Mīt emikyꞌe kahato rakat ikuꞌuro pote niatpo kahato miꞌi pote erewanentup hawe aikotā̃ neꞌi kesom mīt ikuꞌuro hawyi ere. Karāmpeꞌi raꞌyn aru arehaꞌat hewowi ere. Mesūwat wemūꞌe hap puo pyi iꞌewȳte wemūꞌe hap 30 puo pyi watikuap hamo Tupana Ehay piat iwesat hap koꞌi aimoesaika kahato hamo.

1. Aikotā̃ asom mīt ikuꞌuro hawyi.

Iesui henoi ikuꞌuro rakaria aikotā̃ teꞌeroket hap ewy neꞌi e. Karāmpe mīt toket pya kahato hawyi ȳt toikuapꞌi poꞌog̃ aikotā̃ hap koꞌi. Maꞌato aikotā̃ me asom ikuꞌuro rakat g̃et hap ewy. Karāmpe mīt ikuꞌuro hawyi ȳt kat kuapꞌi poꞌog̃ tutunug̃ iꞌewȳte hatyꞌi poꞌog̃ hete neig̃ tohoꞌopot poꞌog̃. Tupana Ehay henoi ikuꞌuro rakaria ȳt ikuap sēse raꞌyn e. — Etimowempāp o Ekeresiasi 9:5.

2. Kat hamo asom aipowȳro watikuap pȳwuat e hap ikuꞌuro rakaria etiat hawyi.

Mītꞌīn teꞌerokenꞌẽ kahato taꞌatukuꞌuro hap pupi iꞌewȳte teꞌerokenꞌẽ kahato ikuꞌuro rakaria pupi. Maꞌato Tupana Ehay henoi ikuꞌuro rakaria etiat. Miꞌi hap watikuap hawyi watokenꞌẽꞌi poꞌog̃. Iesui toꞌe — Eweikuap taꞌyn pȳwuat sēse miꞌi hawyi eipyhik hawyi eiwenoꞌẽ kuap haria ewy raꞌyn e. (Iuwãu 8:32) Iraniaꞌīn religião henoi aikuꞌuro hawyi ti aipaꞌãu ihaig̃te te iꞌatuꞌe. Maꞌato Tupana Ehay henoi ȳt miotā̃ eꞌi. Mīt ikuꞌuro hawyi ipaꞌãu ikuꞌuro raꞌyn wy. Miꞌi pote mīt ikuꞌuro hawyi ȳt tohoꞌopotꞌi poꞌog̃ neig̃ aimosoꞌopot kuap. Iꞌewȳte ȳt kat kuapꞌi poꞌog̃ watunug̃ kuap iꞌatuꞌupi watiꞌatumontypot hawyi watiꞌatumowepīt hamo. Iꞌewȳte neig̃ wahentup kuap iꞌatuꞌupi.

Iraniaꞌīn teꞌeroꞌe ikuꞌuro rakaria wȳwo ahehay kuap neꞌi iꞌatuꞌe. Maꞌato aikotā̃ me kuapꞌi ahehay ikuꞌuro rakaria wȳwo. Aikotā̃ mesūwat wemūꞌe hap puo pyi watikuap taꞌyn ikuꞌuro rakaria ȳt ikuapꞌi sēse raꞌyn hap. Maꞌato ahiag̃ koꞌi iꞌatuehay mītꞌīn wȳwo. Miꞌi pote mītꞌīn teꞌeruwanentup hawe uiwyꞌok ikuꞌuro rakat wȳwo sio uhehay iꞌatuꞌe. Maꞌato ȳt pykaiꞌi. Miꞌi pote watikuap pȳwuat e hap ikuꞌuro rakaria etiat hawyi watuwekawiano kuap ahiag̃niaria pupi. Miꞌi pote Ieuwa ainãpin ȳt nakuꞌi ehehay ikuꞌuro rakaria wȳwo e. Katupono toikuap iꞌatuwȳwuat ahehay hap ipoityꞌi kahato iꞌewȳte toikuap ahiag̃niaria neꞌi hap. — Etimowempāp o Teturonamia 18:10-12.

3. Tupana Ehay henoi pȳwuat e hap ikuꞌuro rakaria etiat

Mesūwat yi oktān mītꞌīn wanentup hap koꞌi tuweupi aikotā̃ mīt ikuꞌuro hawyi hap etiat hap. Maꞌato ȳt torāniaꞌi iꞌatuwanentup hap koꞌi pȳwo pe.

• Aj̃umpe eweig̃neꞌen hap tote kat iꞌatuꞌe teꞌeruwanentup mīt ikuꞌuro hawyi hap etiat.

