Urutoria Ieuwa Ehay Enoi Haria uruimontypot yne Iesui piat woꞌonãpin hap koꞌi aikotā̃ ipotmūꞌeria ewy. Maꞌato meig̃muewuat koꞌi ete asom uruimohey. Pyno mesūwat wemūꞌe hap puo pyi etikuap poꞌog̃ hamo kat etiat uruimohey hap hawyi etikuap poꞌog̃ hamo etiat wy.

1.   Uruimohey Tupana ete. Uruimontypot Tupana sese yn miꞌi ti Ieuwa. Miꞌi torānia saꞌawynug̃ hat. Miꞌi hesaika kahato torānia kai. Aparãu Iesui hawyi Muisei miꞌiria eTupana Ieuwa miꞌi pote urueTupana sese Ieuwa yn wy. (Saumu 83:18; Iesui Aru e Hap 4:11) —Esutu 3:6; 32:11; Iuwãu 20:17.

2.   Uruimohey Tupana Ehay ete wy. Uruepe Tupana Ehay torānia Ieuwa kaipyi tūt. Miꞌi pe toig̃ kahato woꞌonãpin hap koꞌi. (Iuwu 17:17; 2 Timoteu 3:⁠16) Tupana Ehay toig̃ velho testamento hawyi novo testamento. Miꞌiria watimorānia pote watipuenti hamo 66 popera koꞌi. Miꞌi koꞌi ete uruimohey yne miꞌi pote wentup⁠ ok puruwei toꞌe Ieuwa Ehay Enoi Haria etiat — Miꞌiria timontypot yne Tupana Ehay piat woꞌonãpin hap koꞌi. Aikotā̃ Tupana Ehay piat woꞌonãpin hap koꞌi niatpo pykai maꞌato taꞌatunug̃ yne terān Tupana Ehay piat e miꞌi puruwei het ri Jason D. BeDuhn ihay Ieuwa Ehai Enoi Haria etiat. a

    Miꞌitā̃ uruimohey yne Tupana Ehay piat koꞌi maꞌato uruikuap Tupana Ehay henoi kahato haꞌag̃kap wo. Miꞌi waku watikuap hawyi watimowempāp iꞌewȳte apo watoꞌe kuap ― Kan mesūwat Tupana Ehay henoi haꞌag̃kap wo uimūꞌe watoꞌe kuap. Miꞌi aipowȳro hamo watikuap hamo.—Iesui Aru e Hap 1:1.

3.   Uruimohey kahato Iesui ete. Iesui henoi Tupana Ehay piat woꞌonãpin hap koꞌi miꞌi pote urutoria urutunug̃ aikotā̃ Iesui ewy wy uruhenoi Tupana Ehay piat woꞌonãpin hap koꞌi wy. Uruikuap Iesui kaipyi yn ahehakyeraꞌat kuap hap miꞌi Tupana Saꞌyru hap wy miꞌi pote urutukpteꞌen Iesui mohey haria wo. Uruikuap Tupana Ehay puo pyi Iesui ȳt Tupana ꞌi hap. Iꞌewȳte uruikuap Tupana Ehay ȳt henoiꞌi Tupana hawyi Pa⁠ꞌã⁠u hawyi Iesui wentup awy tukupteꞌen ȳt eꞌi.

4.   Iesui morekuatno raꞌyn atipy pe hap. Maꞌato miꞌi hap etiat iraniaꞌīn teꞌeruwanentup hawe ―Iesui porekuat toig̃neꞌen aipyꞌa pe iꞌatuꞌe. Maꞌato ȳtꞌi. Iesui Porekuat toig̃neꞌen atipy pe miꞌi hawyi Iesui toig̃neꞌen hamuat mesūwat yi tote morekuatno. Morekuatno raꞌyn toig̃neꞌen hawyi toiꞌatumomã yne hamo mesūwat yi totiaria morekuaria koꞌi wȳwo. (Tanieu 2:44; Mateu 6:9 hawyi 10) Miꞌi hawyi Ieuwa tunug̃ yne hamo tomikyꞌesat koꞌi torānia emītꞌīn me hamo. Meig̃muewuat koꞌi tutunug̃ hamo mesup epote kat pote Tupana Ehay henoi ―watoig̃neꞌen niatpo hap koꞌi korā̃ e.—2 Timoteu 3:1-5 kape; Mateu 24:3-14 kape.

