Ieuwa tikyꞌesat ahepiat tomontypot hampȳk waku puo hap. (1 Kurintiu 14:33, 40) Miꞌi pote hemītꞌīn teꞌeruwaꞌatunug̃ hampȳk puo kahato. Maꞌato aikotā̃ me asom Iesui mohey sēse haria teꞌeruwaꞌatunug̃ waku puo congregação koꞌi puo. Kan waku torānia congregação piaria tunug̃.

1. Uwe eig̃ congregação piaria piat Akag̃ sēse toig̃neꞌen.

Aipotypot Iesui Aiꞌakag̃ topyhuꞌat. (Ewesu 5:23) Atipy tote pyi Iesui tiꞌatuerohik yne Ieuwa Ehay Enoi Haria koꞌi potpap hap mesūwat yi oktān. Miꞌi pote toiꞌatuꞌaira iraniaꞌīn ihaig̃niaꞌīn iweꞌeg̃ kahato rakaria hemītꞌīn apykok hamuat. Miꞌiria set Ieuwa Ehay Enoi Haria Potyporia e. (Etimowempāp o Mateu 24:45-47.) Nimo pyi ti raꞌyn Iesui Potmūꞌeria 12 ok takaria iꞌewȳte akag̃ koꞌi Ierusarẽi tote pyi taꞌatuhoꞌonãpin hawyi taꞌatupowȳro congregação piaria. (Iesui Potmūꞌeria 15:2, 4) Miꞌi hap ewy kahato korā̃ Ieuwa Ehay Enoi Haria Potyporia tunug̃ mesūwat yi oktān taꞌatuhoꞌomūꞌe iꞌewȳte taꞌatuhoꞌonãpin congregação koꞌi. Maꞌato miꞌiria urukaꞌiwaria sēseꞌi. Teꞌeremūꞌe Tupana Ehay ete taꞌatukuap terān Ieuwa mikyꞌesat koꞌi terān haype iꞌewȳte taꞌatumontypot Iesui Akag̃ sēse hap.

2. Aikotā̃ haria eig̃ akag̃ koꞌi wo iꞌewȳte kan taꞌatunug̃.

Ieuwa Ehay Enoi Haria akag̃ koꞌi ihaig̃niaꞌīn iweꞌeg̃ kahato rakaria. Tupana Ehay puo pyi taꞌatuhoꞌomūꞌe kahato Ieuwa emītꞌīn iꞌewȳte taꞌatuhoꞌomoesaika hawyi taꞌatuhoꞌopowȳro. Ieuwa emītꞌīn erohik hap upi ȳt iꞌatuposaꞌupꞌi maꞌato taꞌatunug̃ aikotā̃ Tupana Ehay piat hap ewy. Eweiꞌatuꞌapykok Iesui mohey haria yne eipyꞌa pyi yne ehepiat kyꞌesat hap wȳwo. Areig̃neꞌen nerān hekat rakatno Tupana hũria apykok hap saꞌup kaipyi e hap pupi eiweꞌeg̃ wo o e. (1 Peteru 5:1, 2) Akag̃ koꞌi taꞌatunug̃ yneꞌi taꞌatupotpap hap koꞌi teꞌeruweran maꞌato toig̃ iꞌatupowȳro haria ihaig̃niaꞌīn. Iꞌatupowȳro haria mōtꞌi hawyi tukupteꞌen kuap wy akag̃ koꞌi wo.

Ieuwa Ehay Enoi Haria Potyporia tiꞌatupoꞌoro iraniaꞌīn akag̃ koꞌi iꞌatupotpap superintendente de circuito wo hamo. Miꞌiria viajante koꞌi aikowo aikowo neꞌi teꞌeruwat congregação koꞌi upi Ieuwa Ehay Enoi Haria moesaika hamo iꞌewȳte iꞌatunãpin hamo. Tupana Ehay puo pyi taꞌatuhoꞌomūꞌe Ieuwa emītꞌīn. Akag̃ koꞌi wo terān haria pe iꞌewȳte iꞌatupowȳro terān haria pe toig̃ woꞌonãpin hap koꞌi Tupana Ehay pe. Miꞌi pote superintendente de circuito tehaꞌat hamo iꞌatuminug̃ koꞌi kape sio taꞌatunug̃ Tupana Ehay piat woꞌonãpin hap ewy sio ȳtꞌi hap. Miꞌitā̃ pote taꞌatuꞌaira hamo akag̃ wo sio akag̃ koꞌi powȳro hamo. — 1 Timoteu 3:1-10, 12; Titu 1:5-9.

