1. Jmé kjoa xi tíjnajin je pastro Juan kʼianga toje tífetʼa siglo 1.

KʼIANGA toje tífetʼa siglo 1, tsee kjoa jaʼatojin je pastro Juan. Jenʼio jchínga, ndoyá tíjnaʼya ya Patmos, kʼoa tsakui nichxin tojesa pastro xi tíjnakon nga kʼia (Apoc. 1:9). Be nga je chjota xi jtike Énle Niná tjíobʼanachale je chjotale Cristo kʼoa nga xkoa̱ya sʼin tjíosíkatío. Kʼoasʼin koantsen nga tojeme jchangi je chjotale Cristo (Jud. 4; Apoc. 2:15, 20; 3:1, 17).

2. Tojo tso Apocalipsis 7:9-14, jmé sén xi kisakole Juan (chótsenlai sén xi faʼaitʼa ya portada).

² Kʼianga kjoa tíjnajin je pastro Juan jngo sén kisakole. Kui tsabe nga ño mani je ánkje xi tjíobʼéchjoale kjoañʼai xi nʼio tse saʼnda nga sʼe̱choa̱ ngatsʼi je choʼnda xi jngo jtín mani (Apoc. 7:1-3). Je jtín jebi jéní xi 144,000 mani xi ya koatexomakao je Jesús ya ngʼajmi (Luc. 12:32; Apoc. 7:4). Xijema, je Juan kʼoati ijngo koya jtín kisikʼaxki̱ xi nʼio nkjín mani, kʼoa i kitso: “Koeni”. Tokʼoakoanle nga kui sén tsabe. “Jo nkjín mani chjota [xi tsabe], jñale xi tsín maxki̱le, xi tsʼe ngatsʼi ʼnde, kao ntje̱, kao naxinandá, kao én. Tjío ngixko̱n je yáxilebe, kʼoa ya ngixko̱n je Barré” (tʼexkiai Apocalipsis 7:9-14). * Nʼiojin tsjoa kisʼe kon nga tsabe sén jebi, jñani kʼoasʼin kisakole nga kjoaʼaí nichxin nga nʼio nkjín jmi koa̱nni je chjota xi skoe̱xkón Jeobá.

3. 1) Ánni nga nʼio basenkaoniná je sén xi tsabe je pastro Juan. 2) Jméni xi chótʼayajiaan i̱ kjoaʼmiya jebi.

 ³ Alikui jao tjínná nga ngisa nʼio kisʼejna kjoamakjainle Juan nga kui sén tsabe. Kʼoa ngisaa basenkaoná ndʼaibi nga̱ jetíbitjoson jmeni xi tsabe je Juan. Tiʼyañá nga millón mani je chjota xi tjíofaʼasʼenjin naxinandále Niná, xi kui kjoachoya tjínle nga kuinje̱ngile yaole nga kjoaʼaí je kjoañʼai xi nʼio tse kʼoa nga koa̱n koatio ngantsjai nichxin i̱ Sonʼnde. Jetsʼato 80 nó tjínle kʼianga kitsoyale Jeobá je naxinandále ʼyáni je xi chjotankjín ʼmile, kʼoa kui tʼatsʼe jebi chótʼayajiaan i̱ kjoaʼmiya jebi. Kʼoati jao koya tjínni xi jchaa tʼatsʼe chjota jebi. Xi títjon, jótjín mani. Kʼoa xi majaoni, nga tjío jngo tjíjtsa Sonʼnde. Nga kui jebi chótʼayajiaan, koasenkaoná nga tosi tonda taja sʼe̱jna kjoamakjainná.

4. Jméni xi tsín majinle je religión xi chjotale Cristo tsole yaole, kʼoa jósʼin koankjainle je Chjota xi kiskotʼaya Biblia.

⁴ Je xi chjotatjenngile Cristo tsole yaole alikui kui bakóya nga kʼoatso je Biblia nga i̱ Sonʼnde koatio ngantsjai nichxin je chjota xi sitjosonle Niná (2 Cor. 4:3, 4). Nichxin xi tiyoaa ndʼaibi, nʼio nkjín religión xi kʼoatso nga ya ngʼajmi fi kʼianga jebiya ngatsʼi xi nda chjota. Tonga kʼianga toje tífetʼa siglo 19, je chjotale Cristo xi kiskotʼaya Biblia kʼoa xi tsakʼasje je revista xi Xo̱n xi Bájinkonná ʼmi ndʼaibi, alikui kʼoasʼin koankjainle. Kʼoasʼin koanjinle nga ʼndenaxó sikao Niná i̱ Sonʼnde kʼoa nga millón mani je chjota xi koa̱n koatio ngantsjai nichxin i̱ Sonʼnde, ali tsa yajin ngʼajmi. Tonga tojo tsín koanjinle ʼyá chjota xi nchja̱ni (Mat. 6:10).

