1. Jméni xi koa̱n sʼiaan kʼiatsa jekjimajchíngaa.

KʼIATSA jekjimajchíngaa tsakui nichxin kui nʼio si̱kjáojiaan nga tsín tikʼoakoa̱nniná kʼoakji si̱xálee je Jeobá jokinʼia ngasʼa. Tsínjin tikʼoakji nganʼio tjínniná joni nga sʼa xtiaa. Tonga jokji tífaʼato nó, sa tse sa tsee kjoafaʼaitsjen tísʼená nga koa̱n kuinyakoaa je xi sʼa xti nga ngisa nda katasíxále je Jeobá kʼoa nga ngisa tse xá sʼe̱nele. Jngo ndsʼee xi jenkjín nó nga chjotajchínga sʼin tíjna i kitso: “Nga jekinroajen nganʼiona nga jekjimajchínga, tsjoa tjín tokoan nga tjío xi sʼa xti xi koa̱nle sitjoson je xá xi tjín jinnaxinandále Niná”.

2. Jmé xi chótʼayajiaan i̱ kjoaʼmiya jebi.

² Tojosʼin tsaʼyaa ya kjoaʼmiya xi jaʼato, nʼio binyakao xi sʼa xti nga je símiyo ndsʼee xi jekoanjchínga. I̱ kjoaʼmiya jebi kui chótʼayajiaan kʼiatsa nangitokon koa̱n je ndsʼee xi jekoanjchínga, tsa kuenta sʼin nga tsín toje kʼoakoa̱nyejele, tsa koako kjoanda kʼoa tsa tjótʼa jme xi tjínle, kuinyakao je ndsʼee xi sʼa xti nga ñatjen sixá kʼoa ndasʼin kuiyoaa ngatsʼiaa ya jinjtín.

3. 1) Tojo tso Filipenses 2:3, 4, jósʼin tíjna nga nangitokon maa. 2) Jósʼin basenkaoná nga nangitokon maa.

³ Tsa je ndsʼee xi jekoanjchínga mele kuinyakao je ndsʼee xi sʼa xti, machjén nga nangitokon koa̱n. Je chjota xi nangitokon be nga ngisa ngʼa tjío xi ngikʼa tikʼoani je (tʼexkiai Filipenses 2:3, 4). * Je ndsʼee xi jekoanjchínga xi nangitokon  be nga nʼio nkjín koya josʼin ma sʼendajin nga bitjoson jngo xá, kʼoa tsín kʼoasʼin síkjaʼaitsjen nga kʼoakjoán tisʼin xi ngikʼa jokisʼin je ngasʼa (Ecl. 7:10). Ninga nʼio tse kjoafaʼaitsjen tjínle ndsʼee jebi, be nga tíbʼantjaiya jokjimachon sonʼnde, kuinga majinnile nga tjínnele kʼoantjaiya josʼin sʼendajin tsa jmeni (1 Cor. 7:31).

4. Jósʼin fitjenngi je superintendente xi tsʼe circuito je choa̱le chjota levita.

⁴ Je ndsʼee xi jekoanjchínga xi nangitokon, majinle nga tsín tikʼoakji chókjoanile nga sixále Jeobá jokisʼin ngasʼa. Tobʼelañá, je xi superintendente xi tsʼe circuito sʼin tjío, jetsín tikʼoasʼin síxáni kʼianga jebichóle 70 nó. Tsakui nichxin ñʼai koa̱nle nga sikatío xá jebi, nga̱ nʼio tsjoake nga binyakao je ndsʼe̱ kʼoa nʼio tsjoake nga kʼoasʼin síxále Jeobá. Tonga majinle nga ngisa nda kuitjosonle xá jebi je ndsʼee xi sʼa xti. Kʼoati sʼín ndsʼee jebi jokisʼin je chjota levita nichxin kjoatse, kʼianga jekichole 50 nó alikui tiya ndʼianajño kisixáni. Ali tsakuijin je xá xi kisʼenele chjota levita xi tsjoa tsakatío kon, tosaa kui xi tsjoa tsakatío kon nga tsakʼénele yaole jokji tjen kʼoakoanle nga kisixále je Jeobá kʼoa nga tsakinyakao je xi sʼa xti (Núm. 8:25, 26). Nichxin xi tiyoaa ndʼaibi, je ndsʼee xi tsínti superintendente xi tsʼe circuito sʼin tjíosíxáni kʼoa ninga tsín tinkjín jtín kjinentsjani, kʼoati nʼio binyakao je ndsʼee ya jtín jñani tjío.

