1, 2. Ánni naskásʼin tíjnani nga kʼoasʼin kisindaná Jeobá nga tsjoa satío tokoán kʼianga tjotʼaa jmeni xi tjínná.

 TSJOA satío tokoán kʼiatsa jme xi kʼoainá, tonga ngisaa titsjoa sʼengániná tsa ñá xosʼiaan (Hech. 20:35). Toxá kʼoamani nga̱ jé Jeobá xi kʼoasʼin kisindaná nga tsjoa satío tokoán kʼianga tjotʼaa jme xi tjínná, kʼoa ndasʼin bichómani nga kʼoasʼin kisindaná Jeobá.

² Ñá xi kuixónñá tsa mená nga ngisa tsjoa sa̱tío tokoán. Kʼiatsa kjoásjailee josʼin kuinyakoaa xi kjaʼaí ngisasa tsjoa sʼe̱ná. Nʼio naskánasʼin tíjna nga kʼoasʼin kisindaná Jeobá (Sal. 139:14).

3. Ánni kʼoatsoni Biblia nga tsjoa tjínle Jeobá.

³ Ya Biblia kʼoatso nga nʼio tsjoa tjíole je xi tjotʼa, kuinga nʼio tsjoa tjínnile je Jeobá nga̱ nʼio tjotʼa jmeni xi tjínle (1 Tim. 1:11). Jé Jeobá xi ngisasa nʼio nkjín koya jmeni xi tsjoáná. Je Pablo i kitso: “Totʼatsʼení nga tiyoaa, nikjaan, kʼoa tiyochoán” (Hech. 17:28). “Ngayije xi kjoanda, ngayije kjoatjao xi ñaki nda” tʼatsʼe Jeobá nroani (Sant. 1:17).

4. Jméni xi sʼiaan nga ngisa tsjoa sa̱tío tokoán.

⁴ I̱ kjoaʼmiya jebi kui chótʼayajiaan nga koa̱n chjénngilee je Jeobá tsa mená nga ngisasa tsjoa sa̱tío tokoán kʼianga tjótʼaa jmeni xi tjínná (Efes. 5:1). Kʼoati chótʼayajiaan jméni xi sʼiaan tsa sakʼoa kʼoasʼin nikjaʼaitsjeen nga tsín chjí be xi ngikʼa jmeni xi nʼia kʼianga binyakoaa. Jmeni xi  chótʼayajiaan koasenkaoná nga tsjoa sa̱tío tokoán kʼoa nga tosi tonda tjótʼaa jme xi tjínná.

CHJÉNNGILEE JEOBÁ NGA TJOTʼA

5. Jméni xi tsjoáná Jeobá.

⁵ Kataʼyala kʼa choa̱ xi bakóná nga tjotʼa je Jeobá. Tobʼelañá, tsjoáná jmeni xi machjénná. Ningalani tsín tongantsjai nga sokóná jmeni xi mená, tsjoáná jmeni xi chinee, najño xi chʼakjá kao ndʼia jña biyoʼyá (Sal. 4:8; Mat. 6:​31-33; 1 Tim. 6:​6-8). Ánni nga tsjoániná Jeobá jmeni xi machjénná.

6. Jmé xi bakóyaná jmeni xi tso Mateo 6:​25, 26.

⁶ Je Jeobá tsjoáná jmeni xi machjénná nga̱ tsjoakená. Chótʼayajinla jmeni xi kitso Jesús tojosʼin faʼaitʼa ya Mateo 6:​25, 26 a (tʼexkiai). Nga kinchja̱ni xi tʼatsʼe nise i kitso: “Nibʼéntjejin jno̱, nibʼéxkójin, nibinyájin ya ningʼa. Kʼoa je Nʼaino xi tíjna ngʼajmi, tsjoále xi kjine”. Kʼoa xijekoan, i kitsole chjotale: “Jon ngisasa chjíno kaoni tsa je”. Jmeni xi kitso Jesús kui bakóyaná nga ngisa chjí be Jeobá je choʼndale tikʼoajinni je ʼndícho̱. Nga tsjoále Jeobá jmeni xi kjine je ʼndínise kʼoati kui xi bʼéjngo tokoán tsanda ñá nga tsjoáná jmeni xi machjénná. Kuinga kʼoasʼínni je Jeobá nga tsjoakená kʼoa nga Nʼainá mani (Sal. 145:16; Mat. 6:32).

