Je Jesús kui xi koanmele nga toje tsakjenkao je xi 12 pastrole. Ali tsakuijin xi tsonile nga tsín tikoanmenile nga je Jesús kitjenngile je xi 70 chjotale kʼoa tsa je Jesús xi tsínti ndasʼin tsabekonni.

Chjotale Jesús koan je xi 70 kao xi 12 pastro. Tejao chjotatjenngile kiskoéjin xi pastro kitsole (Luc. 6:​12-16). Yaa Galilea tíjna nga kisikatíoxkó chjotale xi 12 kʼoa kisikasén nga tsakakóyale chjota xi tʼatsʼe Chjotaxále Niná kʼoa kisindayaa chjota ngakjijnda (Luc. 9:​1-6). Kʼoa nga tíjna ya Judea 70 chjota tsakinyánda xi kisikaséntítjon, jaojao kisikasén (Luc. 9:51; 10:1). Ngakjijnda ʼnde jñani kisakoya Énle Niná nkjín koanni je chjotatjenngile Jesús.

Je xi chjotale Jesús koan toxá xki̱ nó kisikjaʼaitsjenyani je sʼuí Paxko ya niʼyale (Éx. 12:​6-11, 17-20). Kʼoa nga tojeme bichó nichxin nga ni̱kʼien, je Jesús tojé xi 12 pastrole kikao nga ki ya Jerusalén. Alikui kʼoakitsole je chjotatjenngile xi tjío ya Judea, Galilea kao Perea nga kʼoati katafi ya Jerusalén nga sikjaʼaitsjenya je sʼuí Paxko, tojé kikao xi 12 pastro. I kitsole: “Kjaínga tonʼio tse koanmena nga koakjenkaono je paxkobi tongileni nga kjoaʼa kjoañʼai” (Luc. 22:15).

Toxá tojé tsakjenkaoni Jesús je pastrole xi kixi kitʼale, nga̱ be nga kʼoati tsjoánganʼio nga kuitjoson josʼin tjínndajinle Niná. Nga kʼia, tojeme ni̱kʼien nga kʼoechjíntjai jéele chjota. Je Biblia itso: “ʼNdí barréle Niná, xi faʼáxin jéele chjotasonʼnde” (Juan 1:29). Yaa Jerusalén tsakʼaitʼale cho̱ je Niná saʼnda nichxin kjoatse, kʼoa kʼoati ya kinikʼien je Jesús. Tonga nga kʼoasʼin kinikʼien ngisaa tse kjoanda kisokole je chjota tikʼoajinni jokji kjoanda kisʼele je chjota israelita nga kiskine je barré nitje̱n nga kitjoni ya Egipto (1 Cor. 5:​7, 8). Nga kʼoasʼin kʼienntjainá je Jesús, je xi 12 pastro kʼoati je xi xjáoja̱ma̱le koa̱n je jtínle Cristo (Efes. 2:​20-22). Je Biblia itso nga nchja̱ni tʼatsʼe Jerusalén xi tsje: “Xjáolao̱le naxinandábe tjínle tejao xjáoja̱ma̱. Ya tjíotʼa tejao jaʼaínle je xi tejao pastro xi tsʼe Barré” (Apoc. 21:​10-14). Je pastrole Jesús xi kixi kitʼale kʼoati je tsjoánganʼio nga kuitjoson jme xi tjínndajinle Niná. Kuinga toje tsakjenkaoni kʼianga tokʼoatjínsa tsakʼéjna sʼuí Paxko kʼoa xijekoan kʼiaa tsakʼéjna Kjoabichile Nainá.

Ningalani tsín ya tsakatio je xi 70 mani kao xi ngikʼa je chjotatjenngile Jesús kʼianga tsakjenkao je pastrole xi kixi kitʼale, tojo tsee kjoanda tjoéle je xi kixi koaitʼale nga̱ kʼoati ya koatiojin ngatsʼi je chjotale xi ya ngʼajmi koai je kjoasʼendajin xi tsakʼéndakao je pastrole Jesús nga kui nitje̱n (Luc. 22:​29, 30).