WEMŪꞌE HAP 26
Kat pote asom toig̃ kahato saꞌag̃ koꞌi hawyi hoꞌopot hap koꞌi.
Karāmpe tuwemoherep saꞌag̃ koꞌi hap hawyi mītꞌīn apoꞌiꞌatuꞌe kat pote asom miꞌi hap tuwemoherep iꞌatuꞌe. Maꞌato iwesat hap watipuenti kuap Tupana Ehay pe. Karāmpe watikuap iwesat hap hawyi aiwepīt kahato.
1. Karāmpe pyi asom tesaꞌawynug̃ saꞌag̃ hap koꞌi.
Ahiag̃ tuwemompyꞌahakꞌi Ieuwa ete kat pote torānia porekuatno toig̃neꞌen terān haype. Miꞌi tupono tohoꞌomoꞌakag̃ꞌia Atãu hawyi Ewa teꞌeremompyꞌahakꞌi Tupana etiat hamo wy. Aikotā̃ hap puo pyi asom toiꞌatuhoꞌomoꞌakag̃ꞌia. Teso hap puo pyi. (Ienesi 3:1-5) Toimaꞌat Ewa tenentup saꞌag̃ Ieuwa etiat hamo. Ieuwa tum yneꞌi uhepe waku rakat e hamo. Miꞌi hap puo pyi ahiag̃ timoherep mītꞌīn ti aru iꞌatuwepīt poꞌog̃ ȳt taꞌatumontypotꞌi Tupana woꞌonãpin hap koꞌi pote e. Miꞌi pote ahiag̃ heso haryporia Ewa pe ȳt eikuꞌuro hamoꞌi ran e. Meij̃empe pyi ti ahiag̃ hoꞌowynug̃ naꞌyn teso hap. Miꞌi pote Tupana Ehay henoi ahiag̃ wyti yne heso rakat kaꞌiwat neꞌi topyhuꞌat e. — Iuwãu 8:44.
2. Kat hap eig̃ Atão hawyi Ewa taꞌatuꞌaira.
Ieuwa heg̃yiꞌat kahato Atãu hawyi Ewa wȳwo. Tupana toꞌe iꞌatuepe uimikoi koꞌi atum yne ehepe e. Maꞌato wentup uimikoi ypia etiat o ȳt ewetuꞌu teiꞌo e. (Ienesi 2:15-17) Miotā̃ e pykai maꞌato teꞌeruwewi taꞌatuꞌaira mekewat ywa u hap. Ewa tāt topo wo ywa hawyi tutuꞌu raꞌyn hawyi tohoꞌoj̃um teꞌaito pe hawyi tutuꞌu raꞌyn wy. (Ienesi 3:6) Atãu hawyi Ewa ȳt iꞌaparap hariaꞌi hampȳk kahato rakaria miꞌi pote niatpoꞌi Tupana mikyꞌesat yn nug̃ hamo. Maꞌato taꞌatuꞌaira ȳt Tupana montypotꞌi hamo. Karāmpe miꞌi hap taꞌatuꞌaira hawyi taꞌatumoherep ȳt taꞌatukyꞌesatꞌi Tupana taꞌatuporekuatno hap. Miꞌi hap upi ti hoꞌopot hap taꞌyn tūt iꞌatuepe. — Ienesi 3:16-19.
3. Kat hag̃ tūt Atãu hawyi Ewa iꞌatumiꞌaira kaipyi.
Karāmpe Atãu hawyi Ewa taꞌatuꞌaparap taꞌyn hawyi iꞌaparap haria wo raꞌyn tukupteꞌen iꞌewȳte iꞌatusaipepiaria iꞌaparap haria wo raꞌyn tukupteꞌen wy. Tupana Ehay henoi Atãu etiat Atãu ȳt tunug̃ꞌi Tupana mikyꞌesat ewy. Tupana toꞌe — Meketā̃ etunug̃ saꞌag̃ hawyi ti aru ekuꞌuro hap topyhuꞌat e Atãu me. Miꞌi tupono yne mītꞌīn ikuꞌuro rakaria wo tukupteꞌen. — Humanu 5:12.
