1, 2. 1) Jósʼin tjío je chjotale Cristo xi Judea tsʼe nga kiskile Pablo. 2) Ánni kʼoabixónñá nga kʼiakjoán kichole xo̱n xi kiskile Pablo kʼianga koanchjénle.

 KʼIANGA jekʼien Jesús nʼio tse kjoa jaʼatojin je chjotale Cristo xi chjota hebreo. Chjota kitjenngike kʼianga to chriankʼia kisʼejna je jtín ya Jerusalén (Hech. 8:1). Kʼoa nga jekan nó jaʼato, tsee kjoa jaʼatojin je chjotale Cristo xi Judea tsʼe nga kjinrá kisʼe (Hech. 11:​27-30). Kʼianga nó 61 nda tsakatio choatse je chjotale Cristo. Kʼiaa kichole jngo xo̱n xi je pastro Pablo kiskile kʼoa kui xi nʼio nda tsakinyakao.

² Je xo̱n xi kinikasénle je chjotale Cristo xi chjota hebreo kʼiakjoán kicho nga koanchjénle nga̱ tochoatsesa nga nda tsakatio. Je kjoafaʼaitsjen xi kitsjoale Pablo kui xi tsakinyakao nga kiskale je kjoa xi jaʼatojin nga koanskanni. Nga kʼia, tojeme kuichonikje naxinandá Jerusalén tojo kitso je Jesús (Luc. 21:20). Niʼyajin xi kisʼejinle kʼiákjoánni nga kʼoakoa̱n, nijejinla Pablo kʼoa nijejinla chjotale Cristo xi Judea tjío. Tonga nga kjesa kʼoamajin, tjínnele tsakationda je chjotale Cristo nga chókjoajinle je kjoa xi kjoaʼatojin kʼoa nga nʼio sa̱tío kjoamakjainle (Heb. 10:25; 12:​1, 2).

3. Ánni machjénni nga chótʼayajiaan ndʼaibi je xo̱n xi kichjile chjotale Cristo xi chjota hebreo.

 ³ Nichxin xi tiyoaa ndʼai kʼoati tojeme kjoaʼaí je kjoañʼai xi nʼio tsʼe, kʼoa ngisaa tsʼato kʼoakoa̱n jokoan nga tsakatio chjotale Cristo ngasʼa (Mat. 24:21; Apoc. 16:​14, 16). Je kjoafaʼaitsjen xi kitsjoale Jeobá je chjotale Cristo nga kʼia kʼoati kuinyakaoná ñá ndʼaibi. Kataʼyala kʼa.

NʼIO KATASʼEJNA JE KJOAMAKJAINNÁ

4. Jmé kjoa xi jaʼatojin je chjota judío xi chjotale Cristo koan (kʼoati chótsenlai sén xi faʼaitʼa).

⁴ Je chjotale Cristo xi kiskile Pablo religiónle chjota judío tsakatiojin tsakai kʼoa kuinga nkjín koya xi ñʼai koannile. Nga títjon, je chjota judío naxinandále Niná koan. Nkjín nó nga ya tjen Jerusalén tsakatéxomani xi rey sʼin tsakatio xi je Jeobá kiskoejin kʼoa yaa kisʼejna je yo̱ngo̱. Je chjota judío kisitjoson je kjoatéxomale Moisés kao jmeni xi tsakakóya je chjota xi nyatítjonle religión. Tsakʼaile kjoatéxoma tʼatsʼe jokjoan tsojmi xi ski̱ne, tʼatsʼe kjoacircuncisión kʼoa tʼatsʼe josʼin skoe̱kon chjota xi xin naxinandále. Tonga kʼianga jekʼien je Jesús, je Jeobá alikui tikui kisijéni nga tjín xi kʼoaitʼale ya yo̱ngo̱. Je chjota judío xi chjotale Cristo koan ñʼai koanle nga kui kitjenngi je kjoafaʼaitsjen xi tsakʼaile nga̱ kui je kjoatéxomale Moisés sítjoson tsakai (Heb. 10:​1, 4, 10). Kʼoati ñʼai koan kʼale chjotale Cristo xi jenʼio tjío kjoamakjainle, jolani pastro Pedro (Hech. 10:​9-14; Gál. 2:​11-14). Kʼoa je xi nyatítjonle religiónle chjota judío kitjenngike je xi chjotale Cristo koan.

