1. Kʼiáni nga ngisa ñʼai maná nga nixálee je Jeobá.

KʼIÁNI nga ngisa ñʼai maná nga nixálee je Jeobá. A kʼiaa nga nda tiyoaa axo kʼiaa nga kjoa bitjatojiaan. Kʼianga kjoa bitjatojiaan kjitʼanangi je Jeobá nijélee nganʼio. Tonga kʼianga nda tiyoaa tsakui nichxin chajinná jokji kjoandosin tjínle nga Niná nixálee. Je Jeobá kʼoakitsole je chjota israelita nga kʼoama sakʼoa (Deut. 6:10-12).

2. Jmé choa̱ xi tsakʼéjnaná je rey Asá.

² Je rey Asá nʼio nda choa̱ tsakʼéjnaná, nga̱ jé Jeobá kisinʼiotʼa yaole ngantsjai. Jé Niná kisixále kʼianga kjoa jaʼatojin kʼoa kʼianga nda tsakʼejna. Saʼnda nga sʼa xti “je Asá ñaki tjínjngo ni̱ma̱le nga kisixále je Jeobá jokji tse tsakʼejna” (1 Rey. 15:14). Tsakjaʼáxin je niná ndiso xi kisʼe ya naxinandá Judá. Je Biblia kʼoatso nga “tsakjaʼáxin sonxta jña sʼetsʼoale je niná xi xin naxinandále kʼoa kao ʼnde jñani sonngʼa chon, kisixkoaa je xjáo xi sʼetsʼoale kʼoa tsakjaʼáxin je poste xi sʼetsʼoale” (2 Crón. 14:3, 5). Kʼoa tsakjaʼáxinle je xá xi kisʼele Maacá, xi majchále koanni, xi jngo xkóson kisinda nga kui katabʼétsʼoale je naxinandá (1 Rey. 15:11-13).

3. Jmé xi jchaa i̱ kjoaʼmiya jebi.

³ Je Asá ali tsa tokuijin xi kisʼin nga tsakjaʼáxin je xkóson xi kisʼe ya naxinandá Judá, kʼoati tsakasenkao je naxinandá nga je Jeobá tsakʼétsʼoa ijngokʼanile. Je Niná kisichikontʼain je Asá kao naxinandá Judá kʼianga kʼoakisʼin kʼoa nda tsakatio. Jokjitse nga tsakatéxoma, te nó nga nda tsakatio (2 Crón. 14:1, 4, 6). I̱ kjoaʼmiya jebi kui jchaa  jme xi kisʼin je Asá jokjitse nga nda tsakatio, kʼoati jchaa je choa̱le chjotale Cristo xi tsakatio nga siglo 1, nga kʼoati kisʼin jokisʼin Asá nga nda kisixále Niná nichxin nga nda tsakatio. Kʼoati jchaa jméni xi sʼiaan nga ngisa nda si̱xálee Niná kʼiatsa tjoʼndená ya jñani tsaan.

4. Tojo tso 2 Crónicas 14:2, 6, 7, jméni xi kisʼin je Asá nichxin nga nyʼán tsakatio.

⁴ (Tʼexkiai 2 Crónicas 14:2, 6, 7). * Je Asá kʼoakitsole naxinandá nga je Jeobá xokisʼin nga nyʼán sʼin tsakatio. Ningalani lijme kjoa kisʼe alikui tojyó tsakatio, tosaa kisindachon naxinandá, tsakʼényʼoándai jngotjondaile, tsakʼénda xjáo xi ngʼa kjoan kao xo̱ntjoa. I kitsole je chjota xi tjío ya Judá: “Sʼasa ñá kjinentsjaa je naxinandá”. Kui xokitsole nga koan tsakʼénda je xjáo kʼoa alikui ʼya xi jokisikao nga tsakʼetsoma nga̱ tsín ʼya chjotakontrale kichonrʼoe. Kuinga kʼoakitsonile naxinandá nga nʼio katasíxá nga ndatjío.

5. Ánni nga kisinkjínyani chjotakjoajchánle je rey Asá.

⁵ Je Asá kʼoati kisinkjínya chjotakjoajchánle nichxin nga nda tsakatio (2 Crón. 14:8). Je Asá jé Jeobá kisinʼiotʼa yaole ngantsjai. Nga rey koan koanjinle nga je kjinele sikuinda naxinandá tsa totsejinni kjoa kjoaʼaíne. Kʼoati koanjinle nga tsín tongantsjai nga nyʼán sʼin koatio ya naxinandá Judá.