Maꞌato kat pote asom wahoꞌopot. Asuwe wahoꞌopot aimiꞌaira saꞌag̃ koꞌi upi iꞌewȳte iraniaꞌīn miꞌaira saꞌag̃ koꞌi upi. Maꞌato asuwe wahoꞌpot hap iunteꞌen kuap neꞌi tuwemoherep. — Etimowempāp o Ekeresiasi 9:12.
EREWANENTUP O ETIKUAP POꞌOG̃ HAMO
Etikuap hamo ȳt Tupanaꞌi aimosoꞌopot nug̃ hat iꞌewȳte ȳt karāmpeꞌi tutunug̃ saꞌag̃ mesūwat yi totiat hap. Iꞌewȳte etikuap hamo wy aikotā̃ topyhuꞌat wahoꞌopot turān hap.
4. Uwe asom mītꞌīn mosoꞌopot nug̃ hat.
Mītꞌīn teꞌeruwanentup hawe Tupana ti mesūwat yi porekuat iꞌatuꞌe. Maꞌato pȳwo asom miotā̃ iꞌatuꞌe hap. Ewetehaꞌat pyno VÍDEO kape.
Eweimowempāp o Tiaku 1:13 hawyi Ewesu 2:2 Miꞌi hawyi eiwoꞌoꞌehay o apoꞌe hap etiat.
-
Tupana tunug̃ asom saꞌag̃ aimosoꞌopot hamo. Aikotā̃ etipuenti.
5. Ahiag̃ naꞌyn mītꞌīn porekuatno hawyi kat hag̃ tuwemoherep.
Eweimowempāp o Ienesi 3:1-6. Miꞌi hawyi apoꞌe hap koꞌi ete eiwoꞌoꞌehay.
-
Ahiag̃ heso Ewa pe. Kat e eig̃ imaꞌat hamo. — Ewetehaꞌat pakupꞌi pyno hag̃a hit 4 hawyi 5.
-
Ahiag̃ tikyꞌesat mītꞌīn teꞌeruwanentup saꞌag̃ Ieuwa ȳt tum yneꞌi uhepe waku rakat iꞌatuꞌe hamo hap. Miꞌi hamo kat e eig̃ ahiag̃.
-
Eiwepīt sēse hamo eweiꞌaira ro Ieuwa eiporekuatno e asom ahiag̃.
Eweimowempāp o Ekeresiasi 4:1. Miꞌi hawyi eiwoꞌoꞌehay o apoꞌe hap etiat.
-
Watikuap taꞌyn ȳt Ieuwaꞌi morekuatno toig̃neꞌen mesūwat yi tote hap. Miꞌi pote kat hap koꞌi asom tuwemoherep mesūwat yi tote.
-
Atãu hawyi Ewa tukupteꞌen nusuken note ȳt iꞌaparap hap wȳwoꞌi. Maꞌato teꞌeruwat ahiag̃ ehay upi hawyi teꞌeremompyꞌahakꞌi Ieuwa ete.
-
Taꞌatuꞌaparap hawyi torānia raꞌyn iꞌaparap haria wo tukupteꞌen hawyi toig̃ hoꞌopot hap g̃uꞌuro hap mesūwat yi oktān.
-
Ieuwa timoweityk hamuat iꞌaparap hap wȳwo hoꞌopot hap iꞌewȳte g̃uꞌuro hap wȳwo. Miꞌitā̃ raꞌyn hawyi mītꞌīn tukupten wuatꞌi eꞌāt pe nusuken note ȳt iꞌaparap hap wȳwoꞌi hamo.
