1, 2. Tojo tso 1 Timoteo 6:20, jméni xi tsakʼinle je Timoteo nga sʼin.

KʼIATSA nʼio chjíle jmeni xi tjínná, sakʼoaa kjaʼaí chjota banelee nga katasíkuinda. Tobʼelañá, kʼiatsa tao̱n tíjnaná, yaa banco mangínnikʼéjnaa nga̱ tsín mená nga si̱chaa kʼoa tsa koa̱nchénáje̱. ʼYañá josʼin tíjna nga kjaʼaí xi fanelee jmeni xi nʼio chjíle.

² (Tʼexkiai 1 Timoteo 6:20). * Je pastro Pablo kʼoakitsole je Timoteo nga nʼio chjíle jmeni xi tsakʼaile. Jméni. Kui tʼatsʼe jmeni xi tjínndajinle Niná xi kao chjota. Je Jeobá kʼoati kui xá tsakánele je Timoteo nga nda kuitsoyason je Énle kʼoa nga nda sitjoson je xá xi tsakánele (2 Tim. 4:2, 5). Je Pablo kʼoakitsole je Timoteo nga nda katasíkuinda jmeni xi kisʼenele. Kʼoati nʼio chjíle jmeni xi tíbánená je Jeobá. Jméni kʼoa ánni nga nʼio nda si̱kuindasíñá.

3, 4. Tikʼaxki̱ kʼai ánni kʼoabixónsíñá nga nʼio chjíle jmeni xi tso Biblia.

³ Kui kjoanda títsjoáná je Jeobá nga kjimajinná jmeni xi tso Biblia. Nʼio chjíle jebi nga̱ tsoyaná jme xi sʼiaan nga miyole Jeobá koaan kʼoa nga tsjoa sa̱tío kjoaixi tokoán. Kʼianga makjainná jmeni xi tso Énle Niná kʼoa nitjosoán, alikui timakjainniná jmeni xi tsínni kʼoatjín kʼoa tsje mangínkoaa yaoná (1 Cor. 6:9-11).

⁴ Jmeni xi faʼaitʼa je Énle Niná kʼoati nʼio chjíle nga̱ je Jeobá tojé tsoyale chjota xi mele sitjosonle kʼoa xi nangitokon ma (Hech. 13:48). Je chjota xi nangitokon makjainle nga “je choʼnda xi nʼiotʼakon, xi nda be xá” tsoyaná ndʼaibi,  jokjoantjínni xi tʼatsʼe Niná (Mat. 11:25; 24:45). Alikʼiajin koa̱njinná jmeni xi tso Biblia tsa toñá. Kʼianga majinná ngisaa nʼio chjíle tikʼoajinni tojmeni (Prov. 3:13, 15).

5. Jmésa kjoanda títsjoáná je Jeobá.

⁵ Je Jeobá kʼoati kui kjoanda títsjoáná nga ʼmiyalee chjota jokjoantjínni xi tʼatsʼe kʼoa jmeni xi tjínndajinle (Mat. 24:14). Nʼio chjíle je Énle Niná nga̱ binyakao je chjota nga kʼoati ya familiale Jeobá koatiojinle, kʼoa kui kjoachoya sʼele nga koa̱n koatio ngantsjai nichxin (1 Tim. 4:16). Ni choa kʼoa ni tse tiʼmiyasoán nʼio chjíle je xá xi tinʼia ndʼaibi (1 Tim. 2:3, 4). Nʼio tse kjoanda tjínná nga je Niná nixákoaa (1 Cor. 3:9).

6. Jókoan je chjotale Cristo xi tsín tichjí tsabeni je Énle Niná.

⁶ Nichxin nga tsakʼejna je Timoteo, tjínkʼa chjotale Cristo xi tsín tsabechjí je kjoanda xi tsakʼaile nga koan kisixákao Niná. Tobʼelañá, je Demas kui koantsjoake jmeni xi tjín sonʼnde kʼoa alikui titsabechjíni nga ñatjen kitsoyason kao Pablo (2 Tim. 4:10). Je Figelo kao Hermógenes alikui tikitsoyasonni, tsakui nichxin kui kitsokjonle nga kʼoati chjota koaitjenngike joni Pablo (2 Tim. 1:15). Je Himeneo, Alejandro kao Fileto yátsʼin tsakinyále Niná (1 Tim. 1:19, 20; 2 Tim. 2:16-18). Tojosʼin tiʼyaa, je chjota jebi nda tsakatio tsakai ngixko̱n Niná, tonga chaan likui tichjí tsabeni je Énle Niná.

