1. Tojo tso Mateo 11:28-30, jméni xi kitso je Jesús.

KʼIANGA kinchja̱yajinle Jesús je chjotankjín i kitso: “Nroachonnáo [...], nga̱ an xi sikʼéyokjáyano” (tʼexkiai Mateo 11:28-30). * Alikui toxokʼoa kitso je Jesús, ñaki kʼoakisʼin kjoaixi. Tobʼelañá, tsakasenkao jngo ʼndíchjoón xi nʼio tímʼe.

2. Jósʼin tsakasenkao Jesús jngo ʼndíchjoón xi tímʼe.

² Je ʼndíchjoón jebi nʼio koanchjénle nga ʼya xi koasenkao. Jetejao nó nga tímʼe kʼoa jenkjín chjinexki kikonle tonga tsín koanndaya. Je Kjoatéxomale Moisés kʼoatso nga jndí sʼin tsaʼyakon je xi kui chʼin kisʼele joni ʼndíchjoón jebi (Lev. 15:25). Kʼianga kisʼejinle nga síndaya chjota je Jesús kikásjai. Kʼianga kicho jñani tíjna je Jesús kisikao tjon najñole kʼoa koanndaya. Tonga je Jesús alikui tokisindaya ʼndíchjoón jebi, tosaa tsakakóle kjoatjaocha kao kjoaxkóntokon kʼianga “ʼndí naa” kitsole. Nʼiojin nda kisʼe kon ʼndíchjoón jebi (Luc. 8:43-48).

3. Jmé kjoachjonangi xi chótʼayajiaan i̱ kjoaʼmiya jebi.

³ Je ʼndíchjoón jebi kikásjai je Jesús. Machjén nga kʼoati sʼiaan tsanda ñá. Kʼoénelee yaoná nga si̱chriantʼalee je Jesús. Ningalani tsín tikʼoasʼin síndayani ndʼaibi chjota je Jesús, itsoná: “Nroachonnáo [...], nga̱ an xi sikʼéyokjáyano”.  I̱ kjoaʼmiya jebi, aon kjoachjonangi chótʼayajiaan: Jósʼin koa̱n si̱chriantʼalee je Jesús. Jmé xi tsoyanile nga “tjayasonlao yaono yugo xi tsʼan” kitso je Jesús. Jmé xi bakóyaná jokisʼin. Ánni nga tsjoa sʼeni tokoán nga nitjosoán je xá xi tsakánená, kʼoa jósʼin nga tosi tonda tsjoa sʼe̱ tokoán nga chjoé je yugole.

4, 5. Jmé xi koa̱n sʼiaan nga koa̱nchriantʼalee je Jesús.

⁴ Jngo koya josʼin koa̱nchriantʼalee je Jesús kʼiaa nga chótʼayajiaan jokji tjen kʼoakoa̱nná jmeni xi kitso kʼoa jmeni xi kisʼin (Luc. 1:1-4). Kuinga machjénni nga chótʼayajiaan xi tʼatsʼe. Nga jngó jngóñá nga tjínnená kʼoasʼiaan. Kʼoati machriantʼalee je Jesús kʼianga chjotatjenngile maa kʼoa nga mangínsʼenngindá.

⁵ Ijngo koya josʼin nga koa̱nchriantʼalee je Jesús kʼiaa nga si̱jélee nganʼio je xi chjotajchínga sʼin tjío. Je xi chjotajchínga sʼin tjío yaa mangóson joni jngo kjoatjao xi síchjén je Jesús kʼianga síkuinda je chjotale (Juan 21:16; Efes. 4:7, 8, 11; 1 Ped. 5:1-3). Tonga alikui josʼin skoe̱ni jmeni xi makjáojinná kʼoa jmeni xi machjénná, tjínnele ñá kʼoakʼuínlee nga nganʼio machjénná. Itso jngo ndsʼee xi Julian ʼmi: “Alikui tiya Betel tsakatejnaña kʼianga chʼin tsakʼetʼana, tonga jngo miyona xi kʼoakitsona nga koa̱n sijéle nganʼio je xi chjotajchínga sʼin tjío. Nga títjon kʼoasʼin kisikjaʼaitsjen nga tsín machjénna. Tonga xijekoanni, kisijéña nganʼio kʼoa nga kʼoakisʼian nʼio ndasʼin kichomani”. Je xi chjotajchínga sʼin tjío, koaanle koasenkaoná nga jchaa je “kjoafaʼaitsjen xi tsʼe Cristo”, xi tsonile, nga koa̱njinná josʼin síkjaʼaitsjen kʼoa nga koanngíntjenngiaa je choa̱le Jesús (1 Cor. 2:16; 1 Ped. 2:21). Je xi chjotajchínga sʼin tjío yaa mangóson joni jngo kjoatjao xi nʼio chjíle.