7. Jósʼin chjénngilee Jeobá nga tjotʼa (kʼoati chótsenlai sén xi faʼaitʼa).

⁷ Je Jeobá tsjoakená ngatsʼiaa, kʼoa ñá kʼoati tsjoachaa je xíngiaa kuinga binyakaoñá. Tsakui nichxin ñá sichjénná je Jeobá nga kuinyakoaa je xi nganʼio machjénle. Jolani tsakui machjénle tsojmi xi chinee kʼoa tsa najño machjénle. Kʼoasʼin ʼyaná xi choʼndale Jeobá maa nga tjotʼaa jmeni xi tjínná kʼianga binyakoaa xi nganʼio machjénle. Tobʼelañá, kʼianga kisʼe chʼin COVID-19 nʼio nkjín ndsʼee xi kitjotʼa jmeni xi tjínle nga tsakinyakao xi kjaʼaí. Tjínkʼa xi kui kitsjoa tsojmi xi ma chine, najño kʼoa tsa jmesani xi koanchjén, kʼoa tjínkʼa xi tao̱n kitsjoa. Kʼoa je tao̱n jebi kʼoasʼin koanchjén  nga kitsʼainganʼiole je ndsʼee jngo tjíjtsa Sonʼnde. Kʼoakisʼin jotso Hebreos 13:​16, jñani tso: “Ali nichajinjion nga nda sʼiaon, kʼoa nga kuinyakao xikʼa, nga̱ kui kjoatjao xi sasénle Niná”.

8. Jósʼin basenkaoná nga tsjoánganʼioná Jeobá (Filipenses 2:13).

⁸ Je Jeobá nʼio tse nganʼio tjínle kʼoa tsjoánganʼiole je choʼndale xi kixi fitʼale (tʼexkiai Filipenses 2:13). b Tsakui nichxin sa jekinijélai nganʼio je Niná nga kʼoatsakʼinlai nga katabasenkaoli nga tsínkui xi chʼaotjín kʼoasʼiain, kʼoa tsa kʼiaje̱ nga tse kjoa kitjatojin, kʼoa tsakuije̱ nga kitjosonli jmeni xá xi nʼiai nga nyaon nyaon. Kʼianga tsaʼyai nga kinrʼoéli je Jeobá kʼoajinti kisʼe tokuin jokisʼe kon Pablo kʼianga kʼoakitso nga je Niná xi tsjoánganʼioná (Filip. 4:​13, TNM).

9. Jósʼin chjénngilee je Jeobá nga kuinyakoaa xi kjaʼaí (kʼoati chótsenlai sén xi faʼaitʼa).

⁹ Ningalani tsín kʼoakji nganʼio tjínná joni je Jeobá, koaan kuinyakoaa je xi nganʼio machjénle. Jolani tsa jngo ndsʼee xi tímʼe kʼoa tsa jngo xi jejchínga. Koaan kuinyakoaa tsa jme xi machjénle kʼoa tsa jme xá xi tjín ya yaniʼyale. Kʼoa tsa kʼoakoa̱nná, koaan kʼoainganʼioá nga masinle ya Ndʼia jña chotʼayá. Tsa kʼoasʼiaan, kʼoasʼin kuinyakaoñá je ndsʼee.