7. Jósʼín je Na̱i kʼianga bʼanachaná.

⁷ Jméni xi tísʼín je Na̱i nga mele kuinjíotokoán je kjoanda xi títsjoáná Jeobá. Kataʼyala kʼaa. Kui síchjén je kjoasʼetsaojin, jmeni xi faʼa ya radio kao televisión xi kui kaníbason je kjoafaʼaitsjen xi tsín kixi tíjna, xi tobijbi kʼoanachaná nga si̱kʼéjnaa je Énle Niná. Kʼoati kui xi mele nga kuijkónlee jotso je chjota kʼoa tsín tikʼuínyasonñá tsa chjota koaitjenngikená. Kao kui bʼanachaniná jmeni xi tsoya je chjota xi yátsʼi̱n binyále Niná, kʼoa kui xi mele nga si̱kjinlee je Niná (1 Tim. 6:20, 21).

8. Jméni xi bakóyaná jokoan je Daniel.

⁸ Tsa tsín si̱kuindaa yaoná tobijbijin si̱kjinlee je Niná. Kataʼyala jokoan je Daniel, * xi nʼio videojuego kitsjentʼale. Itso: “Kʼiaa nga tosʼa 10 nóna kisiskákoa je videojuego, nga títjon alikui chʼaotjín xi kisiskákoa koanna. Tonga chaan kui kisiskákoa xi kjoatsʼen tjenkao kao xi tʼatsʼe Na̱i nroani”. Je Daniel chaan  saʼnda 15 hora kisiskákao ʼndeʼnde videojuego nga nyaon nyaon. Itsosa: “Koanjinna nga nʼio tse nichxin kisikʼayale kjoaniská jebi, kʼoa kui xokisikaona nga tobijbi kisikjinnile Jeobá. Kʼoa chaan kʼoasʼin kisikjaʼaitsjen nga tsín machjén nga kui kjoafaʼaitsjen xi faʼaitʼa Biblia kjuítjenngia”. Kʼiatsa nʼio tsjéntʼalee je kjoaniská kui xosikaoná nga si̱kjinlee je Jeobá. Tsa kʼoakoaan, si̱chajián jmeni xi ngisa nʼio chjíle xi títsjoáná je Jeobá.

9. Tojo tso 1 Timoteo 1:18, 19, jmé xi kisingósonkao Pablo je Timoteo.

⁹ (Tʼexkiai 1 Timoteo 1:18, 19). * Je Pablo jngoo sondado kisingósonkao je Timoteo kʼoa kʼoakitsole nga tosi tonda katakján. Tonga ali tsakuijin xi kitsonile nga kao chjota skaan. Jósʼin mangósoán xi chjotale Cristo maa joni jngo sondado kʼianga fi kjoajchán. Jótjínnele koa̱nkjoaan xi chjotale Cristo maa. Nga kʼoakitso je Pablo, aon koya tjínni xi bakóyaná nga nda si̱kuindaa je Énle Niná. Kataʼyala jñanile.

10. Jósʼin tíjna nga ʼyaxkoán Niná, kʼoa ánni machjénsíni nga kʼoasʼiaan.

¹⁰ Jchaxkoán Niná. Jngo xi nda sítjoson xále nga sondado ma, kixi fitʼale je xi bándiaale. Sítoánntjai je xi tsjoake kʼoa xi chjí bekon. Je Pablo kʼoakitsole je Timoteo nga katabexkón je Niná, xi tsonile, nga tsjoake katama kʼoa nga kixi katafitʼale (1 Tim. 4:7). Kʼianga nʼio tsjoacha koaan je Niná kʼoa nga kixi kjuintʼalee alikuikʼia si̱kʼéjnaa je Énle (1 Tim. 4:8-10; 6:6).

11. Ánni machjénni nga kʼoénelee yaoná.

¹¹ Kʼoénelee yaoná nga kui kʼoasʼiaan xi kixi tíjna. Jngo xi sondado ma bʼénele yaole nga sítjoson je xá xi sʼenele. Je Timoteo nda kisitjoson je xá xi kisʼenele nga sondadole Cristo koan, nga̱ kisitjoson je kjoafaʼaitsjen xi kitsjoale Pablo nga tsínkui xi chʼaotjín kʼoakatasʼín, nga kui xi ndatjín katabakó kʼoa nga je katasímiyo chjotale Cristo (2 Tim. 2:22). Tonga tjínnele nʼio tsakʼénele yaole nga kʼoakisʼin. Kʼoati tjínnele kʼoénelee yaoná tsanda ñá nga tsínkui katasíkinjená kʼianga kui xi chʼaotjín nimetokoán (Rom. 7:21-25). Kʼoati machjén nga kʼoénelee yaoná tsa mená nga tosi tonda si̱ndayaa yaoná kʼoa nga kui xi ndatjín kʼoasʼiaan (Efes. 4:22, 24). Ninga jenʼio kijtaná nga kanixá, tsakui nichxin machjén nga kʼoénelee yaoná nga kjuian je kjoajtín (Heb. 10:24, 25).

