Kataʼyala jótso je Biblia.

Ya Hechos 24:15 kʼoatso nga kjoaʼáyanile “chjota xi tjínle kjoakixi, kao chjotatsʼen”. Je chjota xi tjínle kjoakixi jéní xi kisitjosonle Niná nga kjesa mʼejin, kuinga ya tjíotʼani jaʼaínle ya libro xi tsʼe kjoabijnachon (Mal. 3:16). Je xi chjotatsʼen ʼmile, kʼoati je tínchja̱ni xi tsín nanda tsabe xi tʼatsʼe Jeobá kʼianga kjesa mʼejin, kuinga tsín ya tjíotʼani jaʼaínle ya libro xi tsʼe kjoabijnachon.

Jmeni xi tso Juan 5:28, 29 tikui nchja̱ni nga jao koya chjota xi síkʼaxki̱ Hechos 24:15. Je Jesús kʼoakitso nga “je xi nda kisʼin kjoaʼáyanile nga sʼe̱le kjoabijnachon, kʼoa je xi chʼao kisʼin kjoaʼáyanile nga sʼe̱ndajinle kjoa”. Je chjota xi tjínle kjoakixi nda kisʼin nga kjesa mʼejin, kjoaʼáyanile nga sʼe̱le kjoabijnachon nga̱ tojo yaa libro xi tsʼe kjoabijnachon tjíotʼa jaʼaínle. Je xi chjotatsʼen ʼmile chʼao kisʼin nga kjesa mʼejin, kjoaʼáyanile nga sʼe̱ndajinle kjoa. Kjesa ya tjíotʼajin jaʼaínle ya libro xi tsʼe kjoabijnachon kʼoa tjóʼndele nga koako tsa mele nga je Jeobá sixále kʼoa tsa mai. Nga kui nichxin koaan skoe̱ xi tʼatsʼe Jeobá kʼoa koaan ya sʼe̱tʼa jaʼaínle ya libro xi tsʼe kjoabijnachon.

Ya Apocalipsis 20:12, 13 kʼoatso nga ngatsʼi xi kjoaʼáyanile tjínnele sitjoson jmeni xi kjoaʼaítʼa rollo, xi tsonile, je kjoatéxoma xi sʼe̱ ya sonʼnde chjotse. Ni̱kjeson je xi tsín sitjoson (Is. 65:20).

Ya Daniel 12:2 kʼoatso nga tjínkʼa xi kjoaʼáyanile “xi sʼe̱le kjoabijnachon xi tsínkʼia fetʼa kʼoa tjínkʼa xi kjoasoa koatiojin kʼoa chʼaosʼin jchatokon tokʼia saʼndani”. Texto jebi kui bakóya josʼin kuichomani nga kjoaʼáyanile chjota: tsa sʼe̱le “kjoabijnachon xi tsínkʼia fetʼa” kʼoa tsa “chʼaosʼin jchatokon tokʼia saʼndani”. Nga jekjoetʼa xi jngo jmi nó tjínkʼa xi sʼe̱le kjoabijnachon xi tsínkʼia fetʼa kʼoa tjínkʼa xi tondiaa ni̱kjeson (Apoc. 20:15; 21:3, 4).

Nga jao koya chjota xi kjoaʼáyanile yaa mangóson joma je chjota xi xin naxinandá mele koaikatio. Je chjota xi tjínle kjoakixi ʼmile yaa mangóson je chjota xi xin naxinandá fikatio nga ma ya síxá ya naxinandá jñani bichó kʼoa tjoʼndele nga kʼoasʼín tsa jmeni. Kʼoa je xi chjotatsʼen ʼmile yaa mangóson joma je chjota xi tongotjo tjoʼndele nga xin naxinandá bichókatio. Nga koa̱n tosi tonda ya koatio ya naxinandá jñani bichó machjén nga sitjoson jmeni xi kʼuínle. Tikʼoasʼinni, je xi chjotatsʼen ʼmile tjínnele sitjoson je kjoatéxomale Jeobá ya sonʼnde chjotse kʼoa machjén nga koako nga chjotakixi ma. Tojosʼin kjoaʼasʼen ya naxinandá nga tosʼa kuicho je chjota xi xin tsʼe, nga koai nichxin tjínkʼa xi tjóʼndele nga tondiaa ya koatio kʼoa tjínkʼa xi ni̱kitjoni, kui kuenta koa̱n josʼin ya naxinandá jñani kuicho. Tikʼoasʼinni, jokoa̱ntʼain nga jekoa̱nni ngatsʼi xi kjoaʼáyanile kui kuenta koa̱n josʼin ya sonʼnde chjotse kʼoa tsa kixi koaitʼale Niná.

Je Jeobá tjínle kjoamatokon kʼoa kixi jmeni xi sʼín (Deut. 32:4; Sal. 33:5). Kʼoasʼin koakoni kjoatsjoacha nga sikjaʼáyanile je chjota xi tjínle kjoakixi kao xi chjotatsʼen ʼmile. Tonga kʼoati kui xi mele Jeobá nga sitjoson ngatsʼi je kjoatéxomale tʼatsʼe jmeni ndatjín kao xi chʼaotjín. Tojé chjota xi tsjoake koa̱n Niná kʼoa xi sitjoson kjoatéxomale xi tosi tonda koatio ya sonʼnde chjotse.