián skuela, tsakuije̱ nga chjota koaitjenngikená kʼoa tsa ndoyá cha̱niná. Kʼoa kʼoati tsín tsjoa sʼe̱ tokoán tsa táo chʼin tjínná kʼoa tsa depresión tjínná. Tonga je Jesucristo, xi tsjoa tjínle kʼoa “xi ngʼa kjoatéxoma tjínle”, kui xi mele nga sinʼio kon je chjota kʼoa tsjoa sa̱tío kon (1 Tim. 6:15; Mat. 11:28-30). Kʼianga kinchja̱ya Jesús ya jngo jko̱nindo, nkjín koya kisikʼaxki̱ jmeni xi tsjoa koaya tokoán ninga sakʼoa kjoa kuitjátojiaan nichxin xi tiyoaa ndʼaibi.

4, 5. Jméni xi machjén nga sʼiaan kʼianga tsjoa sa̱tío tokoán ngantsjai.

⁴ Jmeni xi kitso títjon je Jesús nʼio tjínle kjoandosin. I kitso: “Tsjoa tjíole je xi be nga machjénle tʼatsʼe Niná nga̱ tsʼení je Chjotaxále ngʼajmi” (Mat. 5:3, TNM). Kʼoasʼin bakoñá nga machjénná xi tʼatsʼe Niná kʼianga chotʼayá je Biblia, nga nitjosoán je kjoatéxomale kʼoa nga kui títjon nikʼéjnaa xi tʼatsʼe. Tsa kʼoasʼiaan, tsjoa sa̱tíoná kʼoa ngisaa sʼe̱jngo tokoán kʼianga tojeme kuitjoson jmeni xi tso je Niná. Xi ijngosani, je kjoachoya xi tsjoáná je Énle Niná koasenkaoná nga ska̱ná je kjoa xi kuitjátojiaan (Tito 2:13).

⁵ Xi nʼio koasenkaoná nga tsjoa sa̱tío tokoán kuinga miyole Jeobá koaan. Je pastro Pablo itso xi kiski: “Tsjoá tʼaotakon ngantsjai nga tiyokao Nainá [Jeobá]. Ngijngokʼa kʼoaxinngánino tsjoá tʼaotakon” (Filip. 4:4). Kʼianga miyole Jeobá koaan, machjén nga sʼe̱ná je kjoachjine xi tsʼe. Je Biblia itso: “Tsjoa tjínle je chjota xi masjaile kjoachjine kʼoa je chjota xi sokóle kjoamajintokon”. Kʼoa itsosa: “Je kjoachjine yá xi tsʼe kjoabijnachon tsoyanile je xi masjaile, kʼoa je xi tsín tsjion kʼoakʼuínle nga nʼio tsjoa tjíole” (Prov. 3:13, 18).

6. Jméni xi koasenkaoná nga tosi tonda tsjoa sa̱tío tokoán.

⁶ Kʼianga tsjoa sa̱tío tokoán ngantsjai, machjén nga tosi tonda si̱tjosoán jmeni xi tso je Biblia. Je Jesús kʼoakitso nga nʼio chjíle jebi. I kitso: “Tsa ʼyanío kjoa jebi, jó tondano tsa kʼoasʼiaon” (Juan 13:17; tʼexkiai Santiago 1:25 *). Tsa kʼoasʼiaan, kui xi koasenkaoná nga taja sʼe̱jna kjoamakjainná kʼoa tsjoa sa̱tío tokoán ngantsjai. Tonga jósʼin tsjoa sa̱tíoni tokoán kʼianga nʼio tse kjoa tjín. Kataʼyala jmesani xi kitso je Jesús.