5. Jmé xi bakóyali je choa̱le Dan kao Katie.

 ⁵ Kataʼyala je choa̱le Dan, je xi 23 nó nga superintendente xi tsʼe circuito sʼin kisixá. Kʼianga jekichole 70 nó, ndsʼee jebi kao Katie xi chjoónle mani, precursor especial sʼin kisixá. Jósʼin tjíotsjoánganʼio ndsʼee jebi. Je Dan kʼoatso nga nʼio tse xá tjínle ya jinjtín, tíbasenkao je ndsʼee nga siervo ministerial koa̱n, tsoyale je ndsʼee kao tichjaa josʼin kuitsoyason jñani nʼio tjín chjota kʼoa josʼin kuitsoyason ya yandoyá. Ninga ñaki to xále Niná tjíosʼín je ndsʼee xi jekoanjchínga kʼoa ninga mai, koaan kuinyakao je ndsʼee xi ngikʼa. Koaan kuinyakao je ndsʼee tsa tsjoa tjío kon josʼin tjíosíxále Niná ndʼaibi, tsa sikjaʼaitsjenjin jmeni xi koa̱nle sʼin kʼoa tsa kuenta sʼin jokji tjen kʼoakoa̱nle tsjoánganʼio.

6. Ánni ndatjínni nga kuenta sʼiaan nga tsín toñá kʼoakoa̱nyejená. Jngo choa̱ tʼejnai.

⁶ Jngo chjota xi be nga tsín toje kʼoakoa̱nyejele alikui kjoanʼio bʼénele yaole nga kui kʼoasʼín tsa jmeni xi tsín kʼoakoa̱nle (Prov. 11:2). Tsjoa sʼe kon kʼoa nda síxá. Je chjota xi be nga tsín toje kʼoakoa̱nyejele yaa mangóson josʼín jngo chjota xi tjenmijon chon ndiaa jña tífi. Tobijbi fi saʼnda nga kuicho jñani tífi. Kʼoatisʼinni, je chjota xi be nga tsín toje kʼoakoa̱nyejele, majinle kʼiani nga koa̱n sikʼantjaiya josʼin tísíxále je Jeobá kʼoa nga tosi tonda koasenkao xi ngikʼa (Filip. 4:5).

7. Jósʼin tsakakó je Barzilái nga koanjinle nga tsín toje kʼoakoa̱nyejele.

⁷ Je Barzilái kʼiaa nga 80 nóle kʼoatsakʼinle nga ya sixákao je rey David. Koanjinle nga tsín kuitjosonle je xá xi sʼe̱nele kʼoa tsín kiskoé je xá xi tsakʼaitʼale. Koanjinle nga jekoanjchínga kʼoa nga tsín tikʼoakoa̱nnile, kuinga kʼoakitsoni nga tosa je Kimham katabʼaixále, jngo chjota xi sʼa xti (2 Sam. 19:35-37). Joni je Barzilái, je ndsʼee xi jekoanjchínga tsjoa satío kon kʼianga je xi ngisa xti bʼaile je xá xi tjín jinnaxinandále Niná.

