1. Kʼoasi jósʼe kon Jeobá tʼatsʼe chjota xi nangitokon.

JE Jeobá tsjoakee je chjota xi nangitokon. Tojé chjota jebi xi koa̱n miyole koa̱n. Tonga “tokjin kotsennile je xi ngʼakon” (Sal. 138:6). Ngatsʼiaa mená ndasʼin kuiyoaa ngixko̱n Jeobá kʼoa mená nga tsjoake katamaná. Kuinga machjénsíni nga nangitokon katamaa.

2. Jmé xi chótʼayajiaan i̱ kjoaʼmiya jebi.

² I̱ kjoaʼmiya jebi jan koya tjínni xi chótʼayajiaan. Xi títjon, jósʼin tíjna nga nangitokon maa. Xi majaoni, ánni nga nangitokon koa̱nsíñá. Kʼoa xi majanni, jmé kjoa xi bitjatojiaan xi bakó tsa nangitokon maa. Tojosʼin jchaa i̱bi, nga nangitokon maa kjoanda tsaanñá kʼoa kʼoati tsjoa sʼe kon je Jeobá (Prov. 27:11; Is. 48:17).

3. Jósʼin tíjna nga nangitokon maa.

³ Je chjota xi nangitokon alikui to yaole fini kʼoa alikui ngʼakon. Je Biblia kʼoatso nga je chjota xi nangitokon majinle nga ngisa ngʼa tíjna je Jeobá kʼoa nga ngisa tse jmeni xi male xi ngikʼa tikʼoajinni je (Filip. 2:3, 4).

4, 5. Ánni nga ni̱ma̱ná kjuinroajinni nga nangitokon koaan.

⁴ Tjínkʼa chjota xi kʼoasʼin matsen nga nangitokon. Tsakui nichxin kʼoasʼin koanjchínga nga tjínnele koakole kjoaxkóntokon xi kjaʼaí kʼoa nga ndʼé koa̱n. Tonga tsakuini  nichxin ngʼakon kʼoa skanni bakó jokjoanni kjoan (Luc. 6:45).

⁵ Tonga je chjota xi ñaki bakó jokjoan alikui xi tsonile tsa ngʼakon (Juan 1:46, 47). Ninga kʼoalani, tjínnele sikuinda yaole. Ninga kjaʼaí kjaʼaí kjoaan nga jngó jngoá tjínnele ni̱ma̱ná kjuinroajinni nga nangitokon koaan.

6. Tojo tso ya 1 Corintios 15:10, jmé xi bakóyaná je choa̱le pastro Pablo.

⁶ Kataʼyala je choa̱le pastro Pablo. Kui xá kitsjoale Jeobá nga nkjín jtín katabatío. Tochale ngisa nkjín naxinandá kitsoyason Pablo tikʼoajinni xi ngikʼa pastro. Ninga kʼoalani, alikui ngʼa tsakʼasje yaole, tosaa i̱ kitso: “An nía pastro xi ngisa nangi tíjnasale xikʼa pastro, nga tsín tsa bakinna nga kʼoaʼmina pastro, nga̱ kontra kile je naxinandále Niná” (1 Cor. 15:9). Xijekoan, je Pablo kʼoakitso nga tokui nga tsakakóle kjoanda je Jeobá nga miyole koanni, nga tsín tsakui nga nʼio tse jmeni xi kisʼin (tʼexkiai 1 Corintios 15:10). * Nʼio nda choa̱ tsakakó nga nangitokon koan kʼianga kiskile je chjotale Cristo xi Corinto tsʼe ningalani tjínkʼa xi chʼaosʼin kisikʼaxki̱ (2 Cor. 10:10).

