WEMŪꞌE HAP 42
Kat e asom Tupana Ehay henoi woꞌomenaru haria etiat iꞌewȳte woꞌomenaru ite haria etiat.
Iraniaꞌīn teꞌeruwanentup hawe mīt iwepīt sēse hamo temenaru pote yn iꞌatuꞌe maꞌato ȳt pȳwo peꞌi miotā̃ iꞌatuꞌe kat pote ȳt torāniaꞌi woꞌomenaru haria iꞌatuwepīt iꞌewȳte torāniaꞌi iꞌatuꞌarōt woꞌomenaru ite rakaria. Pȳwo. Tupana Ehay henoi woꞌomenaru haria iꞌewȳte woꞌomenaru ite rakaria Ieuwa mipoitȳro koꞌi wo tukupteꞌen kuap.
1. Kat waku rakat koꞌi asom watunug̃ poꞌog̃ kuap watemenaru ite turān.
Tupana Ehay toꞌe — Waku aheharyꞌi aheꞌaito. Maꞌato ȳt katꞌi aheꞌaito pote ȳt katꞌi aheharyꞌi pote poꞌog̃ waku e. (Etimowempāp o 1 Kurintiu 7:32, 33, 38.) Maꞌato kat pote asom katꞌi aheꞌaito pote katꞌi aheharyꞌi pote poꞌog̃ waku e. Kat pote woꞌomenaru ite rakaria iꞌatupohepap poꞌog̃ iꞌewȳte kat kat neꞌi taꞌatunug̃ poꞌog̃ kuap. Iꞌatupotpap poꞌog̃ kuap Tupana Ehay enoi hap ete iꞌewȳte iꞌatuewyry kuap irania ywania koꞌi kape Tupana Ehay sytpok hamo iꞌewȳte iꞌatupohepap poꞌog̃ pote iꞌatuehay poꞌog̃ kuap Ieuwa wȳwo.
2. Kat pote asom waku ihaig̃nia haryporia teꞌeremenaru sēse.
Woꞌomenaru haria iꞌewȳte woꞌomenaru ite haria taꞌatunug̃ kuap kat koꞌi kat koꞌi waku rakat koꞌi iꞌatuwepīt hamo. Tupana Ehay toꞌe waku poꞌog̃ typy ok ipotpap wentup ok ipotpap hap kai e. (Ekeresiasi 4:9) Pȳwo. Karāmpe woꞌomenaru haria taꞌatumontypot Tupana Ehay piat woꞌonãpin hap koꞌi pote waku poꞌog̃ tukupteꞌen toꞌope iꞌewȳte iꞌatuwepīt sēse hamo. Karāmpe teꞌeremenaru sēse cartório pe pote toꞌoꞌehay watoꞌokyꞌe watoꞌomontypot watoꞌoꞌeropat hamo wuatꞌi eꞌāt pe iꞌatuꞌe toꞌope. Miꞌi pote toꞌomohey poꞌog̃ maꞌato karāmpe ihaig̃nia haryporia ȳt teꞌeremenaru sēseꞌi cartório pe pote ȳt toꞌomohey kahatoꞌi hawyi niatpoꞌi toꞌoꞌatoiat hamo. Mempytꞌīn tipuenti waku kahato karāmpe taꞌatuꞌȳwot taꞌatuty toꞌomohey sēse pote hawyi taꞌatumohey poꞌog̃ iꞌewȳte iꞌatuwepīt poꞌog̃ hamo wy.