6. Jméni xi kisʼin je chjotale Cristo kʼianga siglo 1 nichxin nga nda tsakatio.

⁶ Ningalani nkjín kʼa nga chjota kitjenngike chjotale Cristo kʼianga siglo 1, kʼoati kisʼe nichxin nga ndasʼin tsakatio. Nga kui nichxin, je xi xʼin kao xi yánchjín, kitsoyason je Énle Niná. Ya Hechos kʼoatso nga je chjotale Cristo kitsokjonke Jeobá, kʼoa koannkjínya nga tosi tonda kitsoyason. Je Jeobá kisichikontʼain kʼianga kʼoasʼin kitsoyason nichxin nga nda tsakatio (Hech. 9:26-31).

7, 8. Jókisʼin je Pablo kao chjotale Cristo kʼianga kitjoʼndele nga kitsoya je Énle Niná.

⁷ Je chjotatjenngile Cristo xi tsakatio nga siglo 1 kitsoyason ngantsjai. Tobʼelañá, yaa Éfeso tsakʼejna je pastro Pablo kʼianga tsabe nga nʼio nkjín chjota xi koa̱n kuitsoyale Énle Niná ya naxinandá jebi (1 Cor. 16:8, 9).

⁸ Je Pablo kao chjotale Cristo kʼoati kitjoʼndele nga kitsoya nga nó 49, nga kisʼendajin tʼatsʼe kjoacircuncisión (Hech. 15:23-29). Kʼianga kisʼejinkon je chjotale Cristo jmeni xi kisʼendajin, ngisaa tinda kitsoyasonngáni je Énle Niná (Hech. 15:30-35). Jósʼin kichomani nga kʼoakisʼin. Je Biblia itso: “Je naxinandále Cristo ngakijnda kininʼiojin nga makjainle. Ñaki nga nyaonnyaon koannkjínya chjota” (Hech. 16:4, 5).

9. Jméni xi títjoʼndená nga sʼiaan ndʼaibi kʼoa jméni xi koa̱n si̱kjaʼaitsjenjiaan.

⁹ Nichxin xi tiyoaa ndʼaibi, nkjín ʼnde jñani tjoʼndená nga ʼmiyaa Énle Niná. Tsa tjoʼndená nga ʼmiyaa Énle Niná ya jñani tsaan, si̱kjaʼaitsjenjiaan tsa nda tinixálee Niná kʼianga tiʼndená. Nichxin fetʼa xi tiyoaa ndʼaibi, je naxinandále Niná nʼio títsjoále kjoandosin nga títsoya je Énle Niná, kʼoa ngisaa nʼio tíʼmiyason ndʼaibi tikʼoajinni nichxin kjoatse (Mar. 13:10). Nʼio tsjoa tjío tokoán, nga̱ ngisaa nkjín koya josʼin koa̱n si̱xálee je Jeobá.

10. Jméni xi sʼiaan tojo tso 2 Timoteo 4:2.

¹⁰ Tsa tiʼndená nga ʼmiyasoán, jméni xi koa̱n sʼiaan (tʼexkiai 2 Timoteo 4:2). * Si̱kjaʼaitsjenjiaan josʼin tiyoaa. Koaan ngisasa tse si̱xálee Jeobá nga precursor koaan, kʼoa tsa jngoje̱ xíngiaa xi kui koa̱n. Alikui koa̱n tsa to tao̱n nʼio kjoásjee kʼoa tsa nkjín tsojmi sʼe̱ná, nga̱ toya jchajin jebi nga kjoaʼaí kjoañʼai xi nʼio tse (Prov. 11:4; Mat. 6:31-33; 1 Juan 2:15-17).

11. Jmé xi tjíosʼín kʼa je ndsʼee kao tichjaa nga ngisasa nkjín chjota tjíotsoyale Énle Niná.

¹¹ Nʼio nkjín ndsʼee kao tichjaa xi kjaʼaí én tjíokotʼaya nga tjíotsoyason je Énle Niná. Je naxinandále Niná sa nkjín sa nkjín én tísíkʼatoya je xo̱n xi Énle Niná yʼangini, kʼoa nʼio tjíobinyakao je ndsʼee nga tsoyason. Tobʼelañá, kʼianga nó 2010 je xo̱n xi Énle Niná yʼangini jela tsʼato 500 én jaʼatoya. Tonga nichxin xi tiyoaa ndʼaibi, jetsʼato 1,000 én tífaʼatoya.