7. Jósʼin tsakakó je ndsʼee Klein nga nangitokon koan.

⁷ Nʼio nkjín ndsʼee xi binyakao nga bʼéxkia jmeni xi kisʼin je ndsʼee xi Karl Klein tsakʼin, xi ya tsakʼejnajinle je Cuerpo Gobernante. Je ndsʼee Klein kʼoakitso jme kjoa xi jaʼatojin kʼoa jmeni xi ñʼai koanle. Tobʼelañá, kʼianga nó 1920, tokʼiaa kitsoyason títjon, tonga ñʼai koanle kʼoa jaola nó nga tsín tikitsoyasonni. Kʼianga  jeki nichxin, nga ya Betel tísíxá, koanjti choatsele kao jngo ndsʼee xi kjoafaʼaitsjen kitsjoale. Kʼoa nga nʼio kisikjáojin kitjochʼinle, tonga koanndayani nga koanskanni. Tonga kʼoati nʼio tse xá xi kisʼin. Nga nangitokon koan ndsʼee jebi, koanjinle nga tsín nda kisʼin sakʼoa. Nʼio nkjín ndsʼee xi sasénle jokoankjoan je ndsʼee Klein kʼoa nga tsakʼéyanajmí jmeni xi kisʼin. *

8. Tojo tso 1 Pedro 5:6, jósʼin ʼyañá nga sasénle Jeobá nga nangitokon maa.

⁸ Nʼio machjén nga nangitokon koaan nga̱ kui xi sasénle Jeobá, tojo kitso je pastro Pedro (tʼexkiai 1 Pedro 5:6). * Je libro xi “Ven, sé mi seguidor” ʼmi, itso: “Je kjoangʼakon nʼio síkiʼaonná. Ninga je chjota xi nʼio male jmeni xi sʼín, alikui sasénle Niná tsa ngʼakon chjota jebi. Tonga je xi nangitokon nʼio sasénle Jeobá saʼnda je xi toxkia ʼndíchjota”. Kʼoa kʼoatsosa nga “nʼio tse kjoanichikontʼain tsjoáná Niná tsa nangitokon koaan”. * A tsí kjoaixi nga kui xi mená nga tsjoa kjoáyaa ni̱ma̱le Jeobá (Prov. 23:15).

9. Ánni nga je símiyosíni chjota je xi nangitokon.

⁹ Nda biyoaa ngixko̱n Jeobá kʼianga nangitokon maa, kʼoa kʼoati basenkaoná. Nkjín chjota xi sasénle josʼín je xi nangitokon ma. Kuila si̱kjaʼaitsjeen josʼín chjota xi mená si̱miyoaa (Mat. 7:12). A tsí kjoaixi nga tsín sasénná je chjota xi to yaole fini kʼoa xi tsín sasénle nga kjoafaʼaitsjen bʼaile. Tonga nda sʼe tokoán nga ya biyokoaa je chjota xi majinle jotjín tokoán, xi tjao bená, xi bakóná kjoamatokon kʼoa xi nangitokon (1 Ped. 3:8). Kʼianga kui nikjaʼaitsjenjiaan jebi, majinná nga ngisa nda sa̱tío kon xi ngikʼa tsa nangitokon koaan.

10. Jósʼin basenkaoná nga nangitokon maa kʼianga kjoa bitjatojiaan.

¹⁰ Nga nangitokon maa kʼoati basenkaoná kʼianga kjoa bitjatojiaan. Sakʼoaa kʼoasʼin nikjaʼaitsjeen nga tsín kixi tíjna jmeni xi ma sakʼoa. Je rey Salomón i kitso: “Tiʼbeña nga je choʼnda naxín tjíoson kʼoa je xi chjotatítjon ndso̱koo tjíomani joni choʼnda” (Ecl. 10:7). Sakʼoaa tsín síxkón matʼain  je chjota xi ngisa nkjín kon. Kuinga kʼoakitsoni Salomón nga tsín koa̱n chʼao kʼoé tokoán ninga tojme kjoa xi kuitjátojiaan (Ecl. 6:9). Tsa nangitokon koaan koasenkaoná nga tsín nʼio si̱kjáojiaan ninga kjoa kuitjátojiaan.