5. ʼYáni xi kitjenngike chjotale Cristo.

⁵ Je xi kitjenngike chjotale Cristo xi Judea tsʼe, tijéni je chjotale Cristo xi kʼoakitso nga tjínnele tosi tonda kui kjoatéxomale Moisés koaitjenngi, tsakui nichxin kui kʼoakitsoni nga tsín chjota koaitjenngike (Gál. 6:12). Kʼoati kitjenngike je chjota xi tsakinyatítjonle  religiónle chjota judío, xi kʼoakitso nga yátsʼi̱n tsakinyále Niná je xi chjotale Cristo koan. Jmé xi tsakinyakao chjotale Cristo nga kiskale kjoa xi jaʼatojin.

6. Jméni xi kitsole Pablo je chjotale Cristo (Hebreos 5:14; 6:1).

⁶ Je Pablo kʼoakitsole je chjotale Cristo nga ngisa nda katakotʼayajin je Énle Niná (tʼexkiai Hebreos 5:14; a 6:1 b). Yaa Énle Niná tsakʼangini Pablo nga kitsoyale je chjotale Cristo nga ngisa ndatjín josʼin tjíobexkón Jeobá tikʼoajinni jósʼín je chjota judío. c Kʼoakitsole nga ngisasa nda katakotʼayajin jokjoantjínni je Énle Niná ánni nga koa̱njinnile jmeni xi tsínni kʼoatjín kʼoa tosi tonda je Niná sixánile.

7. Jmé kjoa xi bitjatojiaan ndʼaibi.

⁷ Nichxin xi tiyoaa ndʼai kʼoati kui én kaníbason chjota jmeni xi tsín kixi tíjna ngixko̱n Jeobá kʼoa alikui sasénle josʼin makjainná. Tjínkʼa xi kʼoatso nga tsín kixi tíjna josʼin síkjaʼaitsjen je testigole Jeobá nga kui fitjenngi jotso je kjoatéxoma xi tsjoá Biblia tʼatsʼe nga xínkjín fayokao chjota. Sa kjaʼaí sa kjaʼaí tjíosʼín je chjota kʼoa tsín kʼoasʼin síkjaʼaitsjen josʼin mele Jeobá (Prov. 17:15). Kuinga machjénni nga kataʼyaa jmeni xi tsínni kʼoatjín, nga̱ je chjota kui xi mele nga si̱kʼajenlee tokoán kʼoa nga tsín tije Jeobá si̱xánilee (Heb. 13:9).

8. Jméni xi koasenkaoná nga tosi tonda nʼio sʼe̱jna kjoamakjainná.

⁸ Je Pablo kʼoakitsole chjotale Cristo xi chjota hebreo nga nʼio katasatío kjoamakjainle. Kʼoati machjén nga kʼoasʼiaan tsanda ñá. Kʼianga nʼio sʼe̱jna kjoamakjainná machjén nga chótʼayajiaan jotso Énle Niná kʼoa kʼoasʼin si̱kjaʼaitsjeen josʼin síkjaʼaitsjen Jeobá. Ninga jetsakʼaitʼalee yaoná Niná kʼoa ninga jetsangínsʼenngindá, machjén nga ntsjaintsjai kʼoéxkiaa kʼoa chótʼayajiaan Énle Niná. Machjén nga kʼoasʼiaan, ni chriansʼa kʼoa ni jekjoatse tichotʼayá (Sal. 1:2). Tsa ntsjaintsjai chótʼayajiaan je Biblia kui xi koasenkaoná nga nʼio sʼe̱jna kjoamakjainná. Kui xi kitso je Pablo nga tjínnele kʼoasʼiaan (Heb. 11:​1, 6).

