1. Jmé xá xi tsakánele Jeobá je pastro Pedro kʼianga jenʼio jchínga.

  JE PASTRO Pedro nʼio nda kisixále Jeobá. Ñatjen kitsoyason kao Jesús, nkjín ʼnde kitsoyason kʼoa yaa tsakʼejnajinle cuerpo gobernante. Xijekoan, kʼianga jenʼio jchínga ijngo xá kitsjoale Jeobá. Jé Niná tsakándiaale nga jao carta kiski xi jaʼaínle yʼa kʼianga nó 62 saʼnda nó 64. Carta jebi kui xi 1 Pedro kao xi 2 Pedro ʼmi. Kui xi koanmele Pedro nga kʼoati kuinyakao carta jebi je chjotale Cristo xi koatio nga koa̱nskanni (2 Ped. 1:​12-15).

2. Ánni nga nʼio nda tsakinyakaoni chjotale Cristo je carta xi kiski Pedro.

² Je pastro Pedro kʼiaa kiski nga jao carta jebi kʼianga kjoa tjíofaʼatojin chjotale Cristo (1 Ped. 1:6). Tjínkʼa chjota xi to énndiso kitsoya kʼoa tsín nda kikao yaole ya jinjtín (2 Ped. 2:​1, 2, 14). Nga kui nichxin tojeme kuichosíkjeson chjota romano naxinandá Jerusalén kao yo̱ngo̱le Niná (1 Ped. 4:7). Nʼiojin nda tsakinyakao nga jao carta jebi chjotale Cristo xi kjoa tjíofaʼatojin nga kʼia. Kʼoajin titsakinyakao nga tsakationdale je kjoa xi kuichone nga koa̱nskanni. b

3. Ánni machjénni nga chótʼayajiaan je carta xi kiski Pedro.

³ Ningalani je kiskile Pedro nga jao cartale je chjotale Cristo xi kʼia tsakatio, jé Jeobá xi kʼoasʼin koanmele nga kisʼetʼaxo̱n ya Biblia nga̱ kʼoati nʼio nda binyakaoná ndʼaibi (Rom. 15:4). Nichxin xi tiyoaa ndʼai alikui tinda fikaoni yaole chjota kʼoa ñʼai maná nga je Jeobá nixálee xi totʼatsʼe kjoa xi tjín. Kʼoati jemachrianle nga ngisa tse kjoañʼai sʼe̱ tikʼoajinni  jokoan ya Jerusalén. Nga jao carta xi kiski Pedro koasenkaoná nga tjenyatokon kuiyolee nichxinle Jeobá, nga tsín chjota kuinókjonlee kʼoa nga tsjoacha koaan je ndsʼee. Kʼoati kuinyakao xi chjotajchínga sʼin tjío nga nda sikuinda je jtín.

4. Jméni xi sikinroajen kjoamakjainná (2 Pedro 3:​3, 4).

⁴ Je chjota alikui makjainle jmeni xi tso Biblia tʼatsʼe jmeni xi koa̱n nichxin xi sʼa nroa. Nga jekjoatse kʼoatibixoán nga jekjoaʼaí kjoafetʼa, tsakui nichxin tjínkʼa chjota xi toskoe̱sinná kʼoa kʼoakuitso nga tsínkʼia kʼoakoa̱n (tʼexkiai 2 Pedro 3:​3, 4). c Tsakui nichxin si̱kʼajenlee tokoán tsa kʼoakuitsoná chjota nga ʼmiyasoán, xi ñatjen nixá kʼoa kao je xíngiaa. Jmé xi kuinyakaoná. Kataʼyala jokitso Pedro.

