1, 2. Tojo tso je én xi tongini kinokjoa, jósʼin kjimatinyale naxinandá ndʼaibi.

I KITSO kʼa chjota xi kinjenngile yaole kʼianga jaʼa cháon ya Nepal nga nó 2015: “Tongotjo chixojenni je tienda kao ndʼiayʼai xi jekjoatse kjio. Nʼio kitsokjon je chjota [...]. Je chjota kʼoakitso nga to jao minuto jaʼa cháon, tonga an ñaki tsee jaʼa koanna”. Kʼiatsa yalani tiyoaa nga kʼoakoan alikuijin cha̱jinná.

² Ndʼaibi kʼoatisʼin kjimatinyale naxinandá, tonga ali tojngojin naxinandá jña kʼoakjima. Jé Jeobá tísítinyale ngatsʼi naxinandá kʼoa jekjoatse nga kʼoatísʼín. Kui én jebi xi tongini kitso Ageo: “Kui jebi xi tso je Jeobá xi tsʼe chjotakjoajchán: To choasa chale kʼoa ijngokʼa sitinyale ngʼajmi kao sonʼnde, je ndáchikon kao nangikixí” (Ageo 2:6).

3. Ánni nga tsín mangósonni josʼin kjimatinyale naxinandá kʼoa joma nga faʼa cháon.

³ Kʼianga cháon faʼa nʼio nkjín chjota feson, tonga je xi tínchja̱ni Ageo nga matinyale naxinandá tso ndasʼin bichómani. Je Jeobá itso: “Sitinyale ngatsʼi naxinandá, kʼoa tsojmichjí xi tjíole ngatsʼi naxinandá kjoaʼasʼeen ndʼia jebi kʼoa jeya sʼin sikʼéjna” (Ageo 2:7). Jósʼin tsakinyakao én jebi chjota xi kʼia tsakatio nga nichxinle Ageo, kʼoa jósʼin basenkaoná nichxin xi tiyoaa ndʼaibi. I̱ kjoaʼmiya jebi kui chótʼayajiaan xi tʼatsʼe jebi kʼoa jchañá jósʼin kʼoainganʼioá nga kjimatinyale naxinandá.

4. Jmé xá kisikasénni Jeobá je profeta Ageo.

⁴ Nʼio chjíle je xá xi tsakánele Jeobá je profeta Ageo. Kataʼyala ánni. Tsakui nichxin ya tjenjinle Ageo je chjota xi kinikatíonʼio  ya Babilonia kʼoa xi kʼia kichoni ya Jerusalén nga nó 537 tongini nga nó 1. Kʼianga kicho, je choʼndale Niná xi kixi kitʼale tiʼa tsakʼéndani je xjáoja̱ma̱le yo̱ngo̱le Jeobá (Esd. 3:8, 10). Tonga xijekoanni chjota tsakatiochjoale, kisikinroajen kon kʼoa tsín tikisixáni (Esd. 4:4; Ageo 1:1, 2). Kuinga je Ageo kisikasénni Jeobá nga nó 520 tongini nga nó 1 ánni nga kuinyakaoni je chjota nga tsjoa katasatío kon kʼoa nga sijngo je yo̱ngo̱ (Esd. 6:14, 15). *

5. Ánni nga nʼio kitsjoanganʼionile je naxinandále Niná jmeni xi kitsole Ageo.

⁵ Je Ageo kui xá kichokaonile én je chjota judío nga ngisa nʼio sa̱tío kjoamakjainle xi tʼatsʼe Jeobá. Nʼiojin koan je Ageo kʼoa i kitsole xi jekisikinroajen kon: “Tajajin katamao ngatsʼio, chjota xi tiyo ʼnde jebi, kui xi tso Jeobá, kʼoa tixáo. Nga̱ an tijnakaono, kui xi tso Jeobá xi tsʼe chjotakjoajchán” (Ageo 2:4). Nʼiojin kitsjoanganʼiole nga “Jeobá xi tsʼe chjotakjoajchán” kitso je Ageo. Je Jeobá nʼio nkjín ánkje kjinentsja, kʼoa tjínnele je kisinʼiotʼa chjota judío kʼiatsa mele koa̱njngole je xá xi tjíosʼín.