    Ieuwa tiꞌaira Iesui morekuatno hamo. Toiꞌaira hawyi 1914 pyi morekuatno raꞌyn toig̃neꞌen.—Iesui Aru e Hap 11:15.

5.   Iesui kuꞌuro hap puo pyi yn ahehakyeraꞌat kuap hap. Iesui ikuꞌuro aiminug̃ saꞌag̃ koꞌi upi. Iesui kuꞌuro hap puo pyi tutum kuap aheig̃neꞌen wuatꞌi eꞌāt piat hap. (Mateu 20:28; Iesui Potmuꞌeria 4:12) Maꞌato miꞌi hamo waku etimohey Iesui ete hawyi waku erekoꞌywyk hawyi waku eresetꞌok. (Mateu 28:19 hawyi 20; Iuwãu 3:16; Ipotmūꞌeria 3:19 hawyi 20) Eminug̃ koꞌi puo pyi etimoherep kuap ereig̃neꞌen Tupana sese mohey hatno hap. (Tiaku 2:24 hawyi 26) Maꞌato aheko nug̃ hap kaipyi neꞌi ȳt tūtꞌi ahehakyeraꞌat hap maꞌato Tupana ewaku hap kaipyi yn ahehakyeraꞌat kuap. —Karasia 2:16 hawyi 21.

6.   Uruimohey Ieuwa hawyi Iesui iꞌewȳte anjo koꞌi tukupteꞌen atipy pe hap. b (Saumu 103:19-21 kape; Iesui Potmuꞌeria 7:55) Iraniaꞌīn 144 miu rakaria toiꞌatuhȳmut hamo g̃uꞌuro pyi hawyi tukupteꞌen atipy pe hamo. Miꞌi hawyi Iesui hawyi 144 miu rakaria kan taꞌatunug̃ hamo atipy pe. Taꞌatunug̃ hamo Tupana Porekuat atipy pe.—Tanieu 7:27; 2 Timoteu 2:12; Iesui Aru e Hap 5:9 hawyi 10; 14:1 hawyi 3.

7.   Tupana tum mesūwat yi mītꞌīn me wuatꞌi eꞌāt piat tukupteꞌen hamuat. Miꞌi pote mesūwat yi ȳt tuwemomã kuapꞌi. (Saumu 104:5; 115:16; Ekeresiasi 1:4) Tupana tiꞌatupoitȳro kahato tehay mohey haria. Miꞌiria imipoitȳro koꞌi tukupteꞌen hamo taꞌatuehaig̃te kahato hap wȳwo mesūwat yi nusuken note wuatꞌi eꞌāt pe hamo.—Saumu 37:11 hawyi 34.

8.   Uruimohey wentup anjo tuwemopyꞌahakꞌi Tupana ete hap. Miꞌi pote toig̃ kahato raꞌyn mesūwat yi tote hoꞌopot hap koꞌi hawyi saꞌag̃ nug̃ haria. (Iuwãu 8:44) Miꞌi anjo saꞌag̃ set Satanai e hawyi Ahiag̃ e. Miꞌi homoꞌakag̃ꞌia Atãu hawyi Ewa miꞌi hawyi tukupteꞌen Tupana ewanig̃kaptia wo sio miꞌi hawyi teꞌeruwemopyꞌahakꞌi Tupana ete. Miꞌi pote ti korā̃ aipōro hawyi aikuꞌuro aikotā̃ Atãu hawyi Ewa ewy. (Ienesi 3:1-6 kape; Humanu 5:12) Korā̃ ti Tupana timomãꞌi te hoꞌopot hap koꞌi wȳwo hawyi mītꞌīn saꞌag̃ nug̃ haria wȳwo. Maꞌato kat pote asom ȳt Tupana timomãꞌi te. Kat pote Ieuwa tum mōtꞌi kahato hap. Miꞌi hap puo pyi toimoherep terān ahiag̃ eso hap. Maꞌato toimomã yne hamo pykai.