5. Jmé xi koasenkaoná nga tsejta koaan nga chóyaa saʼnda nga kjoetʼa jme xi chon sonʼnde (2 Pedro 3:​8, 9).

⁵ Tjínkʼa chjota xi kʼoasʼin síkjaʼaitsjen nga nʼio tísíkʼachxin Jeobá nga kje fetʼajin jme xi chon sonʼnde. Tonga je Pedro kʼoakitso nga tsín kʼoasʼin bʼéxki̱ nichxin je Jeobá josʼin bʼexkiaa ñá (tʼexkiai 2 Pedro 3:​8, 9). d Xi kao Jeobá tojngo nichxin tsole nga jngo jmi nó. Tsejtaa kʼoa tsín mele nga ʼya xi kjoeson, tonga kuicho nichxin nga sikjeson jme xi chon sonʼnde. Tsee kjoanda tjínná nga kjimasa tiʼmiyasonlee Énle Niná chjota ndʼaibi jngo tjíjtsa Sonʼnde.

6. Jósʼiaan nga tjenyatokon kuiyolee nichxinle Jeobá (2 Pedro 3:​11, 12).

⁶ Je Pedro kʼoatso nga tjínnele tjenyatokon kuiyolee nichxinle Jeobá (tʼexkiai 2 Pedro 3:​11, 12). e Jmé xi koasenkaoná nga tjenyatokon kuiyoaa. Tsa kʼoakoa̱nná, nyaon nyaon si̱kjaʼaitsjenjiaan josʼin kuiyoaa ya sonʼndenaxó. Cha̱niyalai jkui nga ñaki tsje ntjao̱ xi tichjenjtai kʼoa nga ndakjoan tsojmi xi tichinai. Tikjaʼaitsjenlai tsa jetjíofaʼáyanile je xíngi xi jekʼien kʼoa tsakui tiʼmiyalai jósʼin kitjoson je én xi tongini kinokjoa je chjota xi jekjoatse tsakatio. Tsa kʼoasʼiain, koasenkaoli nga tjenyatokon kuijnai kʼoa nga koa̱njinli nga jenichxin fetʼa tiyoaa. Kʼianga jeʼyaa jmeni xi koa̱n nichxin xi sʼa nroa alikui je nisinlee xi to énndiso bakóya (2 Ped. 3:17).

7. Jósʼin kuichomani tsa chjota kuinókjonlee.

⁷ ʼYañá nga jechrian tíjna nichxinle Jeobá. Kuinga ʼmiyasonnilee Énle Niná je chjota, tonga sakʼoa nokjoaan kʼoa tsín tso tokoán nga nokjoakaoñá Énle Niná. Kʼoati koan je Pedro, kʼianga tínijtsoʼa Jesús nkjín kʼa kʼoakitso nga tsín bexkon nga̱ chjota kitsokjonle (Mat. 26:​69-75). Tonga xijekoan, alikui tichjota kitsokjonnile kʼoa i kitso: “Ali jkonjinlao nga je” (1 Ped. 3:14). Tojo kitso Pedro koaan nʼiojin koaan nga tsín chjota kuijkónlee.

8. Jmé xi koasenkaoná nga tsín chjota kuinókjonlee (1 Pedro 3:15).

 ⁸ Jmé xi koasenkaoná nga nʼiojin koaan nga tsín chjota kuinókjonlee. Je Pedro i kitso: “Chʼa̱sjetsjao Cristo ya jinni̱ma̱no nga Naino ma” (tʼexkiai 1 Pedro 3:15). f Kui xi tsonile nga si̱kjaʼaitsjenjiaan jókji nganʼio tjínle je Jesús nga Nainá ma kʼoa nga Rey sʼin tíjna. Tsa tinokjuin nga tichja̱kaonajmíni Énle Niná tsa ʼyani, tikjaʼaitsjenjin je Jesús nga Rey sʼin tíjna kʼoa nga millón mani ánkje xi ya tjíokao. Tikjaʼaitsjenjin nga tsakʼaile “ngayije kjoatéxoma” je Jesús ya “ngʼajmi, kʼoa i̱ sonʼnde” kʼoa nga ya tjen tíjnakaoli “saʼnda nga kjoetʼa” jme xi chon sonʼnde (Mat. 28:​18-20). Je Pedro kʼoatso nga tjínnele kuiyondaa ngantsjai nga chja̱kaonajmíñá chjota xi tʼatsʼe Énle Niná. Tsa meli nga kʼuínyasuin ya tʼaxáli, ya ndʼiaskuela kʼoa tsa jñasani, títjonkjoanla tikjaʼaitsjain kʼiáni nga koa̱n chja̱kaonajmí je chjota kʼoa jméni xi kʼuínlai. Kʼoatʼinlai Jeobá nga katabasenkaoli nga nʼiojin koai̱n kʼoa tʼejngui tokuin nga je koasenkaoli nga tsín chjota kuinókjonlai (Hech. 4:29).