12. Jméni xi koasenkaoná nga nda kʼuínyaa je Biblia.

¹² Tsa jngo sondado xi mele nda sichjén je ki̱cha̱ kjoajchán, tjínnele kjitʼa skótʼaya josʼin machjén. Tikʼoasʼinni tsanda ñá xi chjotale Cristo maa, tjínnele nga nda koa̱nná si̱chjén je Énle Niná (2 Tim. 2:15). Kʼianga satíoná kjoajtín yaa sakóyaná josʼin si̱chjén. Tonga tsa mená nga koa̱njinle chjota jokji chjíle je Énle Niná, tjínnele nga nʼio nda chótʼaya nga toñá je Biblia. Kui je Énle Niná koasenkaoná nga nʼio sʼe̱jna je kjoamakjainná. Tonga ali tsa tokuijin xi machjén nga kʼoéxkiaa. Tjínnele si̱kjaʼaitsjenjiaan jmeni xi kʼoéxkiaa kʼoa kuiyotsʼinyaa jmeni xi tso je xo̱n xi Énle Niná yʼangini, ánni nga nda koa̱njinniná kʼoa koa̱nná kʼuínyalee  xi kjaʼaí (1 Tim. 4:13-15). Tsa kʼoasʼiaan, koa̱nná kʼuínyalee Biblia xi kjaʼaí. Ali tokuijin xi machjén nga textole Biblia kʼoéxkialee je chjota, kui xi mená nga katamajinle kʼoa nga koasenkao. Tsa kjitʼa chótʼaya je Biblia ngisaa koa̱nná nda koakoyaa (2 Tim. 3:16, 17).

13. Tojo tso Hebreos 5:14, ánni machjénni nga si̱nkjínlee je tokoán.

¹³ Si̱nkjínlee tokoán. Jngo sondado tongini síkjaʼaitsjen jmeni xi xkón sikʼéjna kʼoa alikui kui kʼoasʼín. Ñá kʼoati tjínnele jchaa jmeni xi sikiʼaonná ánni nga tsínkui kʼoasʼiansíñá (Prov. 22:3; tʼexkiai Hebreos 5:14 *). Tobʼelañá, tjínnele nga nda chjoéjiaan jmeni xi kʼoétsaojinkoaa, me ngayeje xi faʼa ya televisión nga kjoajndí tjenkao. Ñá xi chjotale Cristo maa, alikui kui chotsenlee xi kjoajndí tjenkao, nga̱ kui xosikaoná nga tsín titsjoacha koa̱nñá je Jeobá. ʼYañá nga jtike Niná je kjoachajngi, kʼoa je chjota xi kui kʼoasʼín tiyaole síkiʼaonni kʼoa síkiʼaon xi kjaʼaí (Efes. 5:5, 6).

14. Jósʼin tsakasenkao je Daniel nga kisinkjínle kon.

¹⁴ Je Daniel, xi jenása kanikʼaxkiaa ya párrafo 8, chaan tsabe nga tsín ndatjín nga kui kisiskákao je xi kjoatsʼen tjenkao kʼoa xi tʼatsʼe Na̱i nroani, yaa tsakásjaiya ya Watchtower Library jmeni xi kisʼin nga koan kisikʼéjna. Jósʼin kichomani nga kʼoakisʼin. Alikui tikui videojuego xi chʼaotjín kisiskákaoni, alikuiti videojuego kisiskákaoni ya Internet kʼoa alikui tije kisimiyoni xi ñatjen kisiská tsakai. Itso: “ʼNdele nga videojuego kisiskákoa, tosaa kjaʼaísʼin tsakʼetsaojian kʼoa jé kisimiyoa je ndsʼee xi tjío ya jinjtín”. Ndʼaibi, je Daniel precursor sʼin tísíxá kʼoa chjotajchínga sʼin tíjna.

15. Ánni nga nʼio xkón tíjnasíni je énndiso xi kaníbason je xi yátsʼi̱n binyále Niná.

