1. Jméni xi tojeme kʼoasʼin je Jesús.

 JEMACHRIANLE nga kʼoendajinle kjoa Jesús ngatsʼi chjota. ʼYañá nga tojeme kʼoakoa̱n, nga̱ je Jesús kʼoakitso jme choa̱ xi sʼe̱ kʼianga jetíbatéxoma ya ngʼajmi kʼoa kʼianga to jetífikjetʼa nichxin (Mat. 24:3). Yaa faʼaitʼa jmeni xi kitso ya Mateo capítulo 24 kao 25, ya Marcos capítulo 13 kao ya Lucas capítulo 21.

2. Jmé xi chótʼayajiaan i̱ kjoaʼmiya jebi, kʼoa ánni.

² Jan choa̱ kinchja̱ni Jesús xi binyakaoná nga tongini biyondaa. Kui kinchja̱ni tʼatsʼe barré kao tindso, tʼatsʼe te yánchjínxo̱ngó kao tʼatsʼe tao̱n xi talento ʼmi. Je choa̱ jebi kui bakóyaná nga kui kuenta sʼin je Jesús josʼín nga jngó jngó chjota nga kʼoendajinle kjoa kʼoa kui chótʼayajiaan i̱ kjoaʼmiya jebi jméni xi bakóyaná. Kataʼyala tʼatsʼe barré kao tindso.

JE BARRÉ KAO TINDSO

3. Kʼiáni kʼoakuitso Jesús ʼyáni xi barré sʼin jchatokon kʼoa ʼyáni xi tindso sʼin jchatokon.

³ Kʼianga kʼoendajinle kjoa Jesús nga jngó jngó chjota, kʼoakitso nga kui kuenta sʼin tsa kinrʼoé je Énle Niná kʼoa tsa kitsjoanganʼiole je chjotale xi ya ngʼajmi koai (Mat. 25:​31-46). Kʼiaa nga jetíjna kjoañʼai xi nʼio tse nga tojeme kjoaʼaí Armagedón kʼoakuitso Jesús ʼyáni xi barré sʼin jchatokon kʼoa ʼyáni xi tindso sʼin jchatokon (Mat. 24:21). Tojo sʼín jngo chjota xi cho̱ koʼnda nga tʼaxin síkatío je barré kʼoa tʼaxin síkatío je tindso, kʼoati sʼin je Jesús, tʼaxin sikatío je xi tsjoánganʼiole chjotale xi ya ngʼajmi koai kʼoa tʼaxin sikatío je xi tsín kʼoasʼín.

4. Tojo tso Isaías 11:​3, 4, ánni tjínjngoni tokoán nga ñaki nda kʼoendajinle kjoa Jesús je chjota (kʼoati chótsenlai sén xi faʼaitʼa).

⁴ Jé Jeobá kitsjoale xá je Jesús nga juez koa̱n. Kʼoa je Biblia kʼoatso nga nʼio ndasʼin kʼoendajinle kjoa je chjota (tʼexkiai  Isaías 11:​3, 4). a Kuenta sʼín jmeni xi síkjaʼaitsjen nga jngó jngó chjota, jmeni xi tso kʼoa jmeni xi sʼín. Kʼoati kuenta sʼín josíkao je chjotale xi ya ngʼajmi koai (Mat. 12:​36, 37; 25:40). Kʼianga kʼoendajin kjoa je Jesús, skoee ʼyáni xi tjíotsjoánganʼiole je chjotale xi ya ngʼajmi koai kʼoa xi tjíobinyakao jme xá xi tjíosʼín. b Jngo koya josʼin kʼoainganʼiolee chjotale Cristo jebi kʼiaa nga kʼuínyasoán je Énle Niná. Tsa kʼoasʼiaan, chjotakixi sʼin skoe̱konná kʼoa koaan kuiyoaa ngantsjai nichxin i̱ Sonʼnde (Mat. 25:46; Apoc. 7:​16, 17). Nʼio tse kjoanda sʼe̱ná tsa tosi tonda kixi koaan kʼianga jetíjna kjoañʼai xi nʼio tse kʼoa kʼianga jekjoaʼato, nga̱ yaa sʼe̱tʼa jaʼaínná ya libro “xi tsʼe kjoabijnachon” (Apoc. 20:15).