9. Kʼiáni nga tsín tsakakó kjoatsjoacha je Pedro (kʼoati chótsenlai sén xi faʼaitʼa).

⁹ Koanjinle Pedro jósʼin tjínnele koakoá  kjoatsjoacha. Kinrʼoé kʼianga i̱ kitso je Jesús: “Jngo kjoatéxoma chjotse xi tsjoano: Katamatsjoachao xíngio. Josʼin nga an koantsjoake̱no, kʼoasʼin katamatsjoachao xíngio” (Juan 13:34). Tonga xi koanskanni, alikui nda kisʼin je Pedro nga̱ chjota kitsokjonle. Ñandia nga tsín tiya tsakjenkaoni je chjotale Cristo xi tsín chjota judío. Je pastro Pablo kʼoakitso nga jaonkjaín koan Pedro nga kʼoakisʼin (Gál. 2:​11-14). Kisindayaa yaole Pedro nga kʼoatsakʼinle. Nga kiski nga jao cartale kʼoakitso nga tsín koa̱n nga tokʼoakuixoán nga tsjoachaa je ndsʼee, nga tjínnele koakoá nga tsjoachaa.

10. Jmé xi koasenkaoná nga koako kjoaixiaa kjoatsjoacha (1 Pedro 1:22).

¹⁰ Je Pedro kʼoakitso nga koakoá nga tsjoacha kjoaixiaa je ndsʼee (tʼexkiai 1 Pedro 1:22). g Nga tsjoacha maa xíngiaa yaa bakoñá nga nitjosoán Énle Niná, nga̱ kʼoatso nga “Niná tongóson fikao ngatsʼi” (Hech. 10:​34, 35). Tsa tokʼa xi tsjoacha koaan alikuijin tinitjosoán jokitso je Jesús xi tʼatsʼe kjoatsjoacha, ningalani tjín xi ngisa nʼio miyoná mani xi tjío ya jinjtín, tojo kisʼin je Jesús nga tjínkʼa xi ngisa nʼio miyole koanni (Juan 13:23; 20:2). Je Pedro kʼoakitso nga tjínnele tsjoacha koaan ngatsʼi je ndsʼee tojosʼin tsjoachaa je familianá (1 Ped. 2:17).

11. Jósʼin tíjna nga bako kjoaixiaa kjoatsjoacha.

¹¹ Je Pedro i kitso: “Katamatsjoachao xíngio kao ni̱ma̱no”. Jebi kui xi tsonile nga tjínnele tsjoacha koaan ninga ʼya xi josikaoná. Tobʼelañá, jósʼiaan tsa jokuitsoná kʼoa tsa josikaoná jngo ndsʼee. Tochajinle kʼoati koa̱nmená kʼoasikaongajaoñá. Tonga alikui sa̱sénle Jeobá tsa kʼoasʼiaan, tojo kitsole Jesús je Pedro (Juan 18:​10, 11). Je Pedro i kitso: “Ali kjoatsʼenjin ningósonkao xi kjoatsʼen, ali kjoaʼaontakonjin ningósonkao xi kjoaʼaontakon, tosa nda tichikontʼaon” (1 Ped. 3:9). Tsa bako kjoaixi kjoatsjoacha nda si̱koai toʼyani, ninga je xi jokuitsoli kʼoa tsa josikaoli.

12. 1) Tsa tsjoacha kjoaixiaa je ndsʼee, jmésa xi sʼiaan. 2) Jméni xi tiyondaa nga sʼiaan tojosʼin bakóyaná je video xi mi: Cuidemos nuestra valiosa unidad.