7. Jósʼin nga tsjoa satíoni kon je xi kjiʼndá.

⁷ Je Biblia itso: “Jó tondale je xi kjiʼndía, nga̱ je xi koa̱njekon” (Mat. 5:4). Tsakui nichxin itso kʼa je chjota: “Jósʼin tsjoa sa̱tíoni kon je xi kjiʼndá”. Je Jesús ali tsa jejin kinchja̱ni chjota xi tokʼoatjíotso ngantsjai. Saʼnda je chjota xi chʼao sʼín aon male tʼatsʼe nga nʼio ñʼai kjimachon nichxin xi tiyoaa ndʼaibi (2 Tim. 3:1). Ninga kʼoalani, nga to yaole fini alikui síchriantʼale je Jeobá, kuinga tsín tsjoa satíoni kon. Je chjota xi kinchja̱ni je Jesús jéní xi be nga machjénle tʼatsʼe Niná kʼoa xi aon male nga be nga tsín síchriantʼale Niná je chjota. Majinle nga chjotajée ma, kʼoa nga kuinga chʼao chonni je sonʼnde nga jée kichʼá. Je Jeobá kuenta sʼín je chjota jebi, sínʼio kon kao jmeni xi tso je Biblia, basenkao nga tsjoa satío kon kʼoa tsjoále kjoachoya nga  koa̱n koatio ngantsjai nichxin (tʼexkiai Ezequiel 5:11; * 9:4 *).

8. Tʼeyanajmí ánni nga tsjoa tjíonile je xi ndʼé.

⁸ Je Biblia itso: “Jó tondale je xi indajin [xi ndʼé], nga̱ jé xi skoékjoatjao je sonʼndebi” (Mat. 5:5). Ánni nga tsjoa tjíonile je xi ndʼé. Tjínkʼa chjota xi tsʼen koan, tonga kʼianga jetsabe jmeni xi tsoya je Biblia, kisikʼantjaiyaa yaole. Kʼoa ndʼaibi, nangitokon ma, bakó kjoamatokon, kjoanda, kjoandʼé kʼoa tsejta kjima (Col. 3:9-12). Kʼoa nga kʼoasʼín, nda fikao xi ngikʼa kʼoa tsjoa satío kon. Kʼoa je Énle Niná kʼoatso nga je chjota jebi “jé xi skoékjoatjao je sonʼndebi” (Sal. 37:8-10, 29).

9. 1) Jósʼin tsoyanile nga tjoékjoatjaole je Sonʼnde chjota xi ndʼé. 2) Ánni nga tsjoa sa̱tíoni kon “je xi baole, kʼoa xi fatile kjoa xi kjoakixi”.

⁹ Jósʼin tsoyanile nga tjoékjoatjaole je Sonʼnde chjota xi ndʼé. Je chjotale Cristo xi ya ngʼajmi kʼoai kʼiaa tjoékjoatjaole je Sonʼnde kʼianga naʼmi jekoa̱n ya ngʼajmi kʼoa kʼianga jekoatexomason Sonʼnde (Apoc. 20:6). Kʼoa je chjota xi miyón mani xi tsín ya ngʼajmi koai, kʼiaa tjoékjoatjaole je Sonʼnde kʼianga jekoatio ngantsjai nichxin, nga jechjotatsje koa̱n, nga nyʼán sʼin koatio kʼoa nga tsjoa sa̱tío kon. Kʼoati je chjota jebi kinchja̱ni je Jesús kʼianga i̱ kitso: “Jó tondale je xi baole, kʼoa xi fatile kjoa xi kjoakixi” (Mat. 5:6). Je chjota xi kixi ñaki sʼe̱jngo kon kʼianga jekjoaʼaxin Jeobá ngayeje kjoatsʼen (2 Ped. 3:13). Kʼianga kui nichxin, je chjota xi kixi nʼio tsjoa sa̱tío kon kʼoa tsínkʼia tikjoaʼaon koatiojinni nga̱ tsín tisʼe̱ni je kjoatsʼen kao kjoa xi tsín kixi tjín (Sal. 37:17).