9.   Uruikuap hawyi uruimohey ikuꞌuro rakaria ȳt tukupteꞌenꞌi poꞌog̃ hap. Miꞌiria ȳt taꞌatuhoꞌopot poꞌog̃ꞌi hawyi neig̃ tuwat aria wato kape. (Saumu 146:4; Ekeresiasi 9:5 hawyi 10)

    Maꞌato Ieuwa tiꞌatuhȳmut kahato hamo mītꞌīn g̃uꞌuro pyi. (Iesui Potmuꞌeria 24:15) Toiꞌatuhȳmut g̃uꞌuro pyi hawyi iraniaꞌīn ȳt tunug̃ terānꞌi tomikyꞌesat ewy pote miꞌiria toiꞌatumomã yne hamo hawyi ȳt tukupteꞌenꞌi poꞌog̃ hamo.—Iesui Aru e Hap 20:14 hawyi 15.

10.   Ieuwa ti woꞌomenaru nug̃ hat. Miꞌi pote toikyꞌesat ihaig̃nia iharyꞌi haryporia wȳwo hawyi haryporia heꞌaito ihaig̃nia wȳwo hap. Woꞌomenaru haria toꞌoꞌatoiat kuap karāmpe ihaig̃nia sio haryporia toket iraniaꞌīn ihaig̃niaꞌīn sio haryporiaꞌīn wȳwo pote yn. (Mateu 19:4-9 kape) Miꞌitā̃Tupana Ehay hoꞌopowȳro kahato seꞌaito sio seharyꞌi hawyi iꞌatumempytꞌīn tukupteꞌen waku puo hamo.—Ewesu 5:22–6:1 kape.

11.   Ieuwa yn uruimontypot. Ȳt uruimontypotꞌi ariaꞌyp posak neꞌi hawyi neig̃ iraniaꞌīn tupanaria iaꞌag̃kap koꞌi. (Teuteronamia 4:15-19 kape; 1 Iuwãu 5:21) Etikuap aikotā̃ me uruimontypot Tupana hap.

    •  ● Uruhentup Tupana kape.—Wiripu 4:6.

    •  ● Uruimowempāp Tupana Ehay.—Saumu 1:1-3 kape.

    •  ● Urumimowempāp kape urutuwanentup.—Saumu 77:12.

    •  ● Uruwaꞌatunug̃ hap tote urutemūꞌe Tupana Ehay ete hawyi urutuwepy hawyi uruhentup miꞌi hawyi urutomoesaika moesaika iraniaꞌīn uruwyriaꞌīn wȳwo.—Korosi 3:16; Epereu 10:23-25 kape.

    •  ● Uruhenoi Tupana Ehay puo pyi Tupana porekuat etiat—Mateu 24:14.

    •  ● Karāmpe uruwyriaꞌīn tikyꞌesat mowȳro hap pote uruhoꞌopowȳro miꞌiria wy.—Tiaku 2:14-17 kape.

    •  ● Urutunug̃ Ieuwa Montypot Yat hawyi iraniaꞌīn Ieuwa Montypot Yat koꞌi uruimompakupꞌi hawyi iraniaꞌīn tunug̃ netap teꞌeremūꞌe Tupana Ehay etiat hamo .—Saumu 127:1.

    •  ● Karāmpe uruwyriaꞌīn yat iꞌaman kahato hawyi minꞌe pote taꞌatupug̃ha yne taꞌatuekarenꞌen koꞌi sio iũteꞌen netap koꞌi aria tāt miꞌi hawyi taꞌatupug̃ha yne taꞌatuekarenꞌen koꞌi miꞌiria uruhoꞌopowȳro.—Iesui Potmuꞌeria 11:27-30 kape.

12.   Urutuwaꞌatunug̃ waku puo Ieuwa montypot hap. Miꞌi pote urutoria Ieuwa Ehay Enoi Haria mesūwat yi oktān urutuwaꞌatunug̃ tuereto Ieuwa Montypot Yat koꞌi pe. Itote toig̃ uruꞌakag̃ koꞌi. Miꞌiria ȳt iꞌatuposoꞌoknug̃ pykaiꞌi maꞌato miꞌiria aikotā̃ aiwoꞌewyꞌewy. Wentup awy yn tukupteꞌen wuat ewy. (Mateu 10:8; 23:8) Uruwaꞌatunug̃ hap koꞌi tote ȳt uruhentupꞌi dinheiro koꞌi hawyi ȳt uruhoꞌoknug̃ꞌi dizimo koꞌi. (2 Kurintiu 9:7) Maꞌato ȳt uweꞌi ikuap dinheiro pag̃ hap.