¹² Nga kiski xi títjon carta, je Pedro kʼoati kitso nga tsjoacha katamaa xíngiaa, “nga̱ nkjín kjoatsʼen bʼéʼmatʼain kjoatjaochabe” (1 Ped. 4:8). Kʼianga kiski Pedro én jebi tochajinle kui jaʼaitsjenle jmeni xi kitsole Jesús. Tsakui nichxin nʼio nda chjota kitsole yaole Pedro nga kʼoakitso nga saʼnda ñato kʼa sichatʼa. Tonga je Jesús kʼoakitsole nga tjínnele 77 kʼa sichatʼa, xi tsonile, nga tsín koa̱n kʼoexki̱ jotjín kʼa sichatʼa. Kʼoati tjínnele kʼoasʼiaan tsanda ñá (Mat. 18:​21, 22). A sakʼoa ñʼai mali nga ʼmitjenngi kjoafaʼaitsjen jebi. Tosi tonda tʼenelai yaoli nga tichatʼalai xi ngikʼa. Nga chjotajée maa toxá ñʼai ma sakʼoaniná nga nichatʼalee xíngiaa. Xi ngisa chjíle kuinga si̱chatʼalee xíngiaa kʼoa nda kjuinkoaa. h

13. Ánni nga sakʼoa ñʼai manile xi chjotajchínga sʼin tjío nga síkuinda je jtín.

¹³ Alikuijin kichajinle Pedro nga i̱ kitsole Jesús kʼianga jejaʼáyanile: “Tikuindai barréna” (Juan 21:16). Tsa chjotajchínga sʼin tijnai, majinjinli nga tjínnele si̱tjosuin kjoafaʼaitsjen jebi, tonga sakʼoajin ñʼai koa̱nli nga kʼoasʼiain. Je xi títjon  sʼin xi chjotajchínga sʼin tjío kuinga sikuinda familiale, nga koa̱njngíʼa kʼoa nga kuitsoyale xi tʼatsʼe Niná. Kʼoati machjén nga nda choa̱ koatio nga kuitsoyason, nga nda koationdale jme xi faʼa nga satíoná kjoajtín kʼoa nga koationda je kjoanokjoaya nga satío kjoajtíntse. Tjínkʼa xi ya tjíojinle je Comités de Enlace con los Hospitales kao Departamento Local de Diseño y Construcción. Tsee xá kjinele xi chjotajchínga sʼin tjío.

14. Ánni nga síkuindani ndsʼe̱ je xi chjotajchínga sʼin tjío, kʼoa jméni xi kuinyakao nga kʼoasʼin (1 Pedro 5:​1-4).

¹⁴ Je Pedro i kitsole chjotale Cristo xi chjotajchínga sʼin tjío: “Tikuindao je chjotale Niná xi tjíojinno” (tʼexkiai 1 Pedro 5:​1-4). i Je xi chjotajchínga sʼin tjío tsjoake kʼoa síkuindaa je chjotale Cristo. Ninga kʼoalani, sakʼoajin kʼoasʼin sikjaʼaitsjen nga tsín kuitjosonle xá jebi. Tsakui nga tsín maʼale kʼoa tsakuije̱ nga jenʼio bijtale nga sixá. Tsa kʼoakjimai, tʼeyanajmílai Jeobá jotjín tokuin. Je Pedro i kitso: “Tsa jngo xi síxákao, katasíxákao jo tjín nganʼio xi tsjoá Niná” (1 Ped. 4:11). Tsakui kjoa xi tsín sʼe̱ndajin ndʼaibi tjíofaʼatojin je ndsʼee, kuenta tʼiaon nga je Jesús xi ngisa nda koasenkao ndʼaibi kao nichxin xi sʼa nroa, nga̱ jé xi ngisa nda síkuindaná. Je xi mele Jeobá kuinga tsjoake katama ndsʼe̱ xi chjotajchínga sʼin tjío nga katasíkuinda kʼoa nga nda choa̱ katabatío.