5. Jmé xi bakóyaná nga kui kinchja̱ni Jesús tʼatsʼe barré kao tindso, kʼoa ʼyáni xi tjínnele kuenta sʼin jmeni xi kitso.

⁵ Koakoá nga kixi maa. Kʼianga kui choa̱ kisichjén Jesús tʼatsʼe barré kao tindso, jé ngisa kinchja̱ni je xi i̱ Sonʼnde koyale koatio. Kʼoasʼin bakoní nga kixi kjima kʼianga tsjoánganʼiole chjotale Cristo xi ya ngʼajmi koai, nga tsoyason kʼoa nga fitjenngi josʼin bándiaa je choʼnda xi nʼiotʼakon, xi nda be xá (Mat. 24:45). Je chjotale Cristo xi ya ngʼajmi tjínle kjoachoya kʼoati machjén nga kuenta sʼin jmeni xi kitso Jesús nga kui choa̱ kisikʼaxki̱ tʼatsʼe barré kao tindso, nga̱ je Jesús kuenta sʼín jmeni xi síkjaʼaitsjen chjotale Cristo jebi, jmeni xi tso kʼoa jmeni xi sʼín. Kuinga machjénni nga kʼoati tjínnele kixi koa̱n. Kuila chótʼayajiaan ndʼai je xi ngi jao choa̱ kisikʼaxki̱ Jesús, xi faʼaitʼa ya Mateo capítulo 25, xi kui nchja̱ni tʼatsʼe chjotale Cristo xi ya ngʼajmi koai. Kataʼyala tʼatsʼe xi te yánchjínxo̱ngó xi kinchja̱ni Jesús.

XI TE YÁNCHJÍNXO̱NGÓ

6. Jósʼin tsakakó nga chjine je xi aon yánchjínxo̱ngó (Mateo 25:​6-10).

⁶ Kui kinchja̱ni Jesús tʼatsʼe te yánchjínxo̱ngó xi fikoyale je xi kuixankao (Mat. 25:​1-4). Nga te yánchjínxo̱ngó koanmele “jaʼasʼen kao je ya kjoabixan”. Je Jesús kʼoakitso nga aon mani xi chjine kʼoa aon mani xi chini. Je xi chjine tjíondaa kʼoa tjenyatokon tjío nga tjíokoyale je xi kuixankao ninga tse kʼoachxinle kʼoa ninga jenjio kjoaʼaí. Kuinga tsakatíondani je lámpara xi siti̱ xinyále xi siʼisenle kʼoa yʼa je xjoa̱ xi nyale siti̱ tsa totsejinni kʼoachxinle je xi tjíokoyale. Nga kʼoakisʼin, alikui kitsʼao je lámparale (tʼexkiai Mateo 25:​6-10). c Kʼianga kicho je xi kuixankao, je xi aon yánchjínxo̱ngó xi chjine jaʼasʼenkao ya kjoabixan. Kʼoati koa̱n je chjotale Cristo xi ya ngʼajmi koai, je xi kixi koa̱n kʼoa xi tjenyatokon koatio saʼnda nga kjoaʼaí je Jesús, yaa koatexomakao ya ngʼajmi (Apoc. 7:​1-3). d Tonga jókoa̱nni je yánchjínxo̱ngó xi chini.

7. Jmé xi koanle je xi aon yánchjínxo̱ngó xi chini, kʼoa ánni.

⁷ Je yánchjínxo̱ngó xi aon mani xi chini,  alikui tjíonda kʼianga kicho je xi kuixankao. Kʼoa kʼia nga tojeme kuicho, tokʼiakjoan me fitsʼao je lámparale. Kʼoa nga tsín yʼa siti̱ kʼiaa kikatse, kʼoa tokʼiakjoan tsín ya tjío nga kicho je xi kuixankao. Je yánchjínxo̱ngó “xi tjíonda, jaʼasʼen kao je ya kjoabixan, kʼia kisʼechjoa xo̱ntjoa” (Mat. 25:10). Kʼianga kicho je yánchjínxo̱ngó xi chini kʼoati koanmele nga jaʼasʼen jña tíjna je xi kuixankao, tonga je i kitsole: “Likui ʼbexkonno” (Mat. 25:​11, 12). Je xi aon yánchjínxo̱ngó xi chini alikui tongini tsakationda nga kiskoyale je xi kuixankao. Jmé xi bakóyale choa̱ jebi je chjotale Cristo xi ya ngʼajmi koai.

8, 9. Jmé xi bakóyale je chjotale Cristo xi ya ngʼajmi koai je choa̱ xi kitsoya Jesús tʼatsʼe xi te yánchjínxo̱ngó (kʼoati chótsenlai sén xi faʼaitʼa).

