KJOAʼMIYA XI CHOTʼAYA 36
KJOAJNDA 89 Machikontʼain je xi nrʼoé kʼoa xi sítjoson
“Kʼoatʼiaon jo tso je énbi”
“Kʼoatʼiaon jo tso je énbi, ali tonoʼyajinlao” (SANT. 1:22).
XI TÍNCHJA̱NI
I̱ kjoaʼmiya jebi kui chótʼayajiaan jmé xi sʼiaan nga nyaon nyaon kʼoéxkiaa je Biblia, nga si̱kjaʼaitsjenjiaan jmeni xi kʼoéxkiaa kʼoa si̱tjosoán jmeni xi tso.
1, 2. Ánni nga tsjoa satíoni tokoán xi choʼndale Jeobá maa (Santiago 1:22-25).
JE Jeobá kao Jesús kui xi mele nga tsjoa sa̱tío tokoán. Ya Salmo 119:2 itso: “Tsjoa tjío kon je xi sítjoson kjoatéxomale Niná, je xi ñaki kʼoatjío kon nga básjai”. Kʼoa je Jesús kʼoati i̱ kitso: “Ngisa toxkón ndani je xi nrʼoé énle Niná, kʼoa xi sítjoson” (Luc. 11:28).
2 Xi choʼndale Jeobá maa tsjoa tjío tokoán kʼoa nkjín koya tjínni anni nga tsjoa sʼeniná. Je xi ngisa basenkaoná nga tsjoa satío tokoán kuinga nyaon nyaon bʼexkiaa je Biblia kʼoa nga nitjosoán jmeni xi tso (tʼexkiai Santiago 1:22-25). a
3. Jósʼin basenkaoná nga nitjosoán jme xi tso Biblia.
3 Kʼianga nitjosoán jotso Biblia nda biyoaa ngixko̱n Jeobá kʼoa tsjoa sʼe tokoán (Ecl. 12:13). Nga mangíntjenngiaa je kjoafaʼaitsjen xi tsjoá nda biyoaa ya yaniʼyaná kʼoa ngisaa mamiyoaa je ndsʼee xi tjío ya jinjtín. Alikui kui kjoa biyojiaan jme kjoa xi sʼele xi tsín choʼndale Jeobá ma. Je rey David kʼoakitso josʼin bichótsjoá nga nitjosoán je kjoatéxomale Jeobá. I kitso “Kʼianga nitjosoán nʼio tse kjoanda tjenkao” (Sal. 19:7-11).
4. Ánni nga sakʼoa ñʼai maniná nga nitjosoán jotso je Énle Niná.
4 Sakʼoa ñʼai maná nga nitjosoán jotso je Énle Niná. Ninga kʼoalani, machjén nga si̱ʼaa nga kʼoéxkiaa kʼoa nga chótʼayajiaan je Biblia. Tsa kʼoasʼiaan, koa̱njinná jmeni xi mele Jeobá nga sʼiaan. I̱ kjoaʼmiya jebi kui chótʼayajiaan jme xi koa̱n sʼiaan nga nyaon nyaon kʼoéxkiaa Biblia, nga si̱kjaʼaitsjenjiaan jme xi tso kʼoa nga si̱tjosoán.
SI̱ʼAA NGA KʼOÉXKIAA JE BIBLIA
5. Tikʼaxki̱ kʼai jmé xá xi kjinená.
5 Xi choʼndale Jeobá maa me tongatsʼiaa nga tse xá tjínná, nga̱ nkjín koya tjínni jmeni xi nʼia. Bijnyiʼañá yaoná kao xi tjío ya yaniʼyaná kʼoa nitjosonñá jmesa xá xi sʼenená (1 Tim. 5:8). Nkjín ndsʼee xi je síkuinda xínkjín xi tjíomʼe kʼoa tsa xi jejchínga. Xi ijngosani, nikuindañá yaoná nga tsín tjóchʼinniná, nitjosonñá je xá xi kjinená ya jinjtín kʼoa xi ngisa tjínle kjoandosin kuinga ʼmiyasoán je Énle Niná. Ngayeje jebi nichxin tjenkao nga kʼoanʼia. Nga kʼoasikji xá tjínná, tsakui nichxin i̱ bixoán: “Jósʼian nga siʼa kʼianga nyaon nyaon kʼoexkia Biblia, nga sikjaʼaitsjenjian jmeni xi kʼoexkia kʼoa nga sitjosoan jmeni xi tso”.