10. Jmé xi tsoyanile nga mamachaa jngo chjota.

¹⁰ Je Biblia itso: “Jó tondale je xi mamakon, nga̱ je xi sʼe̱le kjoamatakon” (Mat. 5:7). Kʼianga bakoá kjoamatokon, kui xi tsonile nga ndʼé maa kʼoa nga mamachaa je xi kjoañʼai faʼá. Tonga nga tʼatsʼe kjoamatokon nchja̱ni je Biblia ali tokuijin xi tsonile nga tokʼoakuixoán nga mamachaa jngo chjota, kui xi tsonile nga ñaki bisenkoaa.

11. Jméni xi bakóyaná je choa̱ xi tsakʼéjna je Jesús tʼatsʼe chjota samaritano.

¹¹ (Tʼexkiai Lucas 10:30-37). * Je choa̱ xi tsakʼéjna je Jesús nʼio nda tsoyaná josʼin tjínnele koakoá kjoamatokon. Kʼianga tsabe chjota samaritano je chjota xi ché kisikiʼaon, koanmake kʼoa tsakasenkao. Kʼianga jekitsoya choa̱ jebi je Jesús, kʼoakitso nga kʼoati tjínnele sʼiaan tsanda ñá. Kuinga chjónanginilee yaoná jebi: “A kʼoati sʼian tsanda an joni je chjota samaritano. A kʼoati sʼin bakoa kjoamatokon. Kʼianga ʼbe tsa ʼyani xi kjoañʼai tífaʼá, a bakole kjoamatokon. Jméni xi sʼian nga koasenkoa. Tobʼelañá, a basenkaoña je ndsʼee xi jekoanjchínga, je tichjaa xi jekʼien xʼinle, tsa jeje̱ xti xi tsín kotʼaya Énle Niná je xijchále. A koaan tsjoanganʼiole ʼyani xi nroajen kon” (1 Tes. 5:14; Sant. 1:27).

12. Ánni nga tsjoa bʼéni tokoán kʼianga bakoá je kjoamatokon.

 ¹² Ánni nga tsjoa satíoni tokoán kʼianga bakoá kjoamatokon. Kʼianga binyakoaa je xi kjaʼaí ʼyañá nga ngisa nda nga bʼé tikʼoajinni nga chjoé. Xi ijngosani, ʼyañá nga sasénle je Jeobá kʼianga kʼoanʼia (Hech. 20:35; tʼexkiai Hebreos 13:16 *). Je rey David i kitso tʼatsʼe je chjota xi bakó kjoamatokon: “Jé Jeobá sikuinda kʼoa sikʼéjnakon. Kʼoa ñaki tsjoa sʼe̱le nga kʼoéjna i̱ sonʼnde” (Sal. 41:1, 2). Tsa koakolee kjoamatokon xi ngikʼa, je Jeobá kʼoati koakoná kjoamatokon kʼoa nʼio tsjoa sʼe̱ tokoán ngantsjai nichxin (Sant. 2:13).

13, 14. Ánni nga tsjoa tjíoni kon je chjota xi tsje tjío ni̱ma̱le.

¹³ Je Jesús i kitso: “Jó tondale je xi tsje ni̱ma̱le, nga̱ je xi skoe̱ Niná” (Mat. 5:8). Kʼianga tsje sʼe̱ je ni̱ma̱ná, tjínnele tsje kʼoé je kjoafaʼaitsjenná kʼoa tsínkui xi chʼaotjín si̱metokoán. Nʼio chjíle jebi, nga̱ tokʼoasʼin nga sa̱sénle je Jeobá kʼianga jchaxkoán (tʼexkiai 2 Corintios 4:2; * 1 Tim. 1:5).