10. Jósʼin kuinyakoaa je ndsʼee kao jmeni xi kuixoán.

¹⁰ Jmeni xi bixoán kʼoati nʼio nda binyakao xíngiaa. Tsa ʼyani xi nganʼio machjénle koaan kjuinchónlee kʼoa tsa maije̱ koaan teléfono kuinókjoalee, tsa jngo xo̱n chjílee kʼoa tsa mensaje si̱kasénlee. Ninga tsín nʼio tse jmeni xi kuixoán, tsa ñaki kʼoatjín tokoán koasenkao je ndsʼee nga tosi tonda kixi koaitʼale Niná kʼoa nda sʼe̱ kon (Prov. 12:25; Efes. 4:29).

11. A tsjoáná je Jeobá kjoachjine.

¹¹ Je Jeobá tsjoáná kjoachjine. Je Santiago itso xi kiski: “Tsa jngo xi jon xi chale kjoaʼisentakon, katasíjéle Niná, je xi kjaínga tse tsjoákjoatjaole ngatsʼi, kʼoa likui taon be. Kʼoasʼin kʼoaile” (Sant. 1:5). Tojo tso texto jebi, je Jeobá tsjoáná kjoachjine. Kʼoa nga kʼoatso nga “likui taon be”, kui xi tsonile nga tsín mele Jeobá nga chʼao sa̱tío tokoán kʼianga nganʼio nijélee. Tosaa kui xi mele nga si̱jélee kjoachjine (Prov. 2:​1-6).

12. Jósʼin koa̱n kʼuínyalee xi kjaʼaí jmeni xi maná.

¹² Koaan chjénngilee josʼín je Jeobá  nga kʼuínyalee xi kjaʼaí jmeni xi maná (Sal. 32:8). Nkjín koya josʼin koa̱n kuinyakoaa xíngiaa. Tobʼelañá, ʼmiyalee josʼin kuitsoyason je xi tosʼa choatsele nga tjíotsoyason. Je xi chjotajchínga sʼin tjío ngasin nganda tsoyale josʼin sitjoson je xá xi kjinele xi siervo ministerial ma kao xi kjaʼaísa ndsʼee. Kʼoa je ndsʼee kao tichjaa xi male bʼénda ndʼia tsoyale xi kjaʼaí nga koa̱nle kʼoasʼin je xá xi tjín ya Ndʼia jña chotʼayá kao jñasani tjío ndʼia xi machjén nga ʼyaxkón Jeobá.

13. Jósʼin chjénngilee je Jeobá kʼianga kʼuínyalee xi kjaʼaí.

¹³ Je Jeobá kao kjoatsjoa tsjoáná kjoachjine. Kʼoati sʼiaan tsanda ñá, kao kjoatsjoa kʼuínyalee xi kjaʼaí jmeni xi maná. Alikui koa̱n kʼoasʼin si̱kjaʼaitsjeen nga je ndsʼee kjoaʼaná je xá xi nʼia kʼiatsa kʼuínyalee je xá xi maná. Kʼoa alikui koa̱n i̱ kuixoán: “Toje katabʼéngikjoama̱, alikui ʼya xi kitsoyana an”. Alikui koa̱n nga kʼoasʼin sikjaʼaitsjen je xi Niná síxále. Tosaa kao kjoatsjoa binyakoaa je xi kjaʼaí kʼoa bakoyalee jmeni xi maná (1 Tes. 2:8). Xijekoa̱n, je ndsʼee kʼoati koa̱nle koakoyale xi ngikʼa (2 Tim. 2:​1, 2). Kʼiatsa kʼuínyalee xi kjaʼaí jmeni xi maná tsjoa sʼe̱ tokoán kʼoa kʼoati tsjoa sa̱tío kon tsanda je.

TSA KʼOASʼIN NIKJAʼAITSJEEN NGA TSÍN BECHJÍ XI NGIKʼA NGA BINYAKOAA

14. Jósʼín je chjota kʼianga binyakoaa.

¹⁴ Kʼianga binyakoaa je ndsʼee kʼoa tsa kjaʼaí chjota kʼoasʼin ʼyañá nga bechjí jmeni xi nʼia kʼianga tsjoáná kjoanda. Tjínkʼa xi xo̱n tsjoáná kʼoa tsa jmesani xi sʼín kʼianga tsjoáná kjoanda (Col. 3:15). Ngisaa titsjoa satíongáni tokoán nga kʼoasʼín.