KUITJONTJAI JE XI MAKJAINLE

9. Ánni tjínnenile nga ñaki kʼoatsakatío kon je chjotale Cristo nga ngisa ndatjín nga sitjoson jmeni xi kitsole Jesús.

⁹ Nga nʼio kisatio kjoamakjainle je chjotale Cristo xi Judea tsʼe kui xi tsakinyakao nga kinjengile yaole kʼianga kichone kjoaxkón (Heb. 10:​37-39). Je Jesús kʼoakitsole chjotale nga tjínnele ya tóka jñani nindo chon kʼianga jekuicho sondado ya Jerusalén. Tjínnele kisitjoson ngatsʼi je chjotale Cristo jmeni xi tsakʼinle, ni je xi ya Jerusalén tjío kʼoa ni je xi toya ndaile tjío (Luc. 21:​20-24). Tjínnele nga ñaki kʼoatsakatío kon nga ngisa ndatjín nga sitjoson jmeni xi kitsole Jesús, nga̱ je chjota kʼoasʼin kisikjaʼaitsjen nga ya tjóʼale yaole nga ya Jerusalén koatio.

10. Jméni xi kisʼin je chjotale Cristo xi nʼio kisatio kjoamakjainle (Hebreos 13:17).

¹⁰ Je chjotale Cristo kʼoati tjínnele kisitjosonle  je chjota xi kisichjén Jesús nga tsakándiaale je jtín. Tsakui nichxin kui kʼoakitsole kʼiáni kuitjo ya Jerusalén kʼoa jósʼin nga kuitjo (tʼexkiai Hebreos 13:17). d Kʼianga “titjosonlao” je xi bándiaano kitso Pablo, kui kinchja̱ni nga ñaki koannʼiotʼa kjoaixi je chjota xi tsakándiaale je chjotale Cristo. Kuinga kisitjosonnile jmeni xi kitsole. Ali tsa tokuijin kʼoakisʼinni nga tjínnele kisitjoson. Tjínnele tongini kisinʼiotʼa je xi chjotajchínga sʼin tsakatio nga kjesa bichónejin kjoaxkón. Tsa kʼoakisʼin kʼianga nda tsakatio kʼoati kisitjoson kʼianga ñʼai koanchon.

11. Ánni machjénni nga nʼio sʼe̱jna kjoamakjainná.

¹¹ Kʼoati machjén nga nʼio sʼe̱jna kjoamakjainná tojo kisʼin je chjotale Cristo xi kiskile Pablo, nga̱ nichxin xi tiyoaa ndʼaibi nʼio nkjín chjota xi tsín makjainle nga tojeme kjoetʼa jme xi chon sonʼnde kʼoa tobesinná nga kʼoaʼmilee nga kʼoakoa̱n (2 Ped. 3:​3, 4). Ningalani kʼoatso Biblia jmeni xi koa̱n nga jetíjna kjoañʼai xi nʼio tse, tjín jmeni xi tsín ʼyaa. Kuinga machjénni nga kʼoéjngoaa tokoán nga kʼiakjoán kjoetʼa jme xi chon sonʼnde josʼin jetíjnachoa̱le Jeobá kʼoa nga je sikuindaná nga kui nichxin (Hab. 2:3).

12. Jmé xi koasenkaoná nga kuinje̱ngilee yaoná kʼianga jetíjna kjoañʼai xi nʼio tse.

¹² Kʼoati machjén nga kʼoéjngoaa tokoán nga “je choʼnda xi nʼiotʼakon, xi nda be xá” tísíchjén Jeobá ndʼaibi kʼianga tíbándiaaná (Mat. 24:45). Tojo koan je chjotale Cristo xi chjota hebreo kʼianga kʼoatsakʼinle jmeni xi tjínnele kisʼin kʼianga kicho chjota romano ya Jerusalén, tsakui nichxin kʼoati sʼe̱jinkoaan jmeni xi tjínnele sʼiaan nga kuinje̱ngilee yaoná kʼianga jekoaitsʼia kjoañʼai xi nʼio tse. Kuinga machjénni nga si̱nʼiotʼaa ndʼaibi je xi bándiaale naxinandále Niná. Tsa tsín manʼiotʼaa ndʼaibi kʼoa tsa tsín nitjosonlee, ñʼaijin koa̱nná nga si̱tjosonlee jmeni xi kuitsoná kʼianga jetíjna kjoañʼai xi nʼio tse.

