WEMŪꞌE HAP 07

Etikuap poꞌog̃ o Ieuwa etiat

MIOWAT TUWESOꞌOWYNUG̃ HAMO

Ewanentup hawe aikotā̃ asom Ieuwa. Ewanentup hawe miꞌi hesaika kahato rakat asom maꞌato pya kahato toig̃neꞌen ekai aikotā̃ waikiru koꞌi tukupteꞌen pya kahato hap ewy. Sio ewanentup hawe Miꞌi mīt ewyꞌi aikotā̃ hatywo huru huruꞌe hap ewy maꞌato hesaika kahato rakat. Uwe asom pyno Ieuwa. Tehay puo pyi Ieuwa henoi kahato towat wakuat koꞌi etiat iꞌewȳte aikotā̃ tuwanentup kahato ewowiat hap.

1. Kat pote asom wataꞌakasa kuapꞌi Tupana kape.

Iuwãu 4:24 miotā̃ e — Tupana toig̃neꞌen ipaꞌãu yn e. Ieuwa pīt ȳt aipīt ewyꞌi maꞌato ipīt maꞌãu kawiat neꞌi atipy pe toig̃neꞌen miꞌi pote ȳt wataꞌakasa kuap hewowi.

2. Aikowat asom Ieuwa wat toig̃ wakuat koꞌi.

Pȳwo. Ieuwa heremoꞌi wen maꞌato toig̃ kahato iwat wakuat koꞌi. Karāmpe watemūꞌe ihay ete hawyi watikuap iwat wakuat koꞌi etiat. Tupana Ehay henoi Tupana ti hampȳk kahato rakat iꞌewȳte iminug̃ koꞌi hampȳk kahato e. (Teturonamia 32:4) Iꞌewȳte Ieuwa aikyꞌe kahato tohatyꞌu kahato ahepiat hoꞌopot hap. Hoꞌopot rakaria Ieuwa wanentup hawe iꞌatuehakyꞌeꞌi kahato. (Tiaku 5:11) Taꞌi ȳt iwepītꞌi rakaria kai ȳt pya hinꞌi toig̃neꞌen hawyi iꞌarōt rakaria kai. (Saumu 34:18) Etikuap taꞌyn apo aiminug̃ koꞌi puo pyi watimowepīt iꞌewȳte watimoꞌarōt kuap Ieuwa hap. Kotā̃ e hap. Karāmpe mīt tunug̃ tuwepyi neꞌi ȳt nakuꞌi rakat hap miꞌi pote Ieuwa iꞌarōt kahato topyhuꞌat. (Saumu 78:40, 41) Maꞌato karāmpe mīt tunug̃ waku rakat miꞌi pote Ieuwa iwepīt kahato topyhuꞌat. — Etimowempāp o Porowepiu 27:11.

3. Aikotā̃ me asom Tupana timoherep aikyꞌe hap.

Ieuwa timoherep poꞌog̃ wakuat koꞌi kai woꞌokyꞌe hap. Pȳwo Tupana Ehay henoi woꞌopotkyꞌe hat sese ti Tupana e. (1 Iuwãu 4:8) Aikyꞌe hap Ieuwa timoherep tehay puo pyi iꞌewȳte tominug̃ koꞌi puo pyi. (Etimowempāp o Iesui Potmūꞌeria 14:17.) Kotā̃ e hap. Miꞌi ainug̃ watehaꞌat kuap iminug̃ ikahuria kahato rakaria kape hamo iꞌewȳte watuwanentup kuap wepȳ hap koꞌi kape hamo watuꞌu kuap miꞌu he kahato rakaria koꞌi hamo. Toikyꞌesat watoig̃neꞌen aiwepīt kahato hap wȳwo hap.

EREWANENTUP O ETIKUAP POꞌOG̃ HAMO

Etikuap hamo kat puo pyi Ieuwa tunug̃ tominug̃ koꞌi hap iꞌewȳte etikuap hamo aikotā̃ me toimoherep towat wakuat koꞌi hap etiat.