3. Kat eig̃ Ieuwa woꞌomenaru hap etiat.
Ieuwa tunug̃ woꞌomenaru hap. Miꞌi pote karāmpe saꞌawyꞌi wuat ihaig̃nia hawyi saꞌawyꞌi wuat haryporia teꞌeremenaru raꞌyn hawyi Ieuwa tinãpin waku ihaig̃nia toiat toꞌȳwot toty hawyi toig̃neꞌen teharyꞌi wȳwo e. (Ienesi 2:24) Ieuwa tikyꞌesat seꞌaito seharyꞌi toꞌokyꞌe sēse hap iꞌewȳte toꞌowȳwo tukupteꞌen taꞌatukuꞌuro kape hap. Maꞌato Ieuwa pe toꞌoꞌatoiat sēse kuap seꞌaito seharyꞌi tunug̃ sewaire hap iraniaꞌīn wȳwo pote yn. (Mateu 19:9) Miꞌitā̃ pote seharyꞌi seꞌaito tiꞌaira kuap toꞌoꞌatoiat hap sio toꞌowȳwo te tukupteꞌen hap. Toꞌoꞌatoiat pote temenaru kuap iraniaꞌīn wȳwo iraꞌyn. a Ieuwa tikyꞌesatꞌi ihaig̃nia typy ok iharyꞌi hap iꞌewȳte haryporia typy ok heꞌaito hap. Maꞌato toikyꞌesat teꞌeremenaru wentup ok mīt wȳwo yn hap. — 1 Timoteu 3:2.
EREWANENTUP O ETIKUAP POꞌOG̃ HAMO
Etikuap hamo aikotā̃ me woꞌomenaru haria hawyi woꞌomenaru ite haria iꞌatuwepīt kuap iꞌewȳte aikotā̃ me taꞌatumowepīt kuap Ieuwa hap.
4. Kat waku rakat koꞌi ȳt woꞌomenaruꞌi haria tunug̃ kuap iꞌatuwepīt hamo.
Iesui ihay sē kahato ȳt woꞌomenaruꞌi haria etiat. (Mateu 19:11, 12) Eweimowempāp o Mateu 4:23. Miꞌi hawyi eiwoꞌoꞌehay o apoꞌe hap etiat.
-
Karāmpeꞌi Iesui temenaru miꞌi pote ipotpap poꞌog̃ kuap toꞌȳwot montypot hap ete. Miꞌi pote kat koꞌi asom Iesui tunug̃ mesūwat yi tote toig̃neꞌen turān toꞌȳwot montypot hamo iꞌewȳte iraniaꞌīn powȳro hamo.
Ȳt woꞌomenaru ite haria iꞌatuwepīt kuap taꞌatunug̃ kuap aikotā̃ Iesui ewy pote. Ewetehaꞌat pyno VÍDEO kape. Miꞌi hawyi eiwoꞌoꞌehay o apoꞌe hap etiat.
-
Kat koꞌi asom iharyꞌi ite rakat heꞌaitoꞌi rakat tunug̃ kuap Ieuwa montypot hamo iꞌewȳte iraniaꞌīn powȳro hamo.
Etikuap taꞌyn apo.
Tupana Ehay ȳt henoiꞌi mirānia anu ereig̃neꞌen turān eremenaru kuap hap. Maꞌato ainãpin waku poꞌog̃ wahekatup karāmpe nag̃ poꞌog̃ watoig̃neꞌen hawyi. Kat pote aipakup kahato te turān watenentup poꞌog̃ sewaire nug̃ terān hap kape. Miꞌi pote ȳt aiweꞌeg̃ hamoꞌi hawyi merep watemenaru terān hamo. — 1 Kurintiu 7:36, TNM.
5. Eweꞌeg̃ wo o etiꞌaira eꞌaito eharyꞌi turān
Ieuwa tikyꞌesat aiweꞌeg̃ kahato watiꞌaira wentup ok watemenaru hamo hap etiat. Eweimowempāp o Mateu 19:4-6, 9. Miꞌi hawyi eiwoꞌoꞌehay o apoꞌe hap etiat.
-
Kat pote asom ȳt nakuꞌi Iesui mohey hat merep tiꞌaira wentup ok temenaru hamo.