13. Ánni nga nʼio nda tsakinyakaoni chjotale Cristo jmeni xi tso Hebreos 13:5.

¹³ Kiskoya je chjotale Cristo saʼnda nga kʼoatsakʼinle nga tjínnele kuitjo ya Jerusalén. Jokjitse kiskoya alikui kjoanyiná tsakásjai, tokoannile josʼin tsakatio (tʼexkiai Hebreos 13:5). e Nga tongini, tjínkʼa xi ma̱ kisijchá yaole kʼoa kjinrá tsakjaʼá (Heb. 10:​32-34). Ningalani tjínkʼa xi kichokjoajinle nga kjoa jaʼatojin xi totʼatsʼe nga Énle Niná kitsoyason, tjínjinkʼa xi tao̱n koantsjoake nga ma̱ tsakatio. Tonga alikui kui tao̱n tsakʼasjentjai kʼianga kichonikjeson Jerusalén (Sant. 5:3). Tsa jngo xi tao̱n nʼio tjentʼale nga kʼia, ñʼaijin koanle kisikʼéjna je ndʼiale kao tsojmi xi tjínle.

14. Jósʼiaan tsa nʼio tíjna kjoamakjainná.

¹⁴ Alikuijin tao̱n nʼio tsjéntʼalee tsa tjínjngo tokoán nga tojeme kjoetʼa jme xi chon sonʼnde. Kʼianga jetíjna kjoañʼai xi nʼio tse alikui tijme chjí koa̱nnile je tao̱n. Je Biblia kʼoatso nga toyasa yandiaa kʼoetsao tao̱nle chjota kʼianga skoe̱ nga tsínkui kʼoasjentjai je plata kao oro kʼianga kjoaʼaíne kjoajtile Jeobá  (Ezeq. 7:19). ʼNdele nga to tao̱n nʼio kjoásjee tosa chósonnilee josʼiaan nga so̱koʼalee yaoná kao xi tjío ya yaniʼyaná, kʼoa tosi tonda je Jeobá si̱xálee. Alikui koa̱n nga tao̱n si̱jékinyaa tsa tsínkjoan nʼio machjénná. Kʼoa tsín koa̱n nga tokui si̱kʼayalee nichxinná je tsojmi xi tjínná kʼoa tsakui ngisa nʼio chjí jchatokoán (Mat. 6:​19, 24). Kʼianga to jemachrianle nga kjoetʼa jme xi chon sonʼnde machjén nga chjoéjiaan ʼyáni xi ngisa manʼiotʼaa. A jé Jeobá axo kui tsojmi xi tjínná.

MACHJÉN NGA CHÓKJOAJINNÁ

15. Ánni tjínnenile kichokjoajinle je chjotale Cristo.

¹⁵ Kʼianga sa ñʼai sa ñʼai koanchon ya Judea tjínnele kichokjoajinle je kjoa xi jaʼatojin chjotale Cristo nga tosi tonda je Jeobá kisixále (Heb. 10:36). Nga tongini, tjínkʼa je chjotale Cristo xi kichokjoajinle nga chjota kitjenngike tonga tjínkʼa xi tsínkui kjoa jaʼatojin. Je Pablo kʼoakitsole nga tse kjoa sʼa kjoaʼatojin nga chjota koaitjenngike kʼoa nga tjínnele kixi koaitʼale Niná ningalani ni̱kʼien joni Jesús (Heb. 12:4). Nga sa nkjín sa nkjín koan chjotale Cristo nʼio nkjín chjota judío xi nʼio koanjtile. Nga tongini, jngo jtín chjota tsakʼetʼale je Pablo kʼianga títsoyason ya Jerusalén. Kʼoa tsʼatola 40 mani chjota judío xi kʼoakitso nga tsín koa̱kjen kʼoa tsín skʼuí nandá saʼnda nga sikʼien Pablo (Hech. 22:22; 23:​12-14). Ningalani nʼio nkjín koanni chjota xi koanjtike je chjotale Cristo, tosi tonda tsakatiojtín, kitsoyason kʼoa nʼio kisatio kjoamakjainle.