6. Jósʼin kuichomani nga koa̱ntinyale naxinandá kitso je Ageo.

⁶ Je Ageo kʼoakitsole je chjota judío nga je Jeobá sitinyale ngatsʼi naxinandá. Je én jebi tsakinyakao je chjota judío xi jekisikinroajen kon nga tsín titjíobʼéndani je yo̱ngo̱ kʼianga kʼoakitso Ageo nga je Jeobá sitinyale naxinandá Persia, xi nʼio nkjín naxinandá kjinentsja nga kui nichxin. Jósʼin kuichomani nga kʼoakoa̱n. Je naxinandále Niná koa̱njngole nga kʼoenda je yo̱ngo̱. Kʼoa je chjota xi tsín chjota judío ma, jé Jeobá kʼoetsʼoale kʼianga jesʼe̱ndaya je yo̱ngo̱. Nʼiojin kisinʼiojin je naxinandále Niná jmeni xi kitso je Ageo (Zac. 8:9).

7. Jmé xá xi kjima ndʼaibi xi tibʼainganʼiolee.

⁷ Jósʼin tíbitjoson ndʼaibi jmeni xi kitso Ageo. Je Jeobá kʼoati tísítinyale ndʼaibi ngatsʼi naxinandá kʼoa tibʼainganʼioñá nga kʼoakjima. Kʼianga nó 1914, je Jeobá Rey kisikao je Jesús ya ngʼajmi (Sal. 2:6). Tonga je chjotaxá xi tjín sonʼnde alikui kisasenle nga Rey koan je Jesús. Nga kʼia, jekoanjngo “nichxinle je chjota xi li judíojin”. Jebi kui xi tsonile nga tsín tiʼya chjotaxá kisʼeni i̱ Sonʼnde xi je Jeobá tsakasénnda (Luc. 21:24). Kuinga tíbájinkonni chjota je naxinandále Jeobá saʼnda tjen nó 1919 nga toje Chjotaxále Niná xi koa̱nle kʼoendajin je kjoa xi tjín. Je xá xi kjima nga tíʼmiyason je Énle Niná tísítinyale ngatsʼi naxinandá (Mat. 24:14).

8. Tojo tso Salmo 2:1-3, jósʼín je chjota kʼianga tíʼmiyason je Énle Niná.

⁸ Me tongatsʼi chjota nga tsín sasénle je Énle Niná (tʼexkiai Salmo 2:1-3). * Je chjota alikui sasénle nga Énle Niná ʼmiyale kʼoa tsín sítjosonle je Rey xi je Jeobá tsakasénnda. Alikui makjainle tsa nda tso je én xi ʼmiyasoán. Saʼnda tjínkʼa je chjotaxá xi tsín titsjoáʼndeni nga sakóyason. Ningalani nʼio nkjín chjotaxá xi kʼoatso nga Niná síxále, alikui síkatío je xá xi tjínle. Tojo koan nga tsakʼejna je Jesús i̱ Sonʼnde, kʼoati sʼín je chjota nichxin xi tiyoaa ndʼaibi, batiochjoale je xi kiskoéjin Jeobá nga koatexoma kʼianga fitjenngike je choʼndale (Hech. 4:25-28).

9. Jósʼín je Jeobá kʼianga tsín sasénle je chjota nga ʼmiyasoán.

 ⁹ Jósʼín je Jeobá kʼianga tsín sasénle je chjota nga ʼmiyasoán. Ya Salmo 2:10-12 itso: “Kuinga ndʼaibi, xi rey sʼin tiyo, chjine katamao; katamakjainno nga bichakjáyano, xi juez sʼin tiyo i̱ sonʼnde. Kao kjoanokjoncha tixálao je Jeobá, kʼoa ñaki katabʼatséñó nga tsjoa katasʼeno. Jchaxkón je ʼndí, tsa mai, nʼio koa̱njtile je Niná kʼoa kuiyáñó ya yandiaa, nga̱ je sasa majtinile. Nʼio tsjoa tjíole ngatsʼi xi je sínʼiotʼa”. Je Jeobá nʼio nda chjota kʼoa títsjoásale nichxin je chjota nga katasíkʼantjaiya yaole kʼoa nga katamakjainle xi tʼatsʼe Chjotaxále Niná. Tonga nʼio maxátíyale nga kʼoasʼin, nga̱ to jetífikjetʼa nichxin (Is. 61:2; 2 Tim. 3:1). Nʼio maxátíyale nga katabe chjota jotjínni xi tʼatsʼe Jeobá kʼoa nga je katasíxále.