12. Jósatío kon chjota kʼianga kao énle nrʼoéni je Énle Niná. Jngola choa̱ tʼejnai.

¹² Jósatío kon je chjota kʼianga kao kui énle nrʼoéni je Énle Niná. Si̱kjaʼaitsjenla jokoan jngo tichjaa xi én kiniaruanda nchja̱. Én jebi yaa nokjoa ya Ruanda, República Democrática del Congo kao Uganda. Kʼianga ki je tichjaa nga kisʼejna  kjoajtíntse nga kui én ya Memphis (Tennessee, Estados Unidos), i kitso nga jejetʼa kjoajtíntse: “Jexjaʼaonjao nó nga i̱ Estados Unidos tijna kʼoa tosʼaa kamajin títjonna ngayeje xi kafaʼa kjoajtíntse”. Kui kʼoakitsoni nga̱ kichokajin ni̱ma̱le jmeni xi kinrʼoé kʼianga kui én xi nchja̱ kisʼejna je kjoajtíntse. Kʼiatsa kʼoakoa̱nná koaan nga kjaʼaí én chótʼayá nga kʼuínyasonlee chjota xi tjín ya jñani ʼmiyasoán. Tjínkʼa chjota xi ngisa nda nrʼoé kʼianga kao énle ʼmiyanilee. Tsa kʼoasʼiaan, ndasʼin kuichomani.

13. Jókisʼin je ndsʼee xi Rusia tsʼe kʼianga kitjoʼndele nga kitsoyason.

¹³ Likui tongatsʼi ndsʼee nga tiʼndele tsoyason, nga̱ tjín ʼnde jñani bʼéchjoa je chjotaxá nga ʼmiyason je Énle Niná. Jolani je ndsʼee xi tjío ya Rusia. Nkjín nó kʼianga chjota kitjenngike, kʼoa kʼianga sá marzo nó 1991 kʼiaa kitjoʼnde ijngokʼale nga koan kitsoyason. Xjaʼaonjngola jmi mani je ndsʼee xi tsoyason nga kʼia, kʼoa nga jekan nó jaʼato jela 160,000 mani. Kui jebi xi bakóná nga tsín jyó tsakatio je ndsʼee kʼianga kitjoʼndele. Ningalani tsín tse nga kitjoʼndele, tosi tonda tjíosíxále Jeobá kʼoa tjíobʼénele yaole jokji tjen kʼoakjimale nga tjíotsoyason.

14, 15. Jósʼin kisichjén nganʼiole Jeobá nga tsakasenkao je Asá.

¹⁴ Si̱kjaʼaitsjenla ijngokʼá jokoan nichxin nga tsakʼejna je Asá. Chaan kicho nichxin nga likui tinda tsakationi je naxinandá Judá, nga̱ jngo millón chjotakjoajchán etíope kichokʼetʼale. Je Zérah, xi tsakasentítjonle chjotakjoajchán jebi ñaki kʼoatsakʼé kon nga sikinjele naxinandá Judá. Tonga je Asá jé Jeobá  kisinʼiotʼa yaole, kuinga i̱ kitsonile: “Tisenkaonáijin, ji Jeobá Ninánajin, nga̱ ji tininʼiotʼalaijin, kʼoa kao jaʼaínli jaʼainrʼoenijin chjotankjín jebi” (2 Crón. 14:11).

¹⁵ Ningalani me jaoya kʼoakji mani je chjotakjoajchánle chjota etíope tikʼoajinni chjotakjoajchánle naxinandá Judá, je Asá be nga je Jeobá ngisaa tse nganʼio tjínle nga koasenkao je naxinandále. Kʼoa je Jeobá tsakasenkao kjoaixi je naxinandá Judá. Kisikjeson je chjotakjoajchán etíope (2 Crón. 14:8-13).