16. Jósʼin koasenkaoná kʼianga kjoa kuitjátojiaan je xo̱n xi kichjile je chjotale Cristo xi chjota hebreo (Hebreos 12:7).

¹⁶ Je Pablo kʼoakitsole chjotale Cristo nga tsjoáʼndee je Niná nga kjoa bitjatojiaan kʼoa nga tikui kjoa xi bitjatojiaan binyakaoniná nga nindayaa yaoná  (tʼexkiai Hebreos 12:7). f Tsakui kuenta kisʼin jebi je chjotale Cristo kichokjoajinle nga chjota kitjenngike (Heb. 12:11).

17. Ánni kichokjoajinnile Pablo nga chjota kitjenngike.

¹⁷ Je Pablo kʼoakitsole je chjotale Cristo jméni xi kuinyakao nga chókjoajinle nga chjota koaitjenngike. Je Pablo jebe joma kʼianga chjota fitjenngikená nga̱ jé títjon xokisʼin kʼianga kjesa chjotale Cristo majin (2 Cor. 11:​23-25). Tonga xi koanskanni sajé xokoantʼainngá. Jmé xi tsakasenkao Pablo nga kichokjoajinle je kjoa xi jaʼatojin. Xi tsakasenkao kuinga je Jeobá kisinʼiotʼa kʼoa tsín to yaole kini. I kitso: “Jé Nainá xi basenkaona, likui tsakjonnia” (Heb. 13:6).

18. Jméni xi kʼoéjngoaa tokoán kʼoa jméni xi machjén nga sʼiaan ndʼaibi.

¹⁸ Nichxin xi tiyoaa ndʼai tjínkʼa ndsʼee xi chjota fitjenngike. Nga tsjoachaa ndsʼee jebi koaan kʼoétsʼoantjé kʼoa tsa josasʼin kuinyakoaa (Heb. 10:33). Je Biblia kʼoatso nga toxá koaitjenngikeni chjota je xi Niná sixále, xi chjotale Jesús koa̱n (2 Tim. 3:12). Kuinga machjénni nga tongini kuiyondaa ngatsʼiaa nga chókjoajinná kjoa xi kjoaʼaínená. Je Jeobá si̱nʼiotʼaa ndʼaibi kʼoa kʼoéjngoaa tokoán nga je koasenkaoná tojme kjoa xi kjoaʼaínená, nga̱ je Jeobá kʼoatso nga nʼio nda koatio je choʼndale kʼianga kuichoka nichxin (2 Tes. 1:​7, 8).

19. Jméni xi sʼiaan nga tongini kuiyondalee nga kjoaʼaí je kjoañʼai xi nʼio tse (kʼoati chótsenlai sén xi faʼaitʼa).

¹⁹ Jmeni xi kiskile Pablo je chjotale Cristo xi chjota hebreo nʼio nda tsakinyakao nga tongini tsakationda kʼianga kjoa kichone. Kʼoakitsole nga ngisa nda katakotʼayajin je Énle Niná ánni nga skoe̱ni jmeni xi tsínni kʼoatjín. Kʼoati kitsole nga sa nʼio sa nʼio katasatío kjoamakjainle ánni nga sitjosonni jmeni xi kitso Jesús kao xi tsakándiaale je jtín. Kʼoakitsole nga chókjoajinle je kjoa xi kjoaʼatojin tsa kuenta sʼin nga tsjoake je Jeobá kʼoa nga kui xi mele nga tosi tonda sindaya yaole je chjotale Cristo. Tsa kuenta sʼiaan jmeni xi tsakʼinle je chjotale Cristo xi chjota hebreo, kʼoati chókjoajinná kjoa xi kuitjátojiaan saʼnda nga kjoetʼa jme xi chon sonʼnde (Heb. 3:14).