10. Tojo tso Ageo 2:7-9, jósʼín kʼa je chjota nga kjimatinyale naxinandá.

¹⁰ Nga kʼoakitso je Ageo nga koa̱ntinyale naxinandá, tjínkʼa chjota xi tjíobinyakao nga kʼoakjima. Kʼoatso nga je Jeobá skoe̱xkón je “tsojmichjí xi tjíole ngatsʼi naxinandá”, xi tsonile, je chjota xi ndatjío ni̱ma̱le * (tʼexkiai Ageo 2:7-9). * Je Isaías kao Miqueas tongini kʼoakitso nga kʼoakoa̱n nga to jetífikjetʼa nichxin (Is. 2:2-4, nota; Miq. 4:1, 2, nota).

11. Jókisʼe kon jngo ndsʼee kʼianga tokʼia kinrʼoé je Énle Niná.

¹¹ Kataʼyala josʼin tsakasenkao jngo ndsʼee xi Ken ʼmi kʼianga tokʼia kinrʼoé je Énle Niná, xi ya tíjna ndʼaibi jña tjen tísʼendiaanile xále Niná. Jela 40 nó tjínle nga tsakʼinyale je Énle Niná, tonga nʼio nda faʼaitsjenle jokoan nga kʼia. Itso: “Kʼianga tokʼia kinrʼoe jmeni xi tso je Énle Niná,  tsjoa kisʼe tokoan nga kisʼejinna nga to jenichxin fetʼa tiyoaa. Koanjinna nga tsín koa̱n nga tosi tonda i̱ tsjonjian yaona jme xi chon sonʼnde, nga tosa je Jeobá sixále ánni nga ndasʼin koatejnaña ngixko̱n kʼoa nga so̱kona kjoabijnachon xi tsínkʼia fetʼa. Tsakʼetsʼoale Niná kʼoa tokjoan kʼoakisʼian jotso Énle. Alikui tiʼi̱ kitsjonjinña yaona jme xi chon sonʼnde, tosaa je Chjotaxále Niná kisinʼiotʼa nga̱ tsínkʼia tjóxin xi je”.

12. Jósʼin nga jeya tísʼejna je yo̱ngo̱le Jeobá nichxin fetʼa xi tiyoaa ndʼaibi.

¹² Tiʼyañá josʼin tísíchikontʼain Jeobá je naxinandále. Nga to jetífikjetʼa nichxin, sa nkjín sa nkjín kjimani je chjota xi je Jeobá tjíobexkón. Kʼianga nó 1914 sʼaa tochoa jmi mañá, tonga ndʼaibi jetsʼato jin millón mañá. Kʼoa kʼianga faʼaitsjenya je Kjoabiyale Cristo sa nkjín sa nkjín millón mani je chjota nga xki̱ nó. Je “tsojmichjí xi tjíole ngatsʼi naxinandá” yaa tjíobichó ya nditsinle yo̱ngo̱le Jeobá. Yo̱ngo̱ jebi kui tsoyanile josʼin tíbʼéndajin Jeobá nga kʼoasʼin jchaxkón josʼin mele. Kʼianga síkʼantjaiya yaole jokjoan je chjota, kʼoati kui jaʼaínle Jeobá bʼasjengʼa (Efes. 4:22-24).

13. Jñásanile je én xi tongini kinokjoa xi tíbitjoson ndʼaibi (chótsenlai sén xi faʼaitʼa ya portada).

¹³ Nga sa nkjín sa nkjín kjima ndʼaibi je choʼndale Jeobá kʼoati tíbitjoson jmeni xi tso ya capítulo 60 xi tsʼe Isaías. Ya versículo 22 itso: “Je xi tochoa mani jmi koa̱n, kʼoa je xi tojngo jao mani jngoo naxinandá xi nʼio tse nganʼio tjínle kʼónya. An Jeobá, an sixátíyale nga kuichoka nichxin”. “Tsojmichjí” sʼin tíʼyatokon je chjota xi tjíofaʼasʼenjin naxinandále Niná. Nga kʼoasikji nkjín chjota tjíofaʼasʼenjin naxinandále Niná kjaʼaí kjaʼaí xá xi male nga jngó jngó kʼoa kao kjoatsjoa tjíotsjoánganʼio nga tíʼmiyason je Énle Niná. Kʼoa je xá xi male nga jngó jngó xi tjíofaʼasʼenjin naxinandále Jeobá “ndáchikile naxinandá” tsole Isaías. Kʼoa je naxinandále Jeobá nʼio nda tísíchjén jebi kʼianga tíʼmiyason (Is. 60:5, 16). Nga kʼoasʼin tjíotsjoánganʼio je xi xʼin kao xi yánchjín 240 naxinandá kao ʼnde tíʼmiyason, kʼoa jetsʼato  1,000 én tíbitjo je xo̱n xi Énle Niná yʼangini.