5. Jósʼin koankjainle je Chjota xi kiskotʼaya Biblia tʼatsʼe xi 144,000 mani.

⁵ Je Chjota xi kiskotʼaya Biblia kʼoati koanjinle nga kʼoatso je Énle Niná nga tjínkʼa je xi “koanchjíntjai yajin chjotasonʼnde” xi ya koatexomakao je Jesús ya ngʼajmi (Apoc. 14:3). Je chjota jebi jéní xi 144,000 mani chjotale Cristo xi ñaki kao kjoatsjoa kisixále Niná nga tsakatio i̱ Sonʼnde. Tonga ʼyáni xi chjotankjín tsole Biblia xi i̱ Sonʼnde koatio.

6. Jósʼin koankjainle je Chjota xi kiskotʼaya Biblia tʼatsʼe je chjotankjín.

⁶ Je Juan tsabee je chjota jebi nga ya “tjío ngixko̱n je yáxilebe, kʼoa ya ngixko̱n je Barré” (Apoc. 7:9). Tojo tso én jebi, je Chjota xi kiskotʼaya Biblia kʼoasʼin koanjinle nga je chjotankjín yaa ngʼajmi koatio, joni je xi 144,000 mani. Kʼoa jméni xi tsín koanngóson. Je Chjota xi kiskotʼaya Biblia kʼoasʼin koanjinle nga je chjotankjín jéní xi tsín ñaki nda kisitjosonle Niná jokjitse tsakatio i̱ Sonʼnde. Ningalani nda kisʼin, tsakui nichxin tojo ya kitsjonjin yaole je religión ndiso. Je xi koanjinle Chjota xi kiskotʼaya Biblia kuinga je chjota jebi alikui nʼio nda kisixále Niná kʼoa kuinga tsín ya koatexomakaoni je Jesús. Nga tsín nʼio tsjoake koan Niná, yaa ngixko̱n je yáxile kuinya, tonga alikui ya koatione je yáxile.

7. 1) Tojosʼin koanjinle je Chjota xi kiskotʼaya Biblia, ʼyáni je xi i̱ Sonʼnde koatio xi jngo jmi nó. 2) Jósʼin koanjinle tʼatsʼe chjota xi tsakatio nichxin kjoatse.

⁷ ʼYáni xi i̱ Sonʼnde koatio. Je Chjota xi kiskotʼaya Biblia kʼoasʼin koankjainle nga millón koa̱nni je chjota xi koatio i̱ Sonʼnde kʼianga jekoai ya ngʼajmi je xi 144,000 mani kao je chjotankjín, kʼoa nga je chjota xi i̱ Sonʼnde koatio kui sʼe̱le je kjoanichikontʼain xi kjoaʼaíkao Chjotaxále Niná xi jngo jmi nó. Alikui kʼoasʼin koankjainle nga tongini sixále Niná chjota jebi, tosaa kʼoasʼin koankjainle nga kʼia kʼuínyale je kjoatéxomale Niná kʼianga jetíbatéxoma Cristo xi jngo jmi nó. Xijekoa̱n, je chjota xi sitjosonle Niná koaan  koatio ngantsjai nichxin i̱ Sonʼnde kʼoa ni̱kjeson je xi tsʼen. Kʼoa je Chjota xi kiskotʼaya Biblia kʼoasʼin koanjinle nga “je xi chjotatítjon” koa̱n nga kui nichxin, xi kʼoati ya tjíojinle je chjota xi tongini kʼien nga kjesa faʼaijin Cristo, nga tjínkʼa xi ya koai ngʼajmi nga jekjoetʼa je xi jngo jmi nó (Sal. 45:16).