8. Kʼianga koanmele tsakʼénda yo̱ngo̱ je rey David, jósʼin tsakakó nga koanjinle nga tsín toje kʼoakoa̱nyejele.

⁸ Je rey David koanjinle nga tsín toje kʼoakoa̱nyejele. Ñaki kʼoatjín kon nga jngo ndʼia kʼoendale Jeobá. Tonga kʼianga kʼoakitso je Jeobá nga je Salomón kʼoendale yo̱ngo̱, je David alikui jokitso, tosaa kitsjoanganʼio nga kisʼenda je yo̱ngo̱ (1 Crón. 17:4; 22:5). Je David alikui kʼoasʼin kisikjaʼaitsjen nga toje xi koa̱nle kʼoenda je yo̱ngo̱, nga sʼa xti je Salomón kʼoa nga tsínle kjoafaʼaitsjen (1 Crón. 29:1). Koanjinle nga nda kuitjo je xá xi koa̱n nga je Jeobá sichikontʼain, ali tsakuijin jokji kjoafaʼaitsjen tjínle je xi koandiaale je xá xi koa̱n. Joni David, je ndsʼee xi jekoanjchínga tojo nda tjíosíxále je Jeobá ningalani tíbʼantjaiya josʼin tjíosíxále. Ndsʼee jebi majinle nga je Jeobá sichikontʼain je xi sʼa xti nga kuitjosonle je xá xi je kjinele tsakai.

9. Jósʼin tsakakó jngo ndsʼee xi ya tíjnajinle je Comité xi tsʼe Sucursal nga tsín toje kʼoakoa̱nyejele.

⁹ Je ndsʼee Shigeo kʼoati nʼio nda choa̱ bʼéjnaná nga majinle nga tsín toje kʼoakoa̱nyejele. Kʼianga nó 1976 nga 30 nóle yaa tsakʼejnajinle je Comité xi tsʼe Sucursal. Kʼoa kʼianga nó 2004 coordinador sʼin tsakʼejnale je Comité xi tsʼe Sucursal. Kʼianga jeki nichxin, ndsʼee jebi koanjinle nga jejaʼajen nganʼiole kʼoa nga tsín tikʼoakji xátíyani joni ngasʼa. Tsakʼéyanajmíle Jeobá jotjín kon kʼoa kui kisikjaʼaitsjen nga ngisa ndasʼin kuichomani tsa jngo ndsʼee xi ngisa xti sʼe̱nele je xá xi sʼín  tsakai. Nichxin xi tiyoaa ndʼaibi, alikuiti coordinador sʼin tíjnanile je Comité xi tsʼe Sucursal, tonga tojo yaa tsjoánganʼio. Je choa̱le Barzilái, rey David kao Shigeo kui bakóyaná nga jngo chjota xi nangitokon kʼoa xi be nga tsín toje kʼoakoa̱nyejele, alikui kui fini jokji kjoafaʼaitsjen tjínle xi sʼa xti, tosaa kui kuenta sʼín nga kuitjosonle je xá xi sʼe̱nele. Je ndsʼee xi jekoanjchínga alikui maxinkonke je xi sʼa xti, tosaa tsjoa satío kon nga ñatjen síxá (Prov. 20:29).

10. Je ndsʼee xi jekoanjchínga, jósʼin tjínnele skoe̱kon je ndsʼee xi sʼa xti.

¹⁰ Je ndsʼee xi jekoanjchínga kʼoasʼin síkjaʼaitsjen nga je ndsʼee xi sʼa xti jngoo kjoatjao xi tʼatsʼe Jeobá nroani, kʼoa tsjoá kjoanda tʼatsʼe jmeni xi sʼín ndsʼee jebi. Kʼianga jenroajen nganʼiole je ndsʼee xi jekoanjchínga, nʼio chjí bekon je ndsʼee xi sʼa xti, nga tjínle nganʼio kʼoa nga mele sitjoson je xá xi tjín ya jinjtín.

11. Jósʼin bakó Rut 4:13-16 kʼianga nʼio binyakao xi jekoanjchínga nga tsjoánganʼiole je xi sʼa xti.

¹¹ Nʼio nda choa̱ tsakʼéjna je Noemí tojosʼin faʼaitʼa ya Biblia. Nga jejchínga kitsjoaa kjoanda nga tsakasenkao je Rut, jngo chjoón xi ngisa xti tikʼoajinni je. Kʼianga jekʼien tile, kʼoakitsole je Rut nga katafikonnile xínkjín. Tonga koanjyole je Noemí kʼianga kʼoakitsole je Rut nga koaikao saʼnda ya Belén (Rut 1:7, 8, 18). Kʼoa nʼio tse kjoanda kisokole nga jao (tʼexkiai Rut 4:13-16). * Kui choa̱le Noemí  fitjenngi je ndsʼee xi jekoanjchínga kʼianga nangitokon ma.

