WEMŪꞌE HAP 09

Hentup hap puo pyi Tupana wyꞌok wo poꞌog̃ poꞌog̃ kuap ereig̃neꞌen

MIOWAT TUWESOꞌOWYNUG̃ HAMO

Etikyꞌesat raꞌyn asom iraniaꞌīn piat enãpin hap. Etikyꞌesat asom epiat epowȳro niatpo hap koꞌi akit hamo. Emomperupꞌi hap apo etikyꞌesat raꞌyn. Ieuwa wyꞌok wo apo ereig̃neꞌen terān poꞌog̃. Miꞌitā̃ koꞌi hamo hentup hap puo pyi epowȳro kuap yne. Maꞌato aikotā̃ me asom wahentup kuap. Tupana tenentup yne asom hentup haria kape. Kat asom waku etunug̃ Tupana tenentup ehentup hap koꞌi kape hamo. Meig̃muewuat koꞌi etiat watikuap hamo.

1. Uwe kapeig̃ waku wahentup iꞌewȳte kat hap koꞌi upig̃ wahentup kuap.

Iesui aimūꞌe waku wahentup aiꞌȳwot atipy piat kape yn e. Miotā̃ e — Worohoꞌomūꞌe terān ehehay hap ete. Uruꞌȳwot atipy piat e. (Mateu 6:9) Wahentup Ieuwa kape pote iwyꞌok wo poꞌog̃ hamo watoig̃neꞌen.

Wahentup kuap torānia kat koꞌi upi. Maꞌato Tupana tiwesat hamo aimientup hap koꞌi aikotā̃ tomikyꞌesat koꞌi ewy pote yn. Karāmpe wahentup Tupana pe imikyꞌesat ewy miꞌi hawyi watuwehum howawi aimientup ium hat kape. (1 Iuwãu 5:14) Iesui aimūꞌe kat koꞌi upi wahentup hap etiat. (Etimowempāp o Mateu 6:9-13.) Wahentup kuap aimikyꞌesat koꞌi upi aiminug̃ wuat terān hap koꞌi upi. Maꞌato ȳt watiwāure kuapꞌi wahentup iraniaꞌīn upi hamo iꞌewȳte waku wahewaku Tupana iminug̃ aheupiat koꞌi upi.

2. Aikotā̃ meig̃ wahentup kuap Tupana kape.

Waku wahentup aipyꞌa pyi. Miꞌi pote Tupana Ehay henoi waku kat koꞌi kat koꞌi eipyꞌa piat koꞌi ewehenoi hewowi e. (Saumu 62:8) Aiwanentup hawe yn wahentup Tupana kapiat pykai tuwanentup hamo wy. Aj̃umpe pyi neꞌi wahentup kuap ihatꞌok puo sio wantym muo ihatꞌok kaiꞌi. Waku kotā̃ me yn ehentup eꞌi Ieuwa. Ehentup kuap mỹꞌãtutuk pe moĩꞌam me apyk pe maꞌato waku etimoherep Ieuwa montypot hap ehentup turān.

3. Aikotā̃ meig̃ Tupana tiwesat wahentup hap koꞌi.

Aikotā̃ aikotā̃ me neꞌi toiwesat wahentup hap koꞌi. Kotā̃ e hap tehay puo pyi miꞌi hap toimoherep kuap aimikuapꞌi koꞌi. Tupana Ehay mowempāp hap kaipyi mītꞌīn me iꞌatumoweꞌeg̃ hamuat tutum. (Saumu 19:7; etimowempāp o Tiaku 1:5.) Ieuwa tum kuap towese hap karāmpe niatpo ahetiat turān aimomperupꞌi hamo. Watikyꞌesat mowȳro hap turān Ieuwa temītꞌīn koꞌi puo pyi aipowȳro kuap wy.

EREWANENTUP O ETIKUAP POꞌOG̃ HAMO

Etikuap hamo kat waku etunug̃ epyꞌa pyi emientup hap koꞌi kape Tupana tenentup hamo iꞌewȳte etikuap hamo hentup hap epowȳro kuap kahato hap wy.

4. Kat koꞌi waku watunug̃ Tupana tenentup hentup hap koꞌi kape hamo

Kat koꞌi asom waku etunug̃ Tupana tenentup emientup hap koꞌi kape hamo. Ewetehaꞌat pyno VÍDEO kape.

VÍDEO: Tupana tenentup yne asom hentup haria kape. — Vídeo yneꞌi rakat (2:42)

Ieuwa tikyꞌesat wahentup tewowiat hap. Eweimowempāp o Saumu 65:2. Miꞌi hawyi apoꞌe hap koꞌi ete eiwoꞌoꞌehay.

Aikotā̃ etipuenti Tupana tikyꞌesat asom ehentup tewowiat hap. Kat pote asom miotā̃ ere.