8. Tikʼaxki̱ je xi jan koya josʼin koankjainle je Chjota xi kiskotʼaya Biblia.

⁸ Je Chjota xi kiskotʼaya Biblia kʼoasʼin koankjainle nga jan koya mani je jtín xi síkʼaxki̱ Biblia. Xi títjon, je xi 144,000 mani, xi ya ngʼajmi koatexomakao Jesús. Xi majaoni, je chjotankjín xi tsín nʼio nda kisixále Niná xi ya “tjío ngixko̱n je yáxilebe, kʼoa ya ngixko̱n je Barré” ya ngʼajmi. Kʼoa xi majanni, je chjota xi millón mani xi kʼia skoe̱ xi tʼatsʼe Jeobá kʼianga jetíbatéxoma je Jesús xi jngo jmi nó. * Tonga kichoka nichxin kʼianga kisijinle Jeobá je choʼndale jokjoantjínni xi tʼatsʼe jebi (Prov. 4:18).

9. 1) Jósʼin tsoyanile nga ya “tjío ngixko̱n je yáxilebe, kʼoa ya ngixko̱n je Barré” je chjotankjín. 2) Ánni nga kixi tíjnasíni josʼin majinná Apocalipsis 7:9.

⁹ Kʼianga nó 1935, je testigole Jeobá koanjinle ʼyá xi nchja̱ni je chjotankjín xi tsabe je Juan kʼianga kisakole je sén. Koanjinle nga tsín tjínnele ya ngʼajmi koai je chjotankjín jebi nga ya kuinya “ngixko̱n je yáxilebe, kʼoa ya ngixko̱n je Barré”, kʼoa nga totsoyanile je én jebi. Ningalani i̱ Sonʼnde koatio je chjotankjín, yaa kuinya “ngixko̱n je yáxilebe” tsa majinle nga toje Jeobá xi batéxomale ngʼajmi kao Sonʼnde kʼoa tsa sítjosonle (Is. 66:1). Kʼoa yaa nya “ngixko̱n je Barré” tsa tjínle kjoamakjain xi tʼatsʼe Jesús. Kʼoati ya bakóyaná jmeni xi tso Mateo 25:31, 32 nga totsoyanile jebi. Kʼoatso nga “ngatsʼi naxinandá”, ninga je xi tsʼen, yaa “koa̱nxkó ngixko̱n” Jesús. Ngatsʼi je naxinandá jebi i Sonʼnde tjío ali tsa yajin ngʼajmi. Kʼiaa nga nó 1935 koanjinsale choʼndale Niná xi tʼatsʼe jebi. Koanjinle nga je chjotankjín alikui ya ngʼajmi koai. Tojekjoán xi 144,000 mani xi ya ngʼajmi koai xi koatexomakao je Jesús (Apoc. 5:10).

10. Ánni machjénsíni nga katabe kjoatéxomale Jeobá je chjotankjín nga kjesa batéxomajin Cristo xi jngo jmi nó.

¹⁰ Saʼnda tjen nó 1935, je testigole Jeobá kʼoasʼin koanjinle nga je chjotankjín xi tsabe je pastro Juan jé nchja̱ni chjotatjenngile Cristo xi kixi koa̱n kʼoa xi i̱ koyale koatio ngantsjai nichxin i̱ Sonʼnde. Kʼianga kuinje̱ngile yaole nga kjoaʼaí je kjoañʼai xi nʼio tse kʼoa nga chókjoajinle ngayeje kjoa “xi kjoaʼaí”, je chjotale Cristo jebi tjínnele nga skoe̱ kjoatéxomale Jeobá kʼoa koako nga taja tjío je kjoamakjainle nga kjesa faʼaijin xi jngo jmi nó koatexoma je Cristo (Luc. 21:34-36).

11. Ánni nga kʼoasʼin koankjain kʼanile je Chjota xi kiskotʼaya Biblia nga tjínkʼa chjotale Cristo xi ya ngʼajmi koai nga jekjoaʼato xi jngo jmi nó.

¹¹ Tojo tso ya párrafo 7, tjínkʼa je Chjota xi kiskotʼaya Biblia xi kʼoasʼin koankjainle nga tjínkʼa je xi ya ngʼajmi koai kʼianga jekjoaʼato xi jngo jmi nó. Ánni nga kʼoasʼin kisikjaʼaitsjenni. Yaa jaʼaitʼa xi tʼatsʼe jebi ya revista xi tsʼe 15 de febrero de 1913 xi Xo̱n xi Bájinkonná ʼmi ndʼaibi. Tsakui nichxin tjínkʼa xi i̱sʼin kisikjaʼaitsjen: tsa ya ngʼajmi koai je chjotale Cristo xi tsín nanda sítjosonle Niná, ánni nga tsín ya koaini je chjota xi kixi kitʼale Niná nichxin kjoatse. Xi títjon, kuinga kʼoasʼin koankjainle nga ya ngʼajmi koai je chjotankjín. Kʼoa xi majaoni, kuinga kʼoasʼin  koankjainle nga je xi chjotankjín ʼmile jé chjotale Cristo xi tsín nanda kisitjosonle Niná.