12. Jósʼin tsakakó je pastro Pablo nga kitsjoa kjoanda.

¹² Je pastro Pablo kitsjoaa kjoanda kʼianga tsakʼainganʼiole, kʼoa nʼio nda choa̱ bʼéjnaná. Kitsjoale kjoanda je chjotale Cristo xi Filipos tsʼe tʼatsʼe je nganʼio xi kisikasénle (Filip. 4:16). Kʼoati kitsjoale kjoanda je Timoteo nga tsakasenkao (Filip. 2:19-22). Kʼianga tíjnanʼio Pablo, kitsjoale kjoanda Niná nga kitsjoanganʼiole je ndsʼe̱ kʼianga ya Roma tífinikʼéjna (Hech. 28:15). Je Pablo kisʼele nganʼio, nga̱ nʼio nkjín kilómetro kjin kikakóyason kʼoa kitsjoánganʼiole je jtín. Tonga alikui ngʼakon koan, kitsjoaa kjoanda nga tsakinyakao je ndsʼe̱.

13. Jósʼin koako je ndsʼee xi jekoanjchínga nga tsjoále kjoanda jmeni xi sʼín je xi sʼa xti.

¹³ Je ndsʼee xi jekoanjchínga nʼio nkjín koya josʼin koa̱n koako nga tsjoále kjoanda jmeni xi sʼín je ndsʼee xi sʼa xti. Kʼiatsa jekjimajchíngai, tsa jngo ndsʼee xi sʼa xti kʼoakuitsoli nga mele koaikaoli tsa jña kʼuín, tsa je koaikatse jmeni xi machjénli kʼoa tsa jmesani xi sʼiain, tʼailai kjoanda nga kʼoasʼin koasenkaoli. Kui tikjaʼaitsjain nga je Jeobá xi kʼoasʼin tíbakóli kjoatsjoacha. Kʼoa tsakui nichxin saʼnda miyoli koa̱nni je ndsʼee. Tinyakao je xi sʼa xti nga ngisa katamamiyo je Jeobá. Kʼoatʼinlao nga nʼio nda tjíosʼín nga tjíobʼénele yaole nga tjíosíxále Jeobá. Kʼoa tikʼayalao nichxin nga tʼeyanajmílao josʼin tinijcháo yaono. Kʼoasʼin koakoño nga bʼailao kjoanda je Jeobá xi totʼatsʼe nga tjío ndsʼee xi sʼa xti ya jinjtín (Col. 3:15; Juan 6:44; 1 Tes. 5:18).

14. Jósʼin tsakakó je rey David nga kitjotʼa jmeni xi tjínle.

¹⁴ Je rey David kʼoati nʼio nda choa̱ bʼéjnale je ndsʼee xi jekoanjchínga nga kitjotʼa jmeni xi tjínle. Nʼio tse tao̱n kitsjoa kʼoa nʼio nkjín koya tsojmi kitsjoa kʼianga kisʼenda je yo̱ngo̱ (1 Crón. 22:11-16; 29:3, 4). Kitsjoanganʼio ningalani kʼoasʼin jchale je yo̱ngo̱ nga je Salomón tsakʼénda. Kʼiatsa jejchíngai kʼoa tsa tsín tikʼoakoa̱nnili nga ya kʼoainganʼiui nga sʼenda ndʼia jña ʼyaxkón Niná, koaan tosi tonda kao tao̱n kʼoainganʼioni jokji tjen kʼoakoa̱nli. Kʼoa tʼinyalai je ndsʼee xi sʼa xti jokji kjoankjíntokon tísʼeli.

15. Jméni xi nʼio chjíle tsakakóyale Pablo je Timoteo.

¹⁵ Kʼoati nʼio nda choa̱ tsakʼéjna je pastro Pablo nga kitjotʼa jmeni xi tjínle. Kʼoakitsole je Timoteo nga katafikao kʼianga nʼio kjin kikakóyason. Kitsoyale josʼin kuitsoyason kʼoa josʼin kuitsoya je Énle Niná (Hech. 16:1-3). Nga kʼoakisʼin Pablo, je Timoteo nʼio nda koanle kitsoya je Énle Niná (1 Cor. 4:17). Kʼoa je Timoteo kʼoati tsakakóyale xi kjaʼaí josʼin kitsoyale je Pablo.

