Jmé xi tínchja̱ni ya Eclesiastés 5:8 kʼianga i̱ tso: “Ali tomaxkónjinli tsa ʼyai nga totaon ʼya je xi ma̱ tíjna ya naxinandáli kʼoa tsa faʼatone kjoatéxoma je chjotaxá. Nga̱ tíjna jngo xi tíkotsenle xi ngisa ngʼa xá tjínle tikʼoajinni je, kʼoa tjíosa xi ngisa tingʼangáni xá xi tjínle tikʼoajinni chjotaxá jebi”.

Kʼoajin kuixoán nga je chjotaxá sonʼnde nchja̱ni. Tonga tsa si̱kjaʼaitsjenjinsaa jmeni xi tso texto jebi, kui tsoyaná jokjoan je Jeobá, nda bʼé tokoán kʼoa tsjoánganʼioná.

Ya Eclesiastés 5:8, kui nchja̱ni tʼatsʼe jngo chjotaxá xi totaon be xi ma̱ tjío. Je chjotaxá jebi tjínnele kuenta sʼin nga tíjnasa ijngo chjotaxá xi ngisa ngʼa xá tjínle tikʼoajinni je. Kʼoa tjíosa xi ngisa tingʼa xá tjínngánile. Tonga ngatsʼi je chjotaxá sonʼnde faʼatone jotso je kjoatéxoma kʼoa totaon be je xi toxkia chjota.

Ningalani tsín kixi jmeni xi sʼín je chjotaxá, tsjoánganʼioná nga kuenta tísʼín je Jeobá ninga nʼio ngʼa xá tjínle je chjotaxá. Koaan je Niná si̱jélee nganʼio kʼianga kjoa bitjatojiaan (Sal. 55:22; Filip. 4:6, 7). ʼYañá nga “je xko̱n Jeobá tíkotseen jngo tjíjtsa sonʼnde nga tsjoánganʼiole je xi tjíojngo ni̱ma̱le nga tjíosíxále” (2 Crón. 16:9).

Jmeni xi tso Eclesiastés 5:8, kui tsoyaná nga i̱ Sonʼnde tsín tojngo mani chjotaxá xi batéxoma, tjíosa xi ngisasa ngʼa xá tjínle tikʼoajinni jngo chjotaxá. Tonga xi ngisa chjíle, kui bakóyaná nga je Jeobá batéxomale ngʼajmi kao Sonʼnde. Nichxin xi tiyoaa ndʼaibi, jé Jesucristo títsjoále xá, xi Rey sʼin tíjnale Chjotaxále Niná. Je Niná tíbee ngayeje kʼoa ʼyañá nga ñaki kixi, kʼoa je ʼNdíle kʼoati ñaki kixi josʼin batéxoma.