Tupana Ehay henoi kat waku rakat koꞌi waku seꞌaito seharyꞌi wat toig̃ hap. Maꞌato poꞌog̃ waku torānia kai Ieuwa kyꞌe kahato hat. b Miꞌi hap koꞌi epowȳro kuap etiꞌaira eꞌaito sio eharyꞌi Ieuwa mikyꞌesat ewy hamo. Eweimowempāp o 1 Kurintiu 7:39 hawyi 2 Kurintiu 6:14, 15. Miꞌi hawyi apoꞌe hap koꞌi ete eiwoꞌoꞌehay.
-
Kat pote asom waku watemenaru Ieuwa montypot hat wȳwo yn.
-
Erewanentup hawe aikotā̃ asom Ieuwa topyhuꞌat watemenaru wentup ok Ieuwa kyꞌeꞌi hat wȳwo pote.
Typy ok hũria teꞌeruweupi rakaria taꞌatuereto ipotyi kahato rakat. Miꞌi pote typy ok hoꞌopot hamo. Miꞌi hap ewy Iesui mohey hat temenaru Ieuwa montypot hat wȳwoꞌi pote typy ok hoꞌopot hamo.
6. Aikotā̃ Ieuwa wanentup woꞌomenaru etiat hap ewy waku en wy
Nimo Isareu ywaniaria e tempu turān iraniaꞌīn Tupana mohey haria pykai taꞌatuꞌatoiat neꞌi taꞌatueharyꞌi sēse ȳt katꞌi taꞌatunug̃ saꞌag̃ pykai. Teꞌerenentup teꞌeruwewowi yn pote. Eweimowempāp o Marakia 2:13, 14, 16. Miꞌi hawyi eiwoꞌoꞌehay o apoꞌe hap etiat.
-
Tupana Ehay henoi woꞌomenaru haria toꞌoꞌatoiat kuap taꞌatunug̃ sewaire hap iraniaꞌīn wȳwo pote yn e. Maꞌato iraniaꞌīn toꞌokyꞌesatꞌi poꞌog̃ hawyi katꞌi taꞌatunug̃ saꞌag̃ pykai toꞌoꞌatoiat terān neꞌi. Miꞌi hap ete Tupana tuweukaꞌi kahato. Kat pote asom.
Seꞌaito hewaire iraniaꞌīn wȳwo pote hawyi teharyꞌi atoiat pote haty kahato iharyꞌi ete iꞌewȳte tomempyt ete. Taꞌatuhoꞌopot hamo. Miꞌi hap ewy meketā̃ saꞌag̃ seharyꞌi tunug̃ pote wy.
Ewetehaꞌat pyno VÍDEO kape. Miꞌi hawyi eiwoꞌoꞌehay o apoꞌe hap etiat.
-
Eꞌaito sio eharyꞌi Ieuwa montypot hatꞌi pote kat koꞌi asom waku etunug̃ eiwepīt poꞌog̃ hamo.
7. Etimontypot o Ieuwa woꞌomenaru hap etiat
Iraniaꞌīn pe niatpo kahato taꞌatumontypot Ieuwa woꞌonãpin woꞌomenaru hap etiat hamo. c Maꞌato Ieuwa tiꞌatupoitȳro kahato towoꞌonãpin hap montypot haria. Ewetehaꞌat pyno VÍDEO kape.
Eweimowempāp o Epereu 13:4. Miꞌi hawyi eiwoꞌoꞌehay o apoꞌe hap etiat.
-
Erewanentup hawe niatpo pykai maꞌato watimontypot kuap asom Ieuwa woꞌonãpin hap woꞌomenaru hap etiat hamo. Kat pote miotā̃ ere.
Irania ywania koꞌi tote morekuaria tiꞌatupoꞌoro mītꞌīn teꞌeremenaru sēse cartório pe teꞌereset wan popera hamo iꞌewȳte toꞌoꞌatoiat pote morekuaria tiꞌatupoꞌoro cartório kape mekewat toꞌomenaru hap popera aporok hamo raꞌyn. Meig̃muewuat morekuaria piat woꞌonãpin hap koꞌi Ieuwa tikyꞌesat watimontypot hap. Eweimowempāp o 1 Peteru 2:13. Miꞌi hawyi eiwoꞌoꞌehay o apoꞌe hap etiat.