11. Jótjínnele sʼiaan kʼianga kjoafaʼaitsjen bʼainá.

¹¹ Nga nyaon nyaon nkjín koya josʼin koa̱n koakoá tsa nangitokon maa. Tobʼelañá, kʼianga kjoafaʼaitsjen bʼainá. Kuinga kjoafaʼaitsjen bʼaininá nga tsín kixi tíjna jmeni xi nʼia sakʼoaa. Nga títjon, tochale tsín sa̱sénná je kjoafaʼaitsjen xi kʼoainá kʼoa tsa saʼnda chʼaosʼin si̱kʼaxkiaa je xi kjoafaʼaitsjen tsjoáná. Tonga tsa nangitokon maa, si̱tjosonjián jmeni xi kʼuínná.

12. Tojo tso Proverbios 27:5, 6, ánni nga kʼoaisínilee kjoanda tsa ʼya xi kjoafaʼaitsjen tsjoáná. Jngo choa̱ tʼejnai.

¹² Je chjota xi nangitokon tsjoá kjoanda kʼianga kjoafaʼaitsjen bʼaile. Tobʼelañá, kʼiatsa ya tichobakaonajmiá je ndsʼee ya Ndʼia jña chotʼayá, kʼoa tsa jngo xi kuinchja̱tʼaxinná kʼoa kʼoakuitsoná nga tjín xi tíjnangi niʼñoaa, soajin koa̱nná. Tonga kʼoaijinlee kjoanda. Saʼnda kʼoajinsʼin si̱kjaʼaitsjeen nga ngisa nda tsa tongini kʼoakaʼminá. Kʼoatisʼinni, kʼianga jngo ndsʼee tsjoáná kjoafaʼaitsjen koaan kʼoailee kjoanda. Nga̱ kjoanʼiojin kamachjénle nga kʼoakasʼín. Alikui koa̱n kʼoasʼin si̱kjaʼaitsjeen nga jtikená, tosa kʼoasʼin si̱kjaʼaitsjeen nga miyoná mani (tʼexkiai Proverbios 27:5, 6; * Gál. 4:16).

13. Jósʼin bakoá kjoanangitokon kʼianga xá bʼaile ndsʼee ya jinjtín.

¹³ Kʼianga xá bʼaile ndsʼee ya jinjtín. Jngo xi chjotajchínga sʼin tíjna xi Jason ʼmi, itso: “Kʼianga sʼejinna nga xá bʼaile je ndsʼee xi ngikʼa, sakʼoaa kʼoasʼin sikjaʼaitsjen ánni nga tsín an tsakʼainina”. A sakʼoaa kʼoasatío tokoán. Kjoaixi nga tsín chʼaotjín nga bʼenelee yaoná nga ngisa tse nixálee Jeobá (1 Tim. 3:1). Tonga tjínnele si̱kuindaa yaoná josʼin nikjaʼaitsjeen ánni nga tsín kjoangʼakon sʼe̱jnajinni ni̱ma̱ná. Tobʼelañá, tsa jngo ndsʼee xi kʼoasʼin sikjaʼaitsjen nga toje xi ngisa nda male sítjoson tsa jme xáni. Kʼoa tsa jngo tichjaa xi kʼoasʼin sikjaʼaitsjen nga ngisa nda sítjoson  xʼinle je xá xi bʼaile tikʼoajinni xi kjaʼaí ndsʼee. Kʼiatsa nangitokon maa, alikuijin kʼoasʼin si̱kjaʼaitsjeen.