 4. Watikuap pȳwuat e hap ikuꞌuro rakaria etiat hap aipowȳro

Watikuap pȳwuat e hap ikuꞌuro rakaria etiat hawyi ȳt watokenꞌẽꞌi poꞌog̃ ikuꞌuro rakaria pupi. Eweimowempāp o Ekeresiasi 9:10. Miꞌi hawyi eiwoꞌoꞌehay o apoꞌe hap etiat.

• Ikuꞌuro rakaria asom aimokenꞌẽ hawyi aimosoꞌopot kuap asom.

Karāmpe pȳwuat e hap watikuap Tupana Ehay piat hawyi ȳt watomoheyꞌi poꞌog̃ mītꞌīn mienoi waku ikuꞌuro rakaria kape ewetunug̃ kat koꞌi kat koꞌi imowepīt hamo imontypot hamo e hap ete. Eweimowempāp o Isaia 8:19 hawyi Iesui Aru E Hap 4:11. Miꞌi hawyi eiwoꞌoꞌehay o apoꞌe hap etiat.

• Ewanentup hawe aikotā̃ asom Ieuwa topyhuꞌat karāmpe tehaꞌat mīt timontypot ikuꞌuro rakaria iꞌewȳte taꞌatuhentup mowȳro hap ikuꞌuro rakaria kape pote.

5. Watikuap pȳwuat e hap koꞌi ikuꞌuro rakaria etiat hawyi aimowepīt

Mītꞌīn taꞌatuhoꞌomūꞌe mīt ikuꞌuro hawyi ti tominug̃ saꞌag̃ koꞌi upi tohoꞌopot re hamuat iꞌatuꞌe. Maꞌato Tupana Ehay aimūꞌe ȳt uweꞌi hamo hoꞌopot tokuꞌuro hawyi hap. Saꞌag̃ nug̃ haria pykai taꞌatuminug̃ saꞌag̃ koꞌi upi ȳt taꞌatuhoꞌopotꞌi hamo. Pȳwuat e hap watikuap hawyi ahepe te waku kahato. Tupana Ehay henoi Mīt ikuꞌuro hawyi iminug̃ saꞌag̃ koꞌi Tupana tiwāure raꞌyn e. (Humanu 6:7, TNM) Korā̃ eiwoꞌoꞌehay o apoꞌe hap etiat.

• Mesūwat puo pyi Tupana Ehay henoi karāmpe mīt ikuꞌuro hawyi toiwāure raꞌyn iminug̃ saꞌag̃ e hap etiat. Tupana pe karāmpe mīt ikuꞌuro hawyi mīt hoꞌoknug̃ naꞌyn tomiꞌaparap koꞌi upi miꞌi pote Tupana tiꞌaporok sēse raꞌyn imiꞌaparap koꞌi. Pyno ewanentup hawe ikuꞌuro rakat hoꞌopot re hamuat asom saꞌawyꞌi wuat tominug̃ saꞌag̃ koꞌi upi.

Karāmpe watikuap poꞌog̃ Ieuwa ewaku hap koꞌi etiat hawyi watikuap poꞌog̃ ȳt karāmpeꞌi tohoꞌomosoꞌopot ikuꞌuro rakaria hap. Eweimowempāp o Teturonamia 32:4 hawyi 1 Iuwãu 4:8. Miꞌi hawyi apoꞌe hap koꞌi ete eiwoꞌoꞌehay.

• Aimimowempāp koꞌi henoi Ieuwa hampȳk kahato rakat iꞌewȳte woꞌopotkyꞌe kahato rakat e. Pyno ewanentup hawe toiꞌatumosoꞌopot hamuat asom ikuꞌuro rakaria asom.

• Karāmpe etikuap pȳwuat e hap ikuꞌuro rakaria etiat hawyi ewepīt. Kat pote.

 WATUWEMŪꞌE RAꞌYN

Karāmpe mīt ikuꞌuro hawyi ȳt kat kuapꞌi poꞌog̃ tutunug̃. Ikuꞌuro rakaria ȳt hoꞌopotꞌi iꞌewȳte neig̃ taꞌatuhoꞌomosoꞌopot kuap ihaig̃te rakaria mītꞌīn.

Hotꞌokꞌe te asom

• Aikotā̃ asom mīt ikuꞌuro hawyi.

• Watikuap pȳwuat e hap ikuꞌuro rakaria etiat hawyi aikotā̃ me asom miꞌi hap aipowȳro kuap.

• Kat pote etikuap pȳwuat e hap ikuꞌuro rakaria etiat hawyi emowepīt.