3. Kat asom waku torānia Ieuwa Ehay Enoi Haria tunug̃.

Waku torānia congregação piaria Tupana set mowato. Miꞌi hap taꞌatunug̃ teꞌeruwaꞌatunug̃ hap puo pyi. Itote teꞌeruwepȳ hap puo pyi iꞌewȳte apoꞌe hap koꞌi wesat hap puo pyi. Iꞌewȳte taꞌatuhenoi Tupana Ehay hap puo pyi iꞌewȳte taꞌatunug̃ kuap hap oktān taꞌatunug̃. — Etimowempāp o Isaia 12:4 hawyi Saumu 148:12, 13.

 EREWANENTUP O ETIKUAP POꞌOG̃ HAMO

4. Akag̃ wakuat kahato rakat Iesui

Iesui tikyꞌesat watiꞌaira aipyꞌa pyi Aiꞌakag̃ wo miꞌi hap. Eweimowempāp o Mateu 11:28-30. Miꞌi hawyi eiwoꞌoꞌehay o apoꞌe hap etiat.

• Mesūwat puo pyi aikotā̃ rakat eig̃ Aiꞌakag̃ Iesui. Iꞌewȳte Aiꞌakag̃ wo Iesui watimontypot pote kat hap eig̃ tutum hamo ahepe hawyi kat hag̃ watipuenti hamo.

5. Congregação piaria akag̃ koꞌi aimūꞌe kahato taꞌatuminug̃ wakuap koꞌi puo pyi

1. Akag̃ koꞌi Ieuwa wyꞌok wo kahato tukupteꞌen terān poꞌog̃ poꞌog̃ iꞌewȳte taꞌatupowȳro taꞌatueharyꞌi taꞌatumempytꞌīn Ieuwa wyꞌok wo tukupteꞌen hamo wy.

2. Akag̃ koꞌi torānia congregação piaria taꞌatueropat.

3.   Akag̃ koꞌi taꞌatuhenoi henoi tuereto Tupana Ehay etiat mītꞌīn me.

4. Akag̃ koꞌi hoꞌomūꞌe kahato Tupana Ehay etiat iꞌewȳte taꞌatuhoꞌopowȳro kahato Ieuwa montypot yat pitꞌok pitꞌok hap ete hawyi iraniaꞌīn hap ete wy.

6. Watiꞌatupowȳro kuap akag̃ koꞌi

Tupana Ehay henoi kat pote waku watiꞌatupowȳro akag̃ koꞌi hap. Eweimowempāp o Epereu 13:17. Miꞌi hawyi eiwoꞌoꞌehay o apoꞌe hap etiat.

• Mesūwat puo pyi Tupana Ehay henoi waku watiꞌatumontypot aipyꞌa pyi congregação piaria akag̃ koꞌi. Kat pote asom miotā̃ e. Aikotā̃ etipuenti mesūwat woꞌonãpin hap etiat.

Eweimowempāp o Iruka 16:10. Miꞌi hawyi eiwoꞌoꞌehay o apoꞌe hap etiat.

• Mesūwat puo pyi kat pote asom waku kurin ete pykai maꞌato waku watiꞌatumontypot akag̃ koꞌi congregação piaria.

 WATUWEMŪꞌE RAꞌYN

Iesui ti congregação piaria Akag̃ sēse toig̃neꞌen. Congregação piaria akag̃ koꞌi tunug̃ aikotā̃ Iesui piat taꞌatupoꞌoro hap ewy. Watiꞌatupowȳro akag̃ koꞌi hap upi aiwepīt kahato. Kat pote akag̃ koꞌi wakuaria kahato aimūꞌe kahato taꞌatuminug̃ wakuat koꞌi puo pyi.

Hotꞌokꞌe te asom

• Uwe eig̃ congregação piaria Akag̃ sēse toig̃neꞌen.

• Aikotā̃ hap puo pyi eig̃ akag̃ koꞌi tiꞌatupowȳro congregação piaria.

• Kat hap eig̃ torānia congregação piaria waku tunug̃.