4. Tupana paꞌãu e hap Tupana esaika hawiat pe ti

Aito mītꞌīn aipotpap sio kat watunug̃ aipo wȳwo pote yn. Maꞌato Ieuwa ȳtꞌi. Kat ri tutunug̃ topaꞌãu puo pyi ti. Iraniaꞌīn teꞌeruwanentup hawe Tupana paꞌãu e Tupana piat pe neꞌi sio iꞌatuꞌe. Maꞌato Tupana Ehay henoi Tupana esaika hawiat pe neꞌi Tupana paꞌãu e. Miꞌi wȳwo tutunug̃ yne kuap tomikyꞌesat koꞌi. Eweimowempāp o Iruka 11:13 hawyi Iesui Potmūꞌeria 2:17. Miꞌi hawyi apoꞌe hap koꞌi ete eiwoꞌoꞌehay.

Tupana henoi ahytmoig̃ kahato wuatꞌi mītꞌīn me uipaꞌãu e taꞌatuhentup pote e. Pyno Tupana paꞌãu e Tupana piat pe asom sio Tupana esaika hawiat pe neꞌi. Aikotā̃ etipuenti. Kat pote asom miotā̃ ere.

Topaꞌāu puo pyi Ieuwa tunug̃ tominug̃ wakuat koꞌi. Eweimowempāp o Ienesi 1:1,2 hawyi 2 Peteru 1:20, 21. Miꞌi hawyi eiwoꞌoꞌehay o apoꞌe hap etiat.

Kat koꞌi eig̃ Ieuwa tunug̃ naꞌyn topaꞌãu puo pyi.

5. Ieuwa wat toig̃ kahato wakuat koꞌi

Muisei timontypot kahato raꞌyn Tupana pykai maꞌato toikuap poꞌog̃ terān hetiat. Miꞌi pote miotā̃ e — Etimoherep muap wakuat aikotā̃ waku uhewyry hampȳk hamuat e. Pȳwo pe ti worokuap terān En e. (Esutu 33:13) Miꞌi hawyi Ieuwa henoi raꞌyn towat wakuat koꞌi Muisei pe. Eweimowempāp o Esutu 34:4-6. Miꞌi hawyi apoꞌe hap koꞌi ete eiwoꞌoꞌehay.

Mesūwat puo pyi Ieuwa henoi towat wakuat koꞌi etiat Muisei pe. Kat e eig̃.
Ieuwa wat toig̃ kahato wakuat koꞌi hanti. Ehenoi pyno emipuenti poꞌog̃ waku rakat.

6. Pȳwo Ieuwa tenentup kahato mītꞌīn kapiat pykai

Nimo kahato Tupana emītꞌīn Isareu ywaniaria tukupteꞌen Esitu pe turān iꞌatupotpap kahato ȳt kat saꞌup upiꞌi. Sese taꞌatuhoꞌopot kahato. Miꞌi hap kapiat Ieuwa ihaꞌat hawyi aikotā̃ asom topyhuꞌat. Ewetenentup pyno ÁUDIO kape. Miꞌi turān o ewetehaꞌat eheTupana Ehay kape sio eweimowempāp o Esutu 3:1-10. Miꞌi hawyi apoꞌe hap koꞌi ete eiwoꞌoꞌehay.

ÁUDIO: Ieuwa tenentup kahato taꞌatuhoꞌopot hap kapiat pykai (2:45)

Karāmpe Ieuwa ihaꞌat mītꞌīn hoꞌopot hap kapiat hawyi aikotā̃ asom topyhuꞌat.—Erehaꞌat pyno hag̃a hit 7 hawyi 8.
Ewanentup hawe pȳwo asom Ieuwa hoꞌopowȳro terān mītꞌīn hap. Tohoꞌopowȳro kuap asom mītꞌīn. Kat pote asom miotā̃ ere.

7. Tominug̃ koꞌi puo pyi Ieuwa aimūꞌe kahato tetiat

Karāmpe watehaꞌat poꞌog̃ Ieuwa minug̃ koꞌi kapiat hawyi watikuap poꞌog̃ iwat wakuat koꞌi etiat. Ewetehaꞌat pyno VÍDEO kape. Miꞌi hawyi eweimowempāp o Humanu 1:20. Miꞌi hawyi eiwoꞌoꞌehay o apoꞌe hap etiat.