14. Jméni xi tjínnele sʼin ndʼaibi je chjota.

¹⁴ Nga to jetífikjetʼa nichxin nga kjimatinyale naxinandá tjínnele skoéjin jmeni xi sʼin je chjota. A jé Chjotaxále Niná tsjoánganʼiole axo jé chjotaxá sonʼnde. Ningalani sítjoson je choʼndale Niná je kjoatéxoma xi tjín ya naxinandále, alikui kjoa política tsjonjin yaole (Rom. 13:1-7). Majinle nga toje Chjotaxále Niná xi koa̱nle kʼoendajin je kjoa xi tjín, kʼoa Chjotaxá jebi alikui i̱ Sonʼnde tíjna (Juan 18:36, 37).

15. Tojo tso libro xi tsʼe Apocalipsis, jósʼin chótʼayakao je choʼndale Niná.

¹⁵ Je libro xi tsʼe Apocalipsis kʼoatso nga chótʼayakao je choʼndale Niná tsa kixi tjíofitʼale kʼianga to jetífikjetʼa nichxin. Kui xi tsonile nga tosi tonda koaitjenngikená je chjota kʼoa koatiochjoaná. Je chjotaxá kui xi koa̱nmele nga je kʼoétsʼoalee kʼoa nga tsín tije Niná jchaxkónñá, kʼoa koaitjenngike je xi tsín kʼoasʼin (Apoc. 13:12, 15). Je Biblia itso: “Tsakʼéne nga kisʼeyotʼale choa̱ ngatsʼi ntsja ngakixi kao tjen, je xi xti kao xi jchínga, je xi nyiná kao xi yo̱ma̱, je xi tjíondaí kao xi choʼnda” (Apoc. 13:16). Nichxin kjoatse, je xi choʼnda koan kisʼechoaa ánni nga tsaʼyanile ʼyani xi naile ma. Nichxin xi tiyoaa ndʼaibi joxi tjíosʼechoaa ntsja kao totjen chjota. Xi tsonile, kui xi koa̱nmele je chjotaxá sonʼnde nga je tsjoánganʼiole ngatsʼi chjota. Jmeni xi sʼin je chjota kʼoa josʼin sikjaʼaitsjen kʼoasʼin koakoni nga je chjotaxá sonʼnde kjinentsja kʼoa nga je tsjoánganʼiole.

16. Ánni nga nʼio machjénsíni ndʼaibi nga ñaki kʼoakʼoé tokoán nga kixi kjuintʼalee Jeobá.

¹⁶ Kʼoa ñá jósʼiaan, a kʼoaiʼndeñá nga sʼe̱choaa kʼoa a je chjotaxá sonʼnde kʼoainganʼiolee. Je xi tsín tsjoáʼnde nga sʼe̱choa̱ tsee kjoa kjoaʼatojin kʼoa xkón koatio. Je libro xi tsʼe Apocalipsis kʼoatso nga “niʼyajin xi koa̱n koatse, nikoa̱njin koatena” tsa tsín tjíochoa̱ (Apoc. 13:17). Tonga je choʼndale Niná be jme xi sikao Niná je xi tjíochoa̱ (Apoc. 14:9, 10). ʼNdele nga sʼe̱choa̱ ntsja je choʼndale Niná, joxi itso xi kʼoetʼa ntsja: “Tsʼee Jeobá” (Is. 44:5). Kuinga machjénsíni nga si̱kjaʼaitsjenjiaan ndʼaibi tsa ñaki kixi timangíntʼalee Jeobá. Tsa kixi koanngíntʼalee, tsjoa sʼe̱ kon nga kʼoakuitso nga tsʼe maa.