15. Jmé xi sʼín jngo xi chjotajchínga sʼin tíjna nga síkuinda je jtín (kʼoati chótsenlai sén xi faʼaitʼa).

¹⁵ Jngo ndsʼee xi jetjínle kjoafaʼaitsjen xi chjotajchínga sʼin tíjna, xi William ʼmi, nʼio tsjoále kjoandosin nga síkuinda je ndsʼe̱. Kʼianga tosʼa tsʼatsen je chʼin COVID-19, je ndsʼee jebi kao xi ngikʼa ndsʼee xi kʼoati chjotajchínga sʼin tjío nʼio kitsjoale kjoandosin nga xki̱ xomana nga kinchja̱le je ndsʼee xi ya tjíojin grupole. Ánni nga kʼoakisʼinni. Itso je ndsʼee: “Nkjín ndsʼee xi toje tjío ya ndʼiale kʼoa tsín ʼya xi tjínle. Nga toje tjío sakʼoajin kisikinroajen kon”. Kʼianga  kjoa faʼatojin jngo ndsʼee, je William nda nrʼoéle ánni nga beni jmeni xi koasenkao ndsʼee jebi kʼoa jméni xi makjáojinle. Xijema, kui básjaiya jmeni xi ngisa nda koasenkao je ndsʼee, jolani je video xi faʼaitʼa ya jw.org. Je William itsosa: “Ngisaa nʼio timachjénngáni ndʼaibi nga si̱kuindaa je ndsʼee. Tojo nʼia nga binyakoaa chjota nga katabe xi tʼatsʼe Niná, kʼoati machjén nga kuinyakoaa je ndsʼee nga tosi tonda je Niná katasíxále”.

16. Jósʼin kjuintjenngiaa je kjoafaʼaitsjen xi faʼaitʼa je carta xi kiski pastro Pedro.

¹⁶ I̱ kjoaʼmiya jebi tokʼala xi kanikʼaxkiaa jmeni xi bakóyaná nga jao carta xi kiski Pedro. Kaʼyajián jñani machjén nga si̱ndayaa yaoná, jolani nga kui si̱kjaʼaitsjenjiaan josʼin kuiyoaa kʼianga jeʼndenaxó koa̱n. A mená chja̱kaonajmíñá Énle Niná je chjota xi ñatjen nixá, xi ñatjen mangián skuela kʼoa tsa jñasani. Jósasʼin koa̱n koakoá nga tsjoachaa je ndsʼee. Tsa chjotajchínga sʼin tijnai, a ñaki kʼoatjín tokuin nga nikuindai je choʼndale Jeobá kʼoa a kao kjoatsjoa kʼoanʼiani. Tsa tsín kʼoasʼin tíbitjosonli jmeni xi jekanikʼaxkiaa kuenta tʼiain nga nʼio nda chjota je Nainá kʼoa nga je koasenkaoná nga si̱ndayaa yaoná (1 Ped. 2:3). Je Pedro i kitso: “Je soa Niná sindayano, sikʼéjnandano, tsjoáno nganʼio, nda sikʼéyono” (1 Ped. 5:10).

17. Jmé kjoanda xi sʼe̱ná tsa tosi tonda je Jeobá si̱xálee kʼoa tsa kʼoaiʼndee nga je sindayaná.

¹⁷ Ñandia nga kʼoakitso Pedro nga tsín bakinle nga ya koase̱njna ngixko̱n ʼNdíle Niná (Luc. 5:8). Tonga nga jekoanni nda kisixále Niná, nga̱ je Jeobá kao Jesús tsjoake koan kʼoa jé tsakinyakao. Kuinga kitjoʼndenile nga jaʼasʼenjin “kao kjoajeya je kjoatéxomantsjaile Jesucristo xi Nainá kʼoa xi tsakʼasjentjainá” (2 Ped. 1:11). Nʼio tse kjoanda tsakʼaile Pedro. Tsa tosi tonda je Jeobá si̱xálai kʼoa tsa kʼoaiʼndai nga je sindayali, kʼoati tjoéli kjoanda nga koa̱n kuijnai ngantsjai nichxin. Kʼoa kuitjoson je én jebi, xi tso: “Kui nga makjainno sʼe̱no kjoabitjontjai tʼatsʼe ni̱ma̱no” (1 Ped. 1:9).