WEMŪꞌE HAP 41
Kat e Tupana Ehay henoi sewaire hap etiat.
Iraniaꞌīn teꞌeremunti kahato taꞌatuhenoi sewaire hap etiat hamo. Maꞌato Tupana Ehay henoi woꞌomontypot hap wȳwo sewaire hap etiat. Tohenoi aipowȳro hamo kat pote Tupana Ehay tūt Ainug̃ Hat Ieuwa kaipyi. Miꞌi pote toikuap kahato ahepiat poꞌog̃ waku rakat hap. Tohenoi kat waku watunug̃ watimowepīt hamo hap iꞌewȳte tohenoi wy kat aipowȳro kuap aiwepīt wuatꞌi eꞌāt piat hamo hap etiat.
1. Kat e asom Ieuwa henoi sewaire hap etiat.
Sewaire hap Ieuwa mij̃um. Toikyꞌesat sewaire nug̃ hap ihaig̃nia hawyi haryporia piat toꞌomenaru hawyi hap. Toꞌoewaire hap puo pyi iꞌatumempytꞌīn kuap iꞌewȳte toꞌoewaire hap puo pyi taꞌatumoherep toꞌokyꞌe hap hawyi toꞌomowepīt kuap. Tupana Ehay toꞌe — Eiwoꞌomowepīt eharyꞌi wȳwo epakup te turān wuat eiwoꞌokyꞌe hap wȳwo. (Porowepiu 5:18, 19) Ieuwa tikyꞌesatꞌi woꞌomenaru hat hewaire iraniaꞌīn wȳwo hap. Miꞌi pote Iesui mohey sēse hat woꞌomenaru hat karāmpe hamoꞌi hewaire iraniaꞌīn wȳwo hamo. — Etimowempāp o Epereu 13:4.
2. Aikotā̃ rakat sewaire saꞌag̃ hap koꞌi asom Ieuwa tikyꞌesatꞌi.
Tupana Ehay toꞌe wuatꞌi ihaig̃nia wȳwuat wuatꞌi haryporia wȳwuat wuatꞌi wȳwuat sewaire nug̃ hat ȳt uweꞌi aru toig̃neꞌen aikope Tupana toig̃neꞌen Morekuat nuat hap tote e. (1 Kurintiu 6:9, 10) Kereku pusu puo sewaire saꞌag̃ koꞌi hap porneía e. Miowat sehay kotā̃ e hawiat pe (1) mīt temenaru pykaiꞌi sewaire nug̃ hap a (2) haryporia toꞌope iꞌewȳte ihaig̃nia toꞌope tukupteꞌen hap (3) sewaire nug̃ hũria koꞌi wȳwo hap. Karāmpe meig̃muewuat sewaire saꞌag̃ hap koꞌi ȳt watunug̃ꞌi pote watimowepīt kahato Ieuwa iꞌewȳte ahepe te hamo waku wy. — 1 Tesaronika 4:3.
EREWANENTUP O ETIKUAP POꞌOG̃ HAMO
Etikuap hamo aikotā̃ me pya kuap ereig̃neꞌen erekawiano sewaire saꞌag̃ hap pupi hamo hap. Iꞌewȳte etikuap hamo etimontypot Ieuwa woꞌonãpin sewaire etiat hap pote epe te hamo waku.
3. Pya o ereig̃neꞌen erekawiano sewaire saꞌag̃ hap pupi hamo
Tupana Ehay henoi Iuse etiat. Haryporia tunug̃ terān iwȳwo sewaire hap miꞌi pote ȳt e haryporia pe. Eweimowempāp o Ienesi 39:1-12. Miꞌi hawyi apoꞌe hap koꞌi ete eiwoꞌoꞌehay.
-
Kat pote asom Iuse tunug̃ terānꞌi sewaire hap. — Ewetehaꞌat pyno hag̃a hit 9 kape.
-
Ewanentup hawe Iuse tiꞌaira asom waku rakat. Kat pote miotā̃ ere.
Aikotā̃ me asom kurum iwasuria hawyi makuptiaria tunug̃ kuap aikotā̃ Iuse ewy teꞌeruwekawiano sewaire saꞌag̃ nug̃ hap kai pya tukupteꞌen hamo. Ewetehaꞌat pyno VÍDEO kape.