Hentup hap koꞌi kape Tupana tenentup hamo maꞌato waku rakat iꞌe hap ewy watunug̃ pote yn. Eweimowempāp o Mikeia 3:4 hawyi 1 Peteru 3:12. Miꞌi hawyi eiwoꞌoꞌehay o apoꞌe hap etiat.

Aikotā̃ me asom watikuap Tupana tenentup ahepiat hentup hap koꞌi kape hamo hap.

Wuꞌuka hap eꞌyj̃an mete suraraꞌīn hentup mowȳro hap Tupana kape taꞌatuwanikaptia momã hamo maꞌato iꞌatuwanikaptia miꞌitā̃ wy. Tenentup hamo asom Tupana iꞌatumientup hap koꞌi kape.

5. Waku wahentup Ieuwa kape aipyꞌa pyi

Iraniaꞌīn teꞌeruwanentup hawe waku neꞌi wahentup Tupana kape hupiteꞌi hupiteꞌi iꞌatuꞌe. Miꞌi hap asom Tupana tikyꞌesat. Eweimowempāp o Mateu 6:7. Miꞌi hawyi eiwoꞌoꞌehay o apoꞌe hap etiat.

Kat asom waku etunug̃ ȳt hupiteꞌi hupiteꞌi ehuꞌat sehay koꞌi ehentup Tupana kapiat hamo turān.

Pyno waku wuatꞌi eꞌāt pe erenentup wentup Ieuwa mij̃um epiat hap kape. Miꞌi hawyi ehewaku kuap Ieuwa miꞌi hap upi. Miꞌi hap etunug̃ segunda-feira pyi domingo kape pote ehewaku hamo Ieuwa mij̃um sete rakat upi hamo. Miꞌi pote wentup ewy ynꞌi ehentup hamo. Teꞌeruweupi hamo ehentup hap koꞌi.

Ȳwot woꞌopotkyꞌe rakat tikyꞌesat tosaꞌyru henoi topyꞌa piat tuwanentup hap koꞌi hap. Miꞌi pote iꞌȳwot woꞌokyꞌe hap wȳwo tenentup. Miꞌi hap ewy Ieuwa. Toikyꞌesat wahentup aipyꞌa pyi hap.

6. Hentup hap ti Tupana mij̃um ahepiat

Aikotā̃ me asom hentup hap aipowȳro kuap ahetiat niatpo kahato turān. Ewetehaꞌat pyno VÍDEO kape.

VÍDEO: Niatpo turān hentup hap aipowȳro (1:32)

Tupana Ehay henoi wahentup pote aiwanentup hawe woꞌowese hap yn topyhuꞌat hamo e. Eweimowempāp o Wiripu 4:6, 7. Miꞌi hawyi apoꞌe hap koꞌi ete eiwoꞌoꞌehay.

Asuwe ehentup Tupana kape niatpo hap akit hamo maꞌato niatpo te ēte. Maꞌato kat pote asom hentup hap epowȳro kuap kahato te.
Kat koꞌi upig̃ ehentup terān kahato Ieuwa kape.

Etikuap taꞌyn apo.

Nimo pyi ti raꞌyn hentup kahu re amém iꞌatuꞌe sio waku iꞌatuꞌe. Miotā̃ iꞌatuꞌe hap aikotā̃ pȳwo e hap sio miꞌitā̃ e hap — 1 Koronika 16:36.

7. Etiwāure teiꞌo ehentup hamo

Asuwe aisera aipohepapꞌi kahato miꞌi pote asuwe watiwāure wahentup Ieuwa kape hamo. Maꞌato Iesui miꞌitā̃ tuereto asom. Eweimowempāp o Mateu 14:23 hawyi Maku 1:35. Miꞌi hawyi apoꞌe hap koꞌi ete eiwoꞌoꞌehay.

Iesui ipohepapꞌi hera pykai maꞌato kan tutunug̃ toꞌȳwot wȳwo ihay tuereto hamo.
Pyno epohepapꞌi esera pykai maꞌato kan waku etunug̃ ehentup tuereto Ieuwa kape hamo.

IRANIAꞌĪN TEꞌEROꞌE Kat hamoꞌi wahentup Tupana kape kat pote tenentup sese hamo yn. Ȳt toiwesat hamoꞌi aimientup ewy iꞌatuꞌe.

Kat ere ten miotā̃ e haria pe.

WATUWEMŪꞌE RAꞌYN

Wahentup aipyꞌa pyi Ieuwa kapiat pote iwyꞌok wo poꞌog̃ poꞌog̃ watoig̃neꞌen kuap iꞌewȳte aiwanentup hawe woꞌowese hap yn topyhuꞌat hamo iꞌewȳte aipowȳro hamo miꞌi hap imikyꞌesat nug̃ hamo.