6. Ieuwa tenentup kahato ahewowi wahoꞌopot turān
Tenentup asom Tupana ahewowi wahoꞌopot turān. Watikuap hamo kat iꞌatuꞌe miꞌi hap etiat Tawi hawyi Peteru. Eweimowempāp o Saumu 31:7 hawyi 1 Peteru 5:7. Miꞌi hawyi eiwoꞌoꞌehay o apoꞌe hap etiat.
-
Aimimowempāp koꞌi puo pyi watikuap Ieuwa tehaꞌat sese ynꞌi wahoꞌopot hap kape maꞌato aipowȳro terān. Miꞌi hap etiat etikuap hawyi aikotā̃ erepyhuꞌat.
7. Tupana timomã yne hamuat hoꞌopot hap koꞌi wȳwo
Eweimowempāp o Isaia 65:16, 17 hawyi Iesui Aru E Hap 21:3, 4. Miꞌi hawyi eiwoꞌoꞌehay o apoꞌe hap etiat.
-
Ieuwa timomã hamuat saꞌag̃ koꞌi wȳwo hap iꞌewȳte aiꞌarōt hap koꞌi wȳwo hap. Miꞌi hap etikuap hawyi kat pote miꞌi hap emowepīt kahato.
Etikuap taꞌyn apo.
Ahiag̃ heso saꞌawyꞌi karāmpe toimaꞌat Ewa hawyi meij̃empe pyi ti ahiag̃ timohun naꞌyn Ieuwa set. Ahiag̃ minug̃ saꞌag̃ kaipyi mītꞌīn teꞌeruwanentup saꞌag̃ Ieuwa etiat waku kahatoꞌi Ieuwa Aiporekuatno ȳt topotkyꞌeꞌi iꞌatuꞌe hamo. Maꞌato mesup tān epote Ieuwa timomã yne hamuat hoꞌopot hap koꞌi hawyi toimoherep hamo torānia pe uiat yn uiporekuat poꞌog̃ waku torānia kai e hamo. Miꞌi hap tutunug̃ hamuat raꞌyn hawyi toimoherep yne hamo ahiag̃ eso hap koꞌi hawyi uweꞌi poꞌog̃ hamuat tenentup saꞌag̃ Ieuwa etiat. Miꞌi hap Ieuwa tikyꞌesat poꞌog̃ torānia kai. — Esekieu 36:23 hawyi Mateu 6:9, 10.
IRANIAꞌĪN TEꞌEROꞌE Tupana ti uhaꞌag̃ kahato hoꞌopot hap puo pyi iꞌatuꞌe.
-
Kat ere aten miotā̃ e haria pe.
WATUWEMŪꞌE RAꞌYN
Ahiag̃ hawyi Atãu hawyi Ewa. Miꞌiria miꞌaira saꞌag̃ upi tūt hoꞌopot hap iꞌewȳte saꞌag̃ hap koꞌi mesūwat yi tote. Ieuwa tenentup kahato ahewowi miꞌi pote meij̃uran epote toimomã yne hamuat raꞌyn hoꞌopot hap koꞌi wȳwo.
Hotꞌokꞌe te asom
-
Ahiag̃ heso Ewa pe. Kat e eig̃ imaꞌat hamo.
-
Kat hag̃ tūt Atãu hawyi Ewa iꞌatumiꞌaira kaipyi.
-
Aikotā̃ hap puo pyi eig̃ watikuap Ieuwa tenentup kahato ahewowi wahoꞌopot turān hap.
ETIKUAP TERĀN POꞌOG̃ POTE
Kan iꞌaparap hap. Etikuap hamo kat e Tupana Ehay henoi miꞌi hap etiat hap.
Etimowempāp o kat e ahiag̃ Eteĩ tote Ieuwa etiat hap.
Kat pote asom hoꞌopot hap Tupana timomã ite. (A Sentinela, 1.º de janeiro de 2014)
Etikuap hamo wentup apoꞌe hap wesat hap etiat.
Etikuap hamo ihaig̃nia hoꞌopot kahato tohire pyi te hap. Kan miꞌi hap imūꞌe.