-
Eꞌaito raꞌyn sio eharyꞌi raꞌyn pote ereto raꞌyn asom cartório kape ereset wan popera ete hamo aikotā̃ morekuaria piat woꞌonãpin woꞌomenaru hap etiat nug̃ hamo.
IRANIAꞌĪN APOꞌIꞌATUꞌE POTE Kat hamo watemenaru cartório pe. Ȳt kat hamoꞌi kat pote miꞌi hap isag̃poria eko ȳt aheko sēse ewyꞌi iꞌatuꞌe.
-
Kat ere aten etiꞌatuwesat.
WATUWEMŪꞌE RAꞌYN
Woꞌomenaru haria sio woꞌomenaru ite haria Ieuwa mipoitȳro koꞌi wo tukupteꞌen kuap. Torānia iꞌatuwepīt sēse kuap taꞌatunug̃ Ieuwa mikyꞌesat koꞌi pote.
Hotꞌokꞌe te asom
-
Kat hap koꞌi asom ȳt woꞌomenaruꞌi hat tunug̃ kuap towepīt sēse hamo.
-
Kat pote asom Tupana Ehay henoi waku watemenaru Ieuwa montypot hat wȳwo yn e.
-
Ieuwa pe kat upi yn woꞌomenaru haria toꞌoꞌatoiat sēse kuap.
ETIKUAP TERĀN POꞌOG̃ POTE
Tupana Ehay ainãpin waku Iesui mohey hat yn etāt eharyꞌi eꞌaito wo hamo e. Kat e terān haype asom miotā̃ e.
Mowempāp haria apoꞌiꞌatuꞌe hap (A Sentinela, 1.º de julho de 2004)
Erehaꞌat o typy vídeo koꞌi kape epowȳro kahato eweꞌeg̃ hamo erehik terān sio eremenaru terān pote.
Wentup Ieuwa montypot hat tipuenti waku poꞌog̃ tepiat Ieuwa mij̃um koꞌi tomiꞌatoiat koꞌi kai. Kat pote asom.
Arenentup uhenamorada tikuap hamo pȳwuat e hap koꞌi Ieuwa etiat sio are (1:56)
Karāmpe seꞌaito seharyꞌi toꞌoꞌatoiat terān pote sio teꞌeruwat terān cartório kape mekewat toꞌomenaru hap popera aporok hamo pote kat koꞌi kapeig̃ waku teꞌeruwanentup.
Etimontypot o Tupana mipehik woꞌomenaru hap (A Sentinela, dezembro de 2018)
a Miwan hit. Karāmpe asom seꞌaito seharyꞌi toꞌoꞌatoiat kuap maꞌato ȳt taꞌatuewaireꞌi iraniaꞌīn wȳwo pykai. Miꞌi hap etiat erehaꞌat o Etikuap poꞌog̃ hamo e hap 4 kape.
b Miwan hit. Asuwe iraniaꞌīn ywania koꞌi pe ny ȳwot tiꞌaira kuap uwe uwe taꞌatumempyt eꞌaito wo sio taꞌatumempyt eharyꞌi wo hamo hap taꞌatueko ewy. Miꞌitā̃ pote waku iꞌatuweꞌeg̃ kahato waku taꞌatuꞌaira wentup ok Ieuwa kyꞌe kahato hat. Ȳt nakuꞌi teꞌerehaꞌat sese neꞌi hedinheiro koꞌi kape yn sio hekareꞌen koꞌi kape yn.
c Miwan hit. Eꞌaito raꞌyn sio eharyꞌi raꞌyn pote maꞌato ȳt ewetemenaru sēseꞌi cartório pe pote etiꞌaira kuap eiwoꞌoꞌatoiat hamo hap sio ewetemenaru sēse cartório pe hamo hap maꞌato ȳt uweꞌi iꞌaira kuap eheupi.