¹⁴ Je chjota xi tsje tjío ni̱ma̱le tsjoa tjío kon nga̱ ndatjío ngixko̱n Jeobá, je xi itso: “Jó tondale je xi bané najñole” (Apoc. 22:14). Jmé xi tsoyanile jebi. Je xi kao chjotale Cristo xi ya ngʼajmi koai, kui xi tsonile nga je Jeobá tsje sʼin bekon kʼoa kui kjoanda tsjoále nga tsín tikʼia kuiyáni kʼoa tsjoa sa̱tío kon ngantsjai nichxin. Kʼoa je choʼndale Niná xi i̱ Sonʼnde tjínle kjoachoya, kui xi tsonile nga chjotakixi sʼin bekon Niná kʼoa miyo tsole. Je Biblia itso: “Jetsakanéjon najñole, kʼoa je kisichxoa kao je njínle je Barré” (Apoc. 7:9, 13, 14).

15, 16. Jósʼin beni Niná je chjota xi tsje tjío ni̱ma̱le.

¹⁵ Je Biblia kʼoatso nga nijngojin chjota xi koa̱n skoe̱ je Niná (Éx. 33:20). Tonga ánni kʼoakitsoni je Jesús nga skoe̱ Niná je chjota xi tsje tjío ni̱ma̱le. Je én xi “skoe̱” sʼin faʼatoya kʼianga én griego, kui tsoyanile nga “nikjaʼaitsjeen, nga majinná kʼoa nga ʼyaa”. Je chjota xi be Niná jéní xi nʼio nda tjíobe xi tʼatsʼe kʼoa xi chjí bekon jokjoan je Niná (Efes. 1:18). Je Jesús nʼio ndasʼin kiskenngile jokjoan je Niná. Kuinga i̱ kitsoni: “Je xi tsabena nga an, tsabe Nʼainá” (Juan 14:7-9).

¹⁶ Kʼianga ʼyaa jokjoan Niná kʼoasʼin ʼyaxkonñá, tonga jósasʼin koa̱n jchaa je Niná. Kʼiaa nga kuenta sʼiaan josʼin basenkaoná (Job 42:5). Kʼoati koa̱n kʼoasʼin jchañá je Niná kʼianga kuenta sʼiaan je kjoanichikontʼain xi tsjoále je xi tsje sʼin fikao yaole kʼoa xi kixi fitʼale. Kʼoa je chjotale Cristo xi ya  ngʼajmi tjínle kjoachoya ñaki beni xko̱n je Niná kʼianga jefaʼáyale ya ngʼajmi (1 Juan 3:2).

17. Ánni nga tsjoa satíoni kon je xi kjoanyʼán básjai.

¹⁷ Je Jesús kʼoati i̱ kitso: “Jó tondale je xi síkinjenyʼán”, xi tsonile, je xi kjoanyʼán fitjenngi (Mat. 5:9). Ánni nga tsjoa tjíonile je chjota xi kʼoasʼín. Je chjotatjenngile Jesús xi Santiago tsakʼin itso xi kiski: “Je chjota xi male síkinjenyʼánjin, jé ní xi nyʼánsʼin bʼéntje kjoakixi” (Sant. 3:18). Tsa kjoa tjínná kao jngo ndsʼee ya jinjtín kʼoa tsa kao je xi tjío ya yaniʼyaná, koaan si̱jélee je Jeobá nga katabasenkaoná nga kʼoéndajiaan je kjoa xi tjínná kao xíngiaa. Je Jeobá tsjoáná je nganʼiotsjele kʼoa koasenkaoná nga kui xi ndatjín kʼoasʼiaan kʼoa nga tsjoa sʼe̱ tokoán. Je Jesús kʼoakitso nga machjén kʼianga ñá títjon kjoásjee je kjoanyʼán kʼianga i̱ kitso: “Tokui, tsa kjoaʼaikoai kjoatjaoli ya sonxta, kʼoa tsa ya kjoaʼaítsjenli nga ndsʼai tjínʼi̱tséle kjoakontra tʼatsi, tʼejnai kjoatjaoli yatʼa sonxta, kʼoa tʼin títjonkjoanla timiyo ngijngokʼai ndsʼai, kʼoa kʼia nroai, kʼoa tʼaitʼai kjoatjaoliʼni” (Mat. 5:23, 24).