16. Ánni nga kitsoyanile xi kjaʼaí je Shigeo.

¹⁶ Je ndsʼee xi jekoanjchínga tsoyale je ndsʼee xi sʼa xti nga je kʼoasʼin xá xi kjinele ya jinjtín tsakai. Tobʼelañá, je Shigeo, xi sa jekabʼaxki̱ ya párrafo 9, jokji jaʼa nó kitsoyale je ndsʼee xi sʼa xti xi ya tjíojinle je Comité xi tsʼe Sucursal. Koanmele kitsjoanganʼiole je xále Niná ya naxinandá jñani tíjna kuinga kitsoyanile je ndsʼee. Kʼianga jekicho choa̱le nga tsínti coordinador sʼin kʼoéjnani, jetíjnanda jngo ndsʼee xi koa̱nle sitjoson xá jebi. Je Shigeo tosi tonda tsoyale je ndsʼee xi sʼa xti jokji kjoafaʼaitsjen kisʼele je xi tsʼato 45 nó tsakʼejnajinle je Comité xi tsʼe Sucursal. Je ndsʼee xi kʼoasʼín josʼín je Shigeo nʼio nda binyakao je naxinandále Niná.

17. Jméni xi koa̱n sʼin je ndsʼee xi jekoanjchínga (Lucas 6:38).

 ¹⁷ Nga tjío je ndsʼee xi jekoanjchínga xi kixi tjíofitʼale Jeobá, kʼoasʼin ʼyañá nga kui xi ngisa ndatjín nga je Jeobá nixálee. Je choa̱le ndsʼee jebi kui bakóná nga nʼio chjíle nga ʼyaa jmeni xi tso je Biblia kʼoa nga mangíntjenngiaa je kjoafaʼaitsjen xi tsjoá. Ndsʼee jebi be josʼin koanxá nichxin kjoatse, tonga kʼoati be nga toxá tíbʼantjaiyajinni josʼin kjimaxá ndʼaibi, kʼoa nga nʼio chjíle nga kʼoasʼin kjuintjenngiaa jotso je naxinandále Niná. Je ndsʼee xi jejchínga xi chriansʼa kisʼenngindá kʼoati nʼio tsjoánganʼio nga tsoyale xi kjaʼaí ánni nga kui kiskoéjinni nga je Jeobá kisixále nga jekoanjchínga. Je ndsʼee xi sʼa xti nʼio kuinyakao nga kjuinrʼoéle jmeni xi kʼoeyanajmíle je ndsʼee xi jekoanjchínga kʼoa nga kuitsoyale jmeni xi kjimajinle. Kʼiatsa kʼuínyalai je ndsʼee xi sʼa xti jokji kjoafaʼaitsjen jetjínli, nʼio tse kjoanichikontʼain tsjoáli je Jeobá (tʼexkiai Lucas 6: 38). *

18. Jósʼin kuinyakaongañá xínkjín je ndsʼee xi jekoanjchínga kao je ndsʼee xi sʼa xti.

¹⁸ Kʼiatsa je ndsʼee xi jekoanjchínga simiyo je xi sʼa xti tsjoánganʼiongañále xínkjín (Rom. 1:12). Tsen tsen tjínná nga jngó jngoá josʼin koa̱n kʼoainganʼiolee xíngiaa. Je ndsʼee xi jekoanjchínga nʼio tse kjoachjine tjínle kʼoa nʼio tse kjoafaʼaitsjen tjínle. Kʼoa je ndsʼee xi sʼa xti tsee nganʼio tjínle. Kʼianga binyakaongañá xínkjín je ndsʼee xi sʼa xti kao je ndsʼee xi jekoanjchínga, jé Jeobá bʼasjengʼa kʼoa nʼio ndasʼin biyoaa ngatsʼiaa ya jinjtín.