6. Jmé xi sʼiaan nga nyaon nyaon kʼoéxkiaa je Biblia (kʼoati chótsenlai sén xi faʼaitʼa).
6 Nʼio chjíle nga bʼexkiaa Biblia, kuinga bʼexkiañá xi choʼndale Jeobá maa (Filip. 1:10). Nga fitsʼiani Salmo kʼoatso nga tsjoa tjínle je chjota xi “tsjoake je kjoatéxomale Jeobá; nichxin kao nitjeen bʼéxkia kʼoa síkjaʼaitsjenjin jotso” (Sal. 1:1, 2). Tojo tso texto jebi, machjén nga si̱ʼaa nga kʼoéxkiaa Biblia. Chósonnilee jóchon nga ngisa skénndiaaná, nga̱ kui xi mená nga nyaon nyaon kʼoéxkiaa. Jngo ndsʼee xi Víctor ʼmi, itso: “Kʼiaa nga tanjio bʼexkia Biblia nga tojñá chon kʼoa ngisaa majinna jme xi bʼexkia”. A kʼoatisʼin nikjaʼaitsjeen jotso je Victor. Jóchon nga ngisa skénndiaaná nga jngó jngoá nga kʼoéxkiaa je Biblia.
Jmé horani nga ngisa kjenndiaali bʼexkiai je Biblia nga nyaon nyaon (Chótsenlai párrafo 6)
SI̱KJAʼAITSJENJIAAN JME XI BʼEXKIAA
7, 8. Jméni xi tsín koa̱n kʼoasʼiaan kʼianga kʼoéxkiaa je Biblia. Jngo choa̱ tʼejnai.
7 Kʼianga jekabʼendajiaan jóchon kʼoéxkiaa Biblia, je xi kʼoati kuenta sʼiaan kuinga tsín xitso xiská kʼoéxkiaa. Sakʼoa chajinná jme xi bʼexkiaa nga nyaon nyaon, tonga nga kʼoéxkiaa Biblia kui xi mená nga katafaʼaitsjenná jme xi kʼoéxkiaa. Koaan kʼoatjín capítulo kʼoéxkiaa nga nyaon nyaon josʼin jetjínndajinná (1 Cor. 9:26). Tonga alikui tokui xi machjén nga to kʼoéxkiaa je Biblia tsa mená nga nda koa̱njinná jme xi tso.
8 Jngola choa̱ kʼoéjnaa. ʼYañá nga machjénle jtsí je tsojmintje, tonga tsa nyaon nyaon kʼoanele jtsí toxi̱nyándájin nangi kʼoa tokjuiʼndojin tsojmintje. Tonga tsa tochoa choa jtsí kʼoa̱, tobijbijin koa̱nʼnyi̱ʼnde je nangi kʼoa ngisajin nda koa̱njchá tsojmintje. Tikʼoasʼinni, tsa xitso xiská kʼoéxkiaa je Biblia kʼoa tsa tsín si̱kjaʼaitsjenjiaan, ngotjojin jchajinniná kʼoa tsínjinni kʼoasʼiaan jotso (Sant. 1:24).
Tojo ma je tsojmintje nga nichxin tjenkao nga ʼbindá kʼianga bʼanele jtsí, kʼoatisʼinni nga bʼexkiaa Biblia, nichxin machjén nga si̱kjaʼaitsjenjiaan kʼoa nga si̱tjosoán jotso (Chótsenlai párrafo 8)
9. Jméni xi sʼiaan tsa kʼoasʼin nganá nga xitso xiská bʼexkiaa je Biblia.
9 Alikui xitso xiská kʼoéxkiaa je Biblia, tosa ngasin nganda kʼoéxkiaa kʼoa si̱kjaʼaitsjenjiaan jotso ánni nga ngisa nda koa̱njinniná. Jméni xi sʼiaan tsa tsín nikjaʼaitsjenjiaan jme xi bʼexkiaa. Koaan ngisasa tse nichxin si̱kʼayaa nga kʼoéxkiaa Biblia. Kʼoati koa̱n tochoa versículo kʼoéxkiaa, kʼoa xijekoa̱n, si̱kjaʼaitsjenjiaan jmeni xi tso. Je Víctor, xi sa jená kanikʼaxkiaa ya párrafo 6, itso: “Tochoaa versículo bʼexkia kʼoa sakʼoa jngo capítulo bʼexkia. Nga tanjio bʼexkia Biblia sʼejinkonña bʼajnda nichxin jme xi tso”. Xi ngisa chjíle kuinga koa̱njinná jme xi bʼexkiaa, ali tsakuijin tsa tse kʼoa tsa choa kʼoéxkiaa (Sal. 119:97; chótsenlai je recuadro “ Xi koa̱n si̱kjaʼaitsjenjin”).