6. Jmé xi kinchja̱ni je Jesús kʼianga “tjayasonlao yaono yugo xi tsʼan” kitso.

⁶ Kʼianga “tjayasonlao yaono yugo xi tsʼan” kitso je Jesús, tsakui nichxin kui xi kitsoni nga si̱tjosonlee nga̱ jé xi séjnatítjonná. Tsakuije̱ nga ñatjen chʼaa je yugole kʼoa nga ñatjen si̱xálee je Jeobá. Alikuikjoan ʼyaa jme xi kinchja̱ni, tonga jmeni xi bakóyaná kuinga tjínnele si̱xá.

7. Tojo tso Mateo 28:18-20, jmé xá xi kjinená kʼoa jméni xi ñaki tjínjngo tokoán.

⁷ Kʼianga bʼaitʼalee yaoná je Jeobá kʼoa mangínsʼenngindá kʼiaa chjoe je yugole Jesús. ʼYani xi mele sitjosonle je Jeobá alikui kʼoasjengi je Jesús (Juan 6:37, 38). Ngatsʼi je chjotatjenngile Cristo koaan kʼoasʼin je xá xi tsakánele Jeobá je ʼNdíle. Kʼoa ñaki kʼoatjín tokoán nga je Jesús koasenkaoná nga kuitjosonná xá jebi (tʼexkiai Mateo 28:18-20). *

8, 9. 1) Ánni kisichriantʼanile Jesús je chjota xi nangitokon. 2) Jméni xi koa̱n chjónangilee yaoná.

⁸ Je chjota xi nangitokon kisichriantʼale je Jesús (Mat. 19:13, 14; Luc. 7:37, 38). Ánni, kuinga je chjota fariseo alikui tsakakó kjoamatokon kʼoa ngʼakon koan (Mat. 12:9-14). Je Jesús ndʼé koan kʼoa nangitokon koan. Je chjota fariseo to yaole kini kʼoa ngʼa tsakʼasje yaole, tonga je Jesús  kʼoasʼin kitsoyale je chjotatjenngile nga tsín to yaole katafini, nga nangitokon katama kʼoa nga katabinyakao xi ngikʼa (Mat. 23:2, 6-11). Je chjota fariseo totaon tsabe je chjota (Juan 9:13, 22). Tonga je Jesús kisinʼio kon je chjota nga tsakakóle kjoatjaocha tʼatsʼe jokisʼin kʼoa jotso én xi tsakjákao.

⁹ Jméni xi bakóyaná jokisʼin je Jesús. Koaan chjónangilee yaoná jebi: “A kʼoasʼin ʼyana nga ndʼé kʼoa nga nangitokon ma. A sitjosonña je xá xi sʼenena kʼianga basenkoa je xi ngikʼa. A ndʼé sikoa xi ngikʼa”.

12-14. Ánni nga nda satíoni tokoán kʼianga nitjosoán je xá xi tsakánená je Jesús.

¹² Ánni nga nda sʼeni tokoán kʼianga nitjosoán je xá xi tsakánená je Jesús. Nkjín koya tjínni. Kataʼyala kʼaa.

¹³ Je xi bándiaaná nʼio nda chjota. Ninga je Jeobá xi séjnatítjonná alikui nʼio bʼénená kʼoa chjí be jmeni xi nʼia (Heb. 6:10). Kʼoa basenkaoná kʼianga kuitjosonná je xá xi kjinená (2 Cor. 4:7; Gál. 6:5). Je Jesucristo, xi Rey sʼin tíjnaná, nʼio nda choa̱ bʼéjnaná tʼatsʼe josi̱koaa xi ngikʼa (Juan 13:15). Kʼoa je xi chjotajchínga sʼin tjío bʼénele yaole nga fitjenngi je choa̱le Jesús, je xi nʼio nda bándiaaná (Heb. 13:20; 1 Ped. 5:2). Bʼénele yaole nga sínʼio tokoán, nga bakó kjoandʼé, tsoyaná kʼoa síkuindaná.

¹⁴ Miyoná mani je xi ñatjen nixá. Alikui ʼya xi kʼoasikji tsjoa tjío kon kʼoa xi kʼoasikji kjoatjaocha bakóle xínkjín joni je choʼndale Jeobá. Si̱kjaʼaitsjenjinla jebi, je ndsʼee xi ñatjen nixá nda fikao yaole, tonga alikui kʼoasʼin síkjaʼaitsjen nga ngisa ngʼa tjío tikʼoajinni xi ngikʼa. Nkjín koya jmeni xi male sʼín, tonga nangitokon kʼoa kʼoasʼin síkjaʼaitsjen nga ngisa ngʼa tjío xi ngikʼa. Kʼianga ñatjen nixá, miyo sʼin bekonná. Kʼoa nga nʼio tjaokená tjíondaa nga tsjoá kjoabijnachonle xi totʼatsaan.