15. Jméni xi si̱kjaʼaitsjeen kʼiatsa ʼya xi tsín tsjoáná kjoanda kʼianga kuinyakoaa.

¹⁵ Kuenta sʼiaan nga tsín tongatsʼi nga tsjoáná kjoanda kʼianga kuinyakoaa. Tsa kʼoasʼin si̱kjaʼaitsjeenje̱ nga tsín bechjí jmeni xi nʼia, ningalani si̱kʼayalee nichxinná nga binyakoaa kʼoa nga bʼailee jme xi tjínná, si̱kjaʼaitsjeen jotso Hechos 20:35. Tsjoa satío tokoán nga binyakoaa xi kjaʼaí ni tsjoáná kjoanda kʼoa ni mai. Kuinga tsín koa̱n chʼao kʼoéñá tokoán ninga tsín ʼya xi skoe̱chjí kʼianga kuinyakoaa. Kataʼyala jméni xi koa̱n sʼiaan.

16. Jméni xi kuenta sʼiaan.

¹⁶ Kui kuenta sʼiaan nga je Jeobá tichjenngilee kʼiatsa ʼya xi kuisenkoaa. Je Jeobá tsjoále ngatsʼi chjota jmeni xi machjénle ninga tjínkʼa xi tsín tsjoá kjoanda (Mat. 5:​43-48). Je Jeobá kʼoatsoná nga nʼio tse kjoanda tsjoáná tsa tsínkui chóyalee nga kʼoaingajaoniná jme xi bʼé (Luc. 6:35). Kuinga tsín koa̱n chʼao kʼoéñá tokoán tsa ʼya xi tsín tsjoáná kjoanda nga kuisenkoaa, nga̱ je Jeobá sichikontʼainná ngantsjai kʼiatsa ʼya xi kuisenkoaa kʼoa tsa ñaki kʼoatjín tokoán nga kʼoasʼiaan (Prov. 19:17; 2 Cor. 9:7).

17. Jmésani xi koa̱n sʼiaan nga chjénngilee je Jeobá (Lucas 14:​12-14).

¹⁷ Ijngosa koya xi kuenta sʼiaan nga chjénngilee Jeobá kʼiaa nga kjuintjenngiaa jotso Lucas 14:​12-14 c (tʼexkiai).  Alikui chʼaotjín tsa kuinókjoalee ya niʼyaná kʼoa tsa kuisenkoaa je xi koa̱nle kʼoasʼin ngajaoni. Tonga tsa tokui xi tinʼianilee kʼianga kuinyakoaa je xíngiaa nga kʼoasikaongajaoniná, machjén nga kuenta sʼiaan jokitso je Jesús, nga tosa je kuisenkoaa je xi bele tokoán nga tsín koa̱nle kʼoasʼin ngajaoni. Tsa kʼoasʼiaan, tsjoa sa̱tío tokoán nga̱ jé Jeobá tichjenngilee kʼoa tosi tonda kuinyakoaa xíngiaa ninga tsín tsjoáná kjoanda.

18. Jméni xi koa̱n sʼiaan nga tsín chʼaosʼin si̱kjaʼaitsjeen tʼatsʼe xi ngikʼa.

¹⁸ Alikui chʼaosʼin si̱kjaʼaitsjeen tʼatsʼe xi ngikʼa (1 Cor. 13:7). Kʼiatsa ʼya xi tsín tsjoáná kjoanda nga kuisenkoaa, koaan i̱ tso xi si̱kjaʼaitsjenjiaan: “Tochale tokachajinle nga katsjoána kjoanda”. Alikuikjoan ʼyaa ánni nga tsín jotso kʼani. Tsakui nichxin mele tsjoáná kjoanda tonga tsa tsín tso kon nga kʼoatsoná. Kʼoa tjínkʼa xi soa male kʼianga bʼainganʼiole, ngisaa je ndsʼee xi nʼio nda tsakinyakao ngasʼa xi kjaʼaí tonga tsa tsín tikʼoamanile kʼoasʼín ndʼaibi. Nga tsjoachaa je ndsʼee tosi tonda kuinyakoaa kʼoa alikui chʼaosʼin si̱kjaʼaitsjeen xi tʼatsʼe (Efes. 4:2).