17. Jméni xi kuenta sʼiaan nga tsejta kjima Jeobá.

¹⁷ Je Jeobá nʼio tsejta kjima nichxin xi tiyoaa ndʼaibi nga to jetífikjetʼa nichxin. Alikui mele nga ʼya xi kjoeson (2 Ped. 3:9). Títsjoásale nichxin je chjota nga kʼoakatamanile je jéele kʼoa nga je katasíxále. Tonga alikui tongantsjai nga tsejta koa̱n je Jeobá. Je xi tsín tsjoánganʼiole je Chjotaxále Niná kʼoati koa̱n jokoan je faraón kʼianga nichxinle Moisés. Je Jeobá i kitsole: “Koanjin nga jetsakakole tsakai nganʼiona nga kitsjoale kjoañʼai ji kao naxinandáli nga chʼintáo kisikasénnele, kʼoa jejin tsín titijnani i̱ sonʼnde. Tonga kui xá tisikʼéjnakonnile nga koakole nganʼiona kʼoa nga kʼoaxki̱ je jaʼaínna jngo tjíjtsa sonʼnde” (Éx. 9:15, 16). Nga kuichoka nichxin, je chjota skoee nga je Jeobá xi ñaki Niná (Ezeq. 38:23). Jósʼin skoe̱ni jebi je chjota.

18. 1) Jmésa xi nchja̱ni Ageo 2:6, 20-22 kʼianga koa̱ntinyale naxinandá tso. 2) Jósʼin ʼyañá nga sʼasa kuitjoson jmeni xi kitso je Ageo.

¹⁸ Kʼianga jesiento nó jaʼato nga kʼien Ageo, je pastro Pablo kʼoakitso nga sʼasa kuitjoson nichxin xi sʼa nroa jmeni xi tso  Ageo 2:6, 20-22 * (tʼexkiai). Itso xi kiski Pablo: “Ndʼai kitsjoa tsʼoa nga tso: Tojngo kʼasa an ndiaa sitinya, ali tojejin nangi, tonga kʼoati ngʼajmi. Kʼoa je énbi xi tso: Tojngo kʼasa, ndiaa bakó nga kuitjoxin je tsojmi xi matinya joni tsa tsojmi xi xá koanndani, jméni nga sa̱tiosíni je tsojmi xi tsín matinya” (Heb. 12:26, 27). Je én xi sitinya tso i̱ texto jebi kʼoa kao jmeni xi tso Ageo 2:7 alikui tikui tínchja̱ni. Texto jebi kui nchja̱ni nga tondiaa ni̱kjeson je chjota xi kʼoasʼin jokisʼin je faraón, xi tsín makjainle nga toje Jeobá xi tiʼndele batéxoma.

19. Jméni xi tsín koa̱ntinyale, kʼoa jómani ʼyaa jebi.

¹⁹ Je pastro Pablo kʼoakitso jmeni xi tsín koa̱ntinyale kʼoa xi tsín tjóxin. I kitso: “Nga chjoé je kjoatéxoma xi tsín tsa matinya, katasʼená kjoanda. Kʼoasʼin nda koa̱nchjénlee tʼatsʼe Niná, josʼin sasénkon nga je nga jkon chá, kʼoa nga xkón jchaa” (Heb. 12:28). Kʼianga jekjoaʼato ngayeje nga koa̱ntinyale naxinandá, tojé Chjotaxále Niná koatexoma (Sal. 110:5, 6; Dan. 2:44).

20. Jméni xi tjínnele sʼin je chjota kʼoa jósʼin kuinyakoaa.

²⁰ Nʼio maxátíyale nga skoéjin je chjota jmeni xi sʼin. A tosi tonda kui koaitjenngi jme xi chon sonʼnde jñani to kjoeson, axo sikʼantjaiya yaole nga kʼoasʼin josʼin mele Niná kʼoa nga sʼe̱le kjoabijnachon xi tsínkʼia fetʼa (Heb. 12:25). Kʼianga ʼmiyasoán binyakaoñá je chjota nga katakjoéjin jmeni xi sʼin. Kuinga tosi tonda kʼoainganʼioñá nga nkjínsa chjota xi “tsojmichjí” sʼin ʼyatokon katafitʼale je Chjotaxále Niná. Si̱kjaʼaitsjeen ngantsjai jmeni xi kitso je Jesús, nga i̱ kitso: “Je énnda xi tʼatsʼe je kjoatéxomale ngʼajmi kuinókjoayani ngakijnda sonʼnde, nga si̱kixiyandale ngatsʼi naxinandá. Kʼia kjoaʼaí xi kjoetʼa” (Mat. 24:14).