14. Jméni xi bakóyaná jokisʼin Moisés kʼianga kjaʼaí xi kitsʼaile xá.

¹⁴ Kataʼyala jmeni xi bakóyaná jokisʼin Moisés kʼianga kjaʼaí xi kitsʼaile xá. Nʼio chjí tsabekon nga je tsakándiaale je naxinandá Israel. Je Moisés alikui koanchi̱ni̱ kʼianga je chjota israelita xi ngikʼa kitsjoale xá je Jeobá (Núm. 11:24-29). Kʼoa kʼoati tsakakó nga nangitokon ma nga kjaʼaí xi tsakinyakao nga tsakʼéndajin je kjoa xi kisʼele naxinandá (Éx. 18:13-24). Nga nkjín koanni xi tsakʼéndajin kjoa, ngotjo kisʼendajinni je kjoa xi kisʼe. Je Moisés ngisaa kui koanndosinle nga nda katabatio je chjota israelita tikʼoajinni je xá xi kisʼele. Nʼio nda choa̱ tsakʼéjnaná. Kʼiatsa mená nga je Jeobá sichjénná, tjínnele koakoá kjoanangitokon tikʼoajinni nga tokui kjuinñá jmeni xi maná nʼia. Ya Salmo 138:6, itso: “Ningalani ngʼa tíjna je Jeobá, kuenta tísʼín je xi nangitokon”.

15. Jósʼin tíbʼantjaiyajin nga tjíosíxále Niná je ndsʼee.

¹⁵ Kʼianga bʼantjaiya josʼin tinixálee Niná. Tjínkʼa je ndsʼee xi jenʼio nkjín nó tjíosíxále Niná xi chriansʼa tsʼantjaiya josʼin tjíosíxá. Tobʼelañá, kʼianga nó 2014, je superintendente xi tsʼe distrito kao yánchjínle kʼoatsakʼinle nga kʼoantjaiya josʼin sixále Niná. Nga tikuini nó, je superintendente xi tsʼe circuito kʼoatsakʼinle nga tsín tikʼoasʼin sixáni nga jekuichole 70 nó. Kʼoa je ndsʼee xi 80 nóle kʼoa tsa tsʼato alikui tikoa̱n nga coordinador sʼin kʼoéjnanile je xi chjotajchínga sʼin tjío ya jinjtín. Jokji tífaʼa nó, nkjín ndsʼee xi ya Betel síxá xi precursor sʼin tjíonikasén. Kʼoa tjínkʼa xi tjíosíkatío nga ñaki to xále Niná tjíosʼín tsakʼai xi totʼatsʼe  chʼin, nga je síkuinda xijchále kʼoa tsa jmesa kjoa xi kjaʼaí faʼatojin.

16. Jósʼin bakó nga nangitokon ma je ndsʼee.

¹⁶ Nkjín ndsʼee jebi xi ñʼai koanle nga tsʼantjaiya josʼin tjíosíxá tsakai. Nkjín xi ba kisatio kon nga̱ jekoanngakaole nga nkjín nó nga kʼoasʼin kisixále Niná. Nga jefi nichxin, manga ijngokʼale jmeni xi sʼín, nga̱ nʼio tsjoake je Jeobá kʼoa kui kuenta sʼín nga je Niná xi kitsjoatʼale yaole ali tsa jngojin xá (Col. 3:23). Tsjoa satío kon je ndsʼee nga tosi tonda je Jeobá síxále. Jé Jeobá sínʼiotʼa nga̱ be nga je sikuinda (1 Ped. 5:6, 7).

17. Ánni tsjoa satíoni tokoán nga kʼoasʼin tsoyaná je Énle Niná nga nangitokon katamaa.

¹⁷ Tsjoa satío tokoán nga kʼoasʼin tsoyaná je Énle Niná nga nangitokon katamaa. Binyakaoná nga nangitokon maa kʼoa kʼoati binyakao xi kjaʼaí chjota. Basenkaoná nga bʼendajiaan je kjoa xi bitjatojiaan, kʼoa ngisaa machriantʼalee je Nʼainá xi tíjna ngʼajmi. Ningalani “nʼio ngʼa tíjna” je Jeobá, tsjoa satío tokoán nga tsjoakená kʼoa nga chjí bená nga nangitokon maa (Is. 57:15).