Ieuwa ȳt tikyꞌesatꞌi watum aipīt sewaire saꞌag̃ nug̃ hap upi hamo neꞌi. Eweimowempāp o 1 Kurintiu 6:18. Miꞌi hawyi apoꞌe hap koꞌi ete eiwoꞌoꞌehay.
-
Kat hap koꞌi asom mīt tunug̃ pote hewaire terān hamo hawyi miꞌitā̃ kuap hap putꞌokꞌe hawyi tutunug̃ hamuat raꞌyn sewaire saꞌag̃ nug̃ hap.
-
Aikotā̃ me asom erekawiano kuap sewaire saꞌag̃ nug̃ hap kai pya ereig̃neꞌen hamo.
4. Etiꞌakit kuap haꞌag̃ hap koꞌi sewaire saꞌag̃ hap etiat
Kat pote asom asuwe niatpo kahato watiꞌakit haꞌag̃ hap koꞌi sewaire saꞌag̃ hap etiat hamo. Ewetehaꞌat pyno VÍDEO kape. Miꞌi hawyi eiwoꞌoꞌehay o apoꞌe hap etiat.
-
Vídeo piat aiwy tikuap tuwanentup hap koꞌi puo pyi iꞌewȳte tominug̃ koꞌi puo pyi porapꞌi toimaꞌat teharyꞌi hap. Miꞌi hap toikuap hawyi kat asom tutunug̃.
Asuwe Ieuwa montypot haria teꞌeruwanentup terān pykaiꞌi teꞌeruwanentup saꞌag̃ kuap sewaire saꞌag̃ hap koꞌi kape. Miꞌi pote taꞌatuwanentup hap ywyk hamo niatpo. Kat hap koꞌi asom epowȳro kuap ȳt erenentupꞌi aat kaꞌap sewaire saꞌag̃ koꞌi hap kape hamo. Eweimowempāp o Wiripu 4:8. Miꞌi hawyi apoꞌe hap koꞌi ete eiwoꞌoꞌehay.
-
Aikotā̃ rakat koꞌi kape asom waku watuwanentup aat kaꞌap.
-
Aikotā̃ etipuenti. Watimowempāp tuereto Tupana Ehay pote iꞌewȳte aipotpap kahato Ieuwa montypot hap ete pote. Miꞌi hap koꞌi asom aipowȳro kuap watiꞌakit haꞌag̃ hap koꞌi hamo. Kat pote miotā̃ ere.
5. Watimontypot Ieuwa woꞌonãpin hap koꞌi pote ahepe te waku hamo
Ieuwa tikuap kat poꞌog̃ ahepiat waku rakat. Miꞌi pote tehay puo pyi ainãpin aikotā̃ aikotā̃ watoig̃neꞌen kuap pya sewaire saꞌag̃ koꞌi hap kai hamo iweꞌeg̃ nakaria wo watoig̃neꞌen hamo iꞌewȳte aimūꞌe wy watunug̃ iwoꞌonãpin hap koꞌi ewy pote waku kahato ahepe te hamo hap. Eweimowempāp o Porowepiu 7:7-27 kape sio ewetehaꞌat pyno VÍDEO kape. Miꞌi hawyi apoꞌe hap koꞌi ete eiwoꞌoꞌehay.
-
Kat hap koꞌi asom mekewat kurum iwasu tunug̃ toto tohaꞌag̃ hap kape hamo. — Ewetehaꞌat pakupꞌi Porowepiu 7:8 hawyi 9.
-
Porowepiu 7:23 hawyi 26 henoi sewaire waire saꞌag̃ hap aimosoꞌopot poityꞌi kahato kuap. Ȳt watuwekawianoꞌi sewaire saꞌag̃ koꞌi hap kai pote aikotā̃ niatpo hap koꞌi asom putꞌokꞌe hamo.
-
Watimontypot Ieuwa woꞌonãpin sewaire hap etiat pote aikotā̃ me asom miꞌi hap aipowȳro watukupteꞌen wuatꞌi eꞌāt pe hamo.
Tehay puo pyi Ieuwa toꞌe ȳt nakuꞌi ihaig̃niaꞌīn toꞌope haryporiaꞌīn toꞌope tukupteꞌen e. Miꞌi pote miꞌi woꞌonãpin hap puo pyi Tupana timoherep ȳt aikyꞌeꞌi hap iꞌatuꞌe iraniaꞌīn. Maꞌato Ieuwa woꞌopotkyꞌe kahato rakat pykai. Toikyꞌesat torānia watukupteꞌen wuatꞌi eꞌāt pe aiwepīt hap wȳwo hamuat hap. Miꞌi hamo waku watunug̃ yne iꞌe hap ewy. Eweimowempāp o 1 Kurintiu 6:9-11. Miꞌi hawyi eiwoꞌoꞌehay o apoꞌe hap etiat.