12, 13. Jméni xi majinle je chjotale Cristo xi ya ngʼajmi koai kao je chjotankjín tʼatsʼe nga koa̱n koatio ngantsjai nichxin.

¹² Tojosʼin tiʼyaa, saʼnda tjen nó 1935, xi testigole Jeobá maa kjimajinná nga je chjotankjín xi tsabe Juan jé xi kuinje̱ngile yaole nga kjoaʼaí Armagedón. Kʼianga jekjoaʼatojin je kjoañʼai xi nʼio tse i̱ Sonʼnde, i kuitso: “Kjoabitjontjai tjínle je Nináná, xi ya tíjnane je yáxilebe, kʼoa je Barré” (Apoc. 7:10, 14). Xi ijngosani, je Biblia kʼoatso nga je chjota xi ya ngʼajmi kjoaʼáyale ngisaa nda jmeni xi kʼoaile tikʼoajinni je chjota xi kixi kitʼale Niná nichxin kjoatse (Heb. 11:40). Nga koanjinle jebi je chjotale Cristo, kui xi tsakinyakao nga kao kjoatsjoa kʼoakitsole je chjota nga je Jeobá katasíxále kʼoa nga koa̱n koatio ngantsjai nichxin i̱ Sonʼnde.

¹³ Nʼio tsjoa báya kon nga kui kjoachoya tjínle je chjotankjín. Majinle nga je Jeobá xi kuitsoni ʼyáni xi ya ngʼajmi koai kʼoa xi i̱ Sonʼnde koatio. Je chjotale Cristo xi ya ngʼajmi koai kao je chjotankjín, majinle nga nʼio tse kjoanda tíbakóná Niná kʼoa nga totʼatsʼe nga tsakʼéchjíntjainá Cristo nga koa̱n kuiyoñá ngantsjai nichxin (Rom. 3:24).

14. Kʼianga jejaʼato nó 1935, ánni nga kui kisikjaʼaitsjen kʼani jósʼin kuitjoson jmeni xi tongini kinokjoa tʼatsʼe je chjotankjín.

¹⁴ Kʼianga nó 1935, nga jekoanjinle je chjotale Cristo xi tʼatsʼe chjotankjín, tojo kui kisikjaʼaitsjenjin jósʼin koa̱nnkjínya je chjotale Cristo xi i̱ Sonʼnde koatio. Tobʼelañá, je Ronald Parkin, xi 12 nóle kʼianga nó 1935, itso: “Nga kʼia 56,000 mani je xi tsoyason jngo tjíjtsa Sonʼnde, kʼoa me tongatsʼi nga ya ngʼajmi tjínle kjoachoya. Kʼoa to choaa mani je chjotale Cristo xi i̱ Sonʼnde tjínle kjoachoya”.

15. Tʼeyanajmí jósʼin kjimankjínya je chjota xi i̱ Sonʼnde tjínle kjoachoya.

¹⁵ Nga jenkjín nó jaʼato nkjín ʼnde jñani misionero kinikasén, kʼoa sa nkjín sa nkjín koanni je testigole Jeobá. Kʼianga nó 1968, nga kichotʼayajin je Biblia kui koanchjén je libro xi La verdad que lleva a vida eterna ʼmi. Nga tochoa ñʼai sʼin kitsoya jmeni xi tso je Biblia, nʼio nkjín je chjota xi koanndosinle. Nga jeño nó jaʼato, tsʼato basen millón chjota kisʼenngindá. Kʼoa nkjínsa millón chjota kisʼenngindá xi testigole Jeobá koan kʼianga jetsín tikoanndosinnile chjota xi tʼatsʼe religión Católica ya América Latina kao xi kjaʼaísa naxinandá, kʼoa nga jekitjoʼnde nga kisakoyason Énle Niná ya Europa oriental  kao ʼnde xi tjío ya África (Is. 60:22). Je nó xi tífaʼato, je naxinandále Niná nkjín xo̱n kao video tíbʼasje xi binyakao je chjota nga katabe jmeni xi bakóya je Biblia. Kʼoa je chjota xi i̱ Sonʼnde tjínle kjoachoya jetsʼato jin millón mani.