10. Jméni xi si̱kjaʼaitsjenjiaan kʼianga kʼoéxkiaa Biblia. Jngo choa̱ tʼejnai (1 Tesalonicenses 5:17, 18).
10 Ñá xi kuixónñá kʼiáni nga ngisa skénndiaaná nga kʼoéxkiaa je Biblia kʼoa jókji tse kʼoéxkiaa. Kʼianga kʼoéxkiaa si̱kjaʼaitsjenjiaan jósʼin kjuintjenngiaa je kjoafaʼaitsjen xi tsjoá. Koaan i̱ tso xi si̱kjaʼaitsjenjiaan: “Jósʼin kjuítjenngia ndʼaibi kao nichxin xi sʼa nroa kjoafaʼaitsjen jebi”. Tobʼelañá, tsakuilani tibʼexkiaa 1 Tesalonicenses 5:17, 18 b (tʼexkiai) koaan kui si̱kjaʼaitsjenjiaan jóʼmilee je Jeobá kʼianga bʼetsʼoaa kʼoa jókji tse bʼetsʼoañá. Kʼoati koa̱n si̱kjaʼaitsjeen jmé tʼatsʼeni xi bʼainilee kjoanda Jeobá kʼoa koaan jan koya si̱kʼaxkiaa nga kʼoétsʼoalee. Tsa kʼoasʼin chótʼayá ninga tongotjo kʼoakoa̱nná, koa̱njinná jotso Énle Niná kʼoa koanngíntjenngiñá je kjoafaʼaitsjen xi tsjoá. Tsa kjuintjenngiaa nga nyaon nyaon jotso je kjoafaʼaitsjen xi tsjoá, sa koa̱nndaya sa koa̱nndayañá nga kʼoakoa̱nkjoaan josʼin mele Jeobá. Kʼoa jmé xi sʼiaan tsa bele tokoán nga tsesa chaná nga si̱ndayaa yaoná.
KUI KʼOASʼIAAN JMENI XI KʼOAKOA̱NNÁ
11. Jméni xi sakʼoa ma kʼianga bʼexkiaa Biblia. Jngo choa̱ tʼejnai.
11 Sakʼoajin tsín nda sʼe̱ tokoán kʼiatsa tse chaná nga si̱ndayaa yaoná. Si̱kjaʼaitsjenjinla tsakui tibʼexkiaa jñani kʼoatso nga tsín ndatjín nga tokʼa xi nda si̱koaa (Sant. 2:1-8). Kʼianga kui bʼexkiaa nikjaʼaitsjenñá jósʼiaan nga tsín ʼya xi chja̱ʼajiaan. Nga koa̱nnyaonni tsakui kʼoéxkiaa jñani kʼoatso nga chósonnilee jobixoán (Sant. 3:1-12). Kui faʼaitsjenná nga sakʼoa tsín nda tso én nichjén kʼoa sakʼoa toxkia nokjoaa, kʼoa kui nikjaʼaitsjeen jósʼiaan nga ngisa nda chósonnilee jme xi kuixoán. Nga koa̱njngini tsakui kʼoéxkiaa jñani kʼoatso nga tsín koa̱n ya kuinójiaan yaoná jmeni xi chon sonʼnde (Sant. 4:4-12). Kui nikjaʼaitsjeen nga ngisa nda chósonnilee jmé música kuinóʼyalee kʼoa jmé película chótsenlee. Kʼoa kʼianga jekoa̱nni ño nichxin, tsakui nichxin tsín nda sʼe̱ tokoán nga nkjín koya jñani chaná nga si̱ndayaa yaoná.
12. Ánni nga tsín koa̱n si̱kʼajennilai tokuin tsa machjén nga si̱ndayasai yaoli (kʼoati chótsenlai nota).
12 Ali nikʼajenjinlai tokuin tsa machjén nga si̱ndayasai yaoli. Tsa majinli jñani machjén nga si̱ndayai yaoli, kui xi tsonile nga nangitokon mai kʼoa nga ñaki kʼoatjín tokuin nga meli kʼoasʼiain josʼin mele Niná. c Kʼoati kuenta tʼiain nga tjínnele ntsjaintsjai si̱ndayaa yaoná nga kʼoakoa̱nkjoaan josʼin mele Niná (Col. 3:10). Jmé xi koasenkaoli nga tosi tonda kui kʼoasʼiain jotso je Énle Niná.
13. Jméni xi koa̱n sʼiaan nga si̱ndayaa yaoná (kʼoati chótsenlai sén xi faʼaitʼa).
13 Xi koasenkaoná nga tosi tonda si̱tjosoán jotso je Énle Niná kʼiaa nga nangitokon koaan kʼoa tsín toñandiakjoan kʼoasʼiaan ngayeje jmeni xi majinná nga bʼexkiaa Biblia (Prov. 11:2). Koaan kʼoétʼaxoaan jñáni machjén nga si̱ndayaa yaoná. Tojngo koya kʼoa tsa jao koya xi títjon kuenta sʼiaan, kʼoa xijekoa̱n kʼia kʼoasʼiaan xi chasa. Jmé xi títjon kʼoasʼiaan.