¹⁵ Joni Timoteo, kʼoati machjén nga katamajinná nga nʼio xkón tíjna je kjoafaʼaitsjen xi kaníbason je xi yátsʼi̱n binyále Niná (1 Tim. 4:1, 7; 2 Tim. 2:16). Tsakui nichxin énndiso ska̱nibason xi tʼatsʼe ndsʼee kʼoa tsa to jao kʼoe tokoán tʼatsʼe naxinandále Jeobá. Tsakui kuenta sʼiaan, kui xosikaoná nga tsín tikoa̱nkjainniná xi tʼatsʼe Niná. Alikui kʼoaiʼndee nga  katabʼanachaná, nga̱ je Biblia kʼoatso kʼianga ya “nroani xi chʼaosʼin fáoti chjota xi jechitsonya kjoafaʼaitsjenle, xi tsínle kjoakixijin”, kʼoa tokui xi mele nga kui kuixkanyañá josʼin makjainná ñá kʼoa josʼin makjainle je (1 Tim. 6:4, 5). Kui xi mele nga koa̱nkjainná jmeni xi tso kʼoa nga tsín tikoa̱nkjainniná jmeni xi tso je ndsʼee.

16. Jméni xosikaoná nga tsín tikʼoainilee kjoandosin je xále Niná.

¹⁶ Kui ngisa kʼoailee kjoandosin je xále Niná. Nga sondadole Jesús koan je Timoteo, tjínnele nga kui ngisa kuenta kisʼin je xále Niná kʼoa nga tsínla kui tsojmi xi tjín sonʼnde tsakásjai (2 Tim. 2:3, 4). Kʼoati tjínnele sʼiaan tsanda ñá, alikui koa̱n nga kui nʼio si̱metokoán je tsojmi xi tjín sonʼnde, nga̱ je “kjoachʼanacha xi tsʼe kjoanyiná” kuijin xosikaoná nga tsín titsjoacha koa̱nñá je Jeobá, alikuijin tichjí jchatokonñá je Énle kʼoa alikuijin tikʼuínyanilee je chjota (Mat. 13:22). Tjínnele nga tokoa̱nniná josʼin tiyoaa, kʼoa kʼoasʼin si̱chjén nichxinná kao nganʼioná nga kui títjon Chjotaxále Niná si̱kʼéjnaa (Mat. 6:22-25, 33).

17, 18. Jméni xi sʼiaan nga tosi tonda nda kuiyoaa ngixko̱n Jeobá.

¹⁷ Tongini si̱kjaʼaitsjeen jmeni xi sʼiaan. Jngo sondado tongini síkjaʼaitsjen jmeni xi sʼin tsa jmelani xi kuichone. Tsa mená si̱kuindaa je xi nʼio chjíle xi títsjoáná Jeobá, tjínnele kjitʼanangi chja̱ʼaxinlee yaoná jmeni xi xkón sikʼéjnaná. Jmé xi koasenkaoná. Tjínnele tongini si̱kjaʼaitsjeen jmeni xi sʼiaan tsakui kjoa kjoaʼaíne xi xkón sʼin sikʼéjnaná ngixko̱n Niná.

¹⁸ Jngola choa̱ si̱kʼéjnaa: Kʼianga yá bʼétsʼinle je chjota, títjonkjoanla kosonnile jósʼin tóka kʼianga jeska̱ je yá. Kʼoatisʼinni tsanda ñá, machjén nga tongini si̱kjaʼaitsjeen jósʼiaan tsa ya Internet tichotʼaa, tsa televisión kʼoa tsa jngo película tichotsenlee, tsakui én tífaʼa xi kaníbason je chjota xi yátsʼi̱n binyále Niná kʼoa tsakui jchaa je xi kjoajndí tjenkao. Tsa tongini kuiyondaa, ngotjo jchañá jmeni xi sʼiaan ánni nga tosi tonda miyoná koa̱nsíni je Jeobá kʼoa tsje kuiyoaa ngixko̱n (Sal. 101:3; 1 Tim. 4:12).

19. Jmé kjoanichikontʼain xi sʼe̱ná tsa si̱kuindaa je tsojmichjí xi títsjoáná je Jeobá.

¹⁹ Ñá xi chjotale Cristo maa, tjínnele si̱kuindaa je tsojmichjí xi títsjoáná je Jeobá, xi tsonile, jmeni xi tsoya je Biblia kʼoa nga kui kjoanda tjínná nga ʼmiyalee xi kjaʼaí. Tsa kʼoasʼiaan, nda sʼe̱ tokoán, tsjoa sʼe̱ná kʼoa tsjoa sa̱tío tokoán nga kuinyakoaa xi kjaʼaí nga katabexkon je Jeobá. Jé Jeobá koasenkaoná nga koa̱nkuindaná jmeni xi nʼio chjíle títsjoáná (1 Tim. 6:12, 19).