18, 19. Ánni nga tsjoa satíoni kon je chjotale Cristo ninga chjota fitjenngike.

¹⁸ Je Jesús i kitso: “Jó tondano kʼia nga nokjoaʼaonno, kʼia nga fitjenngi kontrano, kʼoa nga kuitsono ngayije xi chʼao tjín xi tʼatsʼan”. Xijekoan, i kitso: “Tʼetsjoaotakon, kʼoa tʼejngotakon, nga̱ je chjíno nʼio tse koa̱n ya ngʼajmi. Kʼoasʼin kitjenngikontrale je xi kinchjaya tʼatsʼe Niná, xi títjon tjíono” (Mat. 5:11, 12). Kʼianga kjoañʼai kinikjaʼá je chjotatjenngile Jesús kʼoa kʼoasʼin kisʼenele nga tsín tikatatsoyasonni, tsjoa kisatio kon kʼianga jekitjoni ya ngixko̱n Sanedrín. Ningalani kjoañʼai kinikjaʼá, tsjoa kisatio kon nga̱ “kichʼasjengi xi tʼatsʼe jaʼaínle Jesús” (Hech. 5:41).

¹⁹ Nichxin xi tiyoaa ndʼaibi, ñá xi choʼndale Jeobá maa, kʼoati kao kjoatsjoa chókjoajinná kʼianga kjoañʼai chjaʼá xi totʼatsʼe jaʼaínle Jesús kʼoa tsa kʼiaje̱ nga nʼio tse kjoa bitjatojiaan (tʼexkiai Santiago 1:2-4). * Alikui tsjoachaa nga kjoañʼai nikjaʼáná. Tonga tsa kixi kjuintʼalee je Jeobá kʼianga kjoa bitjatojiaan, jé koasenkaoná nga ska̱ná. Jngola choa̱ kataʼyaa. Kʼianga sá agosto nó 1944, je chjotaxá yaa kisikasén je ndsʼee Henryk Dornik kao ndsʼe̱ ya ʼnde jñani kjoañʼai kinikjaʼá. Je chjota xi tsakatiochjoa i kitso: “Toxitsjoa tojmeni xi kʼuínlee kʼoa tojmeni xi si̱koaa. Kʼoasʼin matsen nga nda sʼele kʼianga kjoañʼai nikjaʼá”. Tonga je ndsʼee Dornik itso: “Alikui tsjoake̱ koan nga kjoañʼai kinikjaʼána, tonga tsjoa kisʼe tokoan, nga̱ kui tsakakó nga kixi kitʼale je Jeobá”, kʼoa i kitsosa: “Xi tsakasenkaona kuinga nʼio tsakʼetsʼoa, kʼoa kʼoasʼin koanchriantʼale je Jeobá. Jé xi nʼio tsakasenkaona”.

20. Ánni nga tsjoa satíoni tokoán nga je nixálee “Niná xi tsjoa tjínle”.

²⁰ Kʼianga ndasʼin biyoaa ngixko̱n “Niná xi tsjoa tjínle”, tsjoa satío tokoán ninga chjota fitjenngikená, ninga koatiochjoa je xi xíngiaa mani, ninga chʼin tjínná kʼoa ninga jetjínná nó (1 Tim. 1:11). Kʼoati tsjoa satío tokoán nga̱ ʼyañá nga je Niná “tsín male bʼéndiso” kʼoa sitjoson jmeni xi tongini tso (Tito 1:2). Kʼianga sitjoson jmeni xi tso Niná, nʼio tse kjoanichikontʼain sʼe̱ná. Saʼnda tsín majinná ndʼaibi jokji kjoanda tsjoáná je Jeobá ya Sonʼndenaxó. Ñaki nyʼán sʼin kuiyoaa kʼoa tsín jao tjínná nga nʼio tsjoa sa̱tío tokoán (Sal. 37:11).