     Ieuwa Ehay Enoi Haria Potyporia tukupteꞌen Ieuwa Montypot Yat Koro pe. Miꞌiria hoꞌonãpin Ieuwa Ehay Enoi Haria mesūwat yi oktān.—Mateu 24:45.

13.   Urutukupteꞌen wentup awy yn. Mesūwat yi oktān uruimontypot Tupana Ieuwa wentup awy yn miꞌi pote ti uruiꞌatukyꞌe kahato mītꞌīn wentup awy yn wy. (1 Kurintiu 1:10) Hekat rakaria hawyi ȳt hekatꞌi rakaria hawyi iraniaꞌīn pusu kuap haria aikotā̃ tapyꞌyiaria. Miꞌi pote torānia mītꞌīn uruhoꞌokyꞌe. (Iesui Potmūꞌeria 10:34 hawyi 35; Tiaku 2:4) Urutoria Ieuwa Ehay Enoi Haria uruiꞌaira yne kuap urumikyꞌesat koꞌi aikotā̃ urutesokpe pag̃ hap etiat. Maꞌato yne uruiꞌaira Tupana piat woꞌonãpin hap koꞌi puo pyi yn.—Humanu 14:1-4 kape; Epereu 5:14.

14.   Uruminug̃ koꞌi etiat. Uruminug̃ koꞌi puo pyi uruimoherep uruiꞌatukyꞌe kahato mītꞌīn . Uruewowi ynꞌi urutuwanentup maꞌato torānia mītꞌīn kape urutuwanentup (Iuwãu 13:34 hawyi 35) Iꞌewȳte uruikyꞌe kahato Ieuwa. Miꞌi pote urutunug̃ imikyꞌesat yn miꞌi pote ȳt uruipag̃ꞌi iraniaꞌīn sū urupīt pe. (Iesui Potmūꞌeria 15:28 hawyi 29; Karasia 5:19-21 kape) Urutoria wakuaria kahato uruwese kahato torānia ete miꞌi pote ȳt urutuwatꞌi wuꞌuka wuꞌuka e hap koꞌi kape. (Mateu 5:9; Isaia 2:4) Hawyi urutunug̃ morekuaria piat urupoꞌoro hap ewy sio morekuaria piat woꞌonãpin hap koꞌi ewy. Maꞌato karāmpe Tupana Ehay piat ― ȳt ewetunug̃ waĩꞌe hap pote waĩꞌe hap ete waku ewetunug̃ miꞌi hap ete pote urutunug̃ Tupana mikyꞌesat poꞌog̃ .—Mateu 22:21; Iesui Potmūꞌeria 5:29.

15.   Aikotā̃ meig̃ uruikyꞌe mītꞌīn hawyi uruimoherep. Iesui toꞌe ― waku watiꞌatukyꞌe kahato iraniaꞌīn aikotā̃ aiwekyꞌe hap ewy e. Miꞌi hawyi toꞌe poꞌog̃ wy ― ȳt ewetunug̃ poꞌog̃ꞌi ran mesūwarotiaria eko koꞌi ewy neꞌi ewy. (Mateu 22:39; Iuwãu 17:16) Miꞌi pote urutoria Ieuwa Ehay Enoi Haria ȳt uweꞌi ihanik mesūwat yi totiaria morekuaria upi hawyi neig̃ urutuwat iraniaꞌīn igreja koꞌi upi. (Karasia 6:10; 2 Kurintiu 6:14) Maꞌato torānia urutunug̃ wakuat torānia mītꞌīn me iꞌewȳte ȳt uruehay saꞌag̃ꞌi iꞌatuetiat.—Humanu 14:12.

 Etikuap terān poꞌog̃ uruetiat kat koꞌi ete uruimontypot hap etiat hawyi uruimohey hap koꞌi etiat. Miꞌi pote etimowempāp kuap site puo pyi hawyi etiwan popera hawyi etipoꞌoro kuap uruewowi sio ereto terān uruwaꞌatunug̃ hap kape pote ehay kuap wentup Ieuwa Ehay Enoi Hat wȳwo hawyi ereto hamo Ieuwa Montypot Yat kape ȳt pyaꞌi eꞌyat ekai rakat.