15. Jótjínnele sa̱tío tokoán tʼatsʼe xá xi nʼia.

¹⁵ Nʼio chjíle je xá xi nʼia. Kui bakoyalee je chjota jokjoantjínni xi tʼatsʼe Jeobá kʼoa bʼejnatsenñá nga to énndiso jmeni xi tso je Na̱i (Juan 8:44). Je Na̱i nʼio ai tíjna jmeni xi síjéle je chjota. Tobʼelañá, kui xi mele nga kʼoasʼin si̱kjaʼaitsjeen nga je Jeobá tsín síchatʼaná je jéená kʼoa nga tsín bakinná nga tsjoake koa̱nná. Én jebi to énndisoní kʼoa ba bʼé tokoán. Kʼianga nichriantʼalee je Jesús chatʼa je jéená. Kʼoa je Jeobá nʼio tsjoakená (Rom. 8:32, 38, 39). Nʼio tsjoa sʼe tokoán kʼianga ʼmiyalee xi kjaʼaí nga je Jeobá katasínʼiotʼa yaole kʼoa nga ʼyaa josʼin binyakao.

16. Ánni nga tsín mangósonni je xá xi tsaan kao je xá xi tsjoáná je Jesús.

¹⁶ Je xá xi bánená Jesús nga sʼiaan alikui mangóson kao xi kjaʼaí xá. Tobʼelañá, kʼianga totsaan xá nʼia bijtaná kʼoa sakʼoaa likuini tsjoa satío tokoán. Tonga kʼianga je Jeobá kao Jesús nixálee, tsjoa satío tokoán. Kʼianga nixá bʼajnda nichxin nʼio bijtaná kʼoa sakʼoaa tobʼenelee yaoná kʼianga mangían je kjoajtínná. Tonga nga bichoñá ndʼianá tsjoa satío tokoán. Kʼoakjoán tima kʼianga bakoyasoán kʼoa nga chotʼayá je Énle Niná. Kʼianga bʼenelee yaoná nga kʼoanʼia jebi, tsee kjoanichikontʼain bichómani.

17. Jmé xi kuenta sʼiaan, kʼoa jméni xi si̱kuindalee yaoná.

¹⁷ To choaa tjen bichó nganʼioná, kuinga machjénni nga nda chósonnilee josʼin si̱chjén. Tobʼelañá, koa̱njin nga nʼio tse nichxin si̱kʼayalee nga nʼio nkjín tsojmi sʼe̱ná. Si̱kjaʼaitsjenjinla jmeni xi kitsole Jesús jngo ti xi nʼio nyiná koan kʼianga kui kiskonangile jméni xi koa̱n sʼin nga sʼe̱le kjoabijnachon xi tsínkʼia fetʼa. Ti jebi kisitjoson je Kjoatéxomale Moisés, kʼoa ndajin chjota koan nga̱ je Evangelio xi kiski Marcos kʼoatso nga je Jesús koanmake. Kuinga i̱ kitsonile: “Tʼin, tatenai ngayeje xi tjínli [...], kʼoa nroatjennginái”. Ti jebi alikui choa ñʼai koanle jmeni xi kiskoejin, tonga alikui kitso kon nga kisikʼéjna jmeni xi tjínle kʼoa nga je Jesús koaitjenngile “nga̱ nʼio nkjín tsojmi tjínle” (Mar. 10:17-22, TNM). Tsakʼasjengi nga chjotatjenngile Jesús koa̱n kʼoa tosi tonda choʼndale “kjoanyiná” koan (Mat. 6:24). Jókinʼia tsa ñálani xokitsoná je Jesús.

18. Jméni xi machjén nga kjitʼa kʼoasʼiaan, kʼoa ánni.

¹⁸ Machjén nga kjitʼa si̱kjaʼaitsjenjiaan jméni xi ngisa nʼio mandosinná. Tsa kʼoasʼiaan ndasʼin si̱chjén nganʼioná. Jngo ti xi Mark ʼmi itso: “Nkjín nó nga kʼoasʼin kisikjaʼaitsjen nga to kjimanina josʼin tisijchá yaona. Ninga precursor sʼin tisixá, ñaki to tao̱n kisikjaʼaitsjen ngantsjai kʼoa nga ngisa ndasʼin koatejna. Kisikjaʼaitsjenña ánni nga ñʼai kjimanina josʼin tisijchá yaona. Kʼiaani koanjinna nga kui títjon tisikʼéjna jmeni xi toʼan mena kʼoa nga kui titsjoale Jeobá je xi tonjengina”. Je Mark kisikʼantjaiyaa josʼin kisikjaʼaitsjen kʼoa josʼin kikao yaole kʼoa ngisaa tse kisixále je Jeobá. Je Mark itsosa: “Sakʼoaa ba sʼe tokoan. Tonga nga je Jeobá kao Jesús tsjoánganʼiona kui xi basenkaona nga tosi tonda je tisixále”.