-
Mesūwat puo pyi Tupana pe ihaig̃niaꞌīn toꞌope haryporia toꞌope tukupteꞌen hap yn asom iꞌaparap hap sio Tupana Ehay pe toig̃ iraniaꞌīn iꞌaparap hap koꞌi ȳt nakuꞌi watunug̃.
Ieuwa mowepīt hamo waku torānia teꞌeruwekoꞌywyk maꞌato waku hamo asom watekoꞌywyk hap. Eweimowempāp o Saumu 19:8, 11. Miꞌi hawyi eiwoꞌoꞌehay o apoꞌe hap etiat.
-
Ewanentup hawe Ieuwa woꞌonãpin hap koꞌi sewaire hap etiat niatpo asom watimontypot hamo. Kat pote miotā̃ ere.
Ieuwa tiꞌatupowȳro kahato raꞌyn mītꞌīn taꞌatumontypot iwoꞌonãpin hap koꞌi sewaire hap etiat hamo. Miꞌi epowȳro kuap hamo wy.
IRANIAꞌĪN TEꞌEROꞌE Typy ok toꞌokyꞌe pote waku neꞌi toꞌopytyk iꞌatuꞌe.
-
Kat ere aten etiꞌatuwesat.
WATUWEMŪꞌE RAꞌYN
Sewaire hap Ieuwa mij̃um. Toikyꞌesat sewaire nug̃ hap ihaig̃nia hawyi haryporia piat toꞌomenaru hawyi hap.
Hotꞌokꞌe te asom
-
Aikotā̃ rakat sewaire saꞌag̃ hap koꞌi asom Ieuwa ȳt tikyꞌesatꞌi.
-
Kat hap koꞌi asom aipowȳro hamo pya watoig̃neꞌen sewaire saꞌag̃ pupi watuwekawiano hamo.
-
Kat pote asom watimontypot Ieuwa woꞌonãpin sewaire hap etiat pote ahepe te hamo waku.
ETIKUAP TERĀN POꞌOG̃ POTE
Etikuap hamo kat pote Tupana tikyꞌesat ihaig̃nia haryporia wȳwo teꞌeremenaru sēse hap.
Ȳt nakuꞌi ihaig̃niaꞌīn toꞌope haryporiaꞌīn toꞌope tukupteꞌen hap e Tupana Ehay. Miꞌitā̃ pykai maꞌato etiꞌatuweukaꞌi o miꞌitā̃ saꞌag̃ nug̃ haria ȳt eꞌi Tupana Ehay.
Iꞌaparap hap asom ihaig̃niaꞌīn toꞌope haryporiaꞌīn toꞌope tukupteꞌen hap. (Site jw.org piat)
Etikuap hamo kat pote Tupana woꞌonãpin hap koꞌi sewaire hap etiat aikawiano kahato kuap.
Sewaire towẽ puo hap asom sewaire sēse hap ewy. (Site jw.org piat)
Saꞌawyꞌi te ihaig̃nia toꞌope toig̃neꞌen iraniaꞌīn ihaig̃niaꞌīn wȳwo maꞌato tekoꞌywyk Tupana mikyꞌesat nug̃ hamo. Etikuap poꞌog̃ hamo etimowempāp Taꞌatumoherep kahato uimontypot hap e hap.
a Miwan hit. Tapyꞌyiaria teꞌeruwemunti taꞌatuhenoi sewaire hap etiat hamo maꞌato mesūwat popera puo pyi uruhenoi hamo sewaire hap etiat aikotā̃ Ieuwa ainãpin hap ewy tehay puo pyi hap. Miꞌi pote uruhenoi terān kat e terān poꞌog̃ sehay porneía e hap. Kotā̃ e hawiat pe. Sewaire towẽ puo hap toꞌokpy puo hap iꞌewȳte haryporia temaꞌat ihaig̃nia ahit ete sio ihaig̃nia temaꞌat haryporia esiꞌa ete toꞌoewaire nug̃ terān haype hap.