16. Jñá faʼaini je chjotankjín.

¹⁶ Kʼianga kisakole sén je pastro Juan tsabee je chjotankjín “xi tsʼe ngatsʼi ʼnde, kao ntje̱, kao naxinandá, kao én”. Kʼoati i̱ kitso je profeta Zacarías: “Kʼianga kui nichxin te chjota xi ya jaʼaini ngayeje én xi nokjoa ngakjijnda naxinandá tsoa̱nʼio, tsoa̱nʼio je najñojnrole jngo chjota xi judío, kʼoa i kuitso: Menajin nga ya koanngínkaolaijin, nga̱ kinoʼyaníjin nga Niná tíjnakaono” (Zac. 8:23).

17. Jméni xi kjima kʼianga tíʼmiyale Énle Niná je chjota xi xinxin naxinandále kʼoa xi kjaʼaí kjaʼaí én nchja̱.

¹⁷ Xi testigole Jeobá maa, ʼyañá nga tjínnele kjaʼaí kjaʼaí én sa̱kóyason je Énle Niná nga koa̱nxkó je chjota xi kjaʼaí kjaʼaí én nchja̱. Kuinga jetsʼato 130 nó tjínnile nga tífaʼatoya je xo̱n xi Énle Niná yʼangini. Kʼoa nichxin xi tiyoaa ndʼaibi, siento én tífaʼatoya je Énle Niná. Jé Jeobá xotísʼín nga tísíkatíoxkó je chjota xi xinxin naxinandále. Kʼoa nga sa nkjín sa nkjín én tífaʼatoya je Énle Niná, jtín  sʼin tjíosíxále Jeobá ngatsʼi je choʼndale. Kʼoa kʼoasʼin ʼyale je choʼndale Niná nga kao kjoatsjoa tsoyason kʼoa nga tsjoake xínkjín. Nʼio sítaja je kjoamakjainná nga ʼyaa jebi (Mat. 24:14; Juan 13:35).

18. 1) Tojo tso Isaías 46:10, 11, ánni nga tsín tokʼoamasíniná nga tísítjoson je Jeobá jmeni xi tongini kitso tʼatsʼe je chjotankjín. 2) Ánni nga tsín chʼao satíoni kon je xi i̱ Sonʼnde koyale koatio ngantsjai nichxin.

¹⁸ Nʼio tsjoa báya tokoán jme xi tso je én xi tongini kinokjoa. Alikui tokʼoamaná josʼin tísítjoson Jeobá jmeni xi tongini kitso (tʼexkiai Isaías 46:10, 11). * Je chjotankjín nʼio tsjoále kjoanda Niná kʼianga kui kjoachoya tsjoále nga koa̱n koatio ngantsjai nichxin i̱ Sonʼnde. Alikui chʼao satío kon nga tsín je kitjoejin nga ya koatexomakao Jesús ya ngʼajmi. Je Biblia nchja̱ni tʼatsʼe xi xʼin kao xi yánchjín xi nganʼiotsjele Niná tsakándiaale tonga xi tsín ya maxki̱kao je xi 144,000 mani, jolani Juan Bautista kao David (Mat. 11:11; Hech. 2:34). Je chjota jebi kao xi kjaʼaísanile kʼiaa kjoaʼáyale nga jeʼndenaxó koa̱n i̱ Sonʼnde. Kʼoa kui kjoanda sʼe̱le kao je chjotankjín, nga koako nga kixi fitʼale Jeobá kʼoa nga tsjoánganʼio nga toje xi bakinle batéxoma.

19. Tsa majinná josʼin tsoyanile je sén xi tsabe Juan tʼatsʼe chjotankjín, jméni xi machjén nga sʼiaan.

¹⁹ Nichxin xi tiyoaa ndʼaibi, je Jeobá millón mani chjota xi tjío jngo tjíjtsa Sonʼnde tísíkatíoxkó. Ni ya ngʼajmi tjínná kjoachoya kʼoa ni i̱ Sonʼnde, tjínnele kuinyakoaa je chjota jokji tjen kʼoakoa̱nná nga ya katamaxki̱kao je chjotankjín, xi kʼoati “kjaʼaí barré” ʼmile (Juan 10:16). Tochoasa chale nga sikjeson Jeobá je chjotaxá sonʼnde kao je religión xi kjoañʼai tjíosíkjaʼá je chjota. Ngatsʼi je chjotankjín nʼio tse kjoanda sʼe̱le nga toje Jeobá sixále ngantsjai nichxin (Apoc. 7:14).