19. Ánni nga ndatjínni nga si̱kjaʼaitsjenjiaan tsa tinitjosoán josʼin nga sasénle je Niná.

¹⁹ Jan koya tjínni xi koasenkaoná nga tosi tonda nda sʼe̱ tokoán kʼianga tichjoé je yugole Jesús. Xi títjon, si̱kjaʼaitsjenjiaan tsa tinitjosoán josʼin nga sasénle je Niná. Nga je Jeobá tinixálee machjén nga kʼoakjoansʼin si̱tjosoán jotsoná. Jé Jeobá xi Nainá ma kʼoa ñá choʼnda maa (Luc. 17:10). Tsa to yaoná kjuinñá josʼin nga si̱xálee Niná toñájin sikiʼaonná je yugo xi kjinená. Saʼnda jngo nra̱ja̱ xi nʼio taja, tsa tsín kʼoasʼin koai josʼin tíbándiaale je naile skuiʼaon kʼoa kuijtale. Tonga tsa si̱tjosoán josʼin tíbándiaaná je Jeobá nkjín koya jmeni xi koa̱n sʼiaan kʼoa alikui jme xi kʼoechjoaná nga tosi tonda je Niná si̱xálee. Si̱kjaʼaitsjenjiaan nga tsín ʼya xi kʼoechjoale Jeobá nga sitjoson jmeni xi mele (Rom. 8:31; 1 Juan 4:4).

20. Ánni nga kui chjoéñá je yugole Jesús.

²⁰ Xi majaoni, ánni nga je Jeobá tinixánilee. Kui xi mená nga je Jeobá chʼa̱sjengʼaa.  Kʼianga siglo 1, tjínkʼa chjota xi je Niná kisixále tonga ngʼakon koan kʼoa to yaole kini. Nga kʼoakisʼin alikui tsjoa kisatio kon kʼoa kisikatío je yugole Jesús (Juan 6:25-27, 51, 60, 66; Filip. 3:18, 19). Tonga kʼoati tsakatio kʼa xi ñaki tsjoake koan kjoaixi je Niná kʼoa kao je chjota. Ñaki kao kjoatsjoa tsakʼa je yugole nga tsakatio i̱ Sonʼnde kʼoa kui kjoachoya kisʼele nga ya koatexomakao Jesús ya ngʼajmi. Tsjoa satío tokoán kʼianga nixálee je Jeobá kʼoa nga chʼasjengʼaa.

21. Tojo tso Mateo 6:31-33, jméni xi ñaki kʼoakʼoé tokoán nga sʼin je Jeobá.

²¹ Xi majanni, jmeni xi choyalee nga kʼoakoa̱n. Kʼianga je Jeobá tinixálee tsee kjoa bitjatojiaan. Kʼoa je Jesús kʼoakitso nga chjota koaitjenngikená. Tonga koaan je Jeobá si̱nʼiotʼaa yaoná nga je tsjoáná nganʼio ninga tse kjoa kuitjátojiaan. Kʼianga kaná je kjoa xi bitjatojiaan, ngisaa taja sʼejna je kjoamakjainná (Sant. 1:2-4). Kʼoati machjén nga si̱kjaʼaitsjenjiaan nga je Jeobá tsjoáná jmeni xi machjénná, nga je Jesús tosi tonda koandiaaná kʼoa nga je ndsʼee sinʼio tokoán (tʼexkiai Mateo 6:31-33; * Juan 10:14; 1 Tes. 5:11). Alikui koa̱n nga nʼio si̱kjáojiaan.

22. Jméni xi tsjoa bʼé tokoán.

²² Je ʼndíchjoón xi kisindaya Jesús nda kisʼe kon nga tikuini nichxin. Tonga tokʼiaa tsa tosi tonda kitjenngile Jesús nga tsjoa kisʼe kon ngantsjai. Tsa kʼoakisʼin nʼiojin tse kjoanichikontʼain kisʼele, kui kjoachoya kisʼele nga ya koatexomakao Jesús ya ngʼajmi. Alikui jme xi mangóson kjoanda jebi. Tojñani nga tjínná kjoachoya tsa ya ngʼajmi kʼoa tsa i̱ Sonʼnde tsjoa kjoáyaa tokoán kʼianga tinitjosoán nga i̱ títsoná je Jesús: “Nroachonnáo”.