Alikui toñandiakjoan kʼoasʼiaan ngayeje jmeni xi majinná nga bʼexkiaa Biblia, tosa nangitokon katamaa kʼoa tojngo koya kʼoa tsa jao koya xi títjon kuenta sʼiaan jñani machjén nga si̱ndayaa yaoná (Chótsenlai párrafo 13, 14)
14. Jméni xi títjon kʼoasʼiaan.
14 Koaan kui títjon kʼoasʼiaan jmeni xi ngisa choa ñʼai koa̱nná nga kuitjosonná kʼoa tsakuije̱ xi ngisa machjén nga kʼoasʼiaan. Xijekoa̱n, kjoásjaiyaa jotso je xo̱n xi síkasénná naxinandále Niná, jolani ya Índice de las publicaciones Watch Tower kao Xo̱n xi síchjén je testigole Jeobá nga jme xi básjaiya. Si̱jélee nganʼio je Jeobá kʼoa kʼoakʼuínlee nga katabasenkaoná (Filip. 2:13). Xijekoa̱n, kʼoasʼiaan jmeni xi koa̱njinná. Kʼianga jchaa nga jetinindayaa yaoná, tosi tonda koa̱nmená si̱ndayaa yaoná jñasani chaná kʼoa ngisaa choa ñʼai koa̱nná nga kʼoasʼiaan.
KUI ÉNLE NINÁ KATABÁNDIAANÁ
15. Jméni xi tsín mangóson jonʼia xi testigole Jeobá maa kao josʼín je chjota xi kʼoatso nga bʼéxkia Biblia (1 Tesalonicenses 2:13).
15 Nkjín chjota xi kʼoatso nga jenkjín kʼa bʼéxkia Biblia, tonga tsín makjainle nga Énle Niná kʼoa tsín sítjoson jmeni xi tso. Tonga ñá xi testigole Jeobá maa kʼoanʼia jokisʼin je chjotale Cristo xi tsakatio nga siglo 1, makjainná nga Énle Niná je Biblia kʼoa nitjosonñá jmeni xi tso (tʼexkiai 1 Tesalonicenses 2:13). d
16. Jmé xi koasenkaoná nga si̱tjosoán jotso Énle Niná.
16 Sakʼoa ñʼai maná nga nitjosoán jotso je Biblia kʼoa sakʼoa tsín maʼaná nga bʼexkiaa. Tsakui nichxin xitso xiská bʼexkiaa kʼoa tsínni majinná jmeni xi tso. Kʼoa tsa nikʼajenlee tokoán nga tse chaná nga si̱ndayaa yaoná. Ninga kʼoalani, jé Jeobá koasenkaoná. Kʼoaiʼndee nga katabasenkaoná, alikui tokuinóʼyá jotso je Énle kʼoa tsín tosi̱chajiaan, tosa si̱tjosoán je kjoafaʼaitsjen xi tsjoá. Ngisaa tsjoa sa̱tío tokoán tsa kʼoéxkiaa je Biblia kʼoa tsa si̱tjosoán jotso (Sant. 1:25).
KJOAJNDA 94 Bʼailee kjoanda Niná nga kijna Énle
a Santiago 1:22-25: “Kʼoatʼiaon jo tso je énbi, ali tonoʼyajinlao nga kʼoasʼin tichʼanachalao yaono. 23 Tsa jngo xi nrʼoé énbi, kʼoa likui kʼoasʼín jo tso, jebi kʼoakjoan joni tsa jngo chjota xi jngo cho̱tsín kotsensʼennile nkjaín. 24 Je kiskotsenle yaole, ki, kichajin ndi̱to̱nnile jo kji. 25 Tonga jó tonda koa̱nle je xi nda básjaijin je kjoatéxoma xi ñaki kjoakixi, xi síkʼéyondaíná. Jó tonda koa̱nle je xi bʼejnanʼiojin, nga tsín tsa tonrʼoé, kʼia chajinle, tonga kʼoasʼín jo tso”.
b 1 Tesalonicenses 5:17, 18: “Tʼetsʼoao ali nichajinjion ngantsjai. 18 Tʼao kjoanda ngayije, nga jebi xi mele Niná tʼatsaon nga tiyokao Cristo Jesús”.
c Chótsenlai ya jw.org je video Jósʼin síkjaʼaitsjen je xti: Nga bʼexkiaa Biblia.
d 1 Tesalonicenses 2:13: “Kui kjoa kʼoati jinjin likui nichajinjin nga bʼailaijin kjoanda Niná nga kʼoasʼin kichjobáo énle Niná xi kinoʼyanajin. Likui kichjobáo joni tsa énle chjota, tonga joni tsa énle Niná xi ñaki kʼoatjín, je xi tísíxájinno xi koankjainno”.