19, 20. Ánni nga nda bichómani nga tsejta maa (kʼoati chótsenlai sén xi faʼaitʼa).

¹⁹ Tsejta katamaa. Je rey Salomón i kitso kʼianga kui kinchja̱ni tʼatsʼe jngo chjota xi tjotʼa jmeni xi tjínle: “Tikʼatjenngindái je nioxtilali, kʼoa koa̱nsjai ijngokʼanili nga koa̱nskanni” (Ecl. 11:1). Jebi kui bakóyaná nga tjínkʼa chjota xi kʼia tsjoáná kjoanda kʼianga jenkjín nichxin faʼato nga kabinyakoaa. Jngola choa̱ kataʼyaa.

²⁰ Ñandia kʼianga je chjoónle superintendente xi tsʼe circuito jngo xo̱n kitsjoale jngo tichjaa xi tokʼia kisʼenngindá. Je xo̱n xi kitsjoale kʼoatso nga kixi katafitʼale Niná. Kʼianga jejin nó jaʼato, je tichjaa jngo carta kiskile je chjoónle superintendente  xi tsʼe circuito. Itso xi kiskile: “Tokui kʼoaxínle nga nʼio nda tíbasenkaona jokji tífaʼato nó jmeni xi tsakʼinnái. Nʼio naskánatso jmeni xi kichjinái. Tonga xi nʼio tjínjinkoan kui texto xi tsakʼetʼaxuin”. d Kʼoa kʼianga jetsakʼéyanajmíle jme kjoa xi jaʼatojin, itsosa xi kiskile: “Sakʼoa koanmena kisikʼéjna je Énle Niná kʼoa nga tsín tije sixánile, tonga kui jaʼaitsjenna je texto xi tsakʼetʼaxo̱nnái kʼoa kui xi tíbasenkaona je xi jin nó tífaʼato”. Nʼiojin tsjoa kisʼe kon je chjoónle superintendente kʼianga tsakʼéxkia carta jebi. Tsakui nichxin kʼoati koaan tsanda ñá, tsa tse kuichomani nga tsjoáná kjoanda je xi kuinyakoaa.

21. Ánni nga nʼio chjínile nga tosi tonda chjénngilee je Jeobá nga tjótʼaa jmeni xi tjínná.

²¹ Tojosʼin tiʼyaa, je Jeobá toxá kʼoasʼin kisindaniná nga ngisa tsjoa satío tokoán kʼianga ñá bʼé jmeni xi tjínná tikʼoajinni tsa ñá kʼoainá. Nda satío tokoán kʼianga binyakoaa je ndsʼee kʼoa nga tsjoáná kjoanda. Kʼoa ningalani tsín tsjoáná kjoanda tojo tsjoa satío tokoán nga binyakoaa, nga̱ ʼyañá nga ndatjín nga kʼoanʼia. Tojmeni xi sʼiaan kʼoa tojmeni xi kʼoailee ndsʼee kʼianga kuinyakoaa, je Jeobá ngisaa tse tsjoángajaoniná tojo tso ya 2 Crónicas 25:9. Nʼio tsjoa satío tokoán kʼianga je Jeobá síchikontʼainná, nga̱ tojésa xi male tsjoáná ngayeje. Kuinga nʼio chjínile nga chjénngilee je Jeobá kʼianga tjótʼaa jmeni xi tjínná.