16. Jósʼin ʼyañá nga tsín tongantsjai nga nda kuiyoaa.

¹⁶ Ningalani tsín ʼyaa jmeni xi koa̱nná nga jngó jngoá, ʼyañá nga tsín tongantsjai nga nda kuiyoaa. Si̱kjaʼaitsjeen nga kʼoakitso je Jesús nga koanjtikená chjota kʼianga jetífetʼa nichxin (Mat. 24:9). Je pastro Pablo kʼoati me tso én kisichjén, kitso: “Ngatsʼi xi mele nga tsje koatiokontʼale Cristo Jesús, kʼoatisʼin kjoaʼa kjoañʼai” (2 Tim. 3:12). Xi ijngosani, je Na̱i nʼio jtile, kʼoa tsín koa̱n kʼoasʼin si̱kjaʼaitsjeen nga tsín josikaoná (Apoc. 12:12).

17. Jósʼin chótʼayakao je kjoamakjainná.

¹⁷ Alikui titse chanile kʼianga chótʼayakao je kjoamakjainná ngatsʼiaa. Jeme kjoaʼaí je kjoañʼai xi nʼio tse. Je Biblia itso: “Nga̱ jngo kjoañʼai xi nʼio tse sʼe̱. Xi kjesa kʼoamajin saʼnda nga kisʼenda sonʼnde saʼnda ndʼaibi” (Mat. 24:21, TNM). Kʼianga kʼoakoa̱n, tochale koanjtikená je xíngiaa kʼoa sʼe̱chjoale je xále Niná (Mat. 10:35, 36). Nga kui nichxin, a kʼoati sʼiaan jokisʼin je Asá nga kʼoakʼoé tokoán nga je Jeobá koasenkaoná kʼoa nga je sikuindaná.

18. Tojo tso Hebreos 10:38, 39, jméni xi koasenkaoná nga kuiyondalee jmeni xi sʼa kʼoakoa̱n.

¹⁸ Je Jeobá kui xi mele nga tongini kuiyondalee jmeni xi koa̱n, kuinga títsoyaniná ndʼaibi jmeni xi nʼio sikatío je kjoamakjainná. Jé “choʼnda xi nʼiotʼakon, xi nda be xá” tísíchjén nga títsoyaná jmeni xi koasenkaoná nga nʼio sʼe̱jna je kjoamakjainná (Mat. 24:45). Xi tjínnele sʼian, kuinga sa nʼio sa nʼio katasʼejna je kjoamakjainná  xi kao Jeobá (tʼexkiai Hebreos 10:38, 39). *

19, 20. Tojo tso 1 Crónicas 28:9, jméni xi tjínnele si̱kjaʼaitsjenjiaan, kʼoa ánni.

¹⁹ Tojo kisʼin je rey Asá, tjínnele kjoásjee je Jeobá (2 Crón. 14:4; 15:1, 2). Kʼiaa tjen tsakjasjeñá Niná nga tsaʼyaxkoaan kʼoa nga tsangínsʼenngindá. Tonga machjén nga sa tsjoacha sa tsjoacha koaan je Jeobá. Nga jchaa tsa kʼoatinʼia, machjén nga si̱kjaʼaitsjenjiaan tsa mangián ngayeje kjoajtín xi satíoná. Nga mangián je kjoajtín basenkaoná nga tosi tonda nixálee je Jeobá kʼoa tsjoa satío tokoán nga tsaojiaan je ndsʼee (Mat. 11:28). Kʼoati koa̱n si̱kjaʼaitsjenjiaan tsa chotʼayá Biblia nga toñá. Tsa ya tiyokoaa xijcháná, a chotʼayajtínñá Énle Niná nga xki̱ xomana. Tsa toñá tiyoaa, a nikʼayañá nichxin nga chotʼayá. A bʼenelee yaoná nga ʼmiyalee Énle Niná xi kjaʼaí.

²⁰ Ánni machjénsíni nga kui si̱kjaʼaitsjenjiaan jebi. Ya Biblia kʼoatso nga kotʼa Jeobá jotjín je kjoafaʼaitsjenná kʼoa jotjín je ni̱ma̱ná, kuinga machjénsíni nga kʼoati sʼiaan tsanda ñá (tʼexkiai 1 Crónicas 28:9). * Tsa machjén nga si̱kʼantjaiyaa jmeni xi jetjínndajinná kʼoa tsakuije̱ josʼin nikjaʼaitsjeen, si̱jélee je Jeobá nga katabasenkaoná. Ndʼaibi nga machjén kʼianga tongini kuiyondalee jmeni xi jeme koa̱n. Kuinga nda si̱xánilee Niná ndʼaibi kʼiatsa nda tiyoaa.