⁸ Tongini kuiyondaa kʼoa tjenyatokon kuiyoaa. Ali tsakuijin xi kitso Jesús nga jao koya tjínni je chjotale Cristo xi ya ngʼajmi koai, tsa jngojtín mani xi tjíonda kʼoa xi tjenyatokon koatio saʼnda nga kuichokjetʼa jme xi chon sonʼnde kʼoa tsa jngojtín mani xi tsín tjíonda. Je xi kitsole Jesús je chjotale xi ya ngʼajmi koai, kuinga tsín tjoéle je kjoanda xi tjíokoyale tsa tsín koationda nga chókjoale saʼnda nga kjoetʼa jme xi chon sonʼnde (Juan 14:​3, 4). Nʼio tjínle kjoandosin jebi, ni ya ngʼajmi tjínná kjoachoya kʼoa ni i̱ Sonʼnde choyalee kuiyoaa, ngatsʼiñá nga tjínnele kuenta sʼiaan jmeni xi kitso Jesús nga kui kinchja̱ni tʼatsʼe xi te yánchjínxo̱ngó. Tjínnele tjenyatokon kuiyoaa kʼoa kuiyondaa nga chókjoaná saʼnda nga kuichokjetʼa jme xi chon sonʼnde (Mat. 24:13).

⁹ Tojosʼin tiʼyaa, kʼianga kui choa̱ tsakʼéjna je Jesús tʼatsʼe xi te yánchjínxo̱ngó, kui tsakakóya nga nʼio chjíle nga kuiyondaa ngantsjai kʼoa nga tjenyatokon kuiyoaa. Xijekoan, ijngo choa̱ kitsoya tʼatsʼe tao̱n xi talento ʼmi. Kʼoa je choa̱ jebi kui bakóyaná jokji chjíle nga chjotanixá maa.

TAO̱N XI TALENTO ʼMI

10. Jósʼin tsakakó nga kixi koan je xi jao choʼnda (Mateo 25:​19-23).

¹⁰ Kʼianga kui choa̱ kisikʼéjna Jesús tʼatsʼe tao̱n xi talento ʼmi, jao choʼnda kisikʼaxki̱ xi kixi kitʼale naile kʼoa jngo xi tsín kʼoakisʼin  (Mat. 25:​14-18). Kʼianga kjesa xin ʼnde fijin je xi nai ma, kui tao̱n xi talento ʼmi kitsjoale je choʼndale nga katasíxákao. Tsee tao̱n tjínni xi tsakʼaile nga jngó jngó choʼnda. Je choʼnda xi jao mani kixi kitʼale je naile, nda kisixá kʼoa kisikinjeson je tao̱n. Kʼianga jejaʼaini naile, jejaoya kʼoakji tao̱n kitsjoale jotjín tsakʼaile. Kʼoa je naile i kitsole nga jngó jngó choʼnda jebi: “Titjásʼenjin kjoatsjoale naili” (tʼexkiai Mateo 25:​19-23). e Tonga jókisʼin je xi ijngo choʼnda.

11. Jókoantʼain je choʼnda xi tsʼe, kʼoa ánni.

¹¹ Je xi nai ma jngo talento kitsjoale je xi majanni choʼnda nga kʼoati katasíxákao je tao̱n. Tonga nga tsʼe choʼnda jebi tosaa totsakʼéjnañe je tao̱n xi tsakʼaile nga tsakʼéjnaʼma. Kʼoa kʼianga jaʼani je naile tikʼoatjín tao̱n kitsjoanile jotjín tsakʼaile. ʼNdele nga sijéle kjoanichatʼa je naile nga tsín kisixákao je tao̱n xi tsakʼaile, tosaa i̱ kitsole: “ʼBeña nga nʼio tsʼain”. Nga kʼoakisʼin choʼnda jebi, je naile tsakatekjáyale, tsakjáʼale je tao̱n xi kitsjoale kʼoa tsakʼaonsjee ndʼia (Mat. 25:​24, 26-30).

12. ʼYá xi tsoyanile nichxin xi tiyoaa ndʼaibi je xi jao choʼnda.

¹² Je choʼnda xi jao mani xi kixi, jé tsoyanile chjotale Cristo xi ya ngʼajmi koai. Jé Jesús xi naile ma, kʼoa itsole nga jngó jngó chjotale Cristo jebi: “Titjásʼenjin kjoatsjoale naili”. Kui xi tsonile nga ya ngʼajmi kjoaʼáyanile, kʼoa nga kʼoakoa̱n ya Biblia je xi títjon kjoafaʼáya tsole (Mat. 25:​21, 23; Apoc. 20:5b). Kʼoa nga kui kisikʼaxki̱ Jesús je choʼnda xi tsʼe totsakájinkon je chjotale xi ya ngʼajmi koai. Kataʼyala ánni.

13, 14. Jmé xi bakóyale je chjotale Cristo xi ya ngʼajmi koai nga kui choa̱ kisikʼéjna Jesús tʼatsʼe tao̱n xi talento ʼmi (kʼoati chótsenlai sén xi faʼaitʼa).

¹³ Koakoá nga chjotanixá maa. Kʼianga  kui choa̱ kisikʼaxki̱ Jesús tʼatsʼe tao̱n xi talento ʼmi ali tsakuijin xi kitso nga tsʼe koa̱n je chjotale Cristo xi ya ngʼajmi koai. Totsakájinkon tojo kitso nga kitsoya je choa̱ tʼatsʼe xi te yánchjínxo̱ngó. Kui kitsoya nga tsín tijme kjoanda sʼe̱nile je chjotale Cristo xi ya ngʼajmi tjínle kjoachoya tsa tsín tikao kjoatsjoa sixáni. Alikui tikui kjoanda sʼe̱nile nga kinchja̱le Niná kʼoa nga tsakjaʼájin, kʼoa tsín koa̱n ya koatexomakao Jesús ya ngʼajmi (2 Ped. 1:10).

¹⁴ Kʼianga kui choa̱ tsakatío Jesús tʼatsʼe xi te yánchjínxo̱ngó kao tao̱n xi talento ʼmi, kui kitsoya nga tjínnele koationda ngatsʼi chjotale Cristo xi ya ngʼajmi koai, nga tjenyatokon koatio kʼoa nga chjotanixá katama. Tonga ali tokuijin jebi xi kitsole Jesús je chjotale xi ya ngʼajmi koai. Ijngosa choa̱ faʼaitʼa ya Mateo 24:​40, 41. Chótʼayajinla texto jebi.

ʼYÁNI “XI TJÓBÉ”

15, 16. Tojo tso ya Mateo 24:​40, 41, ánni machjénni nga tjenyatokon koatio je chjotale Cristo xi ya ngʼajmi tjínle kjoachoya.

¹⁵ Nga kjesa kui nchja̱jinni Jesús tʼatsʼe xi jan choa̱ jekaʼyaa, kui kʼoakitso jokoa̱n kʼianga sʼe̱ndajinle kjoa je chjotale xi ya ngʼajmi tjínle kjoachoya, nga jchale ʼyáni xi toxá kitjoéjinni nga kui kjoanda kʼoaile. Kui kinchja̱ni tʼatsʼe jao chjota xi tjíosíxá ya jinjñá kʼoa jao yánchjín xi molino tjíosíkʼatji nga tjíobʼao. Tongóson kui xá tjíosʼín je chjota xi tjíosíxá ya jinjñá kao je xi jao yánchjín xi molino tjíosíkʼatji nga tjíobʼao. Tonga je Jesús i kitso: “Jngo xi tjóbé, kʼoa xi ngijngo sʼe̱jnaní” (tʼexkiai Mateo 24:​40, 41). f To jotso je versículo xi fisani, je Jesús i kitsole chjotatjenngile: “Tjenyatakon tiyo, nga̱ tsín tsa ʼyao jme ora nga kjoaʼaí Naino” (Mat. 24:42). Me kʼoati kui én kisichjén je Jesús kʼianga to jekisikjetʼani nga kitsoya tʼatsʼe xi te yánchjínxo̱ngó (Mat. 25:13). Nga kʼoakitso tojngo koya xi kinchja̱ni. Tojekjoán “xi tjóbé” nga ya koatexomakao Jesús ya ngʼajmi je xi toxá kitjoéjinni nga ya ngʼajmi koai kʼoa xi kixi koa̱n (Juan 14:3).

¹⁶ Koakoá nga tjenyatokon tiyoaa. Tsa tsín tjenyatokon kʼoéjna jngo chjotale Cristo xi ya ngʼajmi tjínle kjoachoya alikuijinni ya koai (Mat. 24:31). Kʼoa ngatsʼi xi i̱ Sonʼnde koyale koatio kʼoati machjén nga kuenta sʼin jmeni xi kitso je Jesús nga kixi koa̱n kʼoa nga tjenyatokon koatio.

17. Ánni nga tsínkui nikjáojinñá tsa tosʼa tíkjoéjin kʼa Jeobá je chjotale Cristo xi ya ngʼajmi koai.

¹⁷ Nga nda ʼyaxkoaan je Jeobá ʼyañá nga kui kʼoasʼín ngantsjai je xi kixi tíjna. Kuinga tsínkui nikjáojinñá tsa tochriansʼa tíkjoéjin kʼa je chjotale Cristo xi ya ngʼajmi koai. g Nga̱ ʼyañá jmeni xi kitso Jesús kʼianga kui kinchja̱ni tʼatsʼe chjota xi síxájin tsojmintje, nga tjínkʼa xi kʼia tsakʼaixále nga jekoanxon kʼoa to ijngosa hora kichosíxá (Mat. 20:​1-16). Tongóson kji koanchjíle ninga je xi tanjio kichosíxá kʼoa ninga je xi tongotjosa kichosíxá. Tikʼoasʼinni, kui kjoanda sʼe̱le nga ya ngʼajmi koai je chjotale Cristo xi ya tjínle kjoachoya tsa tosi tonda kixi koa̱n, ni jekjoatse kʼoa ni chriansʼa kitjoéjin.

KUENTA SʼIAAN JMENI XI KITSO JESÚS

18, 19. Jméni xi bakóyaná je xi kachotʼayajiaan i̱ kjoaʼmiya jebi.

¹⁸ Tojosʼin kaʼyaa i̱ kjoaʼmiya jebi, kʼianga kui kinchja̱ni Jesús tʼatsʼe barré kao tindso, kui bakóyaná nga nʼio chjíle nga tosi tonda kixi koa̱n je xi i̱ Sonʼnde koyale koatio. Tjínnele  kixi koa̱n ndʼaibi kʼoa kʼianga jekjoaʼaí kjoañʼai xi nʼio tse. Kʼianga jekʼoakoa̱n, jé Jesús xi kuitsoni ʼyáni xi kixi sʼin skoe̱kon kʼoa kui kjoanda sʼe̱le nga koa̱n koatio ngantsjai nichxin (Mat. 25:46).

¹⁹ Kʼoati jao choa̱ kaʼyaa xi tobájinkon chjotale Cristo xi ya ngʼajmi koai. Kʼianga kui kisikʼaxki̱ Jesús je xi te yánchjínxo̱ngó, aon mani xi tsakakó nga tjíonda kʼoa tjenyatokon tsakatio. Chjine koan je xi aon yánchjínxo̱ngó nga kiskoyale je xi kuixankao, tonga je xi ngi aon xi chini koan alikui tsakationda. Kʼoa je xi kuixankao tsakai alikui tikitsjoaʼndenile nga jaʼasʼen jñani tíjna kjoabixan. Jebi kui bakóyaná nga tjínnele kuiyondaa saʼnda nga kjoetʼa jme xi chon sonʼnde. Kʼianga kui kinchja̱ni Jesús je tao̱n xi talento ʼmi, jao choʼnda kisikʼaxki̱ xi nʼio nda kisixá. Kʼianga kixi koan kisikinjesonsa je tao̱nle naile, kʼoa je naile nda kisʼe kon. Tonga je choʼnda xi tsʼe koan tsakichonsjee ndʼia. Jebi kui bakóyaná nga tjínnele nʼio nda si̱xálee Jeobá saʼnda nga kjoetʼa jme xi chon sonʼnde. Kʼoa xi tofetʼani kaʼyaa kuinga kʼoakitso Jesús nga tjínnele tjenyatokon koatio je chjotale xi ya ngʼajmi koai ánni nga tjoénile kjoanda nga ya koatexomakao Jesús. Je chjotale Cristo jebi kui xi mele nga jekatafaʼai nichxin nga ya koatexomakao Jesús ya ngʼajmi. Kʼoa kʼianga jekjoetʼa Armagedón kʼiaa kuixan je Barré, xi tsonile je Cristo. Kʼoa je xi chjoónle koa̱n jé xi 144,000 mani, je chjotale Cristo xi ya ngʼajmi koai (2 Tes. 2:1; Apoc. 19:9).

20. Jmé kjoanda xi so̱koná tsa kuenta sʼiaan jmeni xi tsoná Jeobá.

²⁰ Jemachrianle nga kʼoendajinle kjoa Jesús je chjota. Tonga alikui koa̱n kuijkoán. Tsa kixi kjuintʼalee Jeobá jé tsjoáná “nganʼio xi nʼio tse” ánni nga sa̱kósíniná kjoanda “ngixko̱n ʼndíle chjota” (2 Cor. 4:7; Luc. 21:36). Ni ya ngʼajmi tjínná kjoachoya kʼoa ni i̱ Sonʼnde choyalee kuiyoaa machjén nga kuenta sʼiaan jmeni xi kitso je Jesús tojonásʼin kaʼyaa je choa̱ xi jekanikʼaxkiaa. Tsa kʼoasʼiaan, nda kuiyoaa ngixko̱n Niná kʼoa je nʼio tse kjoanda koakoná nga ya kʼoetʼa jaʼaínná ya libro “xi tsʼe kjoabijnachon” (Dan